Shiva Purana · Chapter 3.42

nandīśvara uvāca //
avatārāñchṛṇu vibhordvādaśapramitānparān //
jyotirliṅgasvarūpānvai nānoti kārakānmune

saurāṣṭre somanāthaśca śrīśaile mallikārjunaḥ //
ujjayinyāṃ mahākāla oṃkāre cāmareśvaraḥ

kedāro himava tpṛṣṭe ḍākinyāmbhīmaśaṃkaraḥ //
vārāṇasyāṃ ca viśveśastryambako gautamītaṭe

vaidyanāthaścitābhūmau nāgeśo dārukāvane //
setubandhe ca rāmeśo ghuśmeśaśca śivālaye

avatāradvādaśakametacchambhoḥ parātmanaḥ //
sarvānandakaraṃ puṃsāndarśanātsparśanānmune

tatrādyassomanātho hi candraduḥkhakṣayaṃkaraḥ//
kṣayakuṣṭhādirogāṇāṃ nāśakaḥ pūjanānmune

śivāvatārassomeśo liṃgarūpeṇa saṃsthitaḥ//
saurāṣṭre śubhadeśe ca śaśinā pūjitaḥ purā

caṃdrakuṇḍaṃ ca tatraiva sarvapāpavināśakam //
tatra snātvā naro dhīmānsarvarogaiḥ pramucyate

someśvaraṃ mahāliṃgaṃ śivasya paramātmakam//
dṛṣṭvā pramucyate pāpādbhuktiṃ muktiṃ ca vindati

mallikārjunasaṃjñaścāvatāraśśaṃkarasya vai //
dvitīyaḥ śrīgirau tāta bhaktābhīṣṭaphalapradaḥ

saṃstuto liṃgarūpeṇa sutadarśanahetutaḥ //
gatastatra mahāprītyā sa śivaḥ svagirermune

jyotirliṃgaṃ dvitīyantaddarśanātpūjanānmune //
mahāsukhakaraṃ cānte muktidannātra saṃśayaḥ

mahākālābhidhastātāvatāraśśaṃkarasya vai //
ujjayinyāṃ nagaryyāṃ ca babhūva svajanāvanaḥ

dūṣaṇākhyāsuraṃ yastu vedadharmapramardakam ///
ujjayinyāṃ gataṃ vipradveṣiṇaṃ sarvanāśanam

vedaviprasutadhyāto huṅkāreṇaiva sa drutam //
bhasmasātkṛtavāṃstaṃ ca ratnamāla nivāsinam

taṃ hatvā sa mahākālo jyotirliṃgasvarūpataḥ //
devaissa prārthito'tiṣṭhatsvabhaktaparipālakaḥ

/
mahākālāhvayaṃ liṃgaṃ dṛṣṭvābhyarcya prayatnataḥ //
sarvānkāmānavāpnoti labhate parato gatim

oṅkāraḥ parameśāno dhṛtaḥ śambho parātmanaḥ //
avatāraścaturtho hi bhaktābhīṣṭaphalapradaḥ

vidhinā sthāpito bhaktyā svaliṃgātpārthivānmune //
prādurbhūto mahādevo vindhyakāmaprapūrakaḥ

devaissaṃprārthitastatra dvidhārūpeṇa saṃsthitaḥ //
bhuktimuktiprado liṃgarūpo vai śaktavatsala

praṇave caiva coṃkāranāmāsīlliṃgamuttamam //
parameśvaranāmāsītpārthivaśca munīśvara

bhaktābhīṣṭaprado jñeyo yopi dṛṣṭorcito mune //
jyotirliṃge mahādivye varṇite te mahāmune

kedāreśovatārastu paṃcamaḥ paramaśśivaḥ //
jyotirliṃgasvarūpeṇa kedāre saṃsthitasya ca

naranārāyaṇākhyau yāvavatārau harermune //
tatprārthitaśśivastatsthaiḥ kedāre himabhūdhare

tābhyāṃ ca pūjito nityaṃ kedāreśvarasaṃjñakaḥ //
bhaktābhīṣṭapradaḥ śambhurdarśanādarcanādapi

asya khaṇḍasya sa svāmī sarveśopi viśeṣataḥ //
sarvakāmapradastāta sovatāraśśivasya vai

bhīmaśaṃkarasaṃjñastu ṣaṣṭhaḥ śambhormahāprabhoḥ //
avatāro mahālīlo bhīmāsuravināśanaḥ

sudakṣiṇābhidhambhaktaṅkāmarūpeśvarannṛpam//
yo rarakṣādbhutaṃ hatvāsurantaṃ bhaktaduḥkhadam

bhīmaśaṅkaranāmā sa ḍākinyāṃ saṃsthitassvayam //
jyotirliṃgasvarūpeṇa prārthitastena śaṃkaraḥ

viśveśvarāvatārastu kāśyāṃ jāto hi saptamaḥ //
sarvabrahmāṇḍarūpaśca bhuktimuktiprado mune

pūjitassarvadevaiśca bhaktyā viṣṇvādibhissadā //
kailāsapatinā cāpi bhairaveṇāpi nityaśaḥ

jyotirliṃgasvarūpeṇa saṃsthitastatra muktidaḥ //
svayaṃ siddhasvarūpo hi tathā svapuri sa prabhuḥ

kāśīviśveśayorbhaktyā tannāmajapakārakāḥ //
nirliptāḥ karmabhirnnityaṃ kevalyapadabhāginaḥ

tryaṃbakākhyo'vatāro yaḥ soṣṭamo gautamītaṭe //
prārthito gautamenāvirbabhūva śaśimaulinaḥ

gautamasya prārthanayā jyotirliṃga svarūpataḥ //
sthitastatrācalaḥ prītyā tanmuneḥ prītikāmyayā

tasya sandarśanātsparśāddarśanācca maheśituḥ //
sarve kāmāḥ prasidhyanti tato muktirbhavedaho

śivānugrahatastatra gaṃgā nāmnā tu gautamī //
saṃsthitā gautamaprītyā pāvanī śaṃkarapriyā

/
vaidyanāthāvatāro hi navamastatra kīrtitaḥ //
āvirbhūto rāvaṇārthaṃ bahulīlākaraḥ prabhuḥ

tadānayanarūpaṃ hi vyājaṃ kṛtvā maheśvaraḥ //
jyotirliṃgasvarūpeṇa citābhūmau pratiṣṭhitaḥ

vaidyanātheśvaro nāmnā prasiddhobhūjjagattraye //
darśanātpūjanādbhaktyā bhuktimuktipradaḥ sa hi

vaidyanātheśvaraśivamāhātmyamanuśāsanam //
paṭhatāṃ śṛṇvatāṃ cāpi bhuktimuktipradaṃ mune

nāgeśvarāvatārastu daśamaḥ parikīrtitaḥ //
āvirbhūtaḥ svabhaktārthaṃ duṣṭānāṃ daṇḍadassadā

hatvā dārukanāmānaṃ rākṣasandharmaghātakam //
svabhaktaṃ vaiśyanāthaṃ ca prārakṣatsupriyābhidham

lokānāmupakārārthaṃ jyotirliṃgasvarūpadhṛk//
santasthau sāṃbikaśśambhurbahulīlākaraḥ paraḥ

taddṛṣṭvā śivaliṃgantu mune nāgeśvarābhidham //
vinaśyanti drutaṃ cārcya mahāpātakarāśayaḥ

/
rāmeśvarāvatārastu śivasyaikādaśaḥ smṛtaḥ //
rāmacandrapriyakaro rāmasaṃsthāpito mune

dadau jayavaraṃ prītyā yo rāmāya sutoṣitaḥ //
āvirbhūtasya liṃgastu śaṃkaro bhaktavatsalaḥ

rāmeṇa prārthito'tyarthaṃ jyotirliṃgasvarūpataḥ //
santasthau setubandhe ca rāmasaṃsevito mune

rāmeśvarasya mahimādbhuto'bhūdbhuvi cātulaḥ //
bhuktimuktipradaścaiva sarvadā bhaktakāmadaḥ

taṃ ca gaṃgājalenaiva snāpayiṣyati yo naraḥ //
rāmeśvaraṃ ca sadbhaktyā sa jīvanmukta eva hi

iha bhuktvākhilānbhogāndevatādurllabhānapi//
ataḥ prāpya paraṃ jñānaṃ kaivalyaṃ mokṣamāpnuyāt

ghuśmeśvarāvatārastu dvādaśaśśaṃkarasya hi //
nānālīlākaro ghuśmānandado bhaktavatsalaḥ

dakṣiṇasyāndiśi mune devaśailasamīpataḥ //
āvirbabhūva sarasi ghuśmāpriyakaraḥ prabhuḥ

sudehyamāritaṃ ghuśmāputraṃ sākalyato mune //
tuṣṭastadbhaktitaśśambhuryorakṣadbhaktavatsalaḥ

tatprārthitassa vai śambhustaḍāge tatra kāmadāḥ//
jyotirliṃga svarūpeṇa tasthau ghuśmeśvarābhidhaḥ //५५/
tandṛṣṭvā śivaliṃgantu samabhyarcya ca bhaktitaḥ//
iha sarvasukhambhuktvā tato muktiṃ ca vindati

iti te hi samākhyātā jyotirliṃgāvalī mayā//
dvādaśapramitā divyā bhuktimuktipradāyinī

etāṃ jyotirliṃgakathāṃ yaḥ paṭhecchṛṇuyādapi//
mucyate sarvapāpebhyo bhuktiṃ muktiṃ ca vindati

śatarudrābhidā ceyamvarṇitā saṃhitā mayā//
śatāvatārasatkīrtissarvakāmaphalapradā

imāṃ yaḥ paṭhate nityaṃ śṛṇuyādvā samāhitaḥ //
sarvānkāmānavāpnoti tato muktiṃ labheddhruvam

iti śrīśivamahāpurāṇe tṛtīyāyāṃ śatarudrasaṃhitāyāṃ sanatkumāra .nandīśvarasaṃvāde dvādaśajyotirliṃgāvatāravarṇanaṃ nāma dvicatvāriṃśodhyāyaḥ