Śivapurāṇa, Books 1 and 7 · Chapter 7.1.6

iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe śivatattvajñānavarṇanaṃ nāma pañcamo 'dhyāyaḥ
Chapter 6
munaya ūcuḥ
yo 'yaṃ paśuriti prokto yaśca pāśa udāhṛtaḥ
abhyāṃ vilakṣaṇaḥ kaścitkoyamasti tayoḥ patiḥ

vāyuruvāca
asti kaścidaparyaṃtaramaṇīyaguṇāśrayaḥ
patirviśvasya nirmātā paśupāśavimocanaḥ

abhāve tasya viśvasya sṛṣṭireṣā kathaṃ bhavet
acetanatvādajñānādanayoḥ paśupāśayoḥ

pradhānaparamāṇvādi yāvatkiṃcidacetanam
tatkartṛkaṃ svayaṃ dṛṣṭaṃ buddhimatkāraṇaṃ vinā

jagacca kartṛsāpekṣaṃ kāryaṃ sāvayavaṃ yataḥ
tasmātkāryasya kartṛtvaṃ patyurna paśupāśayoḥ

paśorapi ca kartṛtvaṃ patyuḥ preraṇapūrvakam
ayathākaraṇajñānamaṃdhasya gamanaṃ yathā

ātmānaṃ ca pṛthaṅmatvā preritāraṃ tataḥ pṛthak
asau juṣṭastatastena hyamṛtatvāya kalpate

paśoḥ pāśasya patyuśca tattvato 'sti padaṃ param
brahmavittadviditvaiva yonimukto bhaviṣyati

saṃyuktametaddvitayaṃ kṣaramakṣarameva ca
vyaktāvyaktaṃ bibhartīśo viśvaṃ viśvavimocakaḥ

bhoktā bhogyaṃ prerayitā maṃtavyaṃ trividhaṃ smṛtam
nātaḥ paraṃ vijānadbhirveditavyaṃ hi kiṃcanaḥ

tileṣu vā yathā tailaṃ dadhni vā sarpirarpitam
yathāpaḥ srotasi vyāptā yathāraṇyāṃ hutāśanaḥ

evameva mahātmānamātmanyātmavilakṣaṇam
satyena tapasā caiva nityayukto 'nupaśyati

ya eko jālavānīśa īśānībhissvaśaktibhiḥ
sarvāṃllokānimān kṛtvā eka eva sa īśate 1

eka eva tadā rudro na dvitīyo 'sti kaścana
saṃsṛjya viśvabhuvanaṃ goptā te saṃcukoca yaḥ

1 śablugabhāva ārṣa
508a
viśvataścakṣurevāyamutāyaṃ viśvatomukhaḥ
tathaiva viśvatobāhuviśvataḥ pādasaṃyutaḥ

dyāvābhūmī ca janayan deva eko maheśvaraḥ
sa eva sarvadevānāṃ prabhavaścodbhavastathā

hiraṇyagarbhaṃ devānāṃ prathamaṃ janayedayam
viśvasmādadhiko rudro maharṣiriti hi śrutiḥ

vedāhametaṃ puruṣaṃ mahāṃtamamṛtaṃ dhruvam
ādityavarṇaṃ tamasaḥ parastātsaṃsthitaṃ prabhum

asmānnāsti paraṃ kiṃcidaparaṃ paramātmanaḥ
nāṇīyo 'sti na ca jyāyastena pūrṇamidaṃ jagat

sarvānanaśirogrīvaḥ sarvabhūtaguhāśayaḥ
sarvavyāpī ca bhagavāṃstasmātsarvagataśśivaḥ

sarvataḥ pāṇipādo 'yaṃ sarvato 'kṣiśiromukhaḥ
sarvataḥ śrutimāṃlloke sarvamāvṛtya tiṣṭhati

sarvendriyaguṇābhāsassarvendriyavivarjitaḥ
sarvasya prabhurīśānaḥ sarvasya śaraṇaṃ suhṛt

acakṣurapi yaḥ paśyatyakarṇo 'pi śṛṇoti yaḥ
sarvaṃ vetti na vettāsya tamāhuḥ puruṣaṃ param

aṇoraṇīyānmahato mahīyānayamavyayaḥ
guhāyāṃ nihitaścāpi jaṃtorasya maheśvaraḥ

tamakratuṃ kratuprāyaṃ mahimātiśayānvitam
dhātuḥ prasādādīśānaṃ vītaśokaḥ prapaśyati

vedāhamenamajaraṃ purāṇaṃ sarvagaṃ vibhum
nirodhaṃ janmano yasya vadaṃti brahmavādinaḥ

eko 'pi trīnimāṃllokān bahudhā śaktiyogataḥ
vidadhāti vicetyaṃte 1 viśvamādau maheśvaraḥ

viśvadhātrītyajākhyā ca śaivī citrā kṛtiḥ parā
tāmajāṃ lohitāṃ śuklāṃ kṛṣṇāmekāṃ tvajaḥ prajām

janitrīmanuśete 'nyojuṣamāṇassvarūpiṇīm
tāmevājāmajo 'nyastu bhaktabhogā jahāti ca

dvau suparṇau ca sayujau samānaṃ vṛkṣamāsthitau
eko 'tti pippalaṃ svādu paro 'naśnan prapaśyati

vṛkṣesmin puruṣo magno guhyamānaśca śocati
juṣṭamanyaṃ yadā paśyedīśaṃ paramakāraṇam

tadāsya mahimānaṃ ca vītaśokassukhī bhavet
chaṃdāṃsi yajñāḥ ṛtavo yadbhūtaṃ bhavyameva ca

māyī viśvaṃ sṛjatyasminniviṣṭo māyayā paraḥ
māyāṃ tu prakṛtiṃ vidyānmāyinaṃ tu maheśvaram

tasyāstvavayavaireva vyāptaṃ sarvamidaṃ jagat
sūkṣmātisūkṣmamīśānaṃ kalalasyāpi madhyataḥ

1 vicetoti prayogastvārṣatvena, `vyatyayo bahulam' iti smaraṇena sādhuḥ
508b
sraṣṭāramapi viśvasya veṣṭitāraṃ ca tasya tu
śivameveśvaraṃ jñātvā śāṃtimatyaṃtamṛcchati

sa eva kālo goptā ca viśvasyādhipatiḥ prabhuḥ
taṃ viśvādhipatiṃ jñātvā mṛtyupāśātpramucyate

ghṛtātparaṃ maṃḍamiva sūkṣmaṃ jñātvā sthitaṃ prabhum
sarvabhūteṣu gūḍhaṃ ca sarvapāpaiḥ pramucyate

eṣa eva paro devo viśvakarmā maheśvaraḥ
hṛdaye saṃniviṣṭaṃ taṃ jñātvaivāmṛtamaśnute

yadā samastaṃ na divā na rātrirna sadapyasat
kevalaśśiva evaiko yataḥ prajñā purātanī

nainamūrdhvaṃ na tiryakca na madhyaṃ paryajigrahat
na tasya pratimā cāsti yasya nāma mahadyaśaḥ

ajātamimamevaike buddhā janmani bhīravaḥ
rudrasyāsya prapadyaṃte rakṣārthaṃ dakṣiṇaṃ sukham

dve akṣare brahmapare tvanaṃte samudāhṛte
vidyāvidye samākhyāte nihite yatra gūḍhavat

kṣaraṃ tvavidyā hyamṛtaṃ vidyeti parigīyate
te ubhe īśate yastu so 'nyaḥ khalu maheśvaraḥ

ekaikaṃ bahudhā jālaṃ vikurvannekavacca yaḥ
sarvādhipatyaṃ kurute sṛṣṭvā sarvān pratāpavān

diśa ūrdhvamadhastiryak bhāsayan bhrājate svayam
yo niḥsvabhāvādapyeko vareṇyastvadhitiṣṭhati

svabhāvavācakān sarvān vācyāṃśca pariṇāmayan
guṇāṃśca bhogyabhoktṛtve tadviśvamadhitiṣṭhati

te vai guhyopaṇiṣadi gūḍhaṃ brahma parātparam
brahmayoniṃ jagatpūrvaṃ vidurdevā maharṣayaḥ

bhāvagrāhyamanīhākhyaṃ bhāvābhāvakaraṃ śivam
kalāsargakaraṃ devaṃ ye viduste jahustanum

svabhāvameke manyaṃte kālameke vimohitāḥ
devasya mahimā hyeṣa yenedaṃ bhrāmyate jagat

yenedamāvṛtaṃ nityaṃ kālakālātmanā yataḥ
teneritamidaṃ karma bhūtaiḥ saha vivartate

tatkarma bhūyaśaḥ kṛtvā vinivṛtya ca bhūyaśaḥ
tattvasya saha tattvena yogaṃ cāpi sametya vai

aṣṭābhiśca tribhiścaivaṃ dvābhyāṃ caikena vā punaḥ
kālenātmaguṇaiścāpi kṛtsnameva jagat svayam

guṇairārabhya karmāṇi svabhāvādīni yojayet
teṣāmabhāve nāśaḥ syātkṛtasyāpi ca karmaṇaḥ

karmakṣaye punaścānyattato yāti sa tattvataḥ
sa evādissvayaṃ yoganimittaṃ bhoktṛbhogayoḥ

parastrikālādakalassa eva parameśvaraḥ
sarvavit triguṇādhīśo brahmasākṣātparātparaḥ

taṃ viśvarūpamabhavaṃ bhavamīḍyaṃ prajāpatim
509a
devadevaṃ jagatpūjyaṃ svacittasthamupāsmahe

kālādibhiḥ paro yasmātprapañcaḥ parivartate
dharmāvahaṃ pāpanudaṃ bhogeśaṃ viśvadhāma ca

tamīśvarāṇāṃ paramaṃ maheśvaraṃ taṃ devatānāṃ paramaṃ ca daivatam
patiṃ patīnāṃ paramaṃ parastādvidāma devaṃ bhuvaneśvareśvaram

na tasya vidyeta kāryaṃ kāraṇaṃ ca na vidyate
na tatsamo 'dhikaścāpi kvacijjagati dṛśyate

parāsya vividhā śaktiḥ śrutau svābhāvikī śrutā
jñānaṃ balaṃ kriyā caiva yābhyo viśvamidaṃ kṛtam

tasyāsti patiḥ kaścinnaiva liṃgaṃ na ceśitā
kāraṇaṃ kāraṇānāṃ ca sa teṣāmadhipādhipaḥ

na cāsya janitā kaścinna ca janma kutaścana
na janmahetavastadvanmalamāyādisaṃjñakāḥ

sa ekassarvabhūteṣu gūḍho vyāptaśca viśvataḥ
sarvabhūtāṃtarātmā ca dharmādhyakṣassa kathyate

sarvabhūtādhivāsaśca sākṣī cetā ca nirguṇaḥ
eko vaśī niṣkriyāṇāṃ bahūnāṃ vivaśātmanām

nityānāmapyasau nityaścetanānāṃ ca cetanaḥ
eko bahūnāṃ cākāmaḥ kāmānīśaḥ prayacchati

sāṃkhyayogādhigamyaṃ yatkāraṇaṃ jagatāṃ patim
jñātvā devaṃ paśuḥ pāśaissarvaireva vimucyate

viśvakṛdviśvavitsvātmayonijñaḥ kālakṛdguṇī
pradhānaḥ kṣetrajñapatirguṇeśaḥ pāśamocakaḥ

brahmāṇaṃ vidadhe pūrvaṃ vedāṃścopādiśatsvayam
yo devastamahaṃ buddhvā svātmabuddhiprasādataḥ

mumukṣurasmātsaṃsārātprapadye śaraṇaṃ śivam
niṣphalaṃ niṣkriyaṃ śāṃtaṃ niravadyaṃ niraṃjanam

amṛtasya paraṃ setuṃ dagdheṃdhanamivānilam
yadā carmavadākāśaṃ veṣṭayiṣyaṃti mānavāḥ

tadā śivamavijñāya duḥkhasyāṃto bhaviṣyati

tapaḥprabhāvāddevasya prasādācca maharṣayaḥ
atyāśramocitajñānaṃ pavitraṃ pāpanāśanam

vedāṃte paramaṃ guhyaṃ purākalpapracoditam
brahmaṇo vadanāllabdhaṃ mayedaṃ bhāgyagauravāt

nāpraśāṃtāya dātavyametajjñānamanuttamam
na putrāyāśuvṛttāya nāśiṣyāya ca sarvathā

yasya deve parābhaktiryathā deve tathā gurau
tasyaite kathitāhyarthāḥ prakāśaṃte mahātmanaḥ

ataśca saṃkṣepamidaṃ śṛṇudhvaṃ śivaḥ parastātprakṛteśca puṃsaḥ
sa sargakāle ca karoti sarvaṃ saṃhārakāle punarādadāti