Skanda Purana · Verses 3.20-3

// śrīsūta uvāca // //
lakṣmaṇasya mahātīrthe brahmahatyāvināśane //
snātvā svacittaśuddhyarthaṃ jaṭātīrthaṃ tato vrajet

janmamṛtyujarākrāṃtasaṃsārāturacetasām //
ajñānanāśakaṃ nāsti jaṭātīrthādṛte dvijāḥ

loke mumukṣavaḥ keciccittaśuddhimabhīpsavaḥ //
vācā paṭhaṃti vedāṃtāṃstūṣṇīnnānubhavaṃti te

pūrvapakṣamahāgrāhe siddhāṃtajhaṣasaṃkule //
vedāṃtābdhāvihājñānaṃ muhyaṃti patitā dvijāḥ

prathamaṃ cittaśuddhyarthaṃ vedāṃtānsaṃpaṭhaṃti ye //
vivadaṃte paṭhitvā te kalahaṃ ca vitanvate

cittaśuddhirna vedāṃtādbahuvyāmohakāraṇāt //
tato vayaṃ na vedāṃtānmunīṃdrā bahu manmahe

cittaśuddhiṃ yadīcchadhvaṃ laghūpāyena tāpasāḥ //
udghoṣayāmi sarveṣāṃ jaṭātīrthaṃ niṣevata

purā sarvopakārārthaṃ tīrthamajñānanāśanam //
etadvinirmitaṃ sākṣācchambhunā gandhamādane

nihate rāvaṇe viprā jaṭāṃ rāmastu dhārmikaḥ //
kṣālayāmāsa yattoye tajjaṭātīrthamucyate

varṣāṇāṃ ṣaṣṭisāhasraṃ jāhnavījalamajjanam //
godāvaryāṃ sakṛtsnānaṃ siṃhasthe ca bṛhaspatau

tāvatsahasrasnānāni siṃhaṃ devagurau gate //
gomatyāṃ labhyate varṣaistajjaṭātīrthadarśanāt

jaṭātīrthe manuṣyāṇāṃ snātānāṃ dvijapuṃgavāḥ //
antaḥkaraṇaśuddhiḥ syāttato'jñānaṃ vinaśyati

ajñānanāśe jñānaṃ syāttato muktimavāpsyasi //
akhaṇḍasaccidānaṃdasaṃpūrṇaḥ syāttataḥ param

atrāpyudāharaṃtīmamitihāsaṃ purātanam //
pituḥ putrasya saṃvādaṃ vyāsasya ca śukasya ca

purā munivaraṃ kṛṣṇaṃ bhāvi tātmānamacyutam //
pāraṃparyaviśeṣajñaṃ sarvaśāstrārthakovidam //
praṇamya śirasā vyāsaṃ śukaḥ papraccha vai dvijāḥ

// śrīśuka uvāca // //
bhagavaṃstāta sarvajña brūhi guhyamanuttamam

antaḥkaraṇaśuddhiḥ syāttathājñānavināśanam //
jñānodayaśca yena syādaṃte muktiśca śāśvatī

tamupāyaṃ vadasvādya snehānmama mahāmune //
vedāṃtāścetihāsāśca purāṇādīni kṛtsnaśaḥ

adhītāni mayā tvattaḥ śodhayaṃti na mānasam //
ato me cittaśuddhiḥ syādyathā tāta tathā vada

iti pṛṣṭastadā vyāsaḥ śukena munisattamāḥ //
rahasyaṃ kathayāmāsa yenāvidyā vina śyati

// vyāsa uvāca // //
śuka vakṣyāmi te guhyamavidyāgranthibhedanam //
buddhiśuddhipradaṃ puṃsāṃ janmādibhayanāśanam

rāmasetau mahāpuṇyaṃ gandhamādanaparvate //
vidyate pāpasaṃhāri jaṭātīrthamiti śrutam

jaṭāṃ svāṃ śodhayāmāsa yatra rāmo hariḥ svayam //
rāmo dāśarathiḥ śrīmāṃstīrthāya ca varaṃ dadau

snāti ye'tra samāgatya jaṭātīrthe'tipāvane //
antaḥkaraṇaśuddhiśca teṣāṃ bhūyāditi sma saḥ

vinā yajñaṃ vinā jñānaṃ vinā jāpyamupoṣaṇam //
snānamātrājjaṭātīrthe buddhiśuddhirbhavennṛṇām

sarvadānasamaṃ puṇyaṃ snānādatra bhaviṣyati //
durgāṇyanena tarati puṇyalokānsamaśnute

mahattvamaśnute snānājjaṭātīrthe śubhodake //
jaṭātīrthaṃ vinā nānyadaṃtaḥkaraṇa śuddhaye

vidyate niyamo vāpi japo vā nānyadevatā //
dhanyaṃ yaśasyamāyuṣyaṃ sarvalokeṣu viśrutam

pavitrāṇāṃ pavitraṃ ca jaṭātīrthaṃ śukādhunā //
sarvapāpapraśamanaṃ maṃgalānāṃ ca maṃgalam

bhṛgurvai vāruṇiḥ pūrvaṃ varuṇaṃ pitaraṃ śuka //
buddhiśuddhipradopāyamapṛcchatpāvanaṃ śubham //
provāca varuṇastasmai buddhiśuddhipradaṃ śubham

// varuṇa uvāca // //
rāmasetau bhṛgo puṇye gandhamādanaparvate

Esoteric aspect of Jata
Temple details at Jataa Teertha
snānamātrājjaṭā tīrthe buddhiśuddhirbhaveddhruvam //
sa piturvacanātsadyo bhṛgurvai varuṇātmajaḥ

gatvā snātvā jaṭātīrthe buddhiśuddhimavāptavān //
vinaṣṭājñānasaṃtānastayā śuddhyā tadā bhṛguḥ

utpannādvaitavijñānaḥ svapiturvaruṇādayam //
akhaṇḍasaccidānaṃdapūrṇākāro'bhavacchuka

śaṃkarāṃśo'pi durvāsā jaṭātīrthe'bhiṣekataḥ //
manaḥśuddhimavāpyāśu brahmānaṃdamayo'bhavat

dattātreyo'pi viṣṇvaṃśastīrthe'sminnabhiṣecanāt //
śuddhāṃtaḥkaraṇo bhūtvā brahmākāro'bhavacchuka

icchedajñānanāśaṃ yaḥ sa snāyāttu jaṭābhidhe //
tīrthe śuddhatame puṇye sarvapāpavināśane

jaṭātīrthamatastvaṃ ca śuka gaccha mahāmate //
manaḥśuddhipradaṃ tasminsnānaṃ ca kuru puṇyade

pitraivamukto vyāsena śukaḥ putrastadā dvijāḥ //
rāmasetuṃ mahāpuṇyaṃ gandhamādanaparvatam

agamatsnātukāmaḥ sañjaṭātīrthe viśuddhide //
snātvā saṃkalpapṛrvaṃ ca jaṭātīrthe śuko muniḥ

manaḥśuddhimanuprāpya tena cājñānanāśane //
svasvarūpaṃ samāpannaḥ paramānaṃdarūpakam

ye cāpyanye manaḥśuddhikāmāḥ saṃti dvijottamāḥ //
jaṭātīrthe tu te sarve snātuṃ bhaktipuraḥsarama

aho janā jaṭātīrthe kāmadhenusame śubhe //
vidyamāne'pi kiṃ tucche ramaṃtenyatra mohitāḥ

bhuktikāmo labhedbhuktiṃ muktikāmastu tāṃ labhet //
snānamātrājjaṭātīrthe satyamuktaṃ mayā dvijāḥ

vedānuvaca nātpuṇyādyajñāddānāttapovratāt//
upavāsājjapādyogānmanaḥśuddhirnṛṇāṃ bhavet

vināpyetāni vipreṃdrā jaṭātīrthe'tipāvane //
snānamātrānmanaḥśuddhirbrāhmaṇānāṃ dhruvaṃ bhavet

jaṭātīrthasya māhātmyaṃ mayā vaktuṃ na śakyate //
śaṃkaro vetti tattīrthaṃ harirvetti vidhistathā

jaṭātīrthasamaṃtīrthaṃ na bhūtaṃ na bhaviṣyati//
jaṭātīrthasya tīre yaḥ kṣetrapiṃḍaṃ samācaret

gayāśrāddhasamaṃpuṇyaṃtasya syānnātra saṃśayaḥ//
jaṭātīrthe naraḥ snātvā na pāpena vilipyate//
dāridryaṃ na samāpnoti neyācca narakārṇavam

śrīsūta uvāca//
evaṃ vaḥ kathitaṃ viprā jaṭātīrthasya vaibhavam

yatra vyāsasuto yogī snātvā pāpavimocane //
avāptavānmanaḥśuddhimadvaitajñānasādhanām

yastvimaṃ paṭhate'dhyāyaṃ śṛṇute vā samāhitaḥ //
sa vidhūyeha pāpāni labhate vaiṣṇavaṃ padam

iti śrīskānde mahāpurāṇa ekāśītisāhasryāṃ saṃhitāyāṃ tṛtīyebrahmakhaṇḍe setumāhātmye jaṭātīrthapraśaṃsāyāṃ śukacittaśuddhivarṇanaṃnāma viṃśo'dhyāyaḥ