Skanda Purana · Chapter 1.12

//lomaśa uvāca//
praṇamya paramātmānaṃ ramāyuktaṃ janārddanam//
amṛtārthaṃ mamaṃthuste surāsuragaṇāḥ punaḥ

udadhermathyamānācca nirgataḥ sumahāyaśāḥ//
dhanvaṃtaririti khyāto yuvā mṛtyuñjayaḥ paraḥ

pāṇibhyāṃ pūrṇakalaśaṃ sudhāyāḥ parigṛhya vai//
yāvatsarve surāḥ sarve nirīkṣaṃte manoharam

tadā daityāḥ samaṃ gatvā hartukāmā balādiva//
sudhayā pūrṇakalaśaṃ dhanvaṃtarikare sthitam

yāvattaraṃgamālābhirāvṛto'bhūdbhiṣaktamaḥ//
śanaiḥ śanaiḥ samāyāto dṛṣṭo'sau vṛṣaparvaṇā

karasthaḥ kalaśastasya hṛtastena balādiva//
asurāśca tataḥ sarve jagarjuratibhīṣaṇam

kalaśaṃ sudhayā pūrṇaṃ gṛhītvā te samutsukāḥ//
daityāḥ pātālamājagmustadā devā bhramānvitāḥ

anujagmuḥ susaṃnaddhā yoddhukāmāśca taiḥ saha//
tadā devānsamālokya balirevamabhāṣata

// baliruvāca//
vayaṃ tu kevalaṃ devāḥ sudhayā paritoṣitāḥ//
śīghrameva pragaṃtavyaṃ bhavadbhiśca surottamaiḥ

triviṣṭapaṃ mudā yuktaiḥ kimasmābhiḥ prayojanam//
purāsmābhiḥ kṛtaṃ maitraṃ bhavadbhiḥ svārthatatparaiḥ//
adhunā viditaṃ tattu nātra kāryā vicāraṇā

evaṃ nirbhārtsitāstena balinā surasattamāḥ//
yathāgatena mārgeṇa jagmurnārāyaṇaṃ prabhum

taṃ dṛṣṭvā viṣṇunā sarve surā bhagnamanorathā//
āśvāsitā vacobhiśca nānānunayako vidaiḥ

mā trāsaṃ kurutātrārtha ānayiṣyāmi tāṃ sudhām//
evamābhāṣya bhagavānmukundo'nāthasaṃśrayaḥ

sthāpayitvā surānsarvāṃstatraiva madhusūdanaḥ//
mohanīrūpamāsthāya daityanāmagrato'bhavat

tāvaddaityāḥ susaṃrabdhāḥ parasparamathābruvan//
vivādaḥ sarvadaityānāmamṛtārthe tadā'bhavat

evaṃ pravartamāne tu mohinīrūpamāśritām//
dṛṣṭvā yoṣāṃ tadā daivātsarvabhūtamanoramām

vismayena samāviṣṭā babhūvustṛṣitekṣaṇāḥ//
tāṃ saṃmānya tadā daityarājo baliruvāca ha

//baliruvāca//
sudhā tvayā vibhaktavyā sarveṣāṃ gatihetave//
śīghratvena mahābhāge kuruṣva vacanaṃ mama

evamuktā hyuvācedaṃ smayamānā baliṃ prati//
strīṇāṃ naiva ca viśvāsaḥ kartavyo hi vipaścitā

anṛtaṃ sāhasaṃ māyā mūrkhatvamati lobhatā//
aśaucaṃ nirghṛṇatvaṃ ca strīṇāṃ doṣāḥ svabhāvajāḥ

niḥsnehatvaṃ ca vijñeyaṃ dhūrtatvaṃ caiva tattvataḥ//
svastrīṇāṃ caiva vijñeyā doṣā nāstyatra saṃśayaḥ

yathaiva śvāpadānāṃ ca vṛkā hiṃsāparāyaṇāḥ//
kākā yatāṃḍajānāṃ ca śvāpadānāṃ ca jaṃbukāḥ//
dhūrtā tathā manuṣyāṇāṃ strījñeyā satataṃ budhaiḥ

mayā saha bhavadbhiśca kathaṃ sakhyaṃ pravartate//
sarvathātra na vijñeyāḥ ke yūyaṃ caiva ka hyaham

tasmādbhavadbhiḥ saṃciṃtyakāryākāryavicakṣaṇaiḥ//
kartavyaṃ parayā buddhyā prayātāsurasattamāḥ

//baliruvāca//
adyāmṛtaṃ ca sarveṣāṃ vibhajasva yathātatham//
tvayā dattaṃ ca gṛhṇīmaḥ satyaṃsatyaṃ vadāmi te

evamuktā tadā devī mohinī sarvamaṃgalā//
uvācāthāsurānsarvānrocayam̐llaukikīṃ sthitim

// bhagavānuvāca//
yūyaṃ sarve kṛtārthāśca jātā daivena kenacit//
adyopāvāsasaṃyuktā amṛtasyādhivāsanam

kriyatāmasurāḥ śreṣṭhāḥ śubhecchā kiṃcidasti vaḥ//
śvebhūte pāraṇaṃ kuryādvratārcanaratiśca vaḥ

nyāyopārjitavittena daśamāṃśena dhīmatā//
kartavyo viniyogaśca īśaprītyarthahetave

tatheti matvā te sarve yathoktaṃ devamāyayā//
cakrustathaiva daiteyā mohitā nātikovidāḥ

mayāsureṇa ca tadā bhavanāni kṛtāni vai//
manojñāni mahārhāṇi suprabhāṇi mahāṃti ca

teṣupaviṣṭāste sarve susnātāḥ samalaṃkṛtāḥ//
sthāpayitvā susaṃrabdhāḥ pūrṇaṃ kalaśamagrataḥ

rātrau jāgaraṇaṃ sarvaiḥ kṛtaṃ paramayā mudā//
athoṣasi pravṛtte ca prātaḥsnānayutā bhavan

asurā balimukhyāśca paṃktibhūtā yatākramam//
sarvamāvaśyakaṃ kṛtvā tadā pānaratā bhavan

baliśca vṛṣaparvā ca namuciḥ śaṃkha eva ca//
sudaṃṣṭraścaiva saṃhlādī kālanemirvibhīṣaṇaḥ

vātāpirilvalaḥ kumbho nikumbhaḥ pracchadastathā//
tathā sundopasundau ca niśumbhaḥ śumbha eva ca

mahiṣo mahiṣākṣaśca biḍālākṣaḥ pratāpavān//
cikṣurākhyo mahābāhurjṛbhaṇo'tha vṛṣāsuraḥ

vibāhurbāhuko ghorastathā vai ghoradarśanaḥ//
ete cānye ca bahavo daityadānavarākṣasāḥ//
yathākramaṃ copaviṣṭā rāhuḥ ketustathaiva ca

teṣāṃ tu koṭisaṃkhyānāṃ daityānāṃ paṃktirāsthitā

tatastayā tadā devyā amṛtārthaṃ hi vai dvijāḥ//
yajjātaṃ tacchṛṇaudhvaṃ hi tayā devyā kṛtaṃ mahat

sarve vijñāpitāḥ sadyo gṛhītakalaśā tadā//
śobhayā parayā yuktā sākṣātsā viṣṇumohinī

karasthena tadā devī kalaśena virājitā//
śuśubhe parayā kāṃtyā jaganmaṃgalamaṃgalā

pariveṣadharāḥ sarve surāste hyasurāṃtikam//
āgatāstatkṣaṇādeva yatra te hyasurottamāḥ

tāndṛṣṭvā mohinī sadya uvāca pramadottamā

//mohinyuvāca//
ete hyatithayo jñeyā dharmmasarvasvasādhanāḥ//
ebhyo deyaṃ yatāśaktyā yadi satyaṃ vaco mama//
pramāṇaṃ bhavatāṃ cādya kurudhvaṃ mā vilaṃbatha

pareṣāmupakāraṃ ca ye kurvaṃti svaśaktitaḥ//
dhanyāste caiva vijñeyāḥ pavitrāḥ lokapālakāḥ

kevalātmodarārthāya udyogaṃ ye prakurvate//
te kleśabhāgino jñeyā nātra kāryā vicāraṇā

tasmādvibhajanaṃ kāryaṃ mayaitasya śubhavratāḥ//
devebhyaśca prayacchadhvaṃ yaddhi cātmapriyāpriyam

ityukte vacane devyā tathā cakrurataṃ dritāḥ//
āhvayāmāsurasurāḥ sarvāndevānsavāsavān

upaviṣṭāśca te sarve amṛtārthaṃ ca bho dvijāḥ//
teṣūpaviśyamāneṣu hyuvāca paramaṃ vacaḥ//
mohinī sarvadharmmajñā asurāṇāṃ smayanniva

//mohinyuvāca//
ādau hyabhyāgatāḥ pūjyā iti vai vaidikī śrutiḥ

tasmādyūyaṃ vedaparāḥ sarve devaparāyaṇāḥ//
bruvaṃtu tvaritenaiva ādau keṣāṃ dadāmyaham//
amṛtaṃ hi mahābhāgā balimukhyā vadaṃtu bhoḥ

balinoktā tadā devī yatte manasi rocate//
svāminī tvaṃ na saṃdeho hyasmākaṃ suṃdarānane

evaṃ saṃmānitā tena balinā bhāvitātmanā//
pariveṣaṇakāryārthaṃ kalaśaṃ gṛhya satvarā

tasmānnarendrakarabhorulasaddṛkūlā śroṇītaṭālasagatirmavihvalāṃgī//
sā kūjatī kanakanūpurasiṃjitena kuṃbhastanī kalaśapāṇirathāviveśa

tadā tu devī pariveṣayaṃtī sā mohinī devagaṇāya sākṣāt//
vavarṣa deveṣu sudhārasaṃ punaḥ punaḥ sudhāhārarasāmṛtaṃ yathā

punaśca te devagaṇāḥ sudhārasaṃ dattaṃ tayā parayā viśvamūrtyā//
balimukhyāḥ saha lokapālā gaṃdharvayakṣāpsarasāṃ gaṇāśca

sarve daityā āsanasthā punaśca te devagaṇāḥ sudhārasaṃ dattaṃ pīḍitāśca//
tūṣṇīṃbhūtā balimukhyā dvijeṃdrā manasvino dhyānaparā babhūvuḥ

tatastathāvidhāndṛṣṭvā daityāṃstānmohamāśritān//
tadā rāhuśca ketuśca dvāvetau daityapuṃgavau

devānāṃ rūpamāsthāya amṛtārthaṃ tvarānvitau//
upaviṣṭau tadā paṅktyāṃ devānāmamṛtārthinau

yadāmṛtaṃ pātukāmo rāhuḥ paramadurjayaḥ//
candrārkābhyāṃ prakathito viṣṇoramitatejasaḥ

tadā tasya śiraśchinnaṃ rāhordurvigrahasya ca//
śiro gaganamāpede kabaṃdhaṃ ca mahītale//
bhramamāṇaṃ tadā hyadrīṃścūrṇayāmāsa vai tadā

sādriśca sarvabhūlokaścūrṇitaśca tadā'bhavat//
tayā tena ca dehena cūrṇitaṃ sacarācaram

dṛṣṭvā tadā mahādevastasyopari tu saṃsthitaḥ//
nivāsaḥ sarvadevānāṃ tasyāḥ pādatale'bhavat

pīḍanaṃ tatsamīpetha nivāsa iti nāma vai

mahatāmālayaṃ yasmādyasyāstaccaraṇāṃbujam//
mahālayeti vikhyātā jagattrayavimohinī

ketuśca dhūmarūpo'sāvākāśe vilayaṃ gataḥ//
sudhāṃ samarpya caṃdrāya tirodhānagato'bhavat

vāsudevo jagadyonirjagatāṃ kāraṇaṃ param//
viṣṇoḥ prasādāttajjātaṃ surāṇāṃ kāryasiddhidam

asurāṇāṃ vināśāya jātaṃ daivaviparyayāt//
vinā daivena jānīdhvamudyamo hi nirarthakaḥ

yaugapadyena taiḥ sarvaiḥ kṣīrābdhermaṃthanaṃ kṛtam//
siddhirjātā hi devānāmasiddhirasurānprati

tataśca te devavarānprakopitā daityāśca māyāpravi mohitāḥ punaḥ//
anekaśastrāstrayutāstadā'bhavanviṣṇau gate garjamānāstadānīm

iti śrīskānde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kedārakhaṃḍe samudramaṃthanākhyāne devānāmamṛtaprāśanavarṇanaṃnāma dvādaśo'dhyāyaḥ