Skanda Purana · Verses 2.16-4

// skanda uvāca //
meruśṛṃgaṃ samārūḍho nārado divyayā dṛśā //
śvetadvīpaṃ ca tatrasthānpaśyanmuktānsahasraśaḥ

vāsudeve bhagavati dṛṣṭimābadhya tatkṣaṇam //
utpapāta mahāyogī sadyaḥ prāpa ca dhāma tat

prāpya śvetaṃ mahādvīpaṃ nārado hṛṣṭamānasaḥ //
dadarśa bhaktāṃstāneva śvetāṃścandraprabhāñchubhān

pūjayāmāsa śirasā manasā taiśca pūjitaḥ //
didṛkṣurbrahma paramaṃ sa ca kṛcchraparaḥ sthitaḥ

bhaktamekāntikaṃ viṣṇorbuddhvā bhāgavatāstu te //
tamūcustuṣṭamanaso japantaṃ dvādaśākṣaram

śvetamuktā ūcuḥ //
munivarya bhavānbhaktaḥ kṛṣṇasyā'sti yato'tra naḥ //
dṛṣṭavāndevadurdṛśyānkimicchannatha tapyati

nārada uvāca //
bhagavantaṃ paraṃ brahma sākṣātkṛṣṇamahaṃ prabhum //
draṣṭumutko'smi bhaktendrāstaṃ darśayata tatpriyāḥ

skanda uvāca //
tadaikaḥ śvetamuktastu kṛṣṇena prerito hṛdi //
ehi te darśaye kṛṣṇamityuktvā puratobhavat

prahṛṣṭo nāradastena sākamākāśavartmanā //
paśyandhāmāni devānāṃ tata ūrddhvaṃ yayau muniḥ

saptarṣīṃśca dhruvaṃ dṛṣṭvā'nāsaktaḥ kutracitsa ca //
maharjanatapolokānvyatīyāya dvijottama

brahmalokaṃ tato dṛṣṭvā śvetamuktānugo muniḥ //
kṛṣṇasyaivecchayā'dhvānaṃ prāpāṣṭāvaraṇeṣvapi

bhūmyaptejonilākāśāhammahatprakṛtīḥ kramāt //
krāntvā daśottaraguṇāḥ prāpa golokamadbhutam

dhāma tejomayaṃ taddhi prāpyamekāntikairhareḥ//
gacchandadarśa vitatāmagādhāṃ virajāṃ nadīm

gopīgopagaṇasnānadhautacandanasaurabhām//
puṇḍarīkaiḥ kokanadai ramyāmindīvarairapi

tasyāstaṭaṃ manohāri sphaṭikāśmamayaṃ mahat//
prāpa śvetaharidraktapītasanmaṇirājitam

kalpavṛkṣālibhirjjuṣṭaṃ pravālāṅkuraśobhitam//
syamantakendranīlādimaṇīnāṃ khanimaṇḍitam

nānāmaṇīndranicitasopānatatiśobhanam //
kūjadbhirmadhuraṃ juṣṭaṃ haṃsakāraṇḍavādibhiḥ

vṛndaiḥ kāmadughānāṃ ca gajendrāṇāṃ ca vājinām //
pibadbhirnnirmalaṃ toyaṃ rājitaṃ sa vyatikramat

uttīryā'tha dhunī divyāṃ tatkṣaṇādīśvarecchayā //
taddhāmaparikhābhūtāṃ śataśṛṅgāgamāpa saḥ

hiraṇmayaṃ darśanīyaṃ koṭiyojanamucchritam //
vistāre daśakoṭyastu yojanānāṃ manoharam

sahasraśaḥ kalpavṛkṣaiḥ pārijātādibhirdrumaiḥ //
mallikāyūthikābhiśca lavaṅgailālatādibhiḥ

svarṇarambhādibhiścānyaiḥ śobhamānaṃ mahīruhaiḥ //
divyairmṛgagaṇairnnāgaiḥ pakṣibhiśca sukūjitaiḥ

durgāyitasya taddhāmnastasya ramyeṣu sānuṣu //
manojñānvitatānaikṣadbhagavadrāsamaṇḍapān

vṛtānudyānatatibhiḥ phullapuṣpasugandhibhiḥ //
kapāṭai ratnanicitaiścaturdvārasuśobhanān

citratoraṇasaṃpannai ratnastambhaiḥ sahasraśaḥ //
juṣṭāṃśca kadalīstambhairmuktālambairvitānakaiḥ

dūrvālājākṣataphalairyuktānmāṅgalikairapi //
candanāgurukastūrīkeśarokṣita catvarān

suśrāvyavādyaninadairhṛdyānbahuvidhairapi //
teṣu yūthāni gopīnāṃ koṭiśaḥ sa dadarśa ha

anarghyavāsobhūṣābhiḥ sadratnamaṇikaṅkaṇaiḥ //
kāñcīnūpurakeyūraiḥ śobhitānyaṅgulīyakaiḥ

tāruṇyarūpalāvaṇyaiḥ svaraiścā'pratimāni hi //
rādhālakṣmīsavarṇāni śṛṅgārikakarāṇi ca

bhogadravyairbahuvidhairmaṇḍapeṣu yuteṣu ca //
vilasanti ca gāyanti manojñāḥ kṛṣṇagītikāḥ

upatyakāsu tasyādreratha vṛndāvanābhidham //
vanaṃ mahattadadrākṣītsāvarṇe nārado muniḥ

kṛṣṇasya rādhikāyāśca priyaṃ tatkrīḍanasthalam//
kalpadrumālibhī ramyaṃ sarobhiśca sapaṅkajaiḥ

āmrairāmrātakairnīpairbadarībhiśca dāḍimaiḥ //
kharjūrīpūganāraṃgairnnālikeraiśca candanaiḥ

jambūjambīrapanasairakṣodaiḥ suradārubhiḥ //
kadalībhiścampakaiśca drākṣābhiḥ svarṇaketakaiḥ

phalapuṣpabharānamrairnnānāvṛkṣairvirājitam //
mallikā mādhavīkundairllavaṃgairyūthikādibhiḥ

mandaśītasugandhena sevitaṃ mātariśvanā //
śataśṛṅgasnutairārdraṃ nirjharaiśca samantataḥ

sadā vasanta śobhāḍhyaṃ ratnadīpālimaṇḍitaiḥ //
śṛṅgārikadravyayutaiḥ kuñjairjuṣṭamanekaśaḥ

gopānāṃ gopikānāṃ ca kṛṣṇasaṃkīrttanairmuhuḥ //
govatsa pakṣininadairnnānābhūṣaṇanisvanaiḥ //
dadhimanthanaśabdaiśca sarvato nāditaṃ mune

phullapuṣpaphalānamranānādrumasuśobhanaiḥ //
dvātriṃśatavanairanyairyuktaṃ paśyamanoharaiḥ

tadvīkṣya hṛṣṭaḥ sa prāpa golokapuramujvalam //
vartulaṃ ratnadurgaṃ ca rājamārgopaśobhitam

rājitaṃ kṛṣṇabhaktānāṃ vimānaiḥ koṭibhistathā //
rathai ratnendrakhacitaiḥ kiṃkiṇījālaśobhitaiḥ

mahāmaṇīndranikarai ratnastambhālimaṇḍitaiḥ //
adbhutaiḥ koṭiśaḥ saudhaiḥ paṃktisaṃsthairmanoharam

vilāsamaṇḍapai ramyai ratnasāravinirmitaḥ //
ratnendradīpatatibhiḥ śobhanaṃ ratnavedibhiḥ

kesarāgurukastūrīkuṃkumadravacarcitam //
dadhidūrvālājapūgai rambhābhiḥ śobhitāṅgaṇam

vāripūrṇairhemaghaṭaistoraṇaiḥ kṛtamaṃgalam //
maṇikuṭṭimarājādhvacaladbhūrigajāśvakam

śrīkṛṣṇadarśanāyātairnnaikabrahmāṇḍanāyakaiḥ //
viriñciśaṃkarādyaiśca balihastaiḥ susaṃkulam

vrajadbhiḥ kṛṣṇavīkṣātha gopagopīkadambakaiḥ //
susaṃkulamahāmārgaṃ mumodālokya tanmuniḥ

kṛṣṇamandiramāpā'tha sarvāścaryaṃ manoharam //
nandādivṛṣabhānvādigopasaudhālibhirvṛtam

caturdvāraiḥ ṣoḍaśabhirdurgaiḥ saparikhairyutam//
koṭigopavṛtaikaikadvārapālasurakṣitaiḥ

ratnastambhakapāṭeṣu dvārṣu svāgrasthiteṣu saḥ //
upaviṣṭānkrameṇaiva dvārapālāndadarśa ha

vīrabhānuṃ candrabhānuṃ sūryabhānuṃ tṛtīyakam //
vasubhānuṃ devabhānuṃ śakrabhānuṃ tataḥ param

ratnabhānuṃ supārśvaṃ ca viśālamṛṣabhaṃ tataḥ //
aṃśuṃ balaṃ ca subalaṃ devaprasthaṃ varūthapam

śrīdāmānaṃ ca natvā'sau praviṣṭoṃtastadājñayā //
mahācatuṣke vitate tejo'paśyanmahoccayam

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye golokavarṇanaṃ nāma ṣoḍaśo'dhyāyaḥ