Shiva Purana · Chapter 5.27

devyuvāca //
vāyostu padamāpnoti yogākāśasamudbhavam //
tanme sarvaṃ samācakṣva prasannastvaṃ yadi prabho

// śaṃkara uvāca //
purā me sarvamākhyātaṃ yogināṃ hitakāmyayā //
kālaṃ jigāya yassamyagvāyorliṃgaṃ yathā bhavet

tena jñātvā dinaṃ yogī prāṇāyāmaparaḥ sthitaḥ //
sa jayatyāgataṃ kālaṃ māsārddhenaiva suṃdari /

hṛtstho vāyussadā vahnerdīpakasso'nupāvakaḥ //
sa bāhyābhyaṃtaro vyāpī vāyussarvagato mahān

jñānavijñānamutsāhaḥ sarvaṃ vāyoḥ pravartate //
yeneha nirjito vāyustena sarvamidaṃ jagat

dhāraṇāyāṃ sadā tiṣṭhejjarāmṛtyujighāṃsayā //
yogī yogarataḥ samyagdhāraṇādhyānatatparaḥ

lohakāro yathā bhastrāmāpūryya mukhato mune //
sādhayedvāyunā karma tadvadyogī samabhyaset

devassahasrake netrapādahastasahasrakaḥ //
graṃthīnhi sarvamāvṛtya so'gre tiṣṭheddaśāṃgulam

gāyatrīṃ śirasā sārddhaṃ japedvyāhṛtipūrvikām //
trivāramāyataprāṇāḥ prāṇāyāmassa ucyate

gatāgatā nivartaṃte candrasūryādayo grahāḥ //
adyāpi na nivartaṃte yogadhyānaparāyaṇāḥ

śatamabdaṃ tapastaptvā kuśāgrāpaḥ pibeddvijaḥ //
tadāpnoti phalaṃ devi viprāṇāṃ dhāraṇaikayā

yo dvijaḥ kalyamutthāya prāṇāyāmaikamācaret //
sarvaṃ pāpaṃ nihaṃtyāśu brahmalokaṃ sa gacchati

yo'taṃdritassadaikāṃte praṇāyāmaparo bhavet //
jarāṃ mṛtyuṃ vinirjitya vāyugaḥ khecarīti saḥ

siddhasya bhajate rūpaṃ kāṃtiṃ medhāṃ parākramam //
śauryaṃ vāyusamo gatyā saukhyaṃ ślāghyaṃ paraṃ sukham

etatkathitamaśeṣaṃ vāyossiddhiṃ yadāpnute yogī //
yattejaso'pi labhate tatte vakṣyāmi deveśi

sthitvā sukhāsane sve śete janavacanahīne tu //
śaśiraviyutayā tejaḥ prakāśayanmadhyame deśe

vahnigataṃ bhrūmadhye prakāśate yastvataṃdrito yogī //
dīpahīnadhvāṃta paśyennyūnamasaṃśayaṃ loke

netre karaśākhābhiḥ kiṃcitsaṃpīḍya yatnato yogī //
tāraṃ paśyandhyāyenmuhūrtamarddhaṃ tamekabhāvo'pi

tatastu tamasi dhyāyanpaśyate jyotiraiśvaram//
śvetaṃ raktaṃ tathā pītaṃ kṛṣṇamindradhanuṣprabham

bhuvormadhye lalāṭasthaṃ bālārkasamatejasam//
taṃ viditvā tu kāmāṃgī krīḍate kāmarūpadhṛk

kāraṇapraśamāveśaṃ parakāyapraveśanam //
aṇimādiguṇāvāptirmanasā cāvalokanam

dūraśravaṇa vijñānamadṛśyaṃ bahurūpadhṛk //
satatābhyāsayogena khecaratvaṃ prajāyate

śrutādhyayanasaṃpannā nānāśāstraviśāradāḥ//
jñānino'pi vimuhyaṃte pūrvakarmavaśānugāḥ

paśyaṃto'pi na paśyaṃti śṛṇvānā badhirā yathā //
yathāṃdhā mānuṣā loke mūḍhāḥ pāpavimohitāḥ

vedāhametaṃ puruṣaṃ mahāṃtamādityavarṇaṃ tamasaḥ parastāt //
tameva viditvātimṛtyumeti nānyaḥ paṃthā vidyate prāyaṇāyaḥ

eṣa te kathitaḥ samyaktejaso vidhiruttamaḥ //
kālaṃ jitvā yathā yogī cāmaratvaṃ prapadyate

punaḥ parataraṃ vakṣye yathā mṛtyurna jāyate //
sāvadhānatayā devi śṛṇuṣvaikāgramānasā

turīyā devi bhūtānāṃ yogināṃ dhyānināṃ tathā //
sukhāsane yathāsthānaṃ yogī niyatamānasaḥ

samunnataśarīro'pi sa baddhvā karasaṃpuṭam //
cañcvākāreṇa vaktreṇa pibanvāyuṃ śanaiśśanaiḥ

prasravaṃti kṣaṇādāpastālusthā jīvadāyikāḥ //
tā jighredvāyunādāyāmṛtaṃ tacchītalaṃ jalam

pibannanudinaṃ yogī na mṛtyuvaśago bhavet //
divyakāyo mahātejāḥ pipāsā kṣudvivarjitaḥ

balena nāgasturago javena dṛṣṭyā suparṇassuśrutistu dūrāt //
ākuṃcitākuṃḍalikṛṣṇakeśo gaṃdharvavidyādharatulyavarṇaḥ

jīvennaro varṣaśataṃ surāṇāṃ sumedhasā vākpatinā samatvam//
evaṃ caran khecaratāṃ prayāti yatheṣṭacārī sukhitassadaiva

punaranyatpravakṣṇami vidhānaṃ yatsurairapi //
gopitaṃ tu prayatnena tacchṛṇuṣva varānane

samākuṃcyābhyasedyogī rasanāṃ tālukaṃ prati //
kiṃcitkālāṃtareṇaiva kramātprāpnoti laṃbikām

tataḥ prasravate sā tu saṃspṛṣṭā śītalāṃ sudhām //
pibanneva sadā yogī so'maratvaṃ hi gacchati

rephāgraṃ laṃbakāgraṃ karatalaghaṭanaṃ śubhrapadmasya bindostenākṛṣṭā sudheyaṃ patati parapade devatānaṃdakārī //
sāraṃ saṃsāratāraṃ kṛtakaluṣataraṃ kālatāraṃ satāraṃ yenedaṃ plāvitāṃgaṃ sa bhavati na mṛtaḥ kṣutpipāsāvihīnaḥ

ebhiryuktā caturbhiḥ kṣitidharatanaye yogibhirvai dharaiṣā dhairyyānnityaṃ kuto'ntaṃ sakalamapi jagadyatsukhaprāpaṇāya//
svapne dehī vidhatte sakalamapi sadā mānayanyacca duḥkhaṃ svarge hyevaṃ dharitryāḥ prabhavati ca tato vā sa kiñciccaturṇām

tasmānmaṃtraistapobhirvrataniyamayutairauṣadhairyogayuktā dhātrī raktā manuṣyairnayavinayayutairdharmavidbhiḥ krameṇa //
bhūtānāmādi devo na hi bhavati calaḥ saṃyuto vai caturṇāṃ tasmādevaṃ pravakṣye vidhimanugaditaṃ chāyikaṃ yacchivākhyam

iti śrīśivamahāpurāṇe pañcamyāmumāsaṃhitāyāṃ kālavaṃcanaśivaprāptivarṇanaṃ nāma saptaviṃśo'dhyāyaḥ