Shiva Purana · Chapter 5.13

// sanatkumāra uvāca //
tapastapati yo'raṇye vanyamūlaphalāśanaḥ //
yo'dhīte ṛcamekāṃ hi phalaṃ syāttatsamaṃ mune

śruteradhyayanātpuṇyaṃ yadāpnoti dvijottamaḥ //
tadadhyāpanataścāpi dviguṇaṃ phalamaśnute

jagadyathā nirālokaṃ jāyate'śaśibhāskaram //
vinā tathā purāṇaṃ hyadhyeyamasmānmune sadā

tapyamānaṃ sadājñānānniraye yo'pi śāstrataḥ //
sambodhayati lokaṃ taṃ tasmātpūjyaḥ purāṇagaḥ

sarveṣāṃ caiva pātrāṇāṃ madhye śreṣṭhaḥ purāṇavit //
patanāttrāyate yasmāttasmātpātramudāhṛtam

martyabuddhirna kartavyā purāṇajñe kadācana //
purāṇajñassarvavettā brahmā viṣṇurharo guruḥ

dhanaṃ dhānyaṃ hiraṇyaṃ ca vāsāṃsi vividhāni ca //
deyaṃ purāṇavijñāya paratreha ca śarmmaṇe

yo dadāti mahāprītyā purāṇajñāya sajjanaḥ //
pātrāya śubhavastūni sa yāti paramāṃ gatim

mahīṃ gāṃ vā syaṃdanāṃśca gajānaśvāṃśca śobhanān //
yaḥ prayacchati pātrāya tasya puṇyaphalaṃ śṛṇu

akṣayānsarvakāmāṃśca paratreha ca janmani //
aśvamedhamakhasyāpi sa phalaṃ labhate pumān

mahī dadāti yastasmai kṛṣṭāṃ phalavatīṃ śubhām //
sa tārayati vai vaṃśyāndaśa pūrvāndaśāparān

iha bhuktvākhilānkāmānaṃte divyaśarīravān //
vimānena ca divyena śivalokaṃ sa gacchati

na yajñaistuṣṭimāyāṃti devāḥ prokṣaṇakairapi //
balibhiḥ puṣpapūjābhiryathā pustakavācanaiḥ

śaṃbhorāyatane yastu kārayeddharmapustakam //
viṣṇorarkasya kasyāpi śṛṇu tasyāpi tatphalam

rājasūyāśvamedhānāṃ phalamāpnoti mānavaḥ //
sūryalokaṃ ca bhittvāśu brahmalokaṃ sa gacchati

sthitvā kalpaśatānyatra rājā bhavati bhūtale //
bhuṃkte niṣkaṃṭakaṃ bhogānnātra kāryā vicāraṇā

aśvamedhasahasrasya yatphalaṃ samudāhṛtam //
tatphalaṃ samāvāpnoti devāgre yo japaṃ caret

itihāsapurāṇābhyāṃ śambhorāyatane śubhe //
nānyatprītikaraṃ śaṃbhostathānyeṣāṃ divaukasām

tasmātsarvaprayatnena kāryaṃ pustakavācanam //
tathāsya śravaṇaṃ premṇā sarvakāmaphalapradam

purāṇaśravaṇācchaṃbhorniṣpāpo jāyate naraḥ //
bhuktvā bhogānsuvipulāñchivalokamavāpnuyāt

rājasūyena yatpuṇyamagniṣṭomaśatena ca //
tatpuṇyaṃ labhate śaṃbhoḥ kathāśravaṇamātrataḥ

sarvatīrthāvagāhena gāṃ koṭipradānataḥ //
tat phalaṃ labhate śaṃbhoḥ kathāśravaṇato mune

ye śṛṇvaṃti kathāṃ śaṃbhossadā bhuvanapāvanīm //
te manuṣyā na maṃtavyā rudrā eva na saṃśayaḥ

śṛṇvatāṃ śivasatkīrtiṃ satāṃ kīrtayatāṃ ca tām //
padāmbujarajāṃsyeva tīrthāni munayo viduḥ

gaṃtuṃ niḥśreyasaṃ sthānaṃ ye'bhivāṃchanti dehinaḥ //
kathāṃ paurāṇikīṃ śaivīṃ bhaktyā śṛṇvaṃtu te sadā

kathāṃ paurāṇikīṃ śrotuṃ yadyaśaktassadā bhavet //
niyatātmā pratidinaṃ śṛṇuyādvā muhūrtakam

yadi pratidinaṃ śrotumaśakto mānavo bhavet //
puṇyamāsādiṣu mune śṛṇuyācchāṃkarīṃ kathām

śaivīṃ kathāṃ hi śṛṇvānaḥ puruṣo hi munīśvara //
sa nistarati saṃsāraṃ dagdhvā karmamahāṭavīm

kathāṃ śaivīṃ muhūrtaṃ vā tadarddhaṃ kṣaṇaṃ ca vā //
ye śṛṇvaxti narā bhaktyā na teṣāṃ durgatirbhavet

yatpuṇyaṃ sarvadāneṣu sarvayajñeṣu vā mune //
śaṃbhoḥ purāṇaśravaṇāttatphalaṃ niścalaṃ bhavet

viśeṣataḥ kalau vyāsa purāṇaśravaṇādṛte //
paro dharmo na puṃsāṃ hi muktidhyānaparaḥ smṛtaḥ

purāṇaśravaṇaṃ śambhornāmasaṃkīrtanaṃ tathā //
kalpadrumaphalaṃ ramyaṃ manuṣyāṇāṃ na saṃśayaḥ

kalau durmedhasāṃ puṃsāṃ dharmācārojhjhitātmanām //
hitāya vidadhe śambhuḥ purāṇākhyaṃ sudhārasam

eko'jarāmarasyādvai pibannevāmṛtaṃ pumān //
śambhoḥ kathāmṛtāpānātkulamevājarāmaram

yā gatiḥ puṇyaśīlānāṃ yajvanāṃ ca tapasvinām //
sā gatissahasā tāta purāṇaśravaṇātkhalu

jñānavāptiryadā na syādyogaśāstrāṇi yatnataḥ //
adhyetavyāni paurāṇaṃ śāstraṃ śrotavyameva ca

pāpaṃ saṃkṣīyate nityaṃ dharmmaścaiva vivarddhate//
purāṇaśravaṇājjñānī na saṃsāraṃ prapadyate

ataeva purāṇāni śrotavyāni prayatnataḥ //
dharmārthakāmalābhāya mokṣamārgāptaye tathā

yajñairdānaistapobhistu yatphalaṃ tīrthasevayā //
tatphalama samavāpnoti purāṇaśravaṇānnaraḥ

na bhaveyuḥ purāṇāni dharmamārge kṣaṇāni tu //
yadyatra yadvratī sthātā cātra pāratrakī kathām

ṣaḍviṃśatipurāṇānāṃ madhye'pyekaṃ śṛṇoti yaḥ //
paṭhedvā bhaktiyuktastu sa mukto nātra saṃśayaḥ

anyo na dṛṣṭassukhado hi mārgaḥ purāṇamārgo hi sadā variṣṭhaḥ //
śāstraṃ vinā sarvamidaṃ na bhāti sūryyeṇa hīnā iva jīvalokāḥ

iti śrīśivamahāpurāṇe pañcamyāmumāsaṃhitāyāṃ purāṇamāhātmyavarṇanaṃnāma trayodaśo'dhyāyaḥ