Shukla Yajurveda · Chapter 7

agniṣṭome upāṃśugrahādi savanadvayagatā dakṣiṇādānāntā mantrāḥ

vācas pataye pavasva vṛṣṇo aꣳśubhyāṃ gabhastipūtaḥ /
devo devebhyaḥ pavasva yeṣāṃ bhāgo 'si

madhumatīr na ' iṣas kṛdhi /
yat te somādābhyaṃ nāma jāgṛvi tasmai te soma somāya svāhā /
svāhā /
urv antarikṣam anv emi

svāṃkṛto 'si viśvebhya indriyebhyo divyebhyaḥ pārthivebhyo manas tvāṣṭu svāhā tvā subhava sūryāya /
devebhyas tvā marīcipebhyaḥ /
devāśo yasmai tveḍe tat satyam upariprutā bhaṅgena hato 'sau phaṭ /
prāṇāya tvā /
vyānāya tvā

upayāmagṛhīto 'sy antaryaccha maghavan pāhi somam /
uruṣya rāya 'eṣo yajasva

antas te dyāvāpṛthivī dadhāmy antardadhāmy urv antarikṣam /
sajūr devebhir avaraiḥ paraiścāntaryāme maghavan mādayasva

svāṃkṛto'si viśvebhya ' indriyebhyo divyebhyaḥ pārthivebhyo manas tvāṣṭu svāhā tvā subhava sūryāya /
devebhyas tvā marīcipebhyaḥ /
' udānāya tvā

ā vāyo bhūṣa śucipā ' upa naḥ sahasraṃ te niyuto viśvavāra /
upo te'andho madyam ayāmi yasya deva dadhiṣe pūrvapeyam /
vāyave tvā

indravāyū ' ime sutā ' upa prayobhir āgatam /
indavo vām uśanti hi /
upayāmagṛhīto'si vāyava ' indravāyubhyāṃ tvā /
eṣa te yoniḥ /
sajoṣobhyāṃ tvā

ayaṃ vāṃ mitrāvaruṇā sutaḥ soma ' ṛtāvṛdhā /
mamed iha śrutaꣳ havam /
upayāmagṛhīto 'si mitrāvaruṇābhyāṃ tvā

rāyā vayaꣳ sasavāꣷso madema havyena devā yavasena gāvaḥ /
tāṃ dhenuṃ mitrāvaruṇā yuvaṃ no viśvāhā dhattam anapasphurantīm /
eṣa te yonir ṛtāyubhyāṃ tvā

yā vāṃ kaśā madhumatyāśvinā sūnṛtāvatī /
tayā yajñaṃ mimikṣatam /
upayāmagṛhīto 'sy aśvibhyāṃ tvā /
eṣa te yonir mādhvībhyāṃ tvā

taṃ pratnathā pūrvathā viśvathemathā jyeṣṭhatātiṃ barhiṣadaꣳ svarvidam /
pratīcīnaṃ vṛjanaṃ dohase dhunim āśuṃ jayantam anu yāsu vardhase /
upayāmagṛhīto 'si śaṇḍāya tvā /
eṣa te yonir vīratāṃ pāhi /
apamṛṣṭaḥ śaṇḍaḥ /
devās tvā śukrapāḥ praṇayantu /
anādhṛṣṭāsi

suvīro vīrān prajanayan parīhy abhi rāyaspoṣeṇa yajamānam /
saṃjagmāno divā pṛthivyā śukraḥ śukraśociṣā /
nirastaḥ śaṇḍaḥ /
śukrasyādhiṣṭhānam asi

acchinnasya te deva soma suvīryasya rāyaspoṣasya daditāraḥ syāma /
sā prathamā saꣳskṛtir viśvavārā sa prathamo varuṇo mitro ' agniḥ

sa prathamo bṛhaspatiś cikitvāꣳs tasmā ' indrāya sutam ā juhota svāhā /
tṛmpantu hotrā madhvo yāḥ sviṣṭā yāḥ suprītāḥ suhutā yat svāhā /
ayāḍ agnīt

ayaṃ venaś codayat pṛśnigarbhā jyotirjarāyū rajaso vimāne /
imam apāꣳ saṃgame sūryasya śiśuṃ na viprā matibhī rihanti /
upayāmagṛhīto 'si markāya tvā

mano na yeṣu havaneṣu tigmaṃ vipaḥ śacyā vanutho dravantā /
ā yaḥ śaryābhis tuvinṛmṇo ' asyāśrīṇītādiśaṃ gabhastau /
eṣa te yoniḥ prajāḥ pāhi /
apamṛṣṭo markaḥ /
devās tvā manthipāḥ praṇayantu /
anādhṛṣṭāsi

suprajāḥ prajāḥ prajanayan parīhy abhi rāyaspoṣeṇa yajamānam /
saṃjagmāno divā pṛthivyā manthī manthiśociṣā /
nirasto markaḥ /
manthino 'dhiṣṭhānam asi

ye devāso divy ekādaśa stha pṛthivyām adhy ekādaśa stha /
apsukṣito mahinaikādaśa stha te devāso yajñam imaṃ juṣadhvam

upayāmagṛhīto 'sy āgrayaṇo 'si svāgrayaṇaḥ pāhi yajñaṃ pāhi yajñapatiṃ viṣṇus tvām indriyeṇa pātu viṣṇuṃ tvaṃ pāhy abhi savanāni pāhi

somaḥ pavate somaḥ pavate 'smai brahmaṇe 'smai kṣatrāyāsmai sunvate yajamānāya pavata ' iṣa ' ūrje pavate ' dbhya ' oṣadhībhyaḥ pavate dyāvāpṛthivībhyāṃ pavate subhūtāya pavate viśvebhyas tvā devebhyaḥ ' /
eṣa te yonir viśvebhyas tvā devebhyaḥ

upayāmagṛhīto 'sīndrāya tvā bṛhadvate vayasvata ' ukthāvyaṃ gṛhṇāmi /
yat ta ' indra bṛhad vayas tasmai tvā viṣṇave tvā /
eṣa te yonir ukthebhyas tvā /
devebhyas tvā devāvyaṃ gṛhṇāmi yajñasyāyuṣe gṛhṇāmi

mitrāvaruṇābhyāṃ tvā devāvyaṃ yajñasyāyuṣe gṛhṇāmi /
indrāya tvā devāvyaṃ yajñasyāyuṣe gṛhṇāmi /
indrāgnibhyāṃ tvā devāvyaṃ yajñasyāyuṣe gṛhṇāmi /
indrāvaruṇābhyāṃ tvā devāvyaṃ yajñasyāyuṣe gṛhṇāmi /
indrābṛhaspatibhyāṃ tvā devāvyaṃ yajñasyāyuṣe gṛhṇāmi /
indrāviṣṇubhyāṃ tvā devāvyaṃ yajñasyāyuṣe gṛhṇāmi

mūrdhānaṃ divo ' aratiṃ pṛthivyā vaiśvānaram ṛta ' ā jātam agnim /
kaviꣳ samrājam atithiṃ janānām āsannā pātraṃ janayanta devāḥ

upayāmagṛhīto 'si dhruvo 'si dhruvakṣitir dhruvāṇāṃ dhruvatamo 'cyutānām acyutakṣittamaḥ /
' eṣa te yonir vaiśvānarāya tvā /
dhruvaṃ dhruveṇa manasā vācā somam ava nayāmi /
athā na ' indra ' id viśo 'sapatnāḥ samanasas karat

yas te drapsa skandati yas te ' aꣳśur grāvacyuto dhiṣaṇayor upasthāt /
adhvaryor vā pari vā yaḥ pavitrāt taṃ te juhomi manasā vaṣaṭkṛtaꣳ svāhā /
devānām utkramaṇam asi

prāṇāya me varcodā varcase pavasva /
vyānāya me varcodā varcase pavasva /
udānāya me varcodā varcase pavasva /
vāce me varcodā varcase pavasva /
kratūdakṣābhyāṃ me varcodā varcase pavasva /
śrotrāya me varcodā varcase pavasva /
cakṣurbhyāṃ me varcodasau varcase pavethām

ātmane me me varcodā varcase pavasva /
ojase me varcodā varcase pavasva /
āyuṣe me varcodā varcase pavasva /
viśvābhyo me prajābhyo varcodasau varcase pavethām

ko 'si katamo 'si kasyāsi ko nāmāsi /
yasya te nāmāmanmahi yaṃ tvā somenātītṛpāma /
bhūr bhuvaḥ svaḥ suprajāḥ prajābhiḥ syā suvīro vīraiḥ supoṣaḥ poṣaiḥ

upayāmagṛhīto 'si madhave tvā /
upayāmagṛhīto 'si mādhavāya tvā /
upayāmagṛhīto 'si śukrāya tvā /
upayāmagṛhīto 'si śucaye tvā /
upayāmagṛhīto 'si nabhase tvā /
upayāmagṛhīto 'si nabhasyāya tvā /
upayāmagṛhīto 'sīṣe tvā /
upayāmagṛhīto 'sy ūrje tvā /
upayāmagṛhīto 'si sahase tvā /
upayāmagṛhīto 'si sahasyāya tvā /
upayāmagṛhīto 'si tapase tvā /
upayāmagṛhīto 'si tapasyāya tvā /
upayāmagṛhīto sy aꣳhasaspataye tvā

indrāgnī ' ā gataꣳ sutaṃ gīrbhir nabho vareṇyam /
asya pātaṃ dhiyeṣitā /
upayāmagṛhīto 'sīndrāgnibhyāṃ tvā /
eṣa te yonir indrāgnibhyāṃ tvā

ā ghā ye ' agnim indhate stṛṇanti barhir ānuṣak /
yeṣām indro yuvā sakhā /
upayāmagṛhīto 'sy agnīndrābhyāṃ tvā /
eṣa te yonir agnīndrābhyāṃ tvā

omāsaś carṣaṇīdhṛto viśve devāsa ' ā gata /
dāśvāꣳso dāśuṣaḥ sutam /
upayāmagṛhīto 'si viśvebhyas tvā devebhyaḥ /
eṣa te yonir viśvebhyas tvā devebhyaḥ

viśve devāsa ' ā gata śṛṇutā ma imaꣳ havam /
edaṃ barhir ni ṣīdata /
upayāmagṛhīto 'si viśvebhyas tvā devebhyaḥ /
eṣa te yonir viśvebhyas tvā devebhyaḥ

indra marutva ' iha pāhi somaṃ yathā śāryāte ' apibaḥ sutasya /
tava praṇītī tava śūra śarmann ā vivāsanti kavayaḥ suyajñāḥ /
upayāmagṛhīto 'sīndrāya tvā marutvate /
' eṣa te yonir indrāya tvā marutvate

marutvantaṃ vṛṣabhaṃ vāvṛdhānam akavāriṃ divyaꣳ śāsam indram /
viśvāsāham avase nūtanāyograꣳ sahodām iha taꣳ huvema /
upayāmagṛhīto 'sīndrāya tvā marutvate /
eṣa te yonir indrāya tvā marutvate /
upayāmagṛhīto 'si marutāṃ tvaujase

sajoṣā ' indra sagaṇo marudbhiḥ somaṃ piba vṛtrahā śūra vidvān /
jahi śatrūꣳn२ ' apa mṛdho nudasvāthābhayaṃ kṛṇuhi viśvato naḥ /
upayāmagṛhīto 'sīndrāya tvā marutvate /
eṣa te yonir indrāya tvā marutvate

marutvāꣳ२ ' indra vṛṣabho raṇāya pibā somam anuṣvadhaṃ madāya /
āsiñcasva jaṭhare madhva ' ūrmiṃ tvaꣳ rājāsi pratipatsutānām /
upayāmagṛhīto 'sīndrāya tvā marutvate /
eṣa te yonir indrāya tvā marutvate

mahāꣳ२ ' indro nṛvad ā carṣaṇiprā ' uta dvibarhā ' aminaḥ sahobhiḥ /
asmadryag vāvṛdhe vīryāyoruḥ pṛthuḥ sukṛtaḥ kartṛbhir bhūt /
upayāmagṛhīto 'si mahendrāya tvā /
eṣa te yonir mahendrāya tvā

mahāꣳ२ ' indro ya ' ojasā parjanyo vṛṣṭimām̐२ ' iva /
stomair vatsasya vāvṛdhe /
upayāmagṛhīto 'si mahendrāya tvā /
eṣa te yonir mahendrāya tvā

ud u tyaṃ jātavedasaṃ devaṃ vahanti ketavaḥ /
dṛśe viśvāya sūryaꣳ svāhā

citraṃ devānām ud agād anīkaṃ cakṣur mitrasya varuṇasyāgneḥ /
āprā dyāvāpṛthivī ' antarikṣaꣳ sūrya ' ātmā jagatas tasthuṣaś ca svāhā

agne naya supathā rāye ' asmān viśvāni deva vayunāni vidvān /
yuyodhy asmaj juhurāṇam eno bhūyiṣṭhāṃ te nama'uktiṃ vidhema svāhā

ayaṃ no ' agnir varivas kṛṇotv ayaṃ mṛdhaḥ pura ' etu prabhindan /
ayaṃ vājān jayatu vājasātāv ayaꣳ śatrūn jayatu jarhṛṣāṇaḥ svāhā

rūpeṇa vo rūpam abhyāgāṃ tutho vo viśvavedā vi bhajatu /
ṛtasya pathā preta candradakṣiṇāḥ /
vi svaḥ paśya vyantarikṣam /
yatasva sadasyaiḥ

brāhmaṇam adya videyaṃ pitṛmantaṃ paitṛmatyam ṛṣim ārṣeyaꣳ sudhātudakṣiṇam /
asmadrātā devatrā gacchata pradātāram ā viśata

agnaye tvā mahyaṃ varuṇo dadātu so 'mṛtatvam aśīyāyur dātra ' edhi mayo mahyaṃ pratigrahītre /
rudrāya tvā mahyaṃ varuṇo dadātu so 'mṛtatvam aśīya prāṇo dātra ' edhi vayo mahyaṃ pratigrahītre /
bṛhaspataye tvā mahyaṃ varuṇo dadātu so 'mṛtatvam aśīya tvag dātra ' edhi mayo mahyaṃ pratigrahītre /
yamāya tvā mahyaṃ varuṇo dadātu so 'mṛtatvam aśīya hayo dātra ' edhi vayo mahyaṃ pratigrahītre

ko 'dāt kasmā adāt kāmo 'dāt kāmāyādāt /
kāmo dātā kāmaḥ pratigrahītā kāmaitat te //