Skanda Purana · Verses 2.9-4

// brahmovāca // //
naivedyasya vidhiṃ brūhi deva me tattvataḥ prabho //
annaṃ katividhaṃ ceṣṭaṃ vyaṃjanādīnyaśeṣataḥ

//śrībhagavānuvāca // //
sādhu pṛṣṭaṃ tvayā vatsa mama prītikaraṃ param //
vakṣyāmi te'nnapānādivyaṃjanādīnyaśeṣataḥ

ādau hiraṇmayaṃ pātraṃ tadabhāve ca rājatam //
tadabhāve ca pālāśaṃ vistīrṇaṃ bahusundaram

kacolāḥ śataśaḥ kāryāḥ pātre vai parito'nagha //
tanmadhye vyaṃjanā deyā nānāphalamayāḥ śubhāḥ

pāyasaṃ candrasaṃkāśaṃ pātre vai śarkarāyutam //
bhaktaṃ kumudasaṃkāśaṃ mudgānkācaprabhāñchubhān

nānāvyaṃjanasaṃruddhaṃ tribhiḥ paṃktibhireva ca //
niṃbūrasena caṃdreṇa phalamūlayutena ca

vaikṛtāśca tadā kāryāḥ śataśo bhojane mama //
drākṣāstu miśritāścūtakaramarda kṛtāḥ śubhāḥ

marīcapippalīsārdrakailācaṃdrakasaṃyutāḥ //
kvāthitāḥ kathikāḥ kāryāḥ śataśo bhojane mama

pralehanāstathā kāryāḥ kacolaśatasaṃkulāḥ //
nānākusumasaṃmodayuktāḥ sahasi me priyāḥ

maṃḍakā vartulā ramyāḥ samāḥ sarvatra biṃduvat //
sitayā sahitenā'tha dugdhena kvathitena ca

madhuvarṇena gavyena yukte tasminsubhojane //
kacole suprabhe vatsa sthitaṃ kāṃcanasuprabham

ghṛtaṃ suvāsitaṃ prītyā deyaṃ hi mama bhojane //
tatra godhūmapātreṇa caṃdrakeṇa hi cojjvalam

sauvāhlikāḥ pūrikāstu śatacchidrāḥ saveṣṭikāḥ //
apūpāśca tathā kṣīraṃ prakārāṃstu prakārayet

maṇayaḥ sūtrasaṃjñāśca mālatīkusumādayaḥ //
parpaṭā varpaṭā ramyā māṣakūṣmāṃḍasaṃbhavāḥ

vaṭakānnavadhā ramyānkuryānmāse sahe mama //
dvidhā jātīmarīcaiśca pūritā droṇake śubhāḥ

yuktena lavaṇenā'tiśuddhatailena pūritāḥ //
kuṃkumābhāḥ snehahīnāḥ sakṣatā iva durjanāḥ

dadhidugdhayutāḥ kecicciṃciṇīcūtasaṃbhavāḥ //
drākṣārasayutāḥ kecittathaivekṣurasairyutāḥ

rājikā jalamadhyasthāstathā'nye sitayā saha //
rasaiścaturvidhaiścānyairvaṭakā navadhā matāḥ

vajraprabhā'nukaṇikācārabījasukhārikaiḥ //
śakalairnārikelasya lavaṃgaśatasaṃyutāḥ

ghṛtakṣīrasitādyāstāḥ kaṭāhe supraloḍitāḥ //
labdhāsitādikṛsararamyāḥ snigdhāśca pheṇikāḥ

parākikāsu vai pakvāḥ kṛtāścaṃdreṇa polikāḥ //
modakāstatra vai kāryāścārabījabhavāḥ pare

sitayā sahitāḥ kāryā anye dugdhena nirmitāḥ //
nārikelaphalaiścā'nye vṛkṣaniryāsanirmitāḥ

badāmaiśca śubhāścā'nye tilaiśca kaṇabījakaiḥ //
īdṛśānmodakāṃścānyāṃstuṣṭyarthaṃ mama kārayet

arśoghnaṃ mocanīkaṃdaṃ tathā''rdraṃ karamardakam //
nāriṃgaṃ ciṃciṇīkaṃ ca kaṃkolaphalameva ca

daśāraṃ tripurījātaṃ śubhaṃ niṃbaphalaṃ bisam //
tiṃdūphalaṃ lavaṃgaṃ ca śrīphalaṃ tilakaṃ luti

valkalaṃ vaṃśakārīraṃ tathā kāyaphalaṃ balam //
drākṣāphalaṃ cūtaphalaṃ ramyaṃ kaṃṭakinīphalam

dhātrīphalaṃ śuktibhavaṃ phalamaṃbāḍavaṃ tathā //
raṃbhāphalaṃ pippalī ca marīcāśca manoharāḥ

śuddhasarṣapatailena lavaṇena suvedhitam //
tathā rājikayā viddhaṃ tribhirvarṣairghaṭe sthitam

evaṃvidhāni jātāni vyaṃjanāni ca mānada //
kartavyāni sahomāse mama prītikarāṇi vai

etādṛśe bhojane cedasāmarthyaṃ bhavedyadi //
evaṃ kāryaṃ tadā tena saṃkṣepeṇa śṛṇuṣva me

laḍḍūkamekaṃ ghṛtapūramekaṃ phenadvayaṃ kokarasatrayaṃ ca //
ghṛtaplutaṃ maṃḍakaṣoḍaśānāṃ vaṭāṣṭadāyī narakaṃ na paśyet

āḍhakaṃ suciraparyuṣitaṃ ca dugdhaṃ khaṃḍasya ṣoḍaśapalāni śaśiprabhasya //
sarpiṣpalaṃ madhupalaṃ maricaṃ dvikarṣaṃ śuṃṭhyāḥ palārdhamathavā'rdhapalaṃ caturṇām

ślakṣṇe paṭe lalanayā mṛdupāṇighṛṣṭāṃ karpūradhūlidhavalīkṛtabhāṃḍasaṃsthām //
etāṃ śubhāṃ rasavatīṃ prakaroti yo vai kāmāndadāmi sakalānmanujasya tasya

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe brahmaviṣṇusaṃvāde mārgaśīrṣamāhātmye naivedyavidhikathanaṃnāma navamo'dhyāyaḥ