Skanda Purana · Chapter 3.12

// vyāsa uvāca // //
tato devairnṛpaśreṣṭha rakṣārthaṃ satyamaṃdiram //
sthāpitaṃ tattadādyaiva satyābhikhyā hi sā purī

pūrvaṃ dharmeśvaro devo dakṣiṇena gaṇādhipaḥ //
paścime sthāpito bhānuruttare ca svayaṃbhuvaḥ

// yudhiṣṭhira uvāca // //
gaṇeśaḥ sthāpitaḥ kena kasmātsthāpitavānasau //
kiṃ nāmāsau mahābhāga tanme kathaya mā ciram

// vyāsa uvāca // //
adhunāhaṃ pravakṣyāmi gaṇeśotpattikāraṇam

samaye militāḥ sarve devatā mātarastathā //
dharmāraṇye mahārāja sthāpitaścaṃḍikāsutaḥ

ādau devairnṛpaśreṣṭha bhūmau vai satyayoṣitām //
prākāraścābhavattatra patākādhvajaśobhitaḥ

brāhmaṇāyatane tatra prākāramaṇḍalāntare //
tanmadhye racitaṃ pīṭhamiṣṭakābhiḥ suśobhitam

pratolyaśca catasro vai śuddhā eva satoraṇāḥ //
pūrve dharmeśvaro devo dakṣiṇe gaṇanāyakaḥ

paścime sthāpito bhānuruttare ca svayaṃbhuvaḥ //
dharmeśvarotpattivṛttamākhyātaṃ tattavāgrataḥ

adhunāhaṃ pravakṣyāmi gaṇeśotpattihetukam //
kadācitpārvatī gātrodvarttanaṃ kṛtavatyabhūt

malaṃ tajjanitaṃ dṛṣṭvā haste dhṛtvā svagātrajam //
pratimāṃ ca tataḥ kṛtvā surūpaṃ ca dadarśa ha

jīvaṃ tasyāṃ ca saṃcārya udatiṣṭhattadagrataḥ //
mātaraṃ sa tadovāca ki karomi tavājñayā

// pārvatyuvāca // //
yāvatsnānaṃ kariṣyāmi tāvattvaṃ dvāri tiṣṭha me //
āyudhāni ca sarvāṇi paraśvādīni yāni tu

tvayi tiṣṭhati maddvāre ko'pi vighnaṃ karotu na //
evamukto mahādevyā dvāre'tiṣṭhatsa sāyudhaḥ

etasminnaṃtare devo mahādevo jagāma ha //
ābhyaṃtare praveṣṭuṃ ca matiṃ dadhre maheśvaraḥ

dvārasthena gaṇeśena praveśodāyi tasya na //
tataḥ kruddho mahādevaḥ parasparamayudhyata

yuddhaṃ kṛtvā tataścobhau parasparavadhaiṣiṇau //
paraśuṃ jaghnivāndeva lalāṭe parame śubham

tato devo mahādevaḥ śūlamudyamya cāhanat //
śiraściccheda śūlena tadbhūmau nipapāta ha

taṃ dṛṣṭvā patitaṃ putraṃ pārvatī praruroda ha //
hāhākāro mahānāsīttadā tatra nipātite

pārvatīṃ vikalāṃ dṛṣṭvā devadevo maheśvaraḥ //
ciṃtayāmāsa devo'pi kiṃ kṛtaṃ vā mudhā mayā

etasminnaṃtare tatra gajāsuramapaśyata //
taṃ dṛṣṭvā ca mahādaityaṃ sarvalokaikapūjitaḥ

jaghnivāṃstacchiro gṛhya pārvatyā kṛtamarbhakam //
uttasthau sagaṇastatra mahādevasya sannidhau

tato nāma cakārāsya gajānana iti sphuṭam //
surāḥ sarve ca saṃpṛktā harṣitā munayastathā

stuvaṃti stutibhiḥ śaśvatkuṭumbakuśalaṃkaram //
vikrīṇāti kuṭumbaṃ yo modakārthaṃ samarcake

dakṣiṇasyāṃ pratolyāṃ tamekadaṃtaṃ ca pīvaram //
ārcayacca mahādevaṃ svayaṃbhūḥ surapūjitam

jaṭilaṃ vāmanaṃ caiva nāgayajñopavītakam //
tryakṣaṃ caiva mahākāyaṃ karadhvajakuṭhārakam

dadhānaṃ kamalaṃ haste sarvavipravināśanam //
rakṣaṇāya ca lokānāṃ nagarāddakṣiṇāśritam

suprasannaṃ gaṇādhyakṣaṃ siddhibuddhinamaskṛtam //
siṃdūrābhaṃ suraśreṣṭhaṃ tīvrāṃkuśadharaṃ śubham

śatapuṣpaiḥ śubhaiḥ puṣpairarcitaṃ hyamarādhipaḥ //
praṇamya ca mahābhaktyā tuṣṭuvu staṃ surāstataḥ

// devā ūcuḥ // //
namastestu sureśāya gaṇānāṃ pataye namaḥ //
gajānana namastubhyaṃ mahādevādhidaivata

bhaktipriyāya devāya gaṇādhyakṣa namostu te //
ityetaiśca śubhaiḥ stotraiḥ stūyamāno gaṇādhipaḥ //
suprītaśca gaṇādhyakṣaḥ tadā'sau vākyamabravīt //

// gaṇādhyakṣa uvāca //
tuṣṭo'haṃ vo surā brūta vāṃchitaṃ ca dadāmi vaḥ

// devā ūcuḥ // //
tvamatrastho mahābhāga kuru kāryaṃ ca naḥ prabho //
dharmāraṇye ca viprāṇāṃ vaṇigjananivāsinām

brahmacaryādiyuktānāṃ dhārmikāṇāṃ gaṇeśvara //
varṇāśrametarāṇāṃ ca rakṣitā bhava sarvadā /

tvatprasādānmahābhāga dhanasaukhyayutā dvijāḥ //
bhavaṃtu sarve satataṃ vaṇijaśca mahābalāḥ

rakṣitavyāstvayā deva yāvaccaṃdrārkamedinī //
evamastviti sovādīdgaṇanātho maheśvaraḥ

devāśca harṣamāpannāḥ pūjayaṃti gaṇādhipam //
tato devā mudā yuktāḥ puṣpadhūpāditarpaṇaiḥ

ye cānye manujā loke nirvighnārthaṃ ca pūjayan

vivāhotsavayajñeṣu pūrvamārādhito bhavet //
dharmāraṇyodbhavānāṃ ca prasanno bhava sarvadā //

iti śrīskāṃde mahāpurāṇa ekāśītisāhasryāṃ sahitāyāṃ tṛtīye brahmakhaṇḍe pūrvabhāge gaṇeśaprasthāpanāvarṇanaṃnāma dvādaśo'dhyāyaḥ