Śivapurāṇa, Books 1 and 7 · Chapter 7.2.31

oṃ iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe śaivānāṃ kāmyakavarṇanaṃ nāma triṃśo 'dhyāyaḥ
Chapter 31
upamanyuruvāca
stotraṃ vakṣyāmi te kṛṣṇa pañcāvaraṇamārgataḥ
yogeśvaramidaṃ puṇyaṃ karma yena samāpyate

jaya jaya jagadekanātha śaṃbho prakṛtimanohara nityacitsvabhāva
atigatakaluṣaprapañcavācāmapi manasāṃ padavīmatītatattvam

svabhāvanirmalābhoga jaya sundaraceṣṭita
svātmatulyamahāśakte jaya śuddhaguṇārṇava

anantakāṃtisaṃpanna jayāsadṛśavigraha
atarkyamahimādhāra jayānākulamaṃgala

niraṃjana nirādhāra jaya niṣkāraṇodaya
nirantaraparānanda jaya nirvṛtikāraṇa

jayātiparamaiśvarya jayātikaruṇāspada
jaya svataṃtrasarvasva jayāsadṛśavaibhava

jayāvṛtamahāviśva jayānāvṛta kenacit
jayottara samastasya jayātyantaniruttara

jayādbhuta jayākṣudra jayākṣata jayāvyaya
jayāmeya jayāmāya jayābhāva jayāmala

mahābhuja mahāsāra mahāguṇa mahākatha
mahābala mahāmāya mahārasa mahāratha

namaḥ paramadevāya namaḥ paramahetave
namaśśivāya śāṃtāya namaśśivatarāya te

tvadadhīnamidaṃ kṛtsnaṃ jagaddhi sasurāsuram

atastvadvihitāmājñāṃ kṣamate ko 'tivartitum

ayaṃ punarjano nityaṃ bhavadekasamāśrayaḥ
bhavānato 'nugṛhyāsmai prārthitaṃ saṃprayacchatu

jayāṃbike jaganmātarjaya sarvajaganmayi
jayānavadhikaiśvarye jayānupamavigrahe

jaya vāṅmanasātīte jayāciddhvāṃtabhaṃjike
jaya janmajarāhīne jaya kālottarottare

jayānekavidhānasthe jaya viśveśvarapriye
jaya viśvasurārādhye jaya viśvavijṛṃbhiṇi

jaya maṃgaladivyāṃgi jaya maṃgaladīpike
jaya maṃgalacāritre jaya maṃgaladāyini

namaḥ paramakalyāṇaguṇasaṃcayamūrtaye
tvattaḥ khalu samutpannaṃ jagattvayyeva līyate

582b
tvadvinātaḥ phalaṃ dātumīśvaropi na śaknuyāt
janmaprabhṛti deveśi janoyaṃ tvadupāśritaḥ

ato 'sya tava bhaktasya nirvartaya manoratham
pañcavaktro daśabhujaḥ śuddhasphaṭikasannibhaḥ

varṇabrahmakalādeho devassakalaniṣkalaḥ
śivabhaktisamārūḍhaḥ śāṃtyatītassadāśivaḥ
bhaktyā mayārcito mahyaṃ prārthitaṃ śaṃ prayacchatu

sadāśivāṃkamārūḍhā śaktiricchā śivāhvayā
jananī sarvalokānāṃ prayacchatu manoratham

śivayordayitā putrau devau heraṃbaṣaṇmukhau
śivānubhāvau sarvajñau śivajñānāmṛtāśinau

tṛptau parasparaṃ snigdhau śivābhyāṃ nityasatkṛtau
satkṛtau ca sadā devau brahmādyaistridaśairapi

sarvalokaparitrāṇaṃ kartumabhyuditau sadā
svecchāvatāraṃ kurvaṃtau svāṃśabhedairanekaśaḥ

tāvimau śivayoḥ pārśve nityamitthaṃ mayārcitau
tayorājñāṃ puraskṛtya prārthitaṃ me prayacchatām

śuddhasphaṭikasaṃkāśamīśānākhyaṃ sadāśivam
mūrdhābhimāninī mūrtiḥ śivasya paramātmanaḥ

śivārcanarataṃ śāṃtaṃ śāṃtyatītaṃ makhāsthitam
pañcākṣarāṃtimaṃ bījaṃ kalābhiḥ pañcabhiryutam

prathamāvaraṇe pūrvaṃ śaktyā saha samarcitam
pavitraṃ paramaṃ brahma prārthitaṃ me prayacchatu

bālasūryapratīkāśaṃ puruṣākhyaṃ purātanam
pūrvavaktrābhimānaṃ ca śivasya parameṣṭhinaḥ

śāṃtyātmakaṃ marutsaṃsthaṃ śambhoḥ pādārcane ratam
prathamaṃ śivabījeṣu kalāsu ca catuṣkalam

pūrvabhāge mayā bhaktyā śaktyā saha samarcitam
pavitraṃ paramaṃ brahma prārthitaṃ me prayacchatu

añjanādipratīkāśamaghoraṃ ghoravigraham
devasya dakṣiṇaṃ vaktraṃ devadevapadārcakam

vidyāpādaṃ samārūḍhaṃ vahnimaṇḍalamadhyagam
dvitīyaṃ śivabījeṣu kalāsvaṣṭakalānvitam

śaṃbhordakṣiṇadigbhāge śaktyā saha samarcitam
pavitraṃ madhyamaṃ brahma prārthitaṃ me prayacchatu

kuṃkumakṣodasaṃkāśaṃ vāmākhyaṃ varaveṣadhṛk
vaktramuttaramīśasya pratiṣṭhāyāṃ pratiṣṭhitam

vārimaṃḍalamadhyasthaṃ mahādevārcane ratam
turīyaṃ śivabījeṣu trayodaśakalānvitam

devasyottaradigbhāge śaktyā saha samarcitam
pavitraṃ paramaṃ brahma prārthitaṃ me prayacchatu

śaṃkhakuṃdeṃdudhavalaṃ saṃdhyākhyaṃ saumyalakṣaṇam
śivasya paścimaṃ vaktraṃ śivapādārcane ratam

nivṛttipadaniṣṭhaṃ ca pṛthivyāṃ samavasthitam
tṛtīyaṃ śivabījeṣu kalābhiścāṣṭabhiryutam

583a
devasya paścime bhāge śaktyā saha samarcitam
pavitraṃ paramaṃ brahma prārthitaṃ me prayacchatu

śivasya tu śivāyāśca hṛnmūrtiśivabhāvite
tayorājñāṃ puraskṛtya te me kāmaṃ prayacchatām

śivasya ca śivāyāśca śikhāmūrtiśivāśrite
satkṛtya śivayorājñāṃ te me kāmaṃ prayacchatām

śivasya ca śivāyāśca varmaṇā śivabhāvite
satkṛtya śivayorājñāṃ te me kāmaṃ prayacchatām

śivasya ca śivāyāśca netramūrtiśivāśrite
satkṛtya śivayorājñāṃ te me kāmaṃ prayacchatām

astramūrtī ca śivayornityamarcanatatpare
satkṛtya śivayorājñāṃ te me kāmaṃ prayacchatām

vāmau jyeṣṭhastathā rudraḥ kālo vikaraṇastathā
balo vikaraṇaścaiva balapramathanaḥ paraḥ

sarvabhūtasya damanastādṛśāścāṣṭaśaktayaḥ
prārthitaṃ me prayacchaṃtu śivayoreva śāsanāt

athānaṃtaśca sūkṣmaśca śivaścāpyekanetrakaḥ
eka rudrākhyamartiśca śrīkaṇṭhaśca śikhaṃḍakaḥ

tathāṣṭau śaktayasteṣāṃ dvitīyāvaraṇe 'rcitāḥ
te me kāmaṃ prayacchaṃtu śivayoreva śāsanāt

bhavādyā mūrtayaścāṣṭau tāsāmapi ca śaktayaḥ
mahādevādayaścānye tathaikādaśamūrtayaḥ

śaktibhissahitāssarve tṛtīyāvaraṇe sthitāḥ
satkṛtya śivayorājñāṃ diśaṃtu phalamīpsitam

vṛkṣarājo mahātejā mahāmeghasamasvanaḥ
merumaṃdarakailāsahimādriśikharopamaḥ

sitābhraśikharākāraḥ kakudā pariśobhitaḥ
mahābhogīṃdrakalpena vālena ca virājitaḥ

raktāsyaśṛṃgacaraṇau raktaprāyavilocanaḥ
pīvaronnatasarvāṃgassucārugamanojjvalaḥ

praśastalakṣaṇaḥ śrīmānprajvalanmaṇibhūṣaṇaḥ
śivapriyaḥ śivāsaktaḥ śivayordhvajavāhanaḥ

tathā taccaraṇanyāsapāvitāparavigrahaḥ
gorājapuruṣaḥ śrīmāñchrīmacchūlavarāyudhaḥ
tayorājñāṃ puraskṛtya sa me kāmaṃ prayacchatu

nandīśvaro mahātejā nagendratanayātmajaḥ
sanārāyaṇakairdevairnityamabhyarcya vaṃditaḥ

śarvasyāṃtaḥpuradvāri sārdhaṃ parijanaiḥ sthitaḥ
sarveśvarasamaprakhyassarvāsuravimardanaḥ

sarveṣāṃ śivadharmāṇāmadhyakṣatve 'bhiṣecitaḥ
śivapriyaśśivāsaktaśśrīmacchūlavarāyudhaḥ

śivāśriteṣu saṃsaktastvanuraktaśca tairapi
satkṛtya śivayorājñāṃ sa me kāmaṃ prayacchatu

mahākālo mahābāhurmahādeva ivāparaḥ
583b
mahādevāśritānāṃ 1 tu nityamevābhirakṣatu

śivapriyaḥ śivāsaktaśśivayorarcakassadā
satkṛtya śivayorājñāṃ sa me diśatu kāṃkṣitam

sarvaśāstrārthatattvajñaḥ śāstā viṣnoḥ parā tanuḥ
mahāmohātmatanayo madhumāṃsāsavapriyaḥ
tayorājñāṃ puraskṛtya sa me kāmaṃ prayacchatu

brahmāṇī caiva māheśī kaumārī vaiṣṇavī tathā
vārāhī caiva māheṃdrī cāmuṃḍā caṃḍavikramā

etā vai mātaraḥ sapta sarvalokasya mātaraḥ
prārthitaṃ me prayacchaṃtu parameśvaraśāsanāt

mattamātaṃgavadano gaṃgomāśaṃkarātmajaḥ
ākāśadeho digbāhussomasūryāgnilocanaḥ

airāvatādibhirdivyairdiggajairnityamarcitaḥ
śivajñānamadodbhinnarstridaśānāmavighnakṛt

vighnakṛccāsurādīnāṃ vighneśaḥ śivabhāvitaḥ
satkṛtya śivayorājñāṃ sa me diśatu kāṃkṣitam

ṣaṇmukhaśśivasambhūtaḥ śaktivajradharaḥ prabhuḥ
agneśca tanayo devo hyaparṇātanayaḥ punaḥ

gaṃgāyāśca gaṇāṃbāyāḥ kṛttikānāṃ tathaiva ca
viśākhena ca śākhena naigameyena cāvṛtaḥ

iṃdrajiccaṃdrasenānīstārakāsurajittathā
śailānāṃ merumukhyānāṃ vedhakaśca svatejasā

taptacāmīkaraprakhyaḥ śatapatradalekṣaṇaḥ
kumārassukumārāṇāṃ rūpodāharaṇaṃ mahat

śivapriyaḥ śivāsaktaḥ śivapadārcakassadā
satkṛtya śivayorājñāṃ sa me diśatu kāṃkṣitam

jyeṣṭhā variṣṭhā varadā śivayoryajaneratā
tayorājñāṃ puraskṛtya sā me diśatu kāṃkṣitam

trailokyavaṃditā sākṣādulkākārā gaṇāṃbikā
jagatsṛṣṭivivṛddhyarthaṃ brahmaṇā 'bhyarthitā śivāt

śivāyāḥ pravibhaktāyā bhruvorantaranissṛtāḥ
dakṣāyaṇī satī menā tathā haimavatī hyumā

kauśikyāścaiva jananī bhadrakālyāstathaiva ca
aparṇāyāśca jananī pāṭalāyāstathaiva ca

śivārcanaratā nityaṃ rudrāṇī rudravallabhā
satkṛṭya śivayorājñāṃ sā me diśatu kāṃkṣitam

caṃḍaḥ sarvagaṇeśānaḥ śaṃbhorvadanasaṃbhavaḥ
satkṛtya śivayorājñāṃ sa me diśatu kāṃkṣitam

piṃgalo gaṇapaḥ śrīmāñchivāsaktaḥ śivapriyaḥ
ājñayā śivayoreva sa me kāmaṃ prayacchatu

bhṛṃgīśo nāma gaṇapaḥ śivarādhanatatparaḥ
1 sambandhasāmānyavivakṣayā karmaṇi paṣṭhī
584a
prayacchatu sa me kāmaṃ patyurājñā puraḥsaram

vīrabhadro mahātejā himakuṃdeṃdusannibhaḥ
bhadrakālīpriyo nityaṃ mātḥṇāṃ cābhirakṣitā

yajñasya ca śirohartā dakṣasya ca durātmanaḥ
upeṃdreṃdrayamādīnāṃ devānāmaṃgatakṣakaḥ

śivasyānucaraḥ śrīmāñchivaśāsanapālakaḥ
śivayoḥ śāsanādeva sa me diśatu kāṃkṣitam

sarasvatī maheśasya vāksarojasamudbhavā
śivayoḥ pūjane saktā sa me diśatu kāṃkṣitam

viṣṇorvakṣaḥsthitā lakṣmīḥ śivayoḥ pūjane ratā
śivayoḥ śāsanādeva sā me diśatu kāṃkṣitam

mahāmoṭī mahādevyāḥ pādapūjāparāyaṇā
tasyā eva niyogena sā me diśatu kāṃkṣitam

kauśikī siṃhamārūḍhā pārvatyāḥ paramā sutā
viṣṇornidrāmahāmāyā mahāmahiṣamardinī

niśaṃbhaśuṃbhasaṃhatrī madhumāṃsāsavapriyā
satkṛtya śāsanaṃ mātussā me diśatu kāṃkṣitam

rudrā rudrasamaprakhyāḥ prathamāḥ prathitaujasaḥ
bhūtākhyāśca mahāvīryā mahādevasamaprabhāḥ

nityamuktā nirupamā nirdvandvā nirupaplavāḥ
saśaktayassānucarāssarvalokanamaskṛtāḥ

sarveṣāmeva lokānāṃ sṛṣṭisaṃharaṇakṣamāḥ
parasparānuraktāśca parasparamanuvratāḥ

parasparamatisnigdhāḥ parasparanamaskṛtāḥ
śivapriyatamā nityaṃ śivalakṣaṇalakṣitāḥ

saumyādhārāstathā miśrāścāṃtarāladvayātmikāḥ
virūpāśca surūpāśca nānārūpadharāstathā

satkṛtya śivayorājñāṃ te me kāmaṃ diśaṃtu vai
devyā priyasakhīvargo devīlakṣaṇalakṣitaḥ

sahito rudrakanyābhiḥ śaktibhiścāpyanekaśaḥ
tṛtīyāvaraṇe śaṃbhorbhaktyā nityaṃ samarcitaḥ

satkṛtya śivayorājñāṃ sa me diśatu maṃgalam
divākaro maheśasya mūrtirdīptisumaṃḍalaḥ

nirguṇo guṇasaṃkīrṇastathaiva guṇakevalaḥ
avikārātmakaścādya ekassāmānyavikriyaḥ

asādhāraṇakarmā ca sṛṣṭisthitilayakramāt
evaṃ tridhā caturdhā ca vibhaktāḥ pañcadhā punaḥ

caturthāvaraṇe śaṃbhoḥ pūjitaścānugaiḥ saha
śivapriyaḥ śivāsaktaḥ śivapādārcane rataḥ

satkṛtya śivayorājñāṃ sa me diśatu maṃgalam
divākaraṣaḍaṃgāni dīptādyāścāṣṭaśaktayaḥ

ādityo bhāskaro bhānū raviścetyanupūrvaśaḥ
arko brahmā tathā rudro viṣnuścādityamūrtayaḥ

vistarāsutarābodhinyāpyāyinyaparāḥ punaḥ
584b
uṣā prabhā tathā prājñā saṃdhyā cetyapi śaktayaḥ

somādiketuparyaṃtā grahāśca śivabhāvitāḥ
śivayorājñayānunnā maṃgalaṃ pradiśaṃtu me

athavā dvādaśādityāstathā dvādaśa śaktayaḥ
ṛṣayo devagaṃdharvāḥ pannagāpsarasāṃ gaṇāḥ

grāmaṇyaśca tathā yakṣā rākṣasāścāsurāstathā
saptasaptagaṇāścaite saptacchaṃdomayā hayāḥ

vālakhilyā dayaścaiva sarve śivapadārcakāḥ
satkṛtyaśivayorājñāṃ maṃgalaṃ pradiśaṃtu me

brahmātha devadevasya mūrtirbhūmaṇḍalādhipaḥ
catuḥṣaṣṭiguṇaiśvaryo buddhitattve pratiṣṭhitaḥ

nirguṇo guṇasaṃkīrṇastathaiva guṇakevalaḥ
avikārātmako devastatassādhāraṇaḥ puraḥ

asādhāraṇakarmā ca sṛṣṭisthitilayakramāt
bhuvaṃ tridhā caturdhā ca vibhaktaḥ pañcadhā punaḥ

caturthāvaraṇe śaṃbho pūjitaśca sahānugaiḥ
śivapriyaḥ śivāsaktaśśivapādārcane rataḥ

satkṛtya śivayorājñāṃ sa me diśatu maṃgalam
hiraṇyagarbho lokeśo virāṭ kālaśca pūruṣaḥ

sanatkumāraḥ sanakaḥ sanaṃdaśca sanātanaḥ
prajānāṃ patayaścaiva dakṣādyā brahmasūnavaḥ

ekādaśa sapatnīkā dharmassaṃkalpa eva ca
śivārcanaratāścaite śivabhaktiparāyaṇāḥ

śivājñāvaśagāssarve diśaṃtu mama maṃgalam
catvāraśca tathā vedāssetihāsapurāṇakāḥ

dharmaśāstrāṇi vidyābhirvaidikībhissamanvitāḥ
parasparaviruddhārthāḥ śivaprakṛtipādakāḥ

satkṛtya śivayorājñāṃ maṃgalaṃ pradiśaṃtu me
atha rudro mahādevaḥ śaṃbhormūrtirgarīyasī

vāhneyamaṇḍalādhīśaḥ pauruṣaiśvaryavānprabhuḥ
śivābhimānasaṃpanno nirguṇastriguṇātmakaḥ

kevalaṃ sāttvikaścāpi rājasaścaiva tāmasaḥ
avikārarataḥ pūrvaṃ tatastu samavikriyaḥ

asādhāraṇakarmā ca sṛṣṭyādikaraṇātpṛthak
brahmaṇopi śiraśchettā janakastasya tatsutaḥ

janakastanayaścāpi viṣṇorapi niyāmakaḥ
bodhakaśca tayornityamanugrahakaraḥ prabhuḥ

aṃḍasyāṃtarbahirvartī rudro lokadvayādhipaḥ
śivapriyaḥ śivāsaktaḥ śivapādārcane rataḥ

śivasyājñāṃ puraskṛtya sa me diśatu maṃgalam
tasya brahma ṣaḍaṃgāni vidyeśāṃtaṃ tathāṣṭakam

catvāro mūrtibhedāśca śivapūrvāḥ śivārcakāḥ
śivo bhavo haraścaiva mṛḍaścaiva tathāparaḥ
585a
śivasyājñāṃ puraskṛtya maṃgalaṃ pradiśaṃtu me

atha viṣṇurmaheśasya śivasyaiva parā tanuḥ
vāritattvādhipaḥ sākṣādavyaktapadasaṃsthitaḥ

nirguṇassattvabahulastathaiva guṇakevalaḥ
avikārābhimānī ca trisādhāraṇavikriyaḥ

asādhāraṇakarmā ca sṛṣṭyādikaraṇātpṛthak
dakṣiṇāṃgabhavenāpi spardhamānaḥ svayaṃbhuvā

ādyena brahmaṇā sākṣātsṛṣṭaḥ sraṣṭā ca tasya tu
aṃḍasyāṃtarbahirvartī viṣṇurlokadvayādhipaḥ

asurāṃtakaraścakrī śakrasyāpi tathānujaḥ
prādurbhūtaśca daśadhā bhṛguśāpacchalādiha

bhūbhāranigrahārthāya svecchayāvātarakṣitau
aprameyabalo māyī māyayā mohayañjagat

mūrtiṃ kṛtvā mahāviṣṇuṃ sadāśiṣṇumathāpi vā
vaiṣṇavaiḥ pūjito nityaṃ mūrtitrayamayāsane

śivapriyaḥ śivāsaktaḥ śivapādārcane rataḥ
śivasyājñāṃ puraskṛtya sa me diśatu maṃgalam

vāsudevo 'niruddhaśca pradyumnaśca tataḥ paraḥ
saṃkarṣaṇassamākhyātāścatasro mūrtayo hareḥ

matsyaḥ kūrmo varāhaśca nārasiṃho 'tha vāmanaḥ
rāmatrayaṃ tathā kṛṣṇo viṣṇusturagavaktrakaḥ

cakraṃ nārāyaṇasyāstraṃ pāṃcajanyaṃ ca śārṅgakam
satkṛtya śivayorājñāṃ maṃgalaṃ pradiśaṃtu me

prabhā sarasvatī gaurī lakṣmīśca śivabhāvitā
śivayoḥ śāsanādetā maṃgalaṃ pradiśaṃtu me

indro 'gniśca yamaścaiva nirṛtirvaruṇastathā
vāyuḥ somaḥ kuberaśca tatheśānastriśūladhṛk

sarve śivārcanaratāḥ śivasadbhāvabhāvitāḥ
satkṛtya śivayorājñāṃ maṃgalaṃ pradiśaṃtu me

triśūlamatha vajraṃ ca tathā paraśusāyakau
khaḍgapāśāṃkuśāścaiva pinākaścāyudhottamaḥ

divyāyudhāni devasya devyāścaitāni nityaśaḥ
satkṛtya śivayorājñāṃ rakṣāṃ kurvaṃtu me sadā

vṛṣarūpadharo devaḥ saurabheyo mahābalaḥ
vaḍavākhyānalaspardhāṃ pañcagomātṛbhirvṛtaḥ

vāhanatvamanuprāptastapasā parameśayoḥ
tayorājñāṃ puraskṛtya sa me kāmaṃ prayacchatu

naṃdā sunaṃdā surabhiḥ suśīlā sumanāstathā
pañcagomātarastvetāśśivaloke vyavasthitāḥ

śivabhaktiparā nityaṃ śivārcanaparāyaṇāḥ
śivayoḥ śāsanādeva diśaṃtu mama vāṃchitam

kṣetrapālo mahātejā nīla jīmūtasannibhaḥ
daṃṣṭrākarālavadanaḥ sphuradraktādharojjvalaḥ

raktordhvamūrdhajaḥ śrīmānbhrukuṭīkuṭilekṣaṇaḥ
585b
raktavṛttatrinayanaḥ śaśipannagabhūṣaṇaḥ

nagnastriśūlapāśāsikapālodyatapāṇikaḥ
bhairavo bhairavaiḥ siddhairyoginībhiśca saṃvṛtaḥ

kṣetrekṣetre samāsīnaḥ sthito yo rakṣakassatām
śivapraṇāmaparamaḥ śivasadbhāvabhāvitaḥ

śivaśritānviśeṣeṇa rakṣanputrānivaurasān
satkṛtya śivayorājñāṃ sa me diśatu maṅgalam

tālajaṅghādayastasya prathamāvaraṇercitāḥ
satkṛtya śivayorājñāṃ catvāraḥ samavantu mām

bhairavādyāśca ye cānye samaṃtāttasya veṣṭitāḥ
te 'pi māmanugṛhṇaṃtu śivaśāsanagauravāt

nāradādyāśca munayo divyā devaiśca pūjitāḥ
sādhyā māgāśca ye devā janalokanivāsinaḥ

vinivṛttādhikārāśca maharlokanivāsinaḥ
saptarṣayastathānye vai vaimānikaguṇaissaha

sarve śivārcanaratāḥ śivājñāvaśavartinaḥ
śivayorājñayā mahyaṃ diśaṃtu mama kāṃkṣitam 1

gaṃdharvādyāḥ piśācāṃtāścatasro devayonayaḥ
siddhā vidyādharādyāśca ye 'pi cānye nabhaścarāḥ

asurā rākṣasāścaiva pātālatalavāsinaḥ
anaṃtādyāśca nāgendrā vainateyādayo dvijāḥ

kūṣmāṃḍāḥ pretavetālā grahā bhūtagaṇāḥ pare
ḍākinyaścāpi yoginyaḥ śākinyaścāpi tādṛśāḥ

kṣetrārāmagṛhādīni tīrthānyāyatanāni ca
dvīpāḥ samudrā nadyaśca nadāścānye sarāṃsi ca

girayaśca sumervādyāḥ kananāni samaṃtataḥ
paśavaḥ pakṣiṇo vṛkṣāḥ kṛmikīṭādayo mṛgāḥ

bhuvanānyapi sarvāṇi bhuvanānāmadhīśvaraḥ
aṇḍānyāvaraṇaissārdhaṃ māsāśca daśa diggajāḥ

varṇāḥ padāni maṃtrāśca tattvānyapi sahādhipaiḥ
brahmāṃḍadhārakā rudrā rudrāścānye saśaktikāḥ

yacca kiṃcijjagatyasmindṛṣṭaṃ cānumitaṃ śrutam
sarve kāmaṃ prayacchantu śivayoreva śāsanāt

atha vidyā parā śaivī paśupāśavimocinī
pañcārthasaṃjñitā divyā paśuvidyābahiṣkṛtā

śāstraṃ ca śivadharmākhyaṃ dharmākhyaṃ ca taduttaram
śaivākhyaṃ śivadharmākhyaṃ purāṇaṃ śrutisaṃmitam

śaivāgamāśca ye cānye kāmikādyāścaturvidhāḥ
śivābhyāmaviśeṣeṇa satkṛtyeha samarcitāḥ

1 sarvābhilāṣamityarthaḥ
586a
tābhyāmeva samājñātā mamābhipretasiddhaye
karmedamanumanyaṃtāṃ saphalaṃ sādhvanuṣṭhitam

śvetādyā nakulīśāṃtāḥ saśiṣyāścāpi deśikāḥ
tatsaṃtatīyā guravo viśeṣādguravo mama

śaivā māheśvarāścaiva jñānakarmaparāyaṇāḥ
karmedamanumanyaṃtāṃ saphalaṃ sādhvanuṣṭhitam

laukikā brāhmaṇāssarve kṣatriyāśca viśaḥ kramāt
vedavedāṃgatattvajñāḥ sarvaśāstraviśāradāḥ

sāṃkhyā vaiśeṣikāścaiva yaugā naiyāyikā narāḥ
saurā brahmāstathā raudrā vaiṣṇavāścāpare narāḥ

śiṣṭāḥ sarve viśiṣṭā ca śivaśāsanayaṃtritāḥ
karmedamanumanyaṃtāṃ mamābhipretasādhakam

śaivāḥ siddhāṃtamārgasthāḥ śaivāḥ pāśupatāstathā
śaivā mahāvratadharāḥ śaivāḥ kāpālikāḥ pare

śivājñāpālakāḥ pūjyā mamāpi śivaśāsanāt
sarve mamānugṛhṇaṃtu śaṃsaṃtu saphalakriyām

dakṣiṇajñānaniṣṭhāśca dakṣiṇottaramārgagāḥ
avirodhena vartaṃtāṃ maṃtraśreyo 'rthino mama

nāstikāśca śaṭhāścaiva kṛtaghnāścaiva tāmasāḥ
pāṣaṃḍāścātipāpāśca vartaṃtāṃ dūrato mama

bahubhiḥ kiṃ stutairatra ye 'pi ke 'picidāstikāḥ
sarve māmanugṛhṇaṃtu saṃtaḥ śaṃsaṃtu maṃgalam

namaśśivāya sāṃbāya sasutāyādihetave
pañcāvaraṇarūpeṇa prapañcenāvṛtāya te

ityuktvā daṃḍavadbhūmau praṇipatya śivaṃ śivām
japetpañcākṣarīṃ vidyāmaṣṭottaraśatāvarām

tathaiva śaktividyāṃ ca japitvā tatsamarpaṇam
kṛtvā taṃ kṣamayitveśaṃ pūjāśeṣaṃ samāpayet

etatpuṇyatamaṃ stotraṃ śivayorhṛdayaṃgamam
sarvābhīṣṭapradaṃ sākṣādbhuktimuktyaikasādhanam

ya idaṃ kīrtayennityaṃ śṛṇuyādvā samāhitaḥ
sa vidhūyāśu pāpāni śivasāyujyamāpnuyāt

goghnaścaiva kṛtaghnaśca vīrahā bhrūṇahāpi vā
śaraṇāgataghātī ca mitraviśraṃbhaghātakaḥ

duṣṭapāpasamācāro mātṛhā pitṛhāpi vā
stavenānena japtena tattatpāpātpramucyate

duḥsvapnādimahānarthasūcakeṣu bhayeṣu ca
yadi saṃkīrtayedetanna tato nārthabhāgbhavet

āyurārogyamaiśvaryaṃ yaccānyadapi vāñchitam
stotrasyāsya jape tiṣṭhaṃstatsarvaṃ labhate naraḥ

asaṃpūjya śivastotraṃ japātphalamudāhṛtam
saṃpūjya ca jape tasya phalaṃ vaktuṃ na śakyate

586b
āstāmiyaṃ phalāvāptirasminsaṃkīrtite sati
sārdhamaṃbikayā devaḥ śrutyaivaṃ divi tiṣṭhati

tasmānnabhasi saṃpūjya devaṃ devaṃ sahomayā
kṛtāṃjalipuṭastiṣṭhaṃstotrametadudīrayet