Skanda Purana · Chapter 1.2.13

//naṃdikeśvara uvāca // //
ketakībarhamapyenaṃ vihasya punarabravīt //
// ketakyuvāca // //
api mūḍha na kiṃcittvaṃ vetsi kastvaṃ kuto na tat

īdṛśyaḥ parito lagnā yasminbrahmāṃḍakoṭayaḥ //
tasya pramāṇametāvaditi ko vedituṃ kṣamaḥ

caturyugāyutairyātaṃ tato nipatato mama//
idānīmapi nāproti tanmadhyaṃ kila bhūtalam

iti bruvāṇamenaṃ ca namaskṛtya sarojabhūḥ//
hitvā nijamahaṃkāramabhāṣata kṛtāṃjaliḥ

brahmovāca//
mahātmansatyamevāsmi mūḍho'haṃ ketakacchada//
brahmaṇā hi mayā sparddhā viṣṇunā saha nirmitā

dvābhyāmapīdamāvābhyāṃ vismṛtaṃ śivavaibhavam//
yannau mahānabhūdgarvassargasaṃtrāṇamātrataḥ

hrepaṇī saṃkathā tāvadāstāmadyāpyahaṃ yataḥ //
sparddhayā na vimukto'smi baddhayā garuḍadhvaje

sakhyaṃ sāptapadīnaṃ hi kathyate tadbhavānmayi

asaṃstutadhiyaṃ hitvā kartumarhasyanugraham //
ahaṃ viṣṇuśca mohāṃdhau tejaḥstaṃbhasya vīkṣaṇāt

haṃsakolākṛtī dadhvo mithaḥ sāmyaṃ vyapohitum //
mūlaṃ didṛkṣuḥ sa daśāṃ kīdṛśīṃ yātavāniti

na jāne mama cāsyāgraṃ didṛkṣorīdṛkṣī daśā //
gatamuḍḍīyamānasya me sahasreṇa hāyaneḥ //

jātaśramo'smi nitarāṃ viyujya iva cāsubhiḥ //
diṣṭyādya bhadra labdhastvaṃ mayā''laṃbovasīdatām

tanme kuruṣva mitrasya saphalāṃ yācanāmimām //
sakhāhaṃ sahasaṃjalpādasmi dāsonuṣaṃjanāt

tattvayā karaṇīyaivaṃ prārthanaiṣā kṛtāṃjaliḥ //
yadi paśyati mūlaṃ sa jito'hamamunā tadā

yadvā na paśyati tadāpyasmi sāmyamupeyivān //
idaṃ dvayamapi prāyo mamātihrepaṇaṃ sakhe

tvayaiva parihāryatvamidānīṃ samupāgatam //
anṛtāmabhibhāṣa tvamucitāṃ ca suhṛtkṛte

giramekāmimāmagre cakrapāṇerudīraya //
eṣa haṃsākṛtirbrahmā tejaḥstaṃbhasvarūpiṇaḥ

atyuccaṃ dṛṣṭavānagramatra sākṣye sthito'smyaham //
tenāpi tejaḥstambhatvameyuṣā candramaulinā

saṃbhāvitoyaṃ sutarāṃ pitreva hi pitāmahaḥ //
ato'yamevābhyadhiko bhavato viṣṭaraśravāḥ

ityuktvā mama sāhāyyaṃ sumahatkriyatāṃ tvayā

// naṃdikeśvara uvāca // //
evaṃ bhūyaḥ prārthito'yaṃ vidhātrā dākṣiṇyārdraḥ ketakībarhakopi //
tejaḥstaṃbhābhyarṇabhāje tathaiva prāhāśeṣaṃ viṣṇave brahmavākyam

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmya uttarārdhe brahmaṇā'satyasākṣyārthaṃ ketakacchadaprāthanāvarṇanaṃnāma trayodaśo'dhyāyaḥ