Shukla Yajurveda · Chapter 38

mahāvīropakrame gharmadhugdohādayaḥ mantrāḥ

devasya tvā savituḥ prasave 'śvinor bāhubhyāṃ pūṣṇo hastābhyām /
ā dade 'dityai rāsnāsi

iḍa ' ehi /
adita ' ehi /
sarasvatty ehi /
asāv ehi /
asāv ehi /
asāv ehi

adityai rāsnāsīndrāṇyā ' uṣṇīṣaḥ /
pūṣāsi /
gharmāya dīṣva

aśvibhyāṃ pinvasva /
sarasvatyai pinvasva /
indrāya pinvasva /
svāhendravat /
svāhendravat /
svāhendravat

yas te stanaḥ śaśayo yo mayobhūr yo ratnadhā vasuvid yaḥ sudatraḥ /
yena viśvā puṣyasi vāryāṇi sarasvati tam iha dhātave 'kaḥ /
urv antarikṣam anv emi

gāyatraṃ chando 'si /
traiṣṭubhaṃ chando 'si /
dyāvāpṛthivībhyāṃ tvā pari gṛhṇāmi /
antarikṣeṇopa yacchāmi /
indrāśvinā /
madhunaḥ sāraghasya gharmaṃ pāta vasavo yajata vāṭ /
svāhā sūryasya raśmaye vṛṣṭivanaye

samudrāya tvā vātāya svāhā /
sarirāya tvā vātāya svāhā /
anādhṛṣyāya tvā vātāya svāhā /
apratidhṛṣyāya tvā vātāya svāhā /
avasyave tvā vātāya svāhā /
aśimidāya tvā vātāya svāhā

indrāya tvā vasumate rudravate svāhā /
indrāya tvādityavate svāhā /
indrāya tvābhimātighne svāhā /
savitre tva ' ṛbhumate vibhumate vājavate svāhā /
bṛhaspataye tvā viśvadevyāvate svāhā

yamāya tvāṅgirasvate pitṛmate svāhā /
svāhā gharmāya /
svāhā gharmaḥ pitre

viśvā ' āśā dakṣiṇasad viśvān devān ayāḍ iha /
svāhākṛtasya gharmasya madhoḥ pibatam aśvinā

divi dhā ' imaṃ yajñam imam yajñaṃ divi dhāḥ /
svāhāgnaye yajñiyāya śaṃ yajurbhyaḥ

aśvinā gharmaṃ pātaꣳ hārdvānam ahar divābhir ūtibhiḥ /
tantrāyiṇo namo dyāvāpṛthivībhyām

apātām aśvinā gharmam anu dyāvāpṛthivī ' amaꣳsātām /
ihaiva rātayaḥ santu

iṣe pinvasva /
ūrje pinvasva /
brahmaṇe pinvasva /
kṣatrāya pinvasva /
dyāvāpṛthivībhyāṃ pinvasva /
dharmāsi sudharma /
ameny asme nṛmṇāni dhāraya brahma dhāraya kṣatram dhāraya viṣaṃ dhāraya

svāhā pūṣṇe śarase /
svāhā grāvabhyaḥ /
svāhā pratiravebhyaḥ /
svāhā pitṛbhya ' ūrdhvabarhirbhyo gharmapāvabhyaḥ /
svāhā dyāvāpṛthivībhyām /
svāhā viśvebhyaḥ devebhyaḥ

svāhā rudrāya rudrahūtaye /
svāhā saṃ jyotiṣā jyotiḥ /
ahaḥ ketunā juṣatāꣳ sujyotir jyotiṣā svāhā /
rātriḥ ketunā juṣatāꣳ sujyotir jyotiṣā svāhā /
madhu hutam indratame ' agnāv aśyāma te deva gharma namas te ' astu mā mā hiꣳsīḥ

abhīmaṃ mahimā divaṃ vipro babhūva saprathāḥ /
uta śravasā pṛthivīꣳ saꣳ sīdasva mahāꣳ२' asi rocasva devavītamaḥ //
[vi dhūmam agne ' aruṣaṃ miyedhya sṛja praśasta darśatam]

yā te gharma divyā śug yā gāyatryāꣳ havirdhāne /
sā ta ā pyāyatāṃ niṣṭyāyatāṃ tasyai te svāhā /
yā te gharmāntarikṣe śug yā triṣṭubhy āgnīdhre /
sā ta ' ā pyāyatāṃ niṣṭyāyatāṃ tasyai te svāhā /
yā te gharma pṛthivyāꣳ śug yā jagatyāꣳ sadasyā /
sā ta ' ā pyāyatāṃ niṣṭyāyatāṃ tasyai te svāhā

kṣatrasya tvā paraspāya brahmaṇas tanvaṃ pāhi /
viśas tvā dharmaṇā vayam anu krāmāma suvitāya navyase

catuḥsraktir nābhir ṛtasya saprathāḥ sa no viśvāyuḥ saprathāḥ sa naḥ sarvāyuḥ saprathāḥ /
apa dveṣo ' apa hvaro 'nyavratasya saścima

gharmaitat te purīṣaṃ tena vardhasva cā ca pyāyasva /
vardhiṣīmahi ca vayam ā ca pyāsiṣīmahi

acikradad vṛṣā harir mahān mitro na darśataḥ /
saꣳ sūryeṇa didyutad udadhir nidhiḥ

sumitriyā na ' āpa ' oṣadhayaḥ santu durmitriyās tasmai santu yo 'smān dveṣṭi yaṃ ca vayaṃ dviṣmaḥ

ud vayaṃ tamasas pari svaḥ paśyanta ' uttaram /
devaṃ devatrā sūryam aganma jyotir uttamam

edho 'sy edhiṣīmahi /
samid asi tejo 'si tejo mayi dhehi

yāvatī dyāvāpṛthivī yāvac ca sapta sindhavo vitasthire /
tāvantam indra te grahamūrjā gṛhṇāmy akṣitaṃ mayi gṛhṇāmy akṣitam

mayi tyad indriyaṃ bṛhan mayi dakṣo mayi kratuḥ /
gharmas triśug vi rājati virājā jyotiṣā saha brahmaṇā tejasā saha

payaso reta ' ābhṛtaṃ tasya doham aśīmahy uttarām-uttarāꣳ samām /
tviṣaḥ saṃvṛk kratve dakṣasya te suṣumṇasya te suṣumṇāgnihutaḥ /
indrapītasya prajāpatibhakṣitasya madhumata ' upahūta ' upahūtasya bhakṣayāmi //