Skanda Purana · Verses 2.3-6

// brahmovāca // //
puṃḍraṃ katividhaṃ kāryaṃ prabrūhi mama keśava //
puṃḍrāṇāṃ śravaṇe'tīva kautukaṃ mama jāyate

// śrībhagavānuvāca // //
śṛṇu putra pravakṣyāmi puṃḍraṃ ca trividhaṃ smṛtam //
tulasīmṛtsnayā sārdhaṃ śrīgopīcaṃdanena ca

haricaṃdanataḥ kāryaṃ puṃḍraṃ tatra vicakṣaṇaiḥ //
śrīkṛṣṇatulasīmūlamṛdamādāya bhaktimān //
dhārayedūrdhvapuṃḍrāṇi haristatra prasīdati

gopīcaṃdana māhātmyaṃ nibodha gadato mama

yo mṛttikāṃ dvāravatīsamudbhavāṃ kare samādāya lalāṭapaṭṭake //
karoti nityaṃ nara ūrdhvapuṃḍraṃ kriyāphalaṃ koṭiguṇaṃ tadā bhavet

kriyāvihīnaṃ yadi mantrahīnaṃ śraddhāvihīnaṃ yadi kālavarjitam//
kṛtvā lalāṭe yadi gopicaṃdanaṃ prāpnoti tatkarmaphalaṃ sadā'vyayam

gopīcaṃdanasaṃbhavaṃ suruciraṃ puṃḍraṃ lalāṭe dvijo nityaṃ dhārayate yadi pratidinaṃ rātrau divā sarvadā//
yatpuṇyaṃ kurujāṃgale ravigrahe māgha prayāge tathā tatprāpnoti tato'dhikaṃ mama gṛhe saṃtiṣṭhate devavat

yasmingṛhe tiṣṭhati gopicaṃdanaṃ bhaktyā lalāṭe manujo bibharti cet //
tasmingṛhe'haṃ nivasāmi sarvadā śriyānvitaḥ kaṃsanihā caturmukha

yo dhārayedddvāravatīsamudbhavāṃ mṛtsnāṃ pavitrāṃ kalikalmaṣāpahām //
nityaṃ lalāṭe mama mantrasaṃyutāṃ yamaṃ na paśyedapi pāpasaṃyutaḥ

yasyāṃ'takāle suta gopicaṃdanaṃ bāhvorlalāṭe hṛdi mastake ca //
prayāti loke kamalāpatermama gobālaghātī yadi brahmahā syāt

grahā na pīḍyaṃti na rakṣasāṃ gaṇā yakṣāḥ piśācoragabhūtanāyakāḥ //
lalāṭapaṭṭe suta gopicaṃdanaṃ saṃtiṣṭhate yasya mama prabhāvāt

ūrdhvapuṃḍramṛjuṃ saumyaṃ lalāṭe yasya dṛśyate //
sa caṃḍālo'pi śuddhātmā pūjya eva na saṃśayaḥ

asnāto yaḥ kriyāḥ kuryādaśuciḥ pāpasaṃyutaḥ //
gopīcaṃdanasaṃparkātpūto bhavati tatkṣaṇāt

aśucirvāpyanācāro mahāpāpaṃ samācaret //
śucireva bhavennityamūrdhvapuṃḍrāṃ'kito naraḥ

matpriyārthaṃ śubhārthaṃ vā rakṣārthaṃ caturānana //
matpūjāhomake caiva sāyaṃ prātaḥ samāhitaḥ//
madbhakto dhārayennityamūrdhvapuṃḍraṃ bhavāpaham

ūrdhvapuṃḍradharo martyo mriyate yadi kutracit //
śvapāko'pi vimānastho mama loke mahīyate

ūrdhvapuṃḍradharo martyo yadā yasyānnamaśnute //
tadā viṃśatkulaṃ tasya narakāduddharāmyaham

vīkṣyā''darśe jale vā'pi yo vidadhyātprayatnataḥ //
ūrdhvapuṇḍraṃ mahābhāga sa yāti paramāṃ gatim

anāmikā śāṃtidoktā madhyamā''yuṣkarī bhavet //
aṃguṣṭhaḥ puṣṭidaḥ proktastarjanī mokṣadāyinī //

gopīcaṃdanakhaṃḍaṃ tu yo dadāti ca vaiṣṇave //
kulamaṣṭottaraṃ tena tāritaṃ vai bhavecchatam

yajño dānaṃ tapo homaḥ svādhyāyaḥ pitṛtarpaṇam //
vyarthaṃ bhavati tatsarvamūrdhvapuṇḍravinākṛtam

yaccharīraṃ manuṣyāṇāmūrdhvapuṇḍravinākṛtam //
tanmukhaṃ naiva paśyāmi śmaśānasadṛśaṃ hi tat

ūrdhvapuṇḍraṃ prakurvīta matsyakūrmādidhāraṇam //
kuryādviṣṇuprasādārthaṃ mahāviṣṇoratipriyam

yatpunaḥ kalikāle tu matpurīsaṃbhavāṃ mṛdam //
matsyakūrmāṃ'kitaṃ cihnaṃ gṛhītvā kurute naraḥ

dehe tasya praviṣṭaṃ māṃ jānīhi tridaśottama //
tasya me nāṃtaraṃ kiṃcitkartavyaṃ śreya icchatā

mamāvatāracihnāni dṛśyaṃte yasya vigrahe //
martyo martyo na vijñeyaḥ sa nūnaṃ māmakī tanuḥ

pāpaṃ sukṛtarūpaṃ tu jāyate tasya dehinaḥ //
mamā''yudhāni dṛśyaṃte likhitāni kalau yuge

ubhābhyāmapi cihnābhyāṃ yoṃ'kito matsyamudrayā //
kūrmayā māmakaṃ tejo vikṣiptaṃ tasya vigrahe

śaṃkha ca padmaṃ ca gadāṃ rathāṃgaṃ matsyaṃ ca kūrmaṃ racitaṃ svadehe //
karoti nityaṃ sukṛtasya vṛddhiṃ pāpakṣayaṃ janmaśatārjitasya

nārāyaṇāyudhairnityaṃ cihnito yasya vigrahaḥ //
pāpakoṭiprayuktasya tasya kiṃ kurute yamaḥ

śaṃkhoddhāre ca yatproktaṃ vasatā koṭijanmabhiḥ //
tatphalaṃ labhate śaṃkhe pratyahaṃ dakṣiṇe bhuje

yatphalaṃ puṣkare proktaṃ puṇḍarīkākṣadarśanāt //
śaṃkhopari kṛte padme tatphalaṃ koṭisaṃmitam

vāme bhuje gadā yasya likhitā dṛśyate kalau//
gadādharo gayāpuṇyaṃ pratyahaṃ tasya yacchati

yaccānaṃdapure proktaṃ cakrasvāmisamīpataḥ //
gadācakre ca likhite tatphalaṃ liṃgadarśane

mamāyudhāṃ'kitaṃ dehaṃ gopīcandanamṛtsnayā //
prayāgādiṣu tīrtheṣu sa gatvā kiṃ kariṣyati

yadāyadā prapaśyeta dehaṃ śaṃkhādicihnitam //
tadātadā prasannohaṃ pāpaṃ tasya dahāmi vai

tiṣṭhate yasya dehe tu ahorātraṃ dine dine //
śaṃkhacakragadāpadmalikhitaṃ sa madātmakaḥ

nārāyaṇāyudhairyuktaṃ kṛtvātmānaṃ kalau yuge //
yatpuṇyaṃ karma kurute merutulyaṃ na saṃśayaḥ

śaṃkhāyudhāṃ'kito bhaktyā yaḥ śrāddhaṃ kurute suta //
vidhihīnaṃ tu saṃpūrṇaṃ pitṝṇāṃ dattamakṣayam

yathā'gnirdahate kāṣṭhaṃ vāyunā preṣito bhṛśam //
tathā dahyaṃti pāpāni dṛṣṭvā ma āyudhāni vai

mama nāmāṃkitāṃ mudrāmaṣṭākṣarasamanvitām //
śaṃkhādisvāyudhairyuktāṃ svarṇaraupyamayīmapi

dhatte bhagavato yastu kalikāle viśeṣataḥ //
prahrādasya samo jñeyo nānyathā mama vallabhaḥ

yasya nārāyaṇī mudrā dehaṃ śaṃkhādicihnitam //
dhātrīphalaiḥ kṛtā mālā tulasīkāṣṭhasaṃbhavā

dvādaśākṣaramaṃtrastu niyuktāni kalevare //
āyudhāni ca viprasya matsamaḥ sa ca vaiṣṇavaḥ

śaṃkhāṃkitatanurvipro bhuṃkte vai yasya veśmani //
tadannaṃ svayamaśnāmi pitṛbhiḥ saha putraka

kṛṣṇāyudhāṃ'kitaṃ dṛṣṭvā sanmānaṃ na karoti yaḥ //
dvādaśābdārjitaṃ puṇyaṃ bāṣkaleyāya gacchati

kṛṣṇāyudhāṃ'kito yastu śmaśāne mriyate yadi //
prayāge yā gatiḥ proktā sā gatistasya mānada

mamā''yudhaiḥ kalau nityaṃ maṃḍito yasya vigrahaḥ //
tatrā''śramaṃ prakurvaṃti vibudhā vāsavādayaḥ

yaḥ karoti ca me pūjāṃ mama śastrāṃkito naraḥ //
aparādhasahasrāṇi nityaṃ tasya harāmyaham

kṛtvā kāṣṭhamayaṃ biṃbaṃ mama śastraiḥ sucihnitam //
yo vā aṃkayate dehaṃ tatsamo nāsti vaiṣṇavaḥ

aṣṭākṣarāṃ'kitā mudrā yasya dhātumayī kare //
śaṃkhapadmādibhiryuktā pūjyate'sau surāsuraiḥ

dhṛtā nārāyaṇī mudrā prahrādena purā kare //
vibhīṣaṇena balinā dhruveṇa ca śukena ca //
māṃdhātrā hyaṃbarīṣeṇa mārkaṃḍeyamukhairdvijaiḥ

śaṃkhādicihnitaiḥ śastrairdehaṃ kṛtvā ca mānada //
evamārādhya māṃ prāptaṃ samīhitaphalaṃ mahat

gopīcaṃdanamṛtsnayā likhito yasya vigrahaḥ //
śaṃkhacakrādipadmāṃ'ko dehe tasya vasāmyaham

sauvarṇaṃ rājataṃ tāmraṃ kāṃsyamāyasameva ca //
cakraṃ kṛtvā tu medhāvī dhārayīta vicakṣaṇaḥ //
dvādaśāraṃ tu ṣaṭkoṇaṃ valitrayavibhūṣitam

evaṃ sudarśanaṃ cakraṃ kārayīta vicakṣaṇaḥ //
upavītādivaddhāryāḥ śaṃkhacakragadāḥ sadā

brāhmaṇaiśca viśeṣeṇa vaiṣṇavaiśca viśeṣataḥ //
upavītaṃ śikhā yadvaccakraṃ lāṃchana saṃyutam

cakralāṃchanahīnasya viprasya viphalaṃ bhavet //
mama cakrāṃ'kito dehaḥ pavitra iti vai śrutiḥ

cakrāṃ'kitāya dātavyaṃ havyaṃ kavyaṃ vicakṣaṇaiḥ //
mama cakrāṃ'kakavacamabhedyaṃ devadānavaiḥ //
ajeyaḥ sarvabhūtānāṃ śatrūṇāṃ rakṣasāmapi

mama cakrāṃ'kakavacaṃ śarīre yasya tiṣṭhati //
nā'śubhaṃ vidyate tasya gṛhaputrādikasya hi

dakṣiṇe ca bhuje vipro bibhṛyādvai sudarśanam //
savye ca śaṃkhaṃ bibhṛyāditi vedavido viduḥ

tattanmaṃtreṇa maṃtrajñaḥ pratiṣṭhāpya pṛthakpṛthak

lalāṭe ca gadā dhāryā mūrdhni cāpaṃ śarastathā //
naṃdakaṃ caiva hṛnmadhye śaṃkhacakre bhujadvaye

tasmātsarvaprayatnena cakrādīndhārayetsadā //
dhāraṇānantaraṃ brūyāttatra caivaṃ dvijottamaḥ

putramitrakalatrādiryaḥ kaścinmatparigrahaḥ //
saha dehena sarvo'sau viṣṇuprītyai mayā'rpitaḥ

paścātsvadharmamāsthāya tiṣṭhedājīvanaṃ mama //
bhaktyā cāvyabhicāriṇyā sarvadā''ptamanorathaḥ

śaṃkhacakrāṃkitaṃ dṛṣṭvā ye niṃdaṃti narādhamāḥ //
avalokya mukhaṃ teṣāmādityamavalokayet //
śrīkṛṣṇanāma coccārya śuddho bhavati nānyathā

iti śrīskāṃde mahāpurāṇa ekāśātisāhasryāṃ saṃhitāyāṃ dvitīye vaiṣṇavakhaṇḍe brahmaviṣṇusaṃvāde gopīcandanādiśaṃkha cakrādyāyudhadhāraṇatattanmudrādhāraṇaprakārakathanaṃnāma tṛtīyo'dhyāyaḥ