સ્કંદ પુરાણ · શ્લોક 2.7-5

॥ બ્રહ્મોવાચ ॥ ॥
માહાત્મ્યં વદ દેવેશ પુષ્પજાતિસમુદ્ભવમ્ ॥
યેનયેન ચ પુષ્પેણ યત્ફલં લભતે નરઃ

॥ શ્રીભગવાનુવાચ ॥ ॥
શૃણુ પુત્ર પ્રવક્ષ્યામિ માહાત્મ્યં પુષ્પસંભવમ્॥
યેન પુષ્પેણ મે પ્રીતિર્ભવેત્સમ્યઙ્ન સંશયઃ

મલ્લિકા માલતી ચૈવ યૂથિકા ચાતિમુક્તકા ॥
પાટલા કરવીરં ચ જયન્તી વિજયા તથા

કુબ્જકસ્તબકશ્ચૈવ કર્ણિકારં કુરંટકઃ ॥
ચંપકશ્ચાતકઃ કુન્દો બાણઃ કર્ચૂરમલ્લિકા

અશોકસ્તિલકશ્ચૈવ તથૈવાઽપરયૂથિકઃ ॥
અમી પુષ્પપ્રકારાસ્તુ શસ્તા મે પૂજને સુત

કેતકીપત્રપુષ્પં ચ ભૃંગરાજસ્તથૈવ ચ ॥
તુલસીપત્રપુષ્પં ચ સદ્યઃ પ્રીતિકરં મમ

પદ્માન્યંબુસમુત્થાનિ રક્તનીલોત્પલે તથા ॥
સિતોત્પલં સહોમાસે મમાઽત્યન્તં હિ વલ્લભમ્

તાન્યેવ ચ પ્રશસ્તાનિ કુસુમાનિ ચ મે સુત ॥
યાનિ સ્યુર્વર્ણયુક્તાનિ રસગન્ધયુતાનિ ચ

નિર્ગંધાન્યપિ શસ્તાનિ કુસુમાનિ મતાનિ મે ॥
સુરભીણિ તથાઽન્યાનિ વર્જયિત્વા તુ કેતકીમ્

બાણં ચ ચંપકાઽશોકં કરવીરં ચ યૂથિકા ॥
પારિભદ્રં પાટલા ચ બકુલં ગિરિશાલિની

બિલ્વપત્રં શમીપત્રં પત્રં ભૃંગિરજસ્ય ચ ॥
તમાલામલકીપત્રં શસ્તં મે પૂજને સુત

પુષ્પૈરરણ્યસંભૂતૈઃ પત્રૈર્વા ગિરિસંભવૈઃ ॥
અપર્યુષિતનિશ્છિદ્રૈઃ પ્રોક્ષિતૈર્જંતુવર્જિતૈઃ

અથારામોદ્ભવૈર્વાપિ પુષ્પૈઃ સંપૂજયેચ્ચ મામ્ ॥
પુષ્પજાતિવિશેષેણ ભવેત્પુણ્યં વિશેષતઃ

તપઃશીલગુણોપેતે પાત્રે વેદસ્ય પારગે ॥
દશ દત્ત્વા સુવર્ણાનિ યત્ફલં લભતે નરઃ ॥
તત્ફલં લભતે મર્ત્યઃ સહે કુસુમદાનતઃ

દ્રોણપુષ્પે તથૈકસ્મિન્મહ્યં ચ વિનિવેદિતે ॥
દશ દત્ત્વા સુવર્ણાનિ ફલં તદધિકં સુત

પુષ્પાત્પુષ્પાંતરે ભેદો યથાઽઽસીત્તન્નિબોધ મે

દ્રોણપુષ્પસહસ્રેભ્યઃ ખાદિરં તુ વિશિષ્યતે ॥
ખાદિરાત્પુષ્પસાહસ્રાચ્છમીપુષ્પં વિશિષ્યતે

શમીપુષ્પસહસ્રેભ્યો બિલ્વપુષ્પં વિશિષ્યતે ॥
બિલ્વપુષ્પસહસ્રેભ્યો બકપુષ્પં વિશિષ્યતે

બકપુષ્પસહસ્રેભ્યો નંદ્યાવર્તં વિશિષ્યતે ॥
નંદ્યાવર્તસહસ્રાદ્ધિ કરવીરં વિશિષ્યતે

કરવીરસહસ્રસ્ય કુસુમં શ્વેતમુત્તમમ્ ॥
કરવીરશ્વેતપુષ્પાત્પાલાશં પુષ્પમુત્તમમ્

પાલાશપુષ્પસાહસ્રાત્કુશપુષ્પં વિશિષ્યતે ॥
કુશપુષ્પસહસ્રાદ્ધિ વનમાલા વિશિષ્યતે

વનમાલા સહસ્રાદ્ધિ ચંપકં ચ વિશિષ્યતે ॥
ચંપકસ્ય પુષ્પશતાદશોકં પુષ્પમુત્તમમ્

અશોકપુષ્પસાહસ્રાચ્છેવન્તીપુષ્પમુત્તમમ્ ॥
શેવન્તીપુષ્પસાહસ્રાત્કુજકં પુષ્પમુત્તમમ્

કુજપુષ્પસહસ્રાદ્ધિ માલતીપુષ્પમુત્તમમ્ ॥
માલતીપુષ્પસાહસ્રાત્સન્ધ્યાપુષ્પં વિશિષ્યતે

સન્ધ્યા પુષ્પસહસ્રાદ્ધિ ત્રિસંધ્યાપુષ્પમુત્તમમ્

ત્રિસંધ્યારક્તસાહસ્રાત્ત્રિસંધ્યાશ્વેતમુત્તમમ્ ॥
ત્રિસન્ધ્યાશ્વેતસાહસ્રાત્કુન્દપુષ્પં વિશિષ્યતે ॥

કુન્દપુષ્પસહસ્રાદ્ધિ જાતીપુષ્પં વિશિષ્યતે ॥
સર્વાસાં પુષ્પજાતીનાં જાતીપુષ્પમિહોત્તમમ્

જાતીપુષ્પસહસ્રેણ યચ્છેન્માલાં સુશોભનામ્ ॥
મહ્યં યો વિધિવદ્દદ્યાત્તસ્ય પુણ્યફલં શૃણુ

કલ્પકોટિસહસ્રાણિ કલ્પકોટિશતાનિ ચ ॥
મત્પુરે વસતે નિત્યં મમતુલ્ય પરાક્રમઃ

યેષાં સંતિ ચ પુષ્પાણિ પ્રશસ્તાનિ મમાઽર્ચને ॥
તેષાં પત્રાણિ શસ્તાનિ તદભાવે ફલાનિ ચ

એતૈઃ પત્રૈશ્ચ પુષ્પૈશ્ચ ફલૈશ્ચાઽપિ તથાહિ મામ્ ॥
અર્ચન્દશસુવર્ણસ્ય પ્રત્યેકં ફલમાપ્નુયાત્

એતાભિઃ પુષ્પજાતીભિઃ સહોમાસેઽર્ચયંતિ યે ॥
ભક્તિં દદામિ તેષાં વૈ તુષ્ટઃ સન્નાત્ર સંશયઃ

ધનં પુત્રાંસ્તથા દારાન્યત્કિંચિદ્વાંછતે હિ સઃ ॥
તત્તદ્દદામિ દેવેશ પુષ્પૈરેભિઃ પ્રતોષિતઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં દ્વિતીયે વૈષ્ણવખણ્ડે બ્રહ્મવિષ્ણુસંવાદે માર્ગશીર્ષમાહાત્મ્યે જાતીપુષ્પશ્રૈષ્ઠ્યકથનપૂર્વકં વિષ્ણુકણ્ઠે તત્સહસ્રપુષ્પાંકિતમાલાસ્થાપનફલયોવર્ણનંનામ સપ્તમોઽધ્યાયઃ