Śikṣāsamuccayakārikā · Verses 1-20

Śikṣāsamuccayakārikā (Śsk)
yadā mama pareṣāṃ ca bhayaṃ duḥkhaṃ ca na priyam /
tadātmanaḥ ko viśeṣo yattaṃ rakṣāmi netaram

duḥkhāntaṃ kartukāmena sukhāntaṃ gantumicchatā /
śraddhāmūlaṃ dṛḍhīkṛtya bodhau kāryā matirdṛḍhā

(śikṣādaro) mahāyānādbodhisattvasya saṃvaraḥ /
marmasthānānyato vidyādyenānāpattiko bhavet

ātmabhāvasya bhogānāṃ tryadhvavṛtteḥ śubhasya ca /
utsargaḥ sarvasattvebhyastadrakṣā śuddhivardhanam

paribhogāya sattvānāmātmabhāvādi dīyate /
arakṣite kuto bhogaḥ ki dattaṃ yanna bhujyate

tasmātsattvopabhogārthamātmabhāvādi pālayet /
kalyāṇamitrānutsargāt sūtrāṇāṃ ca sadekṣaṇāt

tatrātmabhāve kā rakṣā yadanarthavivarjanam /
kenaitallabhyate sarvaṃ niṣphalaspandavarjanāt

etatsidhyetsadā smṛtyā smṛtistīvrādarādbhavet /
ādaraḥ śamamāhātmyaṃ jñātvātāpena jāyate

samāhito yathābhūtaṃ prajānātītyavadanmuniḥ /
śamācca na caleccitaṃ bāhyaceṣṭā nivartanāt

sarvatrāpacalo mandamatisnigdhābhibhāṣaṇāt /
āvavarjayejjanaṃ bhavyamādeyaścāpi jāyate

anādeyaṃ tu taṃ lokaḥ paribhūya jināṅkuram /
bhasmacchanno yathā vahniḥ pacyeta narakādiṣu

ratnameghe jinenoktastena saṅkṣepasaṃvaraḥ /
yenāprasādaḥ sattvānāṃ tadyatnena vivarjayet

eṣā rakṣātmabhāvasya bhaiṣajyavasānādibhiḥ /
ātmatṛṣṇopabhogāttu kliṣṭāpattiḥ prajāyate

sukṛṭārambhiṇā bhāvyaṃ mātrajñena ca sarvataḥ /
iti śikṣāpadādasya bhogarakṣā na duṣkarā

svārthavipāka vaitṛṣṇyācchubhaṃ saṃrakṣitaṃ bhavet /
paścātāpaṃ na kurvīta na ca kṛtvā prakāśayet

lābhasatkārabhītaḥ syādunnatiṃ varjayetsadā /
bodhisattvaḥ prasannaḥ syāddharme vimatimutsṛjet

śodhitasyātmabhāvasyabhogaḥ pathyo bhaviṣyati /
samyaksiddhasya bhaktasya niṣkaṇasyeva dehinām

tṛṇacchanna yathā śasyaṃ rogaiḥ sīdati naidhate /
buddhāṅkurastathā vṛddhiṃ kleśacchanno na gacchati

ātmabhāvasya kā śuddhiḥ pāpakleśaviśodhanam /
sambuddhottayarthasāreṇa yatnabhāve tvapāyagaḥ

kṣameta śrutameṣeta saṃśrayeta vanaṃ tataḥ /
sāmādhānāya yujyeta bhāvayedaśubhādikam