Skanda Purana · Verses 1.28-2

//nārada uvāca//
vrajaṃtī girijā'paśyatsakhīṃ māturmahāprabhām//
kusumāmodinīṃnāma tasya śailasya devatām

sāpi dṛṣṭvā girisutāṃ snehaviklavamānasā//
kvapunargacchasītyuccairāliṃgyovāca devatā

sā cāsyai sarvamācakhyau śaṃkarātkopakāraṇam//
punaścovāca girijā devatāṃ mātṛsaṃmatām

nityaṃ śailādhirājasya devatā tvamaniṃdite//
sarvaṃ ca sannidhānaṃ ca mayi cātīva vatsalā

tadahaṃ saṃpravakṣyāmi yadvidheyaṃ tavādhunā//
athānya strīpraveśe tu samīpe tu pinākinaḥ

tvayākhyeyaṃ mama śube yuktaṃ paścātkaromyaham//
tathetyukte tayā devyā yayau devī giriṃ prati

ramye tatra mahāśṛṃge nānāścaryopaśobhite//
vibhūṣaṇādi sanyasya vṛkṣavalkaladhāriṇī

tapastepe girisutā putreṇa paripālitā//
grīṣme paṃcāgnisaṃtaptā varṣāsu ca jaloṣitā

yathā na kācitpraviśedyoṣidatra harāṃtike//
dṛṣṭvā parāṃ striyaṃ cātra vadethā mama putraka

śīghrameva kariṣyāmi tato yuktamanaṃtaram//
evamastviti tāṃ devīṃ vīrakaḥ prāha sāṃpratam

māturājñā suto hlāda plāvitāṃgo gatajvaraḥ//
jagāma tryakṣaṃ saṃdraṣṭuṃ praṇipatya ca mātaram

gajavaktraṃ tataḥ prāha praṇamya samavasthitam//
sāśrukaṃṭhaṃ prayācaṃtaṃ naya māmapi pārvati

gajavaktraṃ hi tvāṃ bāla māmivopahasiṣyati//
tadāgaccha mayā sārdhaṃ yā gatirme tavāpi sā

parābhavāddhi dhūrtānāṃ maraṇaṃ sādhu putraka//
evamuktvā samādāya himādriṃ prati sā yayau

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṇḍe kumāreśvaramāhātmye pārvatyastaporthaṃ gamanavarṇanaṃnāmāṣṭāviṃśo'dhyāyaḥ