Shiva Purana · Chapter 7.21

kṛṣṇa uvāca
bhagavañchrotumicchāmi śivāśramaniṣeviṇām

śivaśāstroditaṃ karma nityanaimittikaṃ tathā

upamanyuruvāca
prātarutthāya śayanāddhyātvā devaṃ sahāmbayā

vicārya kāryaṃ nirgacchedgṛhādabhyudite 'ruṇe

abādhe vijane deśe kuryādāvaśyakaṃ tataḥ

kṛtvā śaucaṃ vidhānena daṃtadhāvanamācaret

alābhe daṃtakāṣṭhānāmaṣṭamyādidineṣu ca

apāṃ dvādaśagaṇḍūṣaiḥ kuryādāsyaviśodhanam

ācamya vidhivatpaścādvāruṇaṃ snānamācaret

nadyāṃ vā devakhāte vā hrade vātha gṛhe 'pi vā

snānadravyāṇi tattīre sthāpayitvā bahirmalam

vyāpohya mṛdamālipya snātvā gomayamālipet

snātvā punaḥ punarvastraṃ tyaktvāvātha viśodhya ca

susnāto nṛpavadbhūyaḥ śuddhaṃ vāso vasīta ca

malasnānaṃ sugaṃdhādyaiḥ snānaṃ dantaviśodhanam

na kuryādbrahmacārī ca tapasvī vidhavā tathā

sopavītaśśikhāṃ baddhā praviśya ca jalāṃtaram

avagāhya samācāṃto jale nyasyettrimaṃḍalam

saumye magnaḥ punarmaṃtraṃ japecchaktyā śivaṃ smaret

utthāyācamya tenaiva svātmānamabhiṣecayet

gośṛṃgeṇa sadarbheṇa pālāśena dalena vā

pādmena vātha pāṇibhyāṃ pañcakṛtvastrireva vā

udyānādau gṛhe caiva vardhanyā kalaśena vā

avagāhanakāle 'dbhirmaṃtritairabhiṣecayet

atha cedvāruṇaṃ kartumaśaktaḥ śuddhavāsasā

ārdreṇa śodhayeddehamāpādatalamastakam

āgneyaṃ vātha vā māṃtraṃ kuryātsnānaṃ śivena vā

śivaciṃtāparaṃ snānaṃ yuktasyātmīyamucyate

svasūtroktavidhānena maṃtrācamanapūrvakam

ācaredbrahmayajñāṃtaṃ kṛtvā devāditarpaṇam

maṃḍalasthaṃ mahādevaṃ dhyātvābhyarcya yathāvidhi

dadyādarghyaṃ tatastasmai śivāyādityarūpiṇe

atha vaitatsvasūtroktaṃ kṛtvā hastau viśodhayet

karanyāsaṃ tataḥ kṛtvā sakalīkṛtavigrahaḥ

vāmahastagatāṃbhobhirgaṃdhasiddhārthakānvitaiḥ

kuśapuṃjena vābhyukṣya mūlamaṃtrasamanvitaiḥ

āpohiṣṭhādibhirmantraiḥ śeṣamāghrāya vai jalam

vāmanāsāpuṭenaiva devaṃ saṃbhāvayetsitam

arghamādāya dehasthaṃ savyanāsāpuṭena ca

kṛṣṇavarṇena bāhyasthaṃ bhāvayecca śilāgatam

tarpayedatha devebhya ṛṣibhiśca viśeṣataḥ

bhūtebhyaśca pitṛbhyaśca dadyādarghyaṃ yathāvidhi

raktacaṃdanatoyena hastamātreṇa maṃḍalam

suvṛttaṃ kalpayedbhūmau raktacūrṇādyalaṃkṛtam

tatra saṃpūjayedbhānuṃ svakīyāvaraṇaiḥ saha

svakholkāyeti maṃtreṇa sāṃgatassukhasiddhaye

punaśca maṃḍalaṃ kṛtvā tadaṃgaiḥ paripūjya ca

tatra sthāpya hemapātraṃ māgadhaprasthasaṃmitam

pūrayedgaṃdhatoyena raktacaṃdanayoginā

raktapuṣpaistilaiścaiva kuśākṣatasamanvitaiḥ

dūrvāpāmārgagavyaiśca kevalena jalena vā

jānubhyāṃ dharaṇīṃ gatvā natvā devaṃ ca maṃḍale

kṛtvā śirasi tatpātraṃ dadyādarghyaṃ śivāya tat

athavāṃjalinā toyaṃ sadarbhaṃ mūlavidyayā

utkṣipedambarasthāya śivāyādityamūrtaye

kṛtvā punaḥ karanyāsaṃ karaśodhanapūrvakam

buddhveśānādisadyāṃtaṃ pañcabrahmamayaṃ śivam

gṛhītvā bhasitaṃ mantrairvimṛjyāṅgāni saṃspṛśet

yā dināṃtaiśśirovaktrahṛdguhyacaraṇānkramāt

tato mūlena sarvāṃgamālabhya vasanāntaram

paridhāya dvirācamya prokṣyaikādaśamantritaiḥ

jalairācchādya vāso 'yaddvirācamya śivaṃ smaret

punarnyastakaro mantrī tripuṃḍraṃ bhasmanā likhet

avakramāya taṃ vyaktaṃ lalāṭe gandhavāriṇā

vṛttaṃ vā caturasraṃ vā bindumardhendumeva vā

lalāṭe yādṛśaṃ puṇḍraṃ likhitaṃ bhasmanā punaḥ

tādṛśaṃ bhujayormūrdhni stanayoraṃtare likhet

sarvāṃgoddhūlanaṃ caiva na samānaṃ tripuṇḍrakaiḥ

tasmāttripuṇḍramevaikaṃ likheduddhūlanaṃ vinā

rudrākṣāndhārayedmūrdhni kaṃṭhe śrote kare tathā

suvarṇavarṇamacchinnaṃ śubhaṃ nānyairdhṛtaṃ śubham

viprādīnāṃ kramācchreṣṭhaṃ pītaṃ raktamathāsitam

tadalābhe yathālābhaṃ dhāraṇīyamadūṣitam

tatrāpi nottaraṃ nīcairdhāryaṃ nīcamathottaraiḥ

nāśucirdhārayedakṣaṃ sadā kāleṣu dhārayet

itthaṃ trisaṃdhyamathavā dvisaṃdhyaṃ sakṛdeva vā

kṛtvā snānādikaṃ śaktyā pūjayetparameśvaram

prajāsthānaṃ samāsādya baddhvā ruciramāsanam

dhyāyeddevaṃ ca devīṃ ca prāṅmukho vāpyudaṅmukhaḥ

śvetādīnnakulīśāṃtāṃstacchiṣyānpraṇamedgurum

punardevaṃ śivaṃ natvā tato nāmāṣṭakaṃ japet

śivo maheśvaraścaiva rudro viṣṇuḥ pitāmahaḥ

saṃsāravaidyassarvajñaḥ paramātmeti cāṣṭakam

athavā śivamevaikaṃ japitvaikādaśādhikam

jihvāgre tejaso rāśiṃ dhyātvāvyādhyādiśāṃtaye

prakṣālya caraṇau kṛtvā karau caṃdanacarcitau

prakurvīta karanyāsaṃ karaśodhanapūrvakam

iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe nityanaimittikakarmavarṇanaṃ nāmaikaviṃśo 'dhyāyaḥ