Skanda Purana · Chapter 1.2.23

// kalādhara uvāca // //
kāṃbojeṣu hayo bhūtvā kāṃtiśālī suhṛnmama //
ayāsīdaupavāhyatvaṃ bhavato rājapuṃgava

ahaṃ ca gaṃdhamṛgatāṃ gataḥ svāṃgaprasūtinā //
sugaṃdhinā madenāsya saṃcāraṃ cācaraṃ gireḥ

dharmātmanmṛgayāvyājādāgatena tvayādhunā //
āvāṃ śoṇādrināthasya prāpitau hi pradakṣiṇām

vāhārohaṇadoṣeṇa tavāsīdīdṛśī daśā //
pādapracārapuṇyena prāptaṃ nau prāktanaṃ padam

rājeṃdra tava saṃbaṃdhādasmāttiryaktvabaṃdhanāt //
muktāvāvāṃ svakaṃ dhāma prāptau svastyastu te sadā

ityudīrya nijaṃ dhāma yiyāsaṃtaṃ kalādharam //
kāṃtiśālinaṃ ca rājā jagāda racitāṃjaliḥ

evaṃ yuvāṃ śoṇaśailaśaṃkarasya prabhāvataḥ //
śāpārṇavaṃ samuttīrṇau kathaṃ me punarucchrayaḥ

bhrāmyatīva mama svāṃtamādhāya tadavekṣaṇam //
niryāṃtīva mama prāṇāstatra daivaṃ balottaram

kalādharakāṃtiśālināvūcatuḥ // //
avadhāraya nistāraṃ kathayāva tavāsyadam //
samāhitena manasā nirdhūtanikhilādhinā

jagatsargasthitidhvaṃsavidhānānugraheśvare //
aruṇādrīśvare cittaṃ nidhehi karuṇānidhau

pratyakṣitaṃ tvayedānīmasya devasya vaibhavam //
tiraścorāvayoretadīdṛśatvaṃ vitanvataḥ

kuru pradakṣiṇāṃ pādacārī mṛgamadādṛtaiḥ //
kalhāraiḥ pūjayeśānaṃ devaṃ mṛgamadapriyam

yāvatī tava saṃpattistāvatīmakhilāṃ vibho //
prākāragopurāgāranavīkārāya kalpaya

acirādeva siddhiste bhaviṣyati garīyasī //
manumāṃdhātṛnābhāgabhagīrathavadādhikā

// naṃdikeśvara uvāca // //
itthaṃ niśamya ca tayornijameva dhāma vidyābhṛtoḥ sapadi saṃśrutayornarendraḥ //
niḥsaṃśayena manasā niratastadānīṃ bhaktiṃ babaṃdha bhagavatyaruṇādrināthe

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmya uttarārdhe kalādharakāṃtiśālivṛttāṃtavarṇanaṃnāma trayoviṃśatitamo'dhyāyaḥ