Skanda Purana · Verses 2.34-3

// athāgastyatīrthāgastyeśvarayoḥ prabhāvaḥ //
// arjuna uvāca // //
śrotrāñjalibhyāṃ pītvāpi bhavadvākyāmṛtaṃ muhuḥ //
mano nopaiti me tṛptiṃ bhūyaḥ śravaṇakāṅkṣayā

kriyāsamabhihāro me tvadvākyākarṇanaiṣiṇaḥ //
manaḥ khedāya mā bhūtte karuṇābharitātmanaḥ

idānīṃ śrotumicchāmi nadyāmasyāṃ mahāmune //
kutra kutra samarthāni tīrthānyaghanibarhaṇe

kāḥ kāḥ puṇyataraṃgiṇyaḥ saṅgatā anayā mune //
kutra snānena kṛttāghā nopayāṃti yamādbhayam

harācyutādidevānāṃ puṇyānyāyatanāni ca //
yāniyāni ca puṇyāni tiṣṭhantyasyāstaṭadvaye //

teṣu kṣetreṣu manujairyatphalaṃ samavāpyate //
vihitairvidhivatsnānadānādiśubhakarmabhiḥ

sopākhyānamidaṃ sarvaṃ veditaṃ vedavittama //
saṃjātā mahatī prītirvistāryācakṣva me kramāt

// bharadvāja uvāca // //
yatpṛṣṭaṃ bhavatā pārtha kramādvistārya kathyate //
ārabhyāgastyatīrthendrādasyāstīrthaughavaibhavam

akhaṇḍajñānarūpeṇa sarvalokahitaiṣiṇā //
surāsurāṇāṃ saṃbhāvyenāgastyena mahātmanā

vasudhāmavatīrṇāyāṃ prathamaṃ taddharādharāt //
snātvā yatra mahānadyāṃ saṃprāpnoti kṛtārthatām

agastyatīrthamityuktaṃ pāvanaṃ tajjagattraye //
tatra snānena śuddhiḥ syānmahāpātakināmapi

anekajanmācaritamahāpātakasaṃhatiṃm //
nira divi modante tatra snānaratā janāḥ

ye tatra tīrthe yatinaḥ kṛtasnānā yatendriyāḥ //
gobhūtilahiraṇyādimahādānāni kurvate

te prāpnuvanti saṃpūrṇaṃ gaṃgādvāre samāhitaiḥ //
vihitānāṃ śataguṇaṃ dānānāṃ phalamarjuna//

atrāsti bhagavānīśaḥ khyāto'gastyeśasaṃjñayā //
sthāpito'gastyamuninā lokānandavidhāyinā

snātvā tasyāṃ mahānadyāṃ talliṃgaṃ pūjayanti ye //
daśānāmaśvamedhānāṃ phalaṃ saṃprāpnuvaṃti te

// atha suvarṇamukharīsnānakālanirṇayaḥ // //
dhanūrāśiṃ parityajya yadā makaramaṃśumān//
viśettadayanaṃ puṇyamuttaraṃ parikīrtitam

tasmindine ye niyatā nadyāṃ snātvā samāhitāḥ //
paśyanti pārvatīnāthamagastyeśaṃ surārcitam

agniṣṭomasahasrasya vājapeyaśatasya ca //
phalaṃ saṃprāpya modante divi devagaṇārcitāḥ

mṛgasaṃkramavelāyāṃ puruṣairmaṃgalārthibhiḥ //
avaśyameva kartavyamagastyeśasya darśanam

// atha devarṣipitṛtīrthamāhātmyam // //
aiśānyāṃ tasya tīrthasya deśe krośamite'rjuna //
asti tīrthatrayaṃ khyātaṃ devarṣipitṛnāmabhiḥ

devarṣipitarastatra muninā tena pūjitāḥ //
pradadurhṛṣṭamanasaḥ sarvānsamabhivāñchitān

tadā devarṣipitṛbhiridaṃ tīrthatrayaṃ kramāt //
asmannāmabhirīḍyaṃ syādityuktaṃ tasya sannidhau

tasmiṃstīrthatraye ye tu snātvā vihitatarpaṇāḥ //
ṛṇatrayavinirmuktāste yānti divamakṣayām

// atha veṇāsuvarṇamukharīsaṃgamavarṇanam // //
tataḥ prāguttarakṣoṇyāṃ yojanadvayasīmani //
prāptā suvarṇamukharī veṇānāma mahānadī

samudagrarayāghātanipātitataṭadrumā //
kulyānirgatavāḥpūrasamāplāvitakānanā

uttuṅgapulinotsaṃgakhelatkokakulākulā //
ambujāmodalolālimālālīlāravānvitā

atikramya samuttuṃgānanekāndharaṇīdharān//
prabhūtatoyarucirā suvarṇamukharīṃ gatā

nadīdvayavyatikare kṛtasnānā yathāvidhi //
daśānāmaśvamedhānāmakhaṇḍaṃ prāpnuyuḥ phalam

saṃgatā veṇayā puṇyā suvarṇamukharī nadī //
giridurgamamārgeṇa yayāvuttaravāhinī

madhyagena mahīdhrāṇāṃ mārgeṇa viṣameṇa sā //
gatvā vireje taṭinī yojanānāṃ catuṣṭayam

pūrvatastasya deśasya viṣaye sārdhayojane //
udakkūle mahānadyāḥ prāgvāhinyā manohare

agastyeśvara nāmāste khyātaṃ liṃgaṃ puradviṣaḥ //
smaraṇaṃ devamartyānāṃ samastāghanivāraṇam

tatra snātvā mahānadyāṃ ye narā niyatendriyāḥ //
paśyanti pārvatīnāthamagastyena pratiṣṭhitam

anekaiḥ pūrvajananairarjitaṃ pāpasañcayam //
te nirasya surāvāse modante kālamakṣayam //

tataḥ sodaṅmukhī bhūtvā suvarṇamukharī yayau //
yojanārdhamidaṃ deśaṃ tīrthasaṃghasamanvitā

// atha suvarṇamukharyā vyāghrapadāhvaya nadīsaṃgamaḥ // //
tasmindeśe tu hintālatālasālamanorame //
gatā suvarṇamukharī nadī vyāghrapadāhvayā

durvārabhūriduritavinivāraṇapeśalā //
nīraṃdhatīravānīravanamaṇḍalamaṃḍitā

siddhagaṃdharvalalanā līlāgāhanaśālinī //
tapasvikanyāniḥkṣipta balipuṣpavirājitā //

haṃsakāraṇḍavakrauñcakulakolāhalākulā //
prākpravāhā samāgatya śailāntaragatādhvanā

saṃgame saritostatra kṛtasnānā narottamāḥ //
samagramaśvamedhānāṃ daśānāprāpnuyuḥ phalam

// atha śaṃkhatīrthavarṇanam // //
tatra vyāghrapadākhyāyāstaṭe lokamalāpahe //
anaghaṃ sarvapāpaghnaṃ śaṃkhatīrthaṃ virājate

brahmarṣiniyatāvāsaṃ suragandharvasevitam //
darśanasnānapānādyairamitānandadāyakam

tatrāste bhagavānīśaḥ śaṃkheśonāma phālguna //
śaṃkhanāmnā munīṃdreṇa liṃgarūpaṃ pratiṣṭhitam

ye tatra tīrthe susnātāḥ paśyanti vṛṣavāhanam //
daśāśvamedhajaṃ puṇyaṃ labdhvā yāṃti surālayam

yuktā tayā vyāghrapadābhidhānayā gatvā tato yojanasaṃmitāṃ bhuvam //
yayau munīndrairvṛṣabhācalāṃtikaṃ saṃsevyamānā śubhanirmalodakā

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye'gastyatīrthādivividhatīrthamāhātmyavarṇanaṃnāma catustriṃśo'dhyāyaḥ