Skanda Purana · Chapter 4.75

// agastya uvāca // //
śrutvoṃkārakathāmetāṃ mahāpātakanāśinīm //
na tṛptosmi viśākhātha brūhi traiviṣṭapīṃ kathām

kathaṃ ca kathitā devyai devadevena ṣaṇmukha //
āvirbhūtirmahābuddhe puṇyā trailocanī parā

skaṃda uvāca // //
ākarṇaya mune vacmi kathāṃ śramanivāriṇīm //
yathā devena kathitāṃ triviṣṭapasamudbhavām

virajākhyaṃ hi tatpīṭhaṃ tatra liṃgaṃ triviṣṭapam //
tatpīṭhadarśanādeva virajā jāyate naraḥ

tisrastu saṃgatāstatra srotasvinyo ghaṭodbhava //
tisraḥ kalmaṣahāriṇyo dakṣiṇe hi trilocanāt

srotomūrtidharāḥ sākṣālliṃgasnapanahetave //
sarasvatyatha kāliṃdī narmadā cātiśarmadā

tisropi hi trisaṃdhyaṃ tāḥ saritaḥ kuṃbhapāṇayaḥ //
snapayaṃti mahādhāma liṃgaṃ traiviṣṭapaṃ mahat

liṃgāni paritastābhiḥ svanāmnāsthāpi tānyapi //
teṣāṃ saṃdarśanātpuṃsāṃ tāsāṃ snānaphalaṃ bhavet

sarasvatīśvaraṃ liṃgaṃ dakṣiṇena triviṣṭapāt //
sārasvataṃ padaṃ dadyāddṛṣṭaṃ spṛṣṭaṃ ca jāḍyahṛt

yamuneśaṃ pratīcyāṃ ca narairbhaktyā samarcitam //
api kilbiṣavadbhiśca yamalokanivāraṇam

/
dṛṣṭaṃ trilocanātprācyāṃ narmadeśaṃ suśarmadam //
talliṃgārcanato nṛṇāṃ garbhavāso niṣidhyate

snātvā pilipilā tīrthe triviṣṭapasamīpataḥ //
dṛṣṭvā trilocanaṃ liṃgaṃ kiṃ bhūyaḥ pariśocati

triviṣṭapasya liṃgasya smaraṇādapi mānavaḥ //
triviṣṭapa patirbhūyānnātra kāryā vicāraṇā

triviṣṭapasya draṣṭāraḥ sraṣṭāraḥ syurna saṃśayaḥ //
kṛtakṛtyāsta evātra ta evātra mahādhiyaḥ

ānaṃdakānane liṃgaṃ praṇataṃ yaistriviṣṭapam //
trilocanasya nāmāpi yaiḥ śrutaṃ śuddhabuddhibhiḥ

saptajanmārjitātpāpātte pūtā nātra saṃśayaḥ //
pṛthivyāṃ yāni liṃgāni teṣu dṛṣṭeṣu yatphalam

tatsyātriviṣṭape dṛṣṭe kāśyāṃ manye tatodhikam //
kāśyāṃ triviṣṭape dṛṣṭe dṛṣṭaṃ sarvaṃ triviṣṭapam

kṣaṇānnirdhūta pāposau na punargarbhabhāgbhaveta //
sa snātaḥ sarvatīrtheṣu sarvāvabhṛthavānsa ca

yo vai pilipilā tīrthe snātvottaravahāṃbhasi //
sarittrayaṃ mahāpuṇyaṃ yatra sākṣādvasetsadā

tatra śrāddhādikaṃ kṛtvā gayāyāṃ kiṃ kariṣyati //
snātvā pilipilā tīrthe kṛtvā vai piṃḍapātanam

dṛṣṭvā triviṣṭapaṃ liṃgaṃ koṭitīrthaphalaṃ labhet //
yadanyatrārjitaṃ pāpaṃ tatkāśī darśanādvrajet

kāśyāṃ tu yatkṛtaṃ pāpaṃ tatpaiśācapadapradam //
pramādātpātakaṃ kṛtvā śaṃbhorānaṃdakānane

dṛṣṭvā triviṣṭapaṃ liṃgaṃ tatpāpamapi hāsyati //
sarvasminnapi bhūpṛṣṭhe śreṣṭhamānaṃdakānanam

tatrāpi sarvatīrthāni tatopyoṃkārabhūmikā //
oṃkārādapi salliṃgānmokṣavartma prakāśakāt

atiśreṣṭhataraṃ liṃgaṃ śreyorūpaṃ trilocanam

tejasviṣu yathā bhānurdṛśyeṣu ca yathā śaśī //
tathā liṃgeṣu sarveṣu paraṃ liṃgaṃ trilocanam

trilocanārcakānāṃ sā padavī na davīyasī //
paraṃ nirvāṇapadmāyā mahāsaukhyaikaśevadheḥ

sakṛttrilocanārcāto yacchreyaḥ samupārjyate //
na tadā janmasaṃpūṃjya liṃgānyanyāni labhyate

kāśyāṃ trilocanaṃ liṃgaṃ yercayaṃti mahādhiyaḥ //
tercyāstribhuvanaukobhirmamaprītimabhīpsubhiḥ

kṛtvāpi sarvasaṃnyāsaṃ kṛtvā pāśupatavratam //
niyamebhyaḥ skhalitvāpi kuto bibhyati mānavāḥ

vidyamāne mahāliṃge mahāpāpaughahāriṇi//
triviṣṭape puṇyarāśau mokṣanikṣepasadmani

samabhyarcya mahāliṃgaṃ sakṛdeva trilocanam //'
mucyate kaluṣaiḥ sarvairapijanmaśatārjitaiḥ/

brahmahāpi surāpo vā steyī vā gurutalpagaḥ //
tatsaṃyogyapi vā varṣaṃ mahāpāpī prakīrtitaḥ

paradārarataścāpi parahiṃsā ratopi vā //
parāpavādaśīlopi tathā visraṃbhaghātakaḥ // ३४ /
kṛtaghnopi bhrūṇahāpi vṛṣalīpatireva vā //
mātāpitṛgurutyāgī vahnido garadopi vā

goghnaḥ strīghnopi śūdraghnaḥ kanyādūṣayitāpi ca //
krūro vā piśuno vāpi nijadharmaparāṅmukhaḥ

niṃdako nāstiko vāpi kūṭasākṣyapravādakaḥ//
abhakṣyabhakṣako vāpi tathā'vikreya vikrayī

ityādi pāpaśīlopi muktvaikaṃ śivaniṃdakama //
pāpānniṣkṛtimāpnoti natvā liṃgaṃ trilocanam

śivaniṃdārato mūḍhaḥ śivaśāstraviniṃdakaḥ //
tasya no niṣkṛtirdṛṣṭā kvāpi śāstrepi kenacit

ātmaghātī sa vijñeyaḥ sadā trailokyaghātakaḥ //
śivaniṃdāṃ vidhatte yaḥ sa nābhāṣyo'dhamādhamaḥ

śivaniṃdāratā ye ca śivabhaktajaneṣvapi//
te yāṃti narake ghore yāvaccaṃdradivākarau

śaivāḥ pūjyāḥ prayatnena kāśyā mokṣamabhīpsubhiḥ//
teṣvarciteṣvapi śivaḥ prīto bhavatyasaṃśayaḥ

sarveṣāmiha pāpānāṃ prāyaścittacikīrṣayā //
niḥśaṃkaireva vaktavyaṃ pramāṇajñairidaṃ vacaḥ

puraścaraṇakāmaścedbhītosi yadi pāpataḥ //
manyase yadi naḥ satyaṃ vākyaśāstrapramāṇataḥ

tataḥ sarvaṃ parityajya kṛtvā manasi niścayam //
ānaṃdakānanaṃ yāhi yatra viśveśvaraḥ svayam

yatra kṣetrapraviṣṭānāṃ narāṇāṃ niścitātmanām //
na bādhate'ghanicayaḥ prāpyeta ca parovṛṣaḥ

tatrādyāpi mahātīrthaṃ trisrotasyatinirmale //
puṇye pilipilānāmni trisaritparisevite

trilocanākṣivikṣepa parikṣipta mahainasi //
snātvā gṛhyoktavidhinā tarpaṇīyānpratarpya ca

dattvā deyaṃ yathāśakti vittaśāṭhyavivarjitaḥ //
dṛṣṭvā triviṣṭapaṃ liṃgaṃ samabhyarcyātibhaktitaḥ

gaṃdhādyairvividhairmālyaiḥ paṃcāmṛtapuraḥsaraiḥ //
dhūpairdīpaiḥ sanaivedyairvāsobhirbahubhūṣaṇaiḥ

pūjopakaraṇairdravyairghaṃṭādarpaṇacāmaraiḥ //
citradhvajapatākābhirnṛtyavādyasugāyanaiḥ

japaiḥ pradakṣiṇābhiśca namaskārairmudāyutaiḥ //
paricārakasaṃtoṣaiḥ kṛtveti paripūjanam

brāhmaṇānvācayetpaścānniṣpāpohamiti bruvan //
evaṃ kurvannaraḥ prājño nirenā jāyate kṣaṇāt

tataḥ paṃcanade snātvā maṇikarṇī hrade tataḥ //
tato viśveśamabhyarcya prāpnoti sukṛtaṃ mahat

prāyaścittamidaṃ proktaṃ mahāpāpaviśodhanam //
nāstike na pravaktavyaṃ kāśīmāhātmya niṃdake

dadacca dravyalobhena prāyaścittamidaṃ śubham//
dātā narakamāpnoti satyaṃsatyaṃ ghaṭodbhava

kṣamāṃ pradakṣiṇīkṛnya yatphalaṃ samyagāpyate //
pradoṣe tatphalaṃ kāśyāṃ saptakṛtvastrilocane

bhujaṃgamekhalaṃ liṃgaṃ kāśyāṃ dṛṣṭvā triviṣṭapam //
janmāṃtarepi muktaḥ syādanyatra maraṇe sati

anyatra sarvaliṃgeṣu puṇyakālo viśiṣyate //
triviṣṭape puṇyakālaḥ sadā rātridivaṃ nṛṇām

liṃgānyoṃkāramukhyāni sarvapāpaprakṛṃtyalam //
paraṃ trailocanī śaktiḥ kācidanyaiva pārvati

yataḥ sarveṣu liṃgeṣu liṃgametadanuttamam //
tatkāraṇaṃ śṛṇva parṇe karṇe kuru vadāmyaham

purā me yogayuktasya liṃgametadbhuvastalāt //
udbhidya saptapātālaṃ niragātpurato mahat

asmim̐llige purā gauri suguptaṃ tiṣṭhatā mayā //
tubhyaṃ netratrayaṃ dattaṃ niraikṣiṣṭhāstathottamam

tadā prabhṛti deveśi liṃgametattrilocanama //
viṣṭapatritayāṃtasthairgīyate jñānadṛṣṭidam

trilocanasya ye bhaktāstepi sarve trilocanāḥ //
mama pāriṣadāste tu jīvanmuktā'sta eva hi

trilocanasya liṃgasya mahimānaṃ na kaścana //
samyagvetti maheśāni mayaiva parigopitam

śuklarādhatṛtīyāyāṃ snātvā pailipile hrade //
upoṣaṇaparā bhaktyā rātrau jāgaraṇānvitāḥ

trilocanaṃ pūjayitvā prātaḥ snātvāpi tatra vai //
punarliṃgaṃ samabhyarcya dattvā dharmaghaṭānapi

sānnānsadakṣiṇāndevi pitṝnuddiśya harṣitāḥ //
vidhāya pāraṇaṃ paścācchivabhaktajanaiḥ saha

visṛjya pārthivaṃ dehaṃ tena puṇyena noditāḥ //
bhavaṃti devi niyataṃ gaṇā mama purogamāḥ

tāvaddhamaṃti saṃsāre devā martyā mahoragāḥ //
gauri yāvanna paśyaṃti kāśyāṃ liṃgaṃ trilocanam

sakṛttriviṣṭapaṃ dṛṣṭvā snātvā pailipile hrade //
na jātuḥ mātustanapo jāyate jaṃturatra hi

pratimāsaṃ sadāṣṭamyāṃ caturdaśyāṃ ca bhāmini //
āyāṃti sarvatīrthāni draṣṭuṃ devaṃ triviṣṭapam

triviṣṭapāddakṣiṇataḥ snātaḥ pailipileṃ'bhasi //
tatra saṃdhyāmupāsyaikāṃ rājasūyaphalaṃ labhet

pādodakākhyastatraiva kūpaḥ pāpavināśakaḥ //
prāśya tasyodakaṃ martyo na martyo jāyate punaḥ

tasya liṃgasya pārśve tu saṃti liṃgānyanekaśaḥ //
kaivalyadāni tānyatra darśanātsparśanādapi

tatra śāṃtanavaṃ liṃgaṃ gaṃgātīre pratiṣṭhitam //
taddṛṣṭvā śāṃtimāpnoti naraḥ saṃsāratāpitaḥ

taddakṣiṇe mahāliṃgaṃ mune bhīṣmeśa saṃjñitam //
kaliḥ kālaśca kāmaśca bādhaṃte na tadīkṣaṇāt

tatpratīcyāṃ mahāliṃgaṃ droṇeśa iti kīrtitam //
yalliṃgapūjanāddroṇo jyotīrūpaṃ punardadhau

aśvatthāmeśvaraṃ liṃgaṃ tadagre cātipuṇyadam //
yadarcanavaśāddrauṇirna bibhetyapi kālataḥ

droṇeśādvāyu digbhāge vālakhilyeśvaraṃ param //
talliṃgaṃ śraddhayā dṛṣṭvā sarvakratuphalaṃ labhet

tadvāme liṃgamālokya vālmīkeśvarasaṃjñitam //
tasya saṃdarśanādeva viśoko jāyate naraḥ

anyaccātraiva yadvṛttaṃ tadbravīmi ghaṭodbhava //
triviṣṭapasya māhātmyaṃ devyai devena bhāṣitam

//
iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍa uttarārdhe paṃcasaptatitamo'dhyāyaḥ