શુક્લયજુર્વેદઃ · અધ્યાય 36

પ્રવર્ગ્યાગ્નિકાશ્વમેધોપનિષત્સંબદ્ધા મન્ત્રાઃ

ઋચં વાચં પ્ર પદ્યે મનો યજુઃ પ્ર પદ્યે સામ પ્રાણં પ્ર પદ્યે ચક્ષુઃ શ્રોત્રં પ્ર પદ્યે ।
વાગ્ ઓજઃ સહૌજો મયિ પ્રાણાપાનૌ

યન્ મે છિદ્રં ચક્ષુષો હૃદયસ્ય મનસો વાતિતૃણ્ણં બૃહસ્પતિર્ મે તદ્ દધાતુ ।
શં નો ભવતુ ભુવનસ્ય યસ્ પતિઃ

ભૂર્ ભુવઃ સ્વઃ ।
તત્ સવિતુર્ વરેણ્યં ભર્ગો દેવસ્ય ધીમહિ ।
ધિયો યો નઃ પ્રચોદયાત્

કયા નશ્ ચિત્ર ઽ આ ભુવદ્ ઊતી સદાવૃધઃ સખા ।
કયા શચિષ્ઠયા વૃતા

કસ્ ત્વા સત્યો મદાનાં મꣳહિષ્ઠો મત્સદ્ અન્ધસઃ ।
દૃઢા ચિદ્ આરુજે વસુ

અભી ષુ ણઃ સખીનામ્ અવિતા જરિતૄણામ્ ।
શતં ભવાસ્ય્ ઊતિભિઃ

કયા ત્વમ્ ન ઽ ઊત્યાભિ પ્ર મન્દસે વૃષન્ ।
કયા સ્તોતૃભ્ય ઽ આ ભર

ઇન્દ્રો વિશ્વસ્ય રાજતિ ।
શં નો ઽ અસ્તુ દ્વિપદે શં ચતુષ્પદે

શં નો મિત્રઃ શં વરુણઃ શં નો ભવત્વ્ અર્યમા ।
શં ન ઽ ઇન્દ્રો બૃહસ્પતિઃ શં નો વિષ્ણુર્ ઉરુક્રમઃ

શં નો વાતઃ પવતાꣳ શં નસ્ તપતુ સૂર્યઃ ।
શં નઃ કનિક્રદદ્ દેવઃ પર્જન્યો ઽ અભિ વર્ષતુ

અહાનિ શં ભવન્તુ નઃ શꣳ રાત્રીઃ પ્રતિ ધીયતામ્ ।
શં ન ઽ ઇન્દ્રાગ્ની ભવતામ્ અવોભિઃ શં ન ઽ ઇન્દ્રાવરુણા રાતહવ્યા ।
શં ન ઽ ઇન્દ્રાપૂષણા વાજસાતૌ શમ્ ઇન્દ્રાસોમા સુવિતાય શં યોઃ

શં નો દેવીર્ અભિષ્ટય ઽ આપો ભવન્તુ પીતયે ।
શં યોર્ અભિ સ્રવન્તુ નઃ

સ્યોના પૃથિવિ નો ભવાનૃક્ષરા નિવેશની ।
યચ્છા નઃ શર્મ સપ્રથાઃ

આપો હિ ષ્ઠા મયોભુવસ્ તા ન ઽ ઊર્જે દધાતન ।
મહે રણાય ચક્ષસે

યો વઃ શિવતમો રસસ્ તસ્ય ભાજયતેહ નઃ ।
ઉશતીર્ ઇવ માતરઃ

તસ્મા ઽ અરં ગમામ વો યસ્ય ક્ષયાય જિન્વથ ।
આપો જનયથા ચ નઃ

દ્યૌઃ શાન્તિર્ અન્તરિક્ષꣳ શાન્તિઃ પૃથિવી શાન્તિર્ આપઃ શાન્તિર્ ઓષધયઃ શાન્તિઃ ।
વનસ્પતયઃ શાન્તિર્ વિશ્વે દેવાઃ શાન્તિર્ બ્રહ્મ શાન્તિઃ સર્વꣳ શાન્તિઃ શાન્તિર્ એવ શાન્તિઃ સા મા શાન્તિર્ એધિ

દૃતે દૃꣳહ મા મિત્રસ્ય મા ચક્ષુષા સર્વાણિ ભૂતાનિ સમ્ ઈક્ષન્તામ્ ।
મિત્રસ્યાહં ચક્ષુષા સર્વાણિ ભૂતાનિ સમીક્ષે ।
મિત્રસ્ય ચક્ષુષા સમ્ ઈક્ષામહે

દૃતે દૃꣳહ મા ।
જ્યોક્ તે સંદૃશિ જીવ્યાસં જ્યોક્ તે સંદૃશિ જીવ્યાસમ્

નમસ્ તે હરસે શોચિષે નમસ્ તે ઽ અસ્ત્વ્ અર્ચિષે ।
અન્યાꣳસ્ તે ઽ અસ્મત્ તપન્તુ હેતયઃ પાવકો ઽ અસ્મભ્યꣳ શિવો ભવ

નમસ્ તે ઽ અસ્તુ વિદ્યુતે નમસ્ તે સ્તનયિત્નવે ।
નમસ્ તે ભગવન્ન્ અસ્તુ યતઃ સ્વઃ સમીહસે

યતો-યતઃ સમીહસે તતો નો ઽ અભયં કુરુ ।
શં નઃ કુરુ પ્રજાભ્યો ઽભયં નઃ પશુભ્યઃ

સુમિત્રિયા ન ઽ આપ ઽ ઓષધયઃ સન્તુ દુર્મિત્રિયાસ્ તસ્મૈ સન્તુ યો ઽસ્માન્ દ્વેષ્ટિ યં ચ વયં દ્વિષ્મઃ

તચ્ ચક્ષુર્ દેવહિતં પુરસ્તાચ્ છુક્રમ્ ઉચ્ ચરત્ ।
પશ્યેમ શરદઃ શતં જીવેમ શરદઃ શતꣳ શૃણુયામ શરદઃ શતં પ્ર બ્રવામ શરદઃ શતમ્ અદીનાઃ સ્યામ શરદઃ શતં ભૂયશ્ ચ શરદઃ શતાત્ ॥