Shiva Purana · Chapter 5.29

śaunaka uvāca//
śrutaṃ me mahadākhyānaṃ yattvayā parikīrtitam //
sanatkumārakāleyasaṃvādaṃ paramārthadam

atohaṃ śrotumicchāmi yathā sargastu brahmaṇaḥ //
samutpannaṃ tu me brūhi yathā vyāsācca te śrutam

sūta uvāca //
mune śṛṇu kathāṃ divyāṃ sarvapāpapraṇāśinīm //
kathyamānāṃ mayā citrāṃ bahvarthāṃ śrutavistarām

yaścaināṃ pāṭhayettāṃ ca śṛṇuyādvā'pyabhīkṣṇaśaḥ //
svavaṃśadhāraṇaṃ kṛtvā svargaloke mahīyate

pradhānaṃ puruṣo yattannityaṃ sadasadātmakam //
pradhānapuruṣo bhūtvā nirmame lokabhāvanaḥ

sraṣṭāraṃ sarvabhūtānāṃ nārāyaṇaparāyaṇam //
taṃ vai viddhi muniśreṣṭha brahmāṇamamitaujasam

yasmādakalpayatkalpāntamagrāśśucayo yataḥ //
bhavaṃti muniśārdūla namastasmai svayambhuve

tasmai hiraṇyagarbhāya puruṣāyeśvarāya ca //
namaskṛtya pravakṣyāmi bhūyaḥ sargamanuttamam

brahmā sraṣṭā hariḥ pātā saṃhartā ca maheśvaraḥ //
tasya sargasya nānyo'sti kāle kāle tathā gate

so'pi svayaṃbhūrbhagavānsisṛkṣurvividhāḥ prajāḥ //
apa eva sasarjādau tāsu vīryamavāsṛjat

āpo nārā iti proktā āpo vai narasūnavaḥ //
ayanaṃ tasya tāḥ pūrvaṃ tena nārāyaṇaḥ smṛtaḥ

hiraṇyavarṇamabhavattadaṃḍamudakeśayam //
tatra jajñe svayaṃ brahmā svayaṃbhūriti viśrutaḥ

hiraṇyagarbho bhagavānuṣitvā parivatsaram //
tadaṃḍamakaroddvaidhaṃ divaṃ bhūmi ca nirmame

adho'thorddhvaṃ prayuktāni bhuvanāni caturddaśa //
tayośśakalayormadhya ākāśamamṛjatprabhuḥ

apsu pāriplavāṃ pṛthvīṃ diśaśca daśadhā divi //
tatra kāle mano vācaṃ kāmakrodhāvatho ratim

marīcimatryaṃgirasau pulastyaṃ pulahaṃ kratuma //
vasiṣṭhaṃ tu mahatejāsso'sṛjatsapta mānasān

sapta bahmāṇa ityete purāṇe niścayaṃ gatāḥ //
tato'sṛjatpunarbrahmā rudrānkrodhasamudbhavān

sanatkumāraṃ ca ṛṣiṃ sarveṣāmapi pūrvajam //
sapta caite prajāyaṃte paścādrudrāśca sarvataḥ

atassanatkumārastu tejassaṃkṣipya tiṣṭhati //
teṣāṃ saptamahāvaṃśā divyā devarṣipūjitāḥ

prajāyante kriyāvanto maharṣibhiralaṃkṛtāḥ //
vidyuto'śani meghāṃśca rohitendradhanūṃṣi ca

payāṃsi ca sasarjādau parjanyaṃ ca sasarja ha //
ṛco yajūṃṣi sāmāni nirmame yajñasiddhaye

pūjyāṃstairayajandevānityevamanuśuśruma //
mukhāddevānajanayatpitṝṃścaivātha vakṣasaḥ //
prajanācca manuṣyānvai jaghanānnirmame'surān

uccāvacāni bhūtāni gātrebhyastasya jajñire //
āpavasya prajāsargaṃ sṛjato hi prajāpateḥ

sṛjyamānāḥ prajāścaiva nāvarddhanta yadā tadā //
dvidhā kṛtvātmano dehaṃ strī caiva puruṣo'bhavat

sasṛje'tha prajāssarvā mahimnā vyāpya viśvataḥ //
virājamasṛjadviṣṇussa sṛṣṭaḥ puruṣo virāṭ

dvitīyaṃ taṃ manuṃ viddhi manorantarameva ca //
sa vairājaḥ prajāssarvāssasarja puruṣaḥ prabhuḥ

nārāyaṇavisargasya prajāstasyāpyayonijaḥ //
āyuṣmānkīrtimāndhanyaḥ prajāvāṃścābhavattataḥ

ityevamādisargaste varṇito munisattama //
ādisargaṃ viditvaivaṃ yatheṣṭāṃ prāpnuyādgatim

iti śrīśivamahāpurāṇe pañcamyāmumāsaṃhitāyāmādisargavarṇanaṃ nāma ekonatriṃśo'dhyāyaḥ