Skanda Purana · Verses 2.10-5

sāvarṇiruvāca //
kathaṃ prāptā punaḥ skanda śrīrindreṇa gatāmbudhim // etāṃ kathaya me sarvāṃ kathāṃ nārāyaṇāśrayām

skanda uvāca //
śriyā vihīno devendraḥ śrīhīnairapi dānavaiḥ //
parājito hṛtasthāno naṣṭāśeṣaparicchadaḥ

girigahvarakuñjeṣu kānaneṣu tatastataḥ //
paribabhrāma sahito digīśairvaruṇādibhiḥ

valkalājina vastrāśca paśupakṣyāmiṣāśanāḥ //
devā daityā narā nāgāstulyācāraparicchadāḥ

pātrāṇi mṛnmayānyeva sarveṣāmapi veśmasu //
āsanvarākāḥ sarvepi piśācya iva ca striyaḥ

ādāvabhūdanāvṛṣṭirbhuvi dvādaśavārṣikī //
tato varṣe kvacidvṛṣṭirāsītsvalpā kvacinna ca

itthaṃ dāridryaduḥkhānāṃ teṣāṃ varṣaśataṃ gatam //
baliṣṭhārabdhakarmāṇaste'tiduḥkhepi no mṛtāḥ

ajīvanta mṛtaprāyā narakeṣviva nārakāḥ //
yatantopi śriyaḥ prāptyai yajñādyairnnā'labhanta tām

tataḥ sahasravarṣānte merau śaraṇamāyayuḥ //
śāpāddurvāsaso devāḥ sarve durvāsaso vidhim

praṇamya tasmai duḥkhaṃ svaṃ vāsavādyā nyavedayan //
ādāveva hi so'jñāsītsarvajñatvātsurāpadam

upālabhya tataścendraṃ viriñcaḥ sahaśaṃkaraḥ //
tadduḥkhavāraṇā kalpo viṣṇumaicchatprasāditum

ārādhayiṣyaṃstapasā tato'sau taṃ tapaḥpriyam //
sarvadevagaṇopeta upāyātkṣīrasāgaram

tasyottare taṭe ramye sarve te'naśanavratāḥ //
ekapādasthitā ūrddhvabāhavaścakrire tapaḥ

keśavaṃ hṛdi te dadhyuḥ sarvakleśavināśanam //
lakṣmīpatiṃ vāsudevamekāgrakṛtamānasāḥ

śatābdānte tato viṣṇuḥ śrīkṛṣṇo bhagavānsvayam //
atyāpanneṣu dīneṣu kṛpāṃ deveṣu so'karot//

adṛśyamūrtirātmajñairapi bhūritapasvibhiḥ //
tatrāvirāsītkṛpayā niyutāhaskaradyutiḥ

tejomaṇḍalamevādau sahasā sphuritaṃ mahat //
dadṛśurvibudhāḥ sarve sitaṃ ghanamanaupamam

brahmā śivaśca tanmadhye dadṛśāte ramāpatim //
ghanaśyāmaṃ caturbāhuṃ gadābjābjāridhāriṇam

kirīṭakāñcīkaṭakakuṇḍalādivibhūṣitam //
pītakauśeyavasanaṃ divyasundaravigraham

harṣavihvalitānmānau daṇḍavattau praṇematuḥ //
tadicchayā'tha devāśca dṛṣṭvā taṃ ca mudā''naman

babhūvuratihṛṣṭāste nidhiṃ prāpyā'dhanā iva //
baddhāñjalipuṭāḥ sarve bhaktyā taṃ tuṣṭuvuḥ surāḥ

devā ūcuḥ //
ॐnamo bhagavate tubhyaṃ vāsudevāya dhīmahi //
pradyumnāyāniruddhāya namaḥ saṃkarṣaṇāya ca

ॐkārabrahmarūpāya tredhāviṣkṛtamūrtaye //
brahmāṇḍasargasthityantahetave nirguṇāya ca

nayanānandarūpāya praṇatakleśanāśine //
keśavāya namastubhyaṃ svataṃtreśvaramūrtaye

moditāśeṣabhaktāya kālamāyādimohine //
sadānaṃdāya kṛṣṇāya namaḥ saddharmavarttine//

bhavāmbudhinimagrānāmuddhṛtikṣamakīrtaye //
darśanīyasvarūpāya ghanaśyāmāya te namaḥ

gadābjadaracakrāṇi bibhrate dīrghabāhubhiḥ //
suragovipradharmāṇāṃ goptre tubhyaṃ namonamaḥ

vareṇyāya prapannānāmabhīṣṭavaradāyine //
nigamāgamavedyāya vedagarbhāya te namaḥ

tejomaṇḍalamadhyastha divyasundaramūrtaye //
namāmo viṣṇave tubhyaṃ parātparatarāya ca

vāṇīmanoviprakṛṣṭamahimne'kṣararūpiṇe//
sarvāntaryāmiṇe tubhyaṃ bṛhate ca namonamaḥ

sukhadosi tvamevaikaḥ svāśritānāmato vayam //
mahāpadadhikakliṣṭāḥ śaraṇaṃ tvāmupāgatāḥ

devādhidevabhaktasya tava durvāsaso vayam //
atikramācchriyā hīnāḥ prāptāḥ smo durdaśāmimām

vāsonnapānasthānādihīnāndharmopi naḥ prabho //
tyaktvā saha śriyā yātastānpātuṃ tvamasīśvaraḥ

yato vayaṃ ca dharmaśca tvadīyā iti viśrutāḥ //
yathāpūrvaṃ sukhīkarttuṃ tvamevārhasyato hi naḥ

skanda uvāca //
iti saṃprārthito devairbhagavānsa dayānidhiḥ //
uvācānandayanvācā meghagambhīrayā surān

śrībhagavānuvāca //
viditaṃ me surāḥ sarvaṃ kaṣṭaṃ vaḥ sadatikramāt //
upāyaṃ kurutādyaiva vacmi yattannivṛttaye

oṣadhīrambudhau sarvāḥ kṣiptvā mandarabhūbhṛtā //
nāgarājavaratreṇa maṃthadhvamasuraiḥ saha

ādau saṃdhāya danujaiḥ kurutāmbudhimanthanam //
sāhāyaṃ vaḥ kariṣyāmi khedaḥ kāryo na tatra vaḥ

amṛtaṃ ca śriyo dṛṣṭiṃ prāpya pūrvādhikaujasaḥ //
bhavitāro madvimukhā daityāstu kleśabhāginaḥ

skanda uvāca //
ityuktvāṃtardadhe viṣṇurbhaktasaṅkaṭanāśanaḥ //
devāstasmai namaskṛtya taduktaṃ kartumārabhan

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇava khaṇḍe śrīvāsudevamāhātmye śrīvāsudevaprasādanirūpaṇaṃ nāma daśamo'dhyāyaḥ