Skanda Purana · Chapter 1.30

//lomaśa uvāca//
valgamānaṃ tamāyāṃtaṃ tārakā suramojasā//
ājaghāna ca vajreṇa iṃdro matimatāṃ varaḥ

tena vajraprahāreṇa tārako vihvalīkṛtaḥ
patito'pi samutthāya śaktyā taṃ prāharaddvipam

puraṃdaraṃ gajasthaṃ hi apātayā bhūtale//
hāhākāro mahānāsītpatite ca puraṃdare

tārakeṇāpi tatraiva yatkṛtaṃ tacchṛṇu prabho//
patitaṃ ca padākramya hastādvajraṃ pragṛhya ca

hataṃ deveṃdramālokya tārako ripusūdanaḥ//
vajraghātena mahatā'tāḍayattu puraṃdaram

triśūlamudyamya mahābalastadā sa vīrabhadro ruṣitaḥ puraṃdaram//
saṃrakṣamāṇo hi jaghāna tārakaṃ śūlena daityaṃ ca mahāprabheṇa

śūlaprahārābhihato nipapāta mahītale//
patito'pi mahātejāstārakaḥ punarutthitaḥ

jaghāna parayā śaktyā vīrabhadraṃ tadorasi//
vīrabhadropi patitaḥ śaktighātena tasya vai

sagaṇāścaiva devāśca gaṃdharvoragarākṣasāḥ//
hāhākāreṇa mahatā cukruśuśca punaḥpunaḥ

tadotthitaḥ sahasā mahābalaḥ sa vīrabhadro dviṣatāṃ nihaṃtā//
triśūlamudyamya taḍitprakāśaṃ jājvalyamānaṃ prabhayā niraṃtaram//
svarociṣā bhāsitadigvitānaṃ sūyadubiṃbāgnyuḍumaṇḍalābham

triśūlena tadā yāvaddhaṃtukāmo mahābalaḥ//
nivāritaḥ kumāreṇa māvadhīstvaṃ mahāmate

jagarja ca mahātejāḥ kārttikeyo mahābalaḥ

tadā jayetyabhihito bhūtairākāśasaṃsthitaiḥ//
śaktyā paramayā vīrastārakaṃ haṃtumudyataḥ

tārakasya kumārasya saṃgrāmastatra duḥsahaḥ//
jātastato mahāghoraḥ sarvabhūtabhayaṃkaraḥ

śaktihastau ca tau vīrau yuyudhāte parasparam//
śaktibhyāṃ bhinnahastau tau mahāsāhasasaṃyutau

parasparaṃ vaṃcayaṃtau siṃhāviva mahābalau//
vaitālikīṃ samāśritya tathā vai khecarīṃ gatim

pārvataṃ matamāśritya śaktyā śaktiṃ nijaghnatuḥ//
ebhirmatairmahāvīrau cakraturyuddhamuttamam

anyonyasādhakau bhūtvā mahābalaparākramau//
jaghnatuḥ śaktidhārābhī raṇe raṇaviśāradau

mūrdhni kaṇṭhe tathā bāhvorjānvoścaiva kaṭītaṭe//
vakṣasyurasi pṛṣṭhe ca cicchidatuḥ parasparam

tadā tau yudhyamānau ca hantukāmau mahābalau//
prekṣakā hyabhavansarve devagandharvaguhyakāḥ

ūcuḥ parasparaṃ sarve ko'sminyuddhe vijeṣyate//
tadā nabhogatā vāṇī uvāca parisāṃtvya vai

tārakaṃ hi surāścādya kumāro'yaṃ haniṣyati//
mā śocyatāṃ surāḥ sarvaiḥ sukhena sthīyatāṃ divi

śrutvā tadā tāṃ gagane samīritāṃ tadaiva vācaṃ pramathaiḥ parītaḥ//
kumārakastaṃ prati haṃtukāmo daityādhipaṃ tārakamugrarūpam

śaktyā tayā mahābāhurājaghāna stanāṃtare//
tārakaṃ hyasuraśreṣṭhaṃ kumāro balavattaraḥ

taṃ prahāramanā dṛtya tārako daityapuṃgavaḥ//
kumāraṃ cā'pi saṃkruddhaḥ svaśaktyā cājaghāna vai

tena śaktiprahāreṇa śāṃkarirmūrcchito'bhavat//
muhūrtāccetanāṃ prāptaḥ stūyamāno maharṣibhiḥ

yathā siṃho madonmatto haṃtukāmastathaiva ca//
kumārastārakaṃ daityamājaghāna pratāpavān

evaṃ paraspareṇaiva kumāraścaiva tārakaḥ//
yuyudhāte'tisaṃrabdhau śaktiyuddhaparāyaṇau

abhyāsaparamāvāstāmanyonyavijigīṣayā//
tathā tau yudhyamānau ca citrarūpau tapasvinau

dhārābhiśca aṇībhīśca suprayuktau ca jaghnatuḥ//
avalokaparāḥ sarve devagandharvakinnarāḥ

vismayaṃ paramaṃ prāptā nocuḥ kiṃcana tasya vai//
na vavau ca tadāvāyurniṣprabho'bhūddivākaraḥ

himālayo'tha meruśca śvetakūṭaśca darduraḥ//
malayo'tha mahāśailo maināko viṃdhyaparvataḥ

lokālokau mahāśailau mānasottaraparvataḥ//
kailāso mandaro mālyo gandhamādana eva ca

udayādrirmaheṃdraśca tathaivāstagirirmahān

ete cānye ca bahavaḥ parvatāśca mahāprabhāḥ//
snehārdditāstadājagmuḥ kumāraṃ ca parīpsavaḥ

tataḥ sa dṛṣṭvā tānsarvānbhayabhītāṃśca śāṃkariḥ//
parvatāngirijāputro babhāṣe pratibodhayan

//kumāra uvāca//
mā khidyata mahābhāgā mā ciṃtā kriyatāṃ nagāḥ//
ghātayāmyadya pāpiṣṭhaṃ sarveṣāmiha paśyatām

evaṃ samāśvāsya tadā manasvī tānparvatāndevagaṇaiḥ sametān//
praṇamya śaṃbhuṃ manasā haripriyaḥ svāṃ mātaraṃ caiva nataḥ kumāraḥ

kārttikeyastataḥ śaktyā nicakarta ripoḥ śiraḥ//
tacchiro nipapātorvyāṃ tārakasya ca tatkṣaṇāt//
evaṃ sa jayamāpede kārttikeyo mahāprabhuḥ

dadṛśustaṃ suragaṇā ṛṣayo guhyakāḥ khagāḥ//
kiṃnarāścāraṇāḥ sarpāstathā caivāpsaro gaṇāḥ

harṣeṇa mahatāviṣṭāstuṣṭuvustaṃ kumārakam//
vidyādharyaśca nanṛturgāyakāśca jagustadā

evaṃ vijayamāpannaṃ dṛṣṭvā sarve mudā yutāḥ//
tato harṣātsamāgamya svāṃkamāropya cātmajam

pariṣvajya tu gāḍhena girijāpi tutoṣa vai//
svotsaṃge ca samāropya kumāraṃ sūryavarcasam

lālayāmāsa tanvaṃgī pārvatī rucirekṣaṇā//
ṛṣībhiḥ satkṛtaḥ śaṃbhuḥ pārvatyā sahitastadā

āryāsanagatā sādhvī śuśubhe mitabhāṣiṇī//
saṃstūyamānā munibhiḥ siddhacāraṇapannagaiḥ

nīrājitā tadā devaiḥ pārvatī śaṃbhunā saha//
kumāreṇa sahaivātha śomamānā tadā satī

himālayastadāgatya putraiśca parivāritaḥ//
mervādyaiḥ parvataiścaiva stūyamānaḥ paro'bhavat

tadā devagaṇāḥ sarva indrādya ṛṣibhiḥ saha//
puṣpavarṣeṇa mahāta vavarṣuramitadyutim//
kumāramagrataḥ kṛtvā nīrājanaparā babhuḥ

gītavāditraghoṣeṇa brahmaghoṣeṇa bhūyasā//
saṃstūyamāno vividhaiḥ sūktairvedavidāṃ varaiḥ

kumāravijayaṃnāma caritraṃ paramādbhutam//
sarvapāpaharaṃ divyaṃ sarvakāmapradaṃ nṛṇām

ye kīrttayaṃti śucayo'mitabhāgyayuktāścānaṃtyarūpamajarāmaramādadhānāḥ//
kaumāravikramamahātmyamudārametadānaṃdadāyakamanorthakaraṃ nṛṇāṃ hi

yaḥ paṭhecchṛṇuyādvāpi kumārasya mahātmanaḥ//
caritaṃ tārakākhyaṃ ca sarvapāpaiḥ samucyate

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kedārakhaṃḍe śivaśāstre tārakāsuravadhapūrvakaṃ svāmikārttikeyavijayotsavavarṇanaṃ nāma triṃśo'dhyāyaḥ