Skanda Purana · Verses 2.29-3

//śrīnārāyaṇa uvāca //
upacārairbahuvidhairmānasaistaṃ prapūjya saḥ //
āvāhya sthāpayedbhakto mūrtau sthāpanamudrayā

tatastadaṃgadevāṃśca tattanmantraiḥ pṛthakpṛthak //
āvāhya nāmamantrairvā supratiṣṭhāpayecca saḥ

ghaṇṭādi vādayedvādyaṃ kuryādvā tālikādhvanim //
suptotthitamivā'thainaṃ kārayeddantadhāvanam

śyāmākaviṣṇukāntābhyāṃ dūrvābjābhyāṃ sahodakam //
pādyametatprabhordadyāttatorghyācamanīyake

candanākṣatapuṣpāṇi darbhāgratilasarṣapān //
yavāndūrvā cārghyapātre nikṣipedambunā bhṛte

jātīphalalavaṃgailākaṅkolośīravāsitam //
dadyādācamanīyāmbu tataḥ saṃsnapayeddharim

sugandhipuṣpatailena kuryādabhyaṃgamāditaḥ //
surabhidravyakalkena kuryāccodvartanaṃ tataḥ

kṣīreṇa dadhnā cājyena madhunā sitayā tathā //
snapayeddharimavyagrastattanmantraiḥ pṛthakpṛthak

sugandhinā ca śuddhena snānamuṣṇena cāmbunā //
taṃ kārayitvā gandhādyaiḥ snānapīṭhe'rcayellaghu

nirmālyapuṣpādi tato visṛjyottarato dvijaḥ //
rājanādyaiḥ sāmabhirvā mahāpuruṣavidyayā //
śrīsūktaviṣṇusūktaktābhyāmabhiṣekaṃ samācaret

nāmnāṃ sahasreṇa hareraṣṭottaraśatena vā //
abhiṣekaṃ tu kurvīranstriyaḥ śūdrāśca dīkṣitāḥ

tataḥ pramārjya vastreṇa tamanarghyāṃśukāni ca //
paridhāpayedatipremṇā rādhāṃ cānyāṃśca śaktitaḥ

upavītaṃ bhagavate dadyātsūkṣmaṃ sitaṃ śubham//
ratnahemādyalaṃkārānsāṃgāyāsmai ca dhārayet

yathāṛtu yathāsthānaṃ candanena yathocitam//
tilakānulepanaṃ kuryātsakeśaraghanādinā

yathocitamalaṃkārāndhārayitvā ca rādhikām //
patralekhāṃ ca tilakaṃ vidadhyātkuṅkumākṣataiḥ

ādarśaṃ darśayitvā'tha puṣpasrakchekharādibhiḥ //
pūjayettaṃ sahasreṇa tulasīmañjarīdalaiḥ

tulasyā vā'tha puṣpeṇa pratyekaṃ nāma vaiṣṇavam //
namaḥ prāntacaturthyantaṃ kīrttayannarcayetprabhum

sugandhidravyacūrṇāni tataḥ saubhāgyavanti ca //
samarpya dhūpaṃ kurvīta daśāṃgaṃ vāmṛtādikam

dīpaṃ ghṛtena kurvīta varttikādvayadīpitam //
kṛtaṃ svaśaktitaḥ śuddhaṃ mahānaivedyamarpayet

saṃyāvapāyasāpūpaśaṣkulīkhaṇḍalaḍḍakān//
pūrikāḥ polikā maudgamodanaṃ vyañjanāni ca //
dadhidugdhaghṛtādīni catuṣpadyāṃ nidhārayet

bhojayettaṃ tataḥ premṇā madhye pānīyamarpayan //
muhūrttārddhe gate dadyāddhastaprakṣālanāṃbu ca

uccheṣaṇaṃ bhagavato viṣvaksenādidevatāḥ //
upakalpyānyataḥ sthāpya svārthaṃ tadbhuvamāmṛjet

mukhavāsaṃ tato dadyātkṛtāṃ tāmbūlavīṭikām //
pūgacūrṇalavaṅgailājātījādisamanvitām

phalaṃ ca nālikerādi dattvā śaktyā ca dakṣiṇām //
mahānīrājanaṃ kuryādgītavāditrapūrvakam

stuyātpuṣpāñjalīndattvā tatstotreṇaiva taṃ tataḥ //
nāmasaṃkīrtanaṃ kuryādgāyannṛtyaṃśca tatpuraḥ

muhūrttaṃ sa vidhāyetthaṃ kṛtvā caiva pradakṣiṇām //
praṇāmaṃ daṇḍavatkuryāttiryaktaddakṣiṇe bhuvi

aṣṭāṃgaṃ vāpi pañcāgaṃ praṇāmaṃ puruṣaścaret //
pañcāṃgameva nārī tu nānyathā munisattama

padbhyāṃ karābhyāṃ jānubhyāmurasā śirasā dṛśā //
vacasā manasā ceti praṇāmo'ṣṭāṃga īritaḥ

bāhubhyāṃ caiva manasā śirasā vacasā dṛśā //
pañcāṃgoyaṃ praṇāmaḥ syātpūjāsu pravarāvimau

bhītaṃ māṃ saṃsṛteḥ pāhi prapannaṃ tvāṃ prabho iti //
tataḥ saṃprārtha svādhyāyaṃ śaktyā kurvīta naityakam

dhyātvā śeṣāṃ ca taddattāṃ gṛhītvā śirasādarāt //
āvāhitaṃ yathāpūrvaṃ rādhākṛṣṇaṃ hṛdambuje//
saṃsthāpayeccāṃgadevānsvasvasthānaṃ visarjayet

karaṇḍake vā śayyāyāṃ mandire pratimāṃ hareḥ //
śāyayitvā pidhāya dvārvaiśvadevaṃ samācaret

prāsādikaṃ harerannaṃ svapoṣyebhyo vibhajya saḥ //
svayaṃ bhuktvā tatkathādyairdinaśeṣamatikramet

mahāpūjāvidhānena proktenānena yonvaham //
bhaktyā samarcayedviṣṇuṃ sa bhavettasya pārṣadaḥ

divyaṃ vimānamāruhya bhāsvaraṃ devatepsitam //
golokākhyaṃ harerddhāma divyāṅgo yāti pūjakaḥ

phalābhisaṃdhinā vāpi yastamarceddinedine //
sopi dharmaṃ kāmamarthaṃ mokṣaṃ cāpnotyabhīpsitam

itthaṃ pūjāvidhiṃ karttumaśakto rādhayā saha //
harimekaṃ yathā labdhairarcedbhaktyopacārakaiḥ

dvādaśākṣaramantreṇa dvijo'nyo nāmamantrataḥ //
śrīrādhākṛṣṇamabhyarcedbhaktirevā'tra siddhidā

ekādaśyāṃ harerjanmotsavādau tu viśeṣataḥ //
mahāpūjaiva karttavyā svaśaktyā'khilavaiṣṇavaiḥ

pratiṣṭhāmātramapi yaḥ kuryādanyakṛtālaye //
sa sārvabhauma rājyaṃ vai prāpnuyānnaṣṭakilviṣaḥ

kārayenmandiraṃ ramyaṃ dhanāḍhyaśca harerdṛḍham //
yaḥ sa tu prāpnuyādrājyaṃ trailokyasyāpyakaṇṭakam

vṛttidānena pūjāyāḥ pravāhaṃ varddhayettu yaḥ //
sa pumānprāpnuyānnūnaṃ viṣṇuloke mahatsukham

pratiṣṭhāṃ mandiraṃ pūjāṃ kāraye ttrīṇyapīha yaḥ //
samānaiśvaryamāpnoti vāsudevasya sa dhuvam

harervṛrttiṃ haredyastu kṛtāṃ svena pareṇa vā //
kalpamekaṃ sa vai bhuṃkte narake yamayātanāḥ

karttā kārayitā yaśca sahāyaścānumodakaḥ //
caturṇāṃ hi phale bhāgaḥ sukṛtasyetarasya ca

iti kriyāyogavidhirmayā nārada kīrttitaḥ //
yenaikāntikadharmo'tra siddhyettatpravaṇātmanām

viṣayāṃścintayaṃścitte bahiḥ pūjāṃ hareścaran //
saṃbhāreṇāpi mahatā na yathoktaṃ phalaṃ labhet//

itastato grāmyasukhe bhramatsvīyaṃ manastataḥ //
niyamya viṣṇupūjāyāṃ mumukṣuḥ prayato bhavet

mahāvratā bhūritapasvinopi svadhītavedā api buddhimantaḥ //
sāṃkhyaṃ ca yogaṃ pariśīlayantaḥ siddhiṃ na yāntyeva vinārcanaṃ hareḥ

iti śrīskānde mahāpurāṇa ekāśītisāhasryāṃ sahitāyāṃ dvitīye vaiṣṇavakhaṇḍe śrīvāsudevamāhātmye kriyāyoge śrīvāsudevapūjāvidhinirūpaṇaṃ nāmaikonatriṃśo'dhyāyaḥ