Skanda Purana · Chapter 1.57

// nārada uvāca // //
tato viprā nāradaśca samārādhya maheśvaram //
mahīnagarake puṇye sthāpayāmāsa śaṃkaram

lokānāṃ ca hitārthāya kedāraṃ liṃgamuttamam //
atrīśāduttare bhāge mahāpātakanāśanam

atrikuṇḍe naraḥ snātvā śrāddhaṃ kṛtvā yathāvidhi //
atrīśaṃ ca namaskṛtya kedāraṃ yaḥ prapaśyati

mātuḥ stanyaṃ punarnaiva sa pibenmuktibhāgbhavet //
tato rudro nīlakaṃṭhaṃ nāradāya mahātmane

svayaṃ dattvā svayaṃ tasthau mahīnagarake śubhe //
koṭitīrthe naraḥ snātvā nīlakaṃṭhaṃ prapaśyati

jayādityaṃ namaskṛtya rudralokamavāpnuyāt //
jayādityaṃ pūjayaṃti kūpe snātvā narottamāḥ

na teṣāṃ vaṃśanāśo'sti jayādityaprasādataḥ //
idaṃ te kathitaṃ pārtha mahīnagarakasya ca

ākhyānaṃ sakalaṃ śrutvā sarvapāpaiḥ pramucyate

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṃḍe nīlakaṃṭhamāhātmyavarṇanaṃnāma saptapañcāśattamo'dhyāyaḥ