Skanda Purana · Chapter 2.31

// vālakhilyā ūcuḥ // //
kārtike śuklanavamī tatrā'bhūddvāparaṃ yugam //
pūrvā'parāhṇagā grāhyā kramāddānopavāsayoḥ

atra kūṣmāṃḍakonāma hato daityastu viṣṇunā //
tadromabhiḥ samudbhūtā vallyaḥ kūṣmāṃḍasaṃbhavāḥ

tasmātkūṣmāṃḍadānena phalamāpnoti niścitam //
asyāmeva navamyāṃ tu kuryātkṛṣṇotsavaṃ naraḥ

svaśākhoktena vidhinā tulasyāḥ karapīḍanam //
kanyādānaphalaṃ tasya jāyate nātra saṃśayaḥ

kārtike śuklanavamīmavāpya vijiteṃdriyaḥ//
hariṃ vidhāya sauvarṇaṃ tulasyā sahitaṃ śubham

pūjayedvidhivadbhaktyā vratī tatra dinatrayam //
evaṃ yathoktavidhinā kuryādvaivāhikaṃ vidhim

grāhyaṃ trirātramatraiva navamyādyanurodhataḥ //
madhyāhnavyāpinī grāhyā navamī pūrvavedhitā

dhātryaśvatthau ya ekatra pālayitvā samudvahet//
na naśyate tasya puṇyaṃ kalpakoṭiśatairapi

kanakasya sutā pūrvamekādaśyāṃ kiśorikā //
cakāra bhaktitaḥ sāyaṃ tulasyudvāhajaṃ vidhim

tena vaidhavyadoṣeṇa nirmuktā''sītsulocanā//
tasmātsāyaṃ prakartavyastulastudvāhajo vidhiḥ

avaśyameva kartavyaḥ prativarṣaṃ tu vaiṣṇavaiḥ//
vidhiṃ tasya pravakṣyāmi yathā sāṃgā kriyā bhaveta/११//
viṣṇostu pratimāṃ kuryātpalasya svarṇajāṃ śubhām//
tadarddhārddhaṃ tadarddhārddhaṃ yathāśaktyā prakalpayet

prāṇapratiṣṭhāṃ kṛtvaiva tulasīviṣṇurūpayoḥ //
tata utthāpayeddevaṃ pūrvoktaiśca stavādibhiḥ

upacāraiḥ ṣoḍaśabhiḥ pūjayetpuruṣoktibhiḥ //
deśakālau tataḥ smṛtvā gaṇeśaṃ tatra pūjayet

puṇyāhaṃ vācayitvātha nāṃdīśrāddhaṃ samācaret //
vedavādyādinirghoṣairviṣṇumūrtiṃ samānayet

tulasīnikaṭe sā tu sthāpyā cāṃ'tarhitā paṭaiḥ //
āgaccha bhagavandeva arcayiṣyāmi keśava //

tubhyaṃ dāsyāmi tulasīṃ sarvakāmaprado bhava//
dadyāttrivāramarghyaṃ ca pādyaṃ viṣṭarameva ca

tata ācamanīyaṃ ca triruktvā ca pradāpayet//
tato dadhi ghṛtaṃ kṣīraṃ kāṃsyapātrapuṭīkṛtam

madhuparkaṃ gṛhāṇa tvaṃ vāsudeva namostu te//
haridrālepānābhyaṃgakāryaṃ sarvaṃ vidhāya ca

godhūlisamaye pūjyau tulasīkeśavau punaḥ//
pṛthakpṛthaktathā kāryau saṃmukhau maṃgalaṃ paṭhet

īṣaddṛśye bhāskare tu saṃkalpaṃ tu samuccaret //
svagotrapravarānuktvā tathā tripuruṣādikam

anādimadhyanidhana trailokyapratipālaka //
imāṃ gṛhāṇa tulasīṃ vivāhavidhineśvara

pārvatībījasaṃbhūtāṃ vṛṃdābhasmani saṃsthitām //
anādimadhyanidhanāṃ vallabhāṃ te dadāmyaham

payoghaṭaiśca sevābhiḥ kanyāvadvardhitā mayā //
tvatpriyāṃ tulasīṃ tubhyaṃ dadāmi tvaṃ gṛhāṇa bhoḥ

evaṃ dattvā ca tulasīṃ paścāttau pūjayettataḥ//
rātrau jāgaraṇaṃ kuryādvivāhotsavapūrvakam

tataḥ prabhātasamaye tulasīṃ viṣṇumarcayet //
vahnisaṃsthāpanaṃ kṛtvā dvādaśākṣaravidyayā

pāyasā''jyakṣaudratilairjuhyādaṣṭottaraṃśatam //
tataḥ sviṣṭakṛtaṃ hutvā dadyātpūrṇāhutiṃ tataḥ //
ācāryaṃ ca samabhyarcya homaśeṣaṃ samāpayet

caturo vārṣikānmāsānniyamo yena yaḥ kṛtaḥ //
kathayitvā dvijebhyastattathā'nyatparipūrayet

idaṃ vrataṃ mayā deva kṛtaṃ prītyai tava prabho //
nyūnaṃ saṃpūrṇatāṃ yātu tvatprasādājjanārdana

revatīturyacaraṇe dvādaśīsaṃyute naraḥ //
na kuryātpāraṇaṃ kurvanvrataṃ niṣphalatāṃ nayet

tato yeṣāṃ padārthānāṃ varjanaṃ tu kṛtaṃ bhavet //
cāturmāsye'thavā corje brāhmaṇebhyaḥ samarpayet //
tataḥ sarvaṃ samaśnīyādyadyattyaktaṃ vrate sthitam

daṃpatibhyāṃ sahaivā'tra bhoktavyaṃ ca dvijaiḥ saha

tato bhuktyuttaraṃ yāni galitāni dalāni ca //
tāni bhuktvā tulasyāśca svayaṃ pāpaiḥ pramucyate

ikṣudaṇḍaṃ tathā dhātrīphalaṃ koliphalaṃ tathā //
bhuktvā tu bhojanasyāṃ'te tasyocchiṣṭaṃ vinaśyati

eṣu triṣu na bhuktaṃ cedekaikamapi yena tu //
jñeya ucchiṣṭa āvarṣaṃ naro'sau nā'tra saṃśayaḥ

tataḥ sāyaṃ punaḥ pūjyāvikṣudaṇḍaiśca śobhitaiḥ //
tulasīvāsudevau ca kṛtakṛtyo bhavettataḥ

tato visarjanaṃ kṛtvā dattvā dāyādikaṃ hareḥ //
vaikuṇṭhaṃ gaccha bhagavam̐stulasīsahitaḥ prabho //
matkṛtaṃ pūjanaṃ gṛhya saṃtuṣṭo bhava sarvadā

gacchagaccha suraśreṣṭha svasthāne parameśvara //
yatra brahmādayo devāstatra gaccha janārdana

evaṃ visṛjya deveśamācāryāya pradāpayet //
mūrtyādikaṃ sarvameva kṛtakṛtyo bhavennaraḥ

prativarṣaṃ tu yaḥ kuryāttulasīkarapīḍanam //
bhaktimāndhanadhānyaiḥ sa yukto bhavati niścitam //
ihaloke paratrā'pi vipulaṃ ca yaśo labhet

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye kūṣmāṃḍanavamītulasīvivāhavidhivarṇanaṃnāmaikatriṃśo'dhyāyaḥ