Skanda Purana · Chapter 4.73

agastya uvāca //
trilocanaṃ samāsādya devadevaḥ ṣaḍānanaḥ //
jagadaṃbikayāyuktaḥ kiṃ cakārāśu tadvada

// skanda uvāca // //
mune kalaśajākhyāmi yatpṛṣṭaṃ tanniśāmaya //
virajaḥsaṃjñakaṃ pīṭhaṃ yatproktaṃ sarvasiddhidam

tatpīṭhadarśanādeva virajā jāyate naraḥ //
yatrāsti tanmahāliṃgaṃ vārāṇasyāṃ trilocanam

tīrthaṃ pilipilākhyaṃ taddyunadyaṃbhasi viśrutam //
sarvatīrthamayaṃ tīrthaṃ tatkāśyāṃ parigīyate

viṣṭapatritayāṃtarye devarṣimanujoragāḥ //
sasaritparvatāraṇyāḥ saṃti te tatra yanmune

tadārabhya ca tattīrthaṃ tacca liṃgaṃ trilocanam //
triviṣṭapamiti khyātamatohetormahattaram

triviṣṭapasya liṃgasya mahimoktāḥ pinākinā //
jagajjananyāḥ purato yathā vacmi tathā mune

// devyuvāca // //
devadeva jagannātha śarva sarvada sarvaga //
sarvadṛksarvajanaka kiṃcitpṛcchāmi tadvada //

idaṃ tava priyaṃ kṣetraṃ karmabījamahauṣadham //
naiḥśreyasyāḥ śriyo gehaṃ mamāpi prītidaṃ mahat

yatkṣetrarajasopyagre trilokyapi tṛṇāyate //
tasyākhilasya mahimā viṣvakkenāvagamyate

yānīha saṃti liṃgāni tāni sarvāṇyasaṃśayam //
nirvāṇakāraṇānyeva svayaṃbhūnyapi tānyapi

yadyapyevaṃ tathāpīśa viśeṣaṃ vaktumarhasi //
kāśyāmanādisiddhāni kāni liṃgāni śaṃkara

yatra devaḥ sadā tiṣṭhetsaṃvarte'pi sa vallabhaḥ //
yairiyaṃ prathitiṃ prāptā kāśī muktipurīti ca//

yeṣāṃ smaraṇatopyatra bhavetpāpasya saṃkṣayaḥ//
darśanasparśanābhyāṃ ca syātāṃ svargāpavargakau

yeṣāṃ samarcanādeva madhye janma sakṛdvibho //
liṃgāni pūjitāni syuḥ kāśyāṃ sarvāṇi niścitam

vidhāya mayyanukrośaṃ kāruṇyāmṛtasāgara //
etadācakṣva me śaṃbho pādayoḥ praṇatāsmyaham

ityākarṇya maheśānastasyā devyāḥ subhāṣitam//
kathayāmāsa rvidhyāre mahāliṃgāni sattama

yannāmākarṇanādeva kṣīyaṃte pāparāśayaḥ //
prāpyate puṇyasaṃbhāraḥ kāśyāṃ nivārṇakāraṇam

// devadeva uvāca // //
śṛṇu devi paraṃ guhyaṃ kṣetre'sminmuktikāraṇam //
idaṃ vidaṃti naivāpi brahmanārāyaṇādayaḥ

asaṃkhyātāni liṃgāni pārvatyānaṃdakānane //
sthūlānyapi ca sūkṣmāṇi nānāratnamayāni ca

nānādhātumayānīśe dārṣadānyapyanekaśaḥ //
svayaṃbhūnyapyanekāni devarṣisthāpitānyaho

siddhacāraṇagaṃdharva yakṣarakṣorcitānyapi //
asuroragamartyaiśca dānavairapsarogaṇaiḥ

diggajergiribhistīrtherṛkṣa vānara kinnaraiḥ //
patatripramukhairdevi svasvanāmāṃkitāni vai

pratiṣṭhitāni yānīha muktihetūni tānyapi //
adṛśyānyapi dṛśyāni duravasthānyapi priye

bhagnānyapi ca kālena tāni pūjyāni suṃdari//
parārdhaśatasaṃkhyāni gaṇitānyekadā mayā

gaṃgābhasyapi tiṣṭhaṃti ṣaṣṭikoṭimitānihi//
siddhaliṃgāni tānīśe tiṣye'dṛśyatvamāyayuḥ

gaṇanādivasādavārṅmamabhaktajanaiḥpriye //
pratiṣṭhitāni yānīha teṣāṃ saṃkhyā na vidyate

tvayā tu yāni pṛṣṭāni yairidaṃ kṣetramuttamam //
tāni liṃgāni vakṣyāmi muktihetūni suṃdari

kalāvatīva gopyāni bhaviṣyaṃti girīṃdraje //
paraṃ teṣāṃ prabhāvo yaḥ svasvasthānaṃ na hāsyati

kalikalmaṣapuṣṭā ye ye duṣṭā nāstikāḥ śaṭhāḥ //
eteṣāṃ siddhaliṃgānāṃ jñāsyaṃtyākhyāmapīha na

nāmaśravaṇatopīha yalliṃgānāṃ śubhānane //
vṛjināni kṣayaṃ yāṃti vardhaṃte puṇyarāśayaḥ

oṃkāraḥ prathamaṃ liṃgaṃ dvitīyaṃ ca trilocanam //
tṛtīyaśca mahādevaḥ kṛttivāsāścaturthakam //

ratneśaḥ paṃcamaṃ liṃgaṃ ṣaṣṭhaṃ caṃdreśvarābhidham //
kedāraḥ saptamaṃ liṃgaṃ dharmeśaścāṣṭamaṃ priye

vīreśvaraṃ ca navamaṃ kāmeśaṃ daśamaṃ viduḥ //
viśvakarmeśvaraṃ liṃgaṃ śubhamekādaśaṃ param

dvādaśaṃ maṇikarṇīśamavimuktaṃ trayodaśam //
caturdaśaṃ mahāliṃgaṃ mama viśveśvarābhidham

priye caturdaśaitāni śriyohetūni suṃdari //
eteṣāṃ samavāyoyaṃ muktikṣetramiheritam

devatāḥ samadhiṣṭhātryaḥ kṣetrasyāsya parā imāḥ //
ārādhitāḥ prayacchaṃti nṛbhyo naiḥśreyasīṃ śriyam

ānaṃdakānane muktyai proktānyetāni suṃdari //
priye caturdaśejyāni mahāliṃgāni dehinām

pratimāsaṃ samārabhya tithiṃ pratipadaṃ śubhām //
eteṣāṃ liṃgamukhyānāṃ kāryā yātrā prayatnataḥ

anārādhya mahādevameṣu liṃgeṣu kuṃbhaja //
kaḥ kāśyāṃ mokṣamāpnoti satyaṃ satyaṃ punaḥpunaḥ

tasmātsarvaprayatnena kāśīphalamabhīpsubhiḥ //
pūjyānyetāni liṃgāni bhaktyā paramayā mune

// agastya uvāca // //
etānyeva kimanyāni mahāliṃgāni ṣaṇmukha //
nirvāṇakāraṇānīha yadi saṃti tadā vada

// skaṃda uvāca // //
anyānyapi ca saṃtīha mahāliṃgāni suvrata //
kaliprabhāvādguptāni bhaviṣyaṃtyeva tāni vai //

yasyeśvare sadābhaktiryaḥ kāśītattvavittamaḥ //
sa evaitāni liṃgāni vetsyatyanyo na kaścana

yeṣāṃ nāmagraheṇāpi kalikalmaṣa saṃkṣayaḥ //
amṛteśastārakeśo jñāneśaḥ karuṇeśvaraḥ

mokṣadvāreśvaraścaiva svargadvāreśvarastathā //
brahmeśo lāṃgalaścaiva vṛddhakāleśvarastathā

vṛṣeśaścaiva caṃḍīśo naṃdikeśo maheśvaraḥ //
jyotīrūpeśvaraṃ liṃgaṃ khyātamatra caturdaśam

kāśyāṃ caturdaśaitāni mahāliṃgāni suṃdari //
imāni muktihetūni liṃgānyānaṃdakānane

kalikalmaṣabuddhīnāṃ nākhyeyāni kadācana //
etānyārādhayedyastu liṃgānīha caturdaśa

na tasya punarāvṛttiḥ saṃsārādhvani karhicit //
kāśīkośoyamatulo na prakāśyo yatastataḥ //

etalliṃgābhidhā devi mahāpadyapi duḥkhahṛt //
rahasyaṃ paramaṃ caitatkṣetrasyāsya varānane

caturdaśāpi liṃgāni matsānnidhyakarāṇi hi //
avimuktasya hṛdayametadeva girīṃdraje

imāni yāni liṃgāni sarveṣāṃ muktidāni hi //
ekaikabhuvanasyeha sāramādāya sarvataḥ //
mayaitāni kṛtānyeva mahābhaktikṛpāvaśāt

asminkṣetre dhruvaṃ muktiriti yā prathiti priye //
kāraṇaṃ tatra liṃgāni mamaitāni caturdaśa

ta eva vratinaḥ kāṃte ta eva ca tapasvinaḥ//
dhyātānyetāni yairbhaktairliṃgānyānaṃdakānane

ta evābhyastasadyogā dattadānāsta eva hi //
kāśyāmimāni liṃgāni yairdṛṣṭānyapi dūrataḥ

iṣṭāpūrtāśca ye dharmāḥ praṇītā munisattamaiḥ //
te sarve tena vihitā yāvajjīvaṃ nirenasā

yenāvimuktamāsādya mahāliṃgāni pārvati //
sakṛdabhyarcitānīha sa mukto nātra saṃśayaḥ

// skaṃda uvāca // //
anyānyapi ca viṃdhyāre devyai proktāni śaṃbhunā //
svabhaktānāṃ hitāthārya tānyathākarṇayāgraja

śaileśaḥ saṃgameśaśca svarlīno madhyameśvaraḥ //
hiraṇyagarbha īśāno goprekṣo vṛṣabhadhvajaḥ

upaśāṃta śivo jyeṣṭho nivāseśvara eva ca //
śukreśo vyāghraliṃgaṃ ca jaṃbukeśaṃ caturdaśam

mune caturdaśaitāni mahāṃtyāyatanāni vai //
eteṣāmapi sevāto naro mokṣamavāpnuyāt

caitrakṛṣṇapratipadaṃ samārabhya prayatnataḥ //
ā caturdaśipūjyāni liṃgānyetāni sattamaiḥ

eteṣāṃ vārṣikī yātrā sumahotsavapūrvakam //
kāryā mumukṣubhiḥ samyakkṣetrasaṃsiddhidāyinī //

mune caturdaśaitāni mahāliṃgāni yatnataḥ //
dṛṣṭvā na jāyate jaṃtuḥ saṃsāre duḥkhasāgare

kṣetrasya paramaṃ tattvametadeva priye dhruvam //
saṃsārarogagrastānāmidameva mahauṣadham

kṣetrasyopaniṣaccaiṣā muktibījamidaṃ param //
karmakānanadāvāgnireṣā liṃgāvaliḥ priye

ekaikasyāsya liṃgasya mahimādyaṃta varjitaḥ //
mayaiva jñāyate devi samyaṅnānyena kenacit

iti śrutvā mune prāha devī hṛṣṭatanūruhā //
praṇamya devamīśānaṃ sarvajñaṃ sarvadaṃ śivam

// devyuvāca // //
rahasyaṃ paramaṃ kāśyāṃ yadetatsamudīritam //
tacchrutvotsukatāṃ prāptaṃ mano metīva vallabha

yaduktaṃ ligamekaikaṃ mahāsārataraṃ param //
kāśyāṃ paramanirvāṇakāraṇaṃ kāraṇeśvara

pratyekaṃ mahimānaṃ me brūhyeṣāṃ bhuvaneśvara //
caturdaśānāṃ liṃgānāṃ śravaṇādaghahāriṇām //

oṃkāreśasya liṃgasya kathamatra samāgamaḥ //
atipuṇyatamāttasmātkṣetrādamarakaṃṭakāt

kimātmako'yamoṃkāro mahimāsya ca ko hara //
kenārādhi purā caiṣa dadāvārādhitaśca kim

mṛḍānīvāksudhāmetāṃ vidhāya śrutigocarām //
kathāmakathayaddeva oṃkārasyamahādbhutām

// devadeva uvāca // //
kathāmākarṇayāparṇe varṇayāmi tavāgrataḥ //
yathoṃkārasya liṃgasya prādurbhāva ihābhavat

purānaṃdavane cātra brahmaṇā viśvayoninā //
tapastaptaṃ mahādevi samādhiṃ dadhatāparam

pūrṇe yugasahasre'tha bhittvā pātālasaptakam//
udatiṣṭhatpurojyotirvidyotita harinmukham

yadaṃtarāvirabhavannirvyājena samādhinā//
tadeva paramaṃ dhāma bahirāvirabhūdvidheḥ

yobhūccaṭacaṭāśabdaḥ sphuṭato bhūmibhāgataḥ//
tacchabdādvyasṛjadvedhāḥ samādhiṃ kramato vaśī //

sraṣṭāvisṛṣṭa taddhyāno yāvadunmīlyalocane //
puraḥ paśyeddadarśāgre tāvadakṣaramādimam

akāraṃ sattvasaṃpannamṛkkṣetraṃ sṛṣṭipālakam //
nārāyaṇātmakaṃ sākṣāttamaḥ pāre pratiṣṭhitam

ukāramatha tasyāgre rajorūpaṃ yajurjanim //
vidhātāraṃ samastasya svākāramiva biṃbitam

nīravadhvāṃtasaṃketa sadanābhaṃ tadagrataḥ //
makāraṃ sa dadarśātha tamorūpaṃ viśeṣataḥ

sāmno yoniṃ laye hetuṃ sākṣādrudrasvarūpiṇam //
atha tatpurato dhyātā vyadhātsvanayanātithim

viśvarūpamayākāraṃ saguṇaṃ vāpi nirguṇam//
anākhyanādasadanaṃ paramānaṃdavigraham

śavdabrahmeti yatkhyātaṃ sarvavāṅmayakāraṇam //
athopariṣṭānnādasya biṃdurūpaṃ parātparam

kāraṇaṃ kāraṇānāṃ ca jagadyoniṃ ca taṃ param //
vidhirvilokayāṃcakre tapasāgocarīkṛtam

avanādomiti khyātaṃ sarvasyāsya prabhāvataḥ //
bhaktamunnayate yasmāttadomiti ya īritaḥ

arūpopi sarūpāḍhyaḥ sa dhātrā netragīkṛtaḥ //
tārayedyadbhavāṃbhodheḥ svajapāsaktamānasam //
tatastāra iti khyāto yastaṃ brahmā vyalokayat

praṇūyate yataḥ sarvaiḥ paranirvāṇakāmukaiḥ //
sarvebhyobhyadhikastasmātpraṇavo yaiḥ prakīrtitaḥ

svasevitāraṃ puruṣaṃ praṇayedyaḥ paraṃpadam //
atastapraṇavaṃ śāṃtaṃ pratyakṣīkṛtavānvidhiḥ

trayīmayasturīyoyasturyātītokhilātmakaḥ //
nādabiṃdusvarūpo yaḥ sa praikṣi dvijagāminā

prāvartaṃta yato vedāḥ sāṃgāḥ sarvasya yonayaḥ //
savedādiḥ padmabhuvā purastādavalokitaḥ

vṛṣabho yastridhābaddho roravīti mahomayaḥ //
sanetraviṣayī cakre paramaḥ parameṣṭhinā

śṛṃgaścatvāri yasyāsanhastāsaḥ sapta eva ca //
dve śīrṣe ca trayaḥ pādāḥ sa devo vidhinaikṣata

yadaṃtarlīnamakhilaṃ bhūtaṃ bhāvi bhavatpunaḥ //
tadbījaṃ bījarahitaṃ druhiṇena vilokitam

līnaṃ mṛgyeta yatraitadābrahmastaṃbabhājanam//
ataḥ sa bhājyate sadbhiryalliṃgaṃ tadvilokitam

paṃcārthā yatra bhāsaṃte paṃcabrahmamayaṃ hi yat //
ādipaṃcasvarūpaṃyanniraikṣi brahmaṇā hi tat

tamālokya tato vedhā liṃgarūpiṇamīśvaram //
paṃcākṣaraṃ prapaṃcācca bhinnaṃ tuṣṭāva śaṃkaram

brahmovāca // /
nama oṃkārarūpāya namo'kṣaravapurdhṛte //
namo'kārādivarṇānāṃ prabhavāya sadāśiva

akārastvamukārastvaṃ makārastvamanākṛte //
ṛgyajuḥ sāmarūpāya rūpātītāya te namaḥ

namo nādātmane tubhyaṃ namo biṃdukalātmane //
aliṃgaliṃgarūpāya sarvarūpasvarūpiṇe

namaste dhāma nidhaye nidhanādivivarjita //
namo bhavāya rudrāya śarvāya ca namostute

nama ugrāya bhīmāya paśūnāṃ pataye namaḥ //
namastārasvarūpāya saṃbhavāya namostu te

amāyāya namastubhyaṃ namaḥ śivatarāya te //
kapardine namastubhyaṃ śitikaṃṭha namostu te

mīḍhuṣṭamāya giriśa śipiviṣṭāya te namaḥ //
namo'hrasvāya kharvāya bṛhate vṛddharūpiṇe

kumāragurave tubhyaṃ kumāravapuṣe namaḥ //
namaḥ śvetāya kṛṣṇāya pītāyāruṇamūrtaye

dhūmravarṇāya piṃgāya namaḥ kirmīravarcase //
namaḥ pāṭalavarṇāya namo haritatejase

nānāvarṇasvarūpāya varṇānāṃ pataye namaḥ //
namaste svararūpāya namo vyaṃjanarūpiṇe

udāttāyānudāttāya svaritāya namo namaḥ //
hrasvadīrghapluteśāya savisargāya te namaḥ //

anusvārasvarūpāya namaste sānunāsika //
namo niranunāsāya daṃtyatālavyarūpiṇe

oṣṭhyorasyasvarūpāya nama ūṣmasvarūpiṇe //
aṃtasthāya namastubhyaṃ paṃcamāya pinākine

niṣādāya namastubhyaṃ niṣādapataye namaḥ //
vīṇāveṇumṛdaṃgādi vādyarūpāya te namaḥ

namastārāya maṃdrāya ghorāyāghoramūrtaye //
namastānasvarūpāya mūrcchanāṃ pataye namaḥ

sthāyisaṃcāribhedena namo bhāvasvarūpiṇe //
tālapriyāya tālāya lāsyatāṃḍavajanmane

tauryatrikasvarūpāya tauryatrikamahāpriya // tauryatrikakṛtāṃbhaktyā nirvāṇaśrīpradāyaka

sthūlasūkṣmasvarūpāya dṛśyādṛśya svarūpiṇe //
arvācīnāya ca namaḥ parācīnāya te namaḥ

vākprapaṃca svarūpāya vākprapaṃca parāya ca //
ekāyānekabhedāya sadasatpataye namaḥ

śabdabrahma namastubhyaṃ parabrahma namostute //
namo vedāṃtavedyāya vedānāṃ pataye namaḥ

namo vedasvarūpāya vedagocaramūrtaye //
pārvatīśa namastubhyaṃ jagadīśa namostu te

namaste devadeveśa deva divyapadaprada //
śaṃkarāya namastubhyaṃ namastubhyaṃ maheśvara

namaste jagadānaṃda namaste śaśiśekhara //
mṛtyuṃjaya namastubhyaṃ namaste tryaṃbakāya ca

namaḥ pinākahastāya triśūlāyudhadhāriṇe //
namastripurahaṃtre ca namoṃdhaka niṣūdana

kaṃdarpadarpadalana namojālaṃdharāraye //
kālāya kālakālāya kālakūṭaviṣādine

viṣādahaṃtre bhaktānāmabhaktaika viṣādada //
jñānāya jñānarūpāya sarvajñāya namo'stute //

yogasiddhipradosi tvaṃ yogināṃ yogasattama //
tapasāṃ phaladosi tvaṃ tapasvibhyastapodhana

tvameva maṃtrarūposi maṃtrāṇāṃ phalado bhavān //
mahādānaphalaṃ tvaṃ vai mahādānaprado bhavān

mahāyajñastvameveśa mahāyajña phalaprada //
tvaṃ sarvaḥ sarvagastvaṃ vai sarvadaḥ sarvadṛgbhavān

sarvabhuksarvakartā tvaṃ sarvasaṃhārakāraka //
yogināṃ hṛdayākāśa kṛtālaya namostu te

tvameva viṣṇurūpeṇa śaṃkhacakragadādhara //
trilokīṃ trāyase trātaḥ sattvamūrte namostu te

tvameva vidadhāsye tadvidhirbhūtvā vidhānavit //
rajorūpaṃ samālaṃbya nīrajaskapadaprada

tvameva hi mahārudrastvaṃ mahogro bhujaṃgabhṛt //
tvameva hi mahābhīmo mahāpitṛvanecara

tāmasīṃ tanumāśritya tvaṃ kṛtāṃta kṛtāṃtaka //
kālāgnirudro bhū'tvāṃte tvaṃ saṃvarta pravartakaḥ

tvaṃ puṃprakṛtirūpābhyāṃ mahadādyakhilaṃ jagat //
akṣipakṣmasamutkṣepātpunarāviḥ karopyaja

unmeṣavinimeṣau te sargāsargaikakāraṇam //
kapālamālākheloyaṃ bhavataḥ svairacāriṇaḥ

tvatkaṃṭhe nṛkaroṭīyaṃ dhūrjaṭe yā vibhāsate //
sarveṣāmaṃtadagdhānāṃ sāsphuṭaṃ bījamālikā

tvattaḥ sarvamidaṃ śaṃbho tvayi sarvaṃ carācaram //
kastvāṃ stotuṃ vijānāti purāṃ vācāmagocaram

stotā tvaṃ hi stutistvaṃ hi nityaṃ stutyastvameva ca //
vedmyoṃ namaḥ śivāyeti nānyadve'dmyeva kiṃcana

tvameva hi śaraṇyaṃ me tvameva hi gatiḥ parā //
tvāmeva praṇamāmīśa namastubhyaṃ namo namaḥ

ityudīryāsakṛdvedhāḥ praṇanāma maheśvaram //
praṇavākhyaṃ mahāliṃgarūpiṇaṃ daṃḍavatkṣitau

// īśvara uvāca // //
tato girīṃdratanaye śrutvā brahmastutiṃ parām //
paramaiśvaryasaṃpatti hetuṃ tuṣṭohamadbhutam

amūrto'haṃ tato liṃgānmūrtimāsthāya śāṃkarīm //
prasannosmi varaṃ brūhītyuvāca caturānanam

caturvaktraḥ samutthāya pratyakṣaṃ vīkṣya māmatha //
punarjayajayetyuktvā praṇanāma kṛtāṃjaliḥ

ānaṃdabāṣpasalilanetro hṛṣṭatanūruhaḥ //
gadgadena svareṇātha provāca jalajāsanaḥ

brahmovāca // //
yadi prasanno deveśa yadi deyo varo mama //
tadetasminmahāliṃge sānnidhyaṃ te'stu śaṃkara

ayameva varo deyo nānyaṃ varamahaṃ vṛṇe //
oṃkāreśvaranāmaitadastu bhaktaikamuktidam

// skaṃda uvāca // //
vidhyuktamiti viprarṣe samākarṇya tadeśitā //
uvāca vacanaṃ caitattathāstu caturānanam

varānanyānapi vibhuḥ prasannastatkṣaṇāddadau//
vidhaye dīrghatapase tayā stutyātitoṣitaḥ

// īśvara uvāca //
suraśreṣṭha tapaḥśreṣṭha sarvāmnāya nidhirbhava //
sṛṣṭeḥkaraṇasāmarthyaṃ tavāstu madanugrahāt

pitāmahastvaṃ sarveṣāṃ sarveṣāṃ mānyabhūrbhavān //
tvattapaḥphaladānārthaṃ yadetalliṃgamutthitam

paramoṃkārarūpaṃ ca śabdabrahmamayaṃ vidhe //
asyārādhanataḥ puṃsāṃ na dūraṃ brahmaṇaḥ padam

akārākhyamidaṃ liṃgamukārākhyamidaṃ param //
makārāhvayametacca nādākhyaṃ biṃdusaṃjñakam

paṃcāyatanamīśānamitthametadudīritam //
mokṣāya sarvajaṃtūnāmasminnānaṃdakānane

snātvā matsyodarī tīrthe vilokyoṃkāramīśvaram //
na jātu jāyate jaṃturjananī jaṭhare kvacit

etannādeśvaraṃ liṃgametalliṃgaṃ sudurlabham //
ramye matsyodarī tīre dṛṣṭaṃ spṛṣṭaṃ vimuktidam

yadetatkāpilaṃ jyotiretalliṃge vilokyate //
atastu kapileśākhyametalliṃgaṃ sudurlabham

matsyodarī yadā gaṃgā kapileśvara sannidhau //
tadā tatra naraḥ snātvā brahmahatyāṃ vyapohati

varaṇotsiktapānīye dyunadītoyamiśrite //
snātvā nādeśvaraṃ dṛṣṭvā naraḥ kimanuśocati

aṣṭamyāṃ ca caturdaśyāṃ tīrthāni saha sāgaraiḥ //
ṣaṣṭi koṭi sahasrāṇi matsyodaryāṃ viśaṃti hi

praṇaveśa samīpe tu yadā gaṃgā sameṣyati //
tadā puṇyatamaḥ kālo devarṣi pitṛvallabhaḥ

tatra snānaṃ japodānaṃ havanaṃ devatārcanam //
matsyodaryāmakṣayaṃ syādoṃkāreśvarasannidhau

oṃkāradarśanādeva vājimedhaphalaṃ labhet //
tasmātkāśyāṃ prayatnena dṛśya oṃkāra īśvaraḥ

durlabhaṃ mānavaṃ janma caturvargaikasādhanam //
jalabudbudavattatsyānnādeśo yena nekṣitaḥ

nirīkṣya kapileśānaṃ snātvā matsyodarījale //
kṛtvā piṃḍapradānāni pitṝṇāmanṛṇo bhavet

kṛtvāpi mohātpāpāni bhūrīṇyeva mahāṃtyapi //
kāśyāmoṃkāramālokya kutastrasyati vai yamāt

oṃkārayātrābhimukhaṃ naraṃ vīkṣya pitāmahāḥ //
parinṛtyaṃti muditāḥ svasaṃtānasamudbhavam

yasya yasya ca vai nāma smṛtvā smṛtvā namasyati //
taṃ tamunnayate prājñaḥ pitaraṃ brahmaṇaḥ padam

rudrāṇāṃ niyutaṃ japtvā yatphalaṃ samyagāpyate //
tatphalaṃ labhate nūnaṃ bhaktyoṃkāra vilokanāt

kevalaṃ bhūmibhārāya janmino janma tasya vai //
yenānaṃdavane dṛṣṭo noṃkāraḥ sarvakāmadaḥ

ekamoṃkāramālokya samaste kṣoṇimaṃḍale // liṃ
gajātāni sarvāṇi dṛṣṭāni syurna saṃśayaḥ

praṇaveśaṃ praṇamyātha yadyanyatra vipadyate //
svargalokamavāpyātha kāśyāṃ muktimavāpnuyāt

asmim̐lliṃge sadā brahmansthāsyāmīti viniścitam //
dāsyāmi ca sadā mokṣametalliṃgārcakāya vai

oṃkāraṃ sakṛdapyatra naro natvā prayatnataḥ //
kṛtakṛtyo bhavennūnaṃ paramānmadanugrahāta

oṃkārapaścime bhāge tāratīrthamanuttamam //
kṛtodakakriyastatra narastarati durgatim

oṃkāreśasya ye bhaktā jñeyāste naiva mānavāḥ //
manuṣyacarmaṇā naddhāste rudrā mokṣagāminaḥ

asya liṃgasya mahimā nānyairatrāvagamyate //
tvatpuṇyodayato yasmādvidhetrāvirabhūdidam

etalliṃgaprabhāvācca sarvaṃ jñāsyasi tattvataḥ //
vidhe vidhehi tasmāttvaṃ sarvametaccarācaram

iti dattvā varaṃ tasmai brahmaṇe padmasaṃbhave/
tasminneva mahāliṃge śaṃbhurlīno babhūva ha

// skaṃda uvāca // //
brahmāpi bhajatedyāpi talliṃgaṃ kalaśodbhava //
stuvanbrahma stavenaiva svātmanā vihitena hi

brahmastavaṃ japanmartyaḥ sarvaiḥ pāpaiḥ pramucyate //
pūryate ca mahāpuṇyairjñānaṃ prāpnoti sattamam

brahmastavamimaṃ japtvā trikālaṃ parivatsaram //
aṃtakāle bhavejjñānaṃ yena baṃdhātpramucyate //

//
iti śrīskāṃde mahāpurāṇa ekāśīti sāhasryāṃ saṃhtiāyāṃ caturthe kāśīkhaṃḍa uttarārdha oṃkāramahimavarṇanaṃnāma trisaptatitamo'dhyāyaḥ