સ્કંદ પુરાણ · અધ્યાય 1.2.23

॥ કલાધર ઉવાચ ॥ ॥
કાંબોજેષુ હયો ભૂત્વા કાંતિશાલી સુહૃન્મમ ॥
અયાસીદૌપવાહ્યત્વં ભવતો રાજપુંગવ

અહં ચ ગંધમૃગતાં ગતઃ સ્વાંગપ્રસૂતિના ॥
સુગંધિના મદેનાસ્ય સંચારં ચાચરં ગિરેઃ

ધર્માત્મન્મૃગયાવ્યાજાદાગતેન ત્વયાધુના ॥
આવાં શોણાદ્રિનાથસ્ય પ્રાપિતૌ હિ પ્રદક્ષિણામ્

વાહારોહણદોષેણ તવાસીદીદૃશી દશા ॥
પાદપ્રચારપુણ્યેન પ્રાપ્તં નૌ પ્રાક્તનં પદમ્

રાજેંદ્ર તવ સંબંધાદસ્માત્તિર્યક્ત્વબંધનાત્ ॥
મુક્તાવાવાં સ્વકં ધામ પ્રાપ્તૌ સ્વસ્ત્યસ્તુ તે સદા

ઇત્યુદીર્ય નિજં ધામ યિયાસંતં કલાધરમ્ ॥
કાંતિશાલિનં ચ રાજા જગાદ રચિતાંજલિઃ

એવં યુવાં શોણશૈલશંકરસ્ય પ્રભાવતઃ ॥
શાપાર્ણવં સમુત્તીર્ણૌ કથં મે પુનરુચ્છ્રયઃ

ભ્રામ્યતીવ મમ સ્વાંતમાધાય તદવેક્ષણમ્ ॥
નિર્યાંતીવ મમ પ્રાણાસ્તત્ર દૈવં બલોત્તરમ્

કલાધરકાંતિશાલિનાવૂચતુઃ ॥ ॥
અવધારય નિસ્તારં કથયાવ તવાસ્યદમ્ ॥
સમાહિતેન મનસા નિર્ધૂતનિખિલાધિના

જગત્સર્ગસ્થિતિધ્વંસવિધાનાનુગ્રહેશ્વરે ॥
અરુણાદ્રીશ્વરે ચિત્તં નિધેહિ કરુણાનિધૌ

પ્રત્યક્ષિતં ત્વયેદાનીમસ્ય દેવસ્ય વૈભવમ્ ॥
તિરશ્ચોરાવયોરેતદીદૃશત્વં વિતન્વતઃ

કુરુ પ્રદક્ષિણાં પાદચારી મૃગમદાદૃતૈઃ ॥
કલ્હારૈઃ પૂજયેશાનં દેવં મૃગમદપ્રિયમ્

યાવતી તવ સંપત્તિસ્તાવતીમખિલાં વિભો ॥
પ્રાકારગોપુરાગારનવીકારાય કલ્પય

અચિરાદેવ સિદ્ધિસ્તે ભવિષ્યતિ ગરીયસી ॥
મનુમાંધાતૃનાભાગભગીરથવદાધિકા

॥ નંદિકેશ્વર ઉવાચ ॥ ॥
ઇત્થં નિશમ્ય ચ તયોર્નિજમેવ ધામ વિદ્યાભૃતોઃ સપદિ સંશ્રુતયોર્નરેન્દ્રઃ ॥
નિઃસંશયેન મનસા નિરતસ્તદાનીં ભક્તિં બબંધ ભગવત્યરુણાદ્રિનાથે

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં પ્રથમે માહેશ્વરખણ્ડેઽરુણાચલમાહાત્મ્ય ઉત્તરાર્ધે કલાધરકાંતિશાલિવૃત્તાંતવર્ણનંનામ ત્રયોવિંશતિતમોઽધ્યાયઃ