Skanda Purana · Verses 2.7-5

// brahmovāca // //
māhātmyaṃ vada deveśa puṣpajātisamudbhavam //
yenayena ca puṣpeṇa yatphalaṃ labhate naraḥ

// śrībhagavānuvāca // //
śṛṇu putra pravakṣyāmi māhātmyaṃ puṣpasaṃbhavam//
yena puṣpeṇa me prītirbhavetsamyaṅna saṃśayaḥ

mallikā mālatī caiva yūthikā cātimuktakā //
pāṭalā karavīraṃ ca jayantī vijayā tathā

kubjakastabakaścaiva karṇikāraṃ kuraṃṭakaḥ //
caṃpakaścātakaḥ kundo bāṇaḥ karcūramallikā

aśokastilakaścaiva tathaivā'parayūthikaḥ //
amī puṣpaprakārāstu śastā me pūjane suta

ketakīpatrapuṣpaṃ ca bhṛṃgarājastathaiva ca //
tulasīpatrapuṣpaṃ ca sadyaḥ prītikaraṃ mama

padmānyaṃbusamutthāni raktanīlotpale tathā //
sitotpalaṃ sahomāse mamā'tyantaṃ hi vallabham

tānyeva ca praśastāni kusumāni ca me suta //
yāni syurvarṇayuktāni rasagandhayutāni ca

nirgaṃdhānyapi śastāni kusumāni matāni me //
surabhīṇi tathā'nyāni varjayitvā tu ketakīm

bāṇaṃ ca caṃpakā'śokaṃ karavīraṃ ca yūthikā //
pāribhadraṃ pāṭalā ca bakulaṃ giriśālinī

bilvapatraṃ śamīpatraṃ patraṃ bhṛṃgirajasya ca //
tamālāmalakīpatraṃ śastaṃ me pūjane suta

puṣpairaraṇyasaṃbhūtaiḥ patrairvā girisaṃbhavaiḥ //
aparyuṣitaniśchidraiḥ prokṣitairjaṃtuvarjitaiḥ

athārāmodbhavairvāpi puṣpaiḥ saṃpūjayecca mām //
puṣpajātiviśeṣeṇa bhavetpuṇyaṃ viśeṣataḥ

tapaḥśīlaguṇopete pātre vedasya pārage //
daśa dattvā suvarṇāni yatphalaṃ labhate naraḥ //
tatphalaṃ labhate martyaḥ sahe kusumadānataḥ

droṇapuṣpe tathaikasminmahyaṃ ca vinivedite //
daśa dattvā suvarṇāni phalaṃ tadadhikaṃ suta

puṣpātpuṣpāṃtare bhedo yathā''sīttannibodha me

droṇapuṣpasahasrebhyaḥ khādiraṃ tu viśiṣyate //
khādirātpuṣpasāhasrācchamīpuṣpaṃ viśiṣyate

śamīpuṣpasahasrebhyo bilvapuṣpaṃ viśiṣyate //
bilvapuṣpasahasrebhyo bakapuṣpaṃ viśiṣyate

bakapuṣpasahasrebhyo naṃdyāvartaṃ viśiṣyate //
naṃdyāvartasahasrāddhi karavīraṃ viśiṣyate

karavīrasahasrasya kusumaṃ śvetamuttamam //
karavīraśvetapuṣpātpālāśaṃ puṣpamuttamam

pālāśapuṣpasāhasrātkuśapuṣpaṃ viśiṣyate //
kuśapuṣpasahasrāddhi vanamālā viśiṣyate

vanamālā sahasrāddhi caṃpakaṃ ca viśiṣyate //
caṃpakasya puṣpaśatādaśokaṃ puṣpamuttamam

aśokapuṣpasāhasrācchevantīpuṣpamuttamam //
śevantīpuṣpasāhasrātkujakaṃ puṣpamuttamam

kujapuṣpasahasrāddhi mālatīpuṣpamuttamam //
mālatīpuṣpasāhasrātsandhyāpuṣpaṃ viśiṣyate

sandhyā puṣpasahasrāddhi trisaṃdhyāpuṣpamuttamam

trisaṃdhyāraktasāhasrāttrisaṃdhyāśvetamuttamam //
trisandhyāśvetasāhasrātkundapuṣpaṃ viśiṣyate //

kundapuṣpasahasrāddhi jātīpuṣpaṃ viśiṣyate //
sarvāsāṃ puṣpajātīnāṃ jātīpuṣpamihottamam

jātīpuṣpasahasreṇa yacchenmālāṃ suśobhanām //
mahyaṃ yo vidhivaddadyāttasya puṇyaphalaṃ śṛṇu

kalpakoṭisahasrāṇi kalpakoṭiśatāni ca //
matpure vasate nityaṃ mamatulya parākramaḥ

yeṣāṃ saṃti ca puṣpāṇi praśastāni mamā'rcane //
teṣāṃ patrāṇi śastāni tadabhāve phalāni ca

etaiḥ patraiśca puṣpaiśca phalaiścā'pi tathāhi mām //
arcandaśasuvarṇasya pratyekaṃ phalamāpnuyāt

etābhiḥ puṣpajātībhiḥ sahomāse'rcayaṃti ye //
bhaktiṃ dadāmi teṣāṃ vai tuṣṭaḥ sannātra saṃśayaḥ

dhanaṃ putrāṃstathā dārānyatkiṃcidvāṃchate hi saḥ //
tattaddadāmi deveśa puṣpairebhiḥ pratoṣitaḥ

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe brahmaviṣṇusaṃvāde mārgaśīrṣamāhātmye jātīpuṣpaśraiṣṭhyakathanapūrvakaṃ viṣṇukaṇṭhe tatsahasrapuṣpāṃkitamālāsthāpanaphalayovarṇanaṃnāma saptamo'dhyāyaḥ