Skanda Purana · Verses 3.17-2

// ṛṣaya ūcuḥ // //
vedavedāṃgatattvajñairgurubhirbrahmavādibhiḥ //
nṛṇāṃ kṛtopadeśānāṃ sadyaḥ siddhirhi jāyate

athānyajanasāmānyairgurubhirnītikovidaiḥ//
nṛṇāṃ kṛtopadeśānāṃ siddhirbhavati kīdṛśī

// // sūta uvāca // //
śraddhaiva sarvadharmasya cātīva hitakāriṇī //
śraddhayaiva nṛṇāṃ siddhirjāyate lokayordvayoḥ

śraddhayā bhajataḥ puṃsaḥ śilāpi phaladāyinī //
mūrkho'pi pūjito bhaktyā gururbhavati siddhidaḥ

śraddhayā paṭhito mantrastvabaddhopi phalapradaḥ //
śraddhayā pūjito devo nīcasyāpi phalapradaḥ // ६. //
aśraddhayā kṛtā pūjā dānaṃ yajñastapo vratam //
sarvaṃ niṣphalatāṃ yāti puṣpaṃ vandhyata roriva

sarvatra saṃśayāviṣṭaḥ śraddhāhīno'ticaṃcalaḥ //
paramārthātparibhraṣṭaḥ saṃsṛterna hi mucyate

mantre tīrthe dvije deve daivajñe bheṣaje gurau //
yādṛśī bhāvanā yatra siddhirbhavati tādṛśī

ato bhāvamayaṃ viśvaṃ puṇyaṃ pāpaṃ ca bhāvataḥ //
te ubhe bhāvahīnasya na bhavetāṃ kadācana

atredaṃ paramāścaryamākhyānamanuvarṇyate //
aśraddhā sarvamartyānāṃ yena sadyo nivartate

āsītpāṃcālarājasya siṃhaketuriti śrutaḥ //
putraḥ sarvaguṇopetaḥ kṣātradharmarataḥ sadā

sa ekadā katipayairbhṛtyairyukto mahābalaḥ //
jagāma mṛgayāhetorbahu sattvānvitaṃ vanam

tadbhṛtyaḥ śabaraḥ kaścidvicaranmṛgayāṃ vane //
dadarśa jīrṇaṃ sphuṭitaṃ patitaṃ devatālayam

tatrāpaśyadbhinnapīṭhaṃ patitaṃ sthaṃḍilopari //
śivaliṃṅgamṛjuṃ sūkṣmaṃ mūrtaṃ bhāgyamivātmanaḥ

sa samādāya vegena pūrvakarmapracoditaḥ //
tasmai saṃdarśayāmāsa rāja putrāya dhīmate

paśyedaṃ ruciraṃ liṃgaṃ mayā dṛṣṭamiha prabho //
tadetatpūjayiṣyāmi yathāvibhavamādarāt

asya pūjāvidhiṃ brūhi yathā devo maheśvaraḥ //
amaṃtrajñaiśca mantrajñaiḥ prīto bhavati pūjitaḥ

iti tena niṣādena pṛṣṭaḥ pārthivanaṃdanaḥ //
pratyuvāca prahasyainaṃ parihāsa vicakṣaṇaḥ

saṃkalpena sadā kuryādabhiṣekaṃ navāṃbhasā //
upaveśyāsane śuddhe śubhairgaṃdhākṣatairnavaiḥ //
vanyaiḥ patraiśca kusumairdhūpairdīpaiśca pūjayeta //

citābhasmopahāraṃ ca prathamaṃ parikalpayet //
ātmopabhogyenānnena naivadyaṃ kalpayedbudhaḥ

punaśca dhūpadīpādīnupacārānprakalpet //
nṛtyavāditragītādīnyathāvatparikalpayet

namaskṛtvā tu vidhivatprasādaṃ dhārayedbudhaḥ //
eṣa sādhāraṇaḥ proktaḥ śivapūjāvidhistava //

citābhasmopahāreṇa sadyastuṣyati śaṃkaraḥ

// sūta uvāca // //
parihāsarasenetthaṃ śāsitaḥ svāminā'munā //
sa caṃḍakākhyaḥ śabaro mūrdhnā jagrāha tadvacaḥ

tataḥ svabhavanaṃ prāpya liṃgamūrti maheśvaram //
pratyahaṃ pūjayāmāsa citābhasmopahārakṛt

yaccātmanaḥ priyaṃ vastu gandhapuṣpākṣatādikam //
nivedya śaṃbhave nityamupāyuṃkta tataḥ svayam

evaṃ maheśvaraṃ bhaktyā saha patnyābhyapūjayat //
śabaraḥ sukhamāsādya nināya katicitsamāḥ

ekadā śivapūjāyai pravṛttaḥ śabarottamaḥ //
na dadarśa citābhasma pātre pūritamaṇvapi

athāsau tvarito dūramanviṣyanparito bhraman //
na labdhavāṃścitābhasma śrāṃto gṛhamagātpunaḥ

tata āhūya patnīṃ svāṃ śabaro vākyamabravīt //
na labdhaṃ me citābhasma kiṃ karomi vada priye

śivapūjāṃtarāyo me jātodya bata pāpmanaḥ //
pūjāṃ vinā kṣaṇamapi nāhaṃ jīvitumutsahe

upāyaṃ nātra paśyāmi pūjopakaraṇe hate //
na gurośca vihanyeta śāsanaṃ sakalārthadam

iti vyākulitaṃ dṛṣṭvā bharttāraṃ śabarāṃganā //
pratyabhāṣata mā bhaistvamupāyaṃ pravadāmi te

idameva gṛhaṃ dagdhvā bahukālopabṛṃhitam //
ahamagniṃ pravekṣyāmi citābhasma bhavettataḥ

// śabara uvāca // //
dharmārthakāmamokṣāṇāṃ dehaḥ paramasādhanam //
kathaṃ tyajasi taṃ dehaṃ sukhārthaṃ navayauvanam

adhunā tvanapatyā tvamabhuktaviṣayāsavā //
bhogayogyamimaṃ dehaṃ kathaṃ dagdhumihecchasi

// śabaryuvāca // //
etāvadeva sāphalyaṃ jīvitasya ca janmanaḥ //
parārthe yastyajetprāṇāñchivārthe kimuta svayam

kiṃ nu taptaṃ tapo ghoraṃ kiṃ vā dattaṃ mayā purā //
kiṃ vārcanaṃ kṛtaṃ śaṃbhoḥ pūrvajanmaśatāṃtare

kiṃ vā puṇyaṃ mama pituḥ kā vā mātuḥ kṛtārthatā //
yacchivārthe samiddhe'gnau tyajāmyetatkalevaram

itthaṃ sthirāṃ matiṃ dṛṣṭvā tasyā bhaktiṃ ca śaṃkare //
tatheti dṛḍhasaṃkalpaḥ śabaraḥ pratyapūjayat

sā bharttāramanuprāpya snātvā śuciralaṃkṛtā //
gṛhamādīpya taṃ vahniṃ bhaktyā cakre pradakṣiṇam

namaskṛtvātmagurave dhyātvā hṛdi sadāśivam //
agnipraveśābhimukhī kṛtāṃjaliridaṃ jagau

// śabaryuvāca // //
puṣpāṇi saṃtu tava deva mameṃdriyāṇi dhūpo'gururvapuridaṃ hṛdayaṃ pradīpaḥ //
prāṇā havīṃṣi karaṇāni tavākṣatāśca pūjāphalaṃ vrajatu sāṃpratameṣa jīvaḥ

vāṃchāmi nāhamapi sarvadhanādhipatyaṃ na svargabhūmimacalāṃ na padaṃ vidhātuḥ //
bhūyo bhavāmi yadi janmanijanmani syāṃ tvatpādapaṃkajalasanmakaraṃdabhṛṃgī

janmāni saṃtu mama deva śatādhikāni māyā na me vi śatu cittamabodhahetuḥ //
kiṃcitkṣaṇārdhamapi te caraṇāravindānnāpaitu me hṛdayamīśa namonamaste

iti prasādya deveśaṃ śabarī dṛḍhaniścayā //
viveśa jvalitaṃ vahniṃ bhasmasādabhavatkṣaṇāt

śabaropi ca tadbhasma yatnena parigṛhya saḥ //
cakre dagdhagṛhopānte śivapūjāṃ samāhitaḥ

atha sasmāra pūjāṃte prasādagrahaṇocitām //
dayitāṃ nityamāyāṃtīṃ prāṃjaliṃ vinayānvitām

smṛtamātrāṃ tadāpaśyadāgatāṃ pṛṣṭhataḥ sthitām //
pūrveṇāvayavenaiva bhaktinamrāṃ śucismitām

tāṃ vīkṣya śabaraḥ patnīṃ pūrvavatprāṃjaliṃ sthitām //
bhasmāvaśeṣitagṛhaṃ yathāpūrvamavasthitam ///

agnirdahati tejobhiḥ sūryo dahati raśmibhiḥ //
rājā dahati daṃḍena brāhmaṇo manasā dahet

kimayaṃ svapna āhosvitkiṃ vā māyā bhramātmikā //
iti vismayasaṃbhrātastāṃ bhūyaḥ paryapṛcchata

api tvaṃ ca kathaṃ prāptā bhasmabhūtāsi pāvake //
dagdhaṃ ca bhavanaṃ bhūyaḥ kathaṃ pūrva vadāsthitam

// śabaryuvāca // //
yadā gṛhaṃ samuddīpya praviṣṭāhaṃ hutāśane //
tadātmānaṃ na jānāmi na paśyāmi hutāśanam

na tāpaleśopyāsīnme praviṣṭāyā ivodakam //
suṣupteva kṣaṇārdhena prabuddhāsmi punaḥ kṣaṇāt

tāvadbhavanamadrākṣamadagdhamiva susthitam //
adhunā devapūjāṃte prasādaṃ labdhumāgatā

evaṃ parasparaṃ premṇā daṃpatyorbhāṣamāṇayoḥ //
prādurāsīttayoragre vimānaṃ divyamadbhutam

tasminvimāne śatacandrabhāsvare catvāra īśānucarāḥ puraḥsarāḥ //
haste gṛhītvātha niṣādadaṃpatī āropayāmāsuramuktavigrahau

tayorniṣādadaṃpatyostatkṣaṇādeva tadvapuḥ //
śivadūtakarasparśāttatsārūpyamavāpa ha

tasmācchraddhaiva sarveṣu vidheyā puṇyakarmasu //
nīcopi śabaraḥ prāpa śraddhayā yogināṃ gatim

kiṃ janmanā sakalavarṇajanottamena kiṃ vidyayā sakalaśāstravicāravatyā //
yasyāsti cetasi sadā parameśabhaktiḥ ko'nyastatastribhuvane puruṣosti dhanyaḥ

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmottarakhaṇḍe bhasmamāhātmyavarṇanaṃ nāma saptadaśo'dhyāyaḥ