Shiva Purana · Chapter 3.41

tamāgatantato dṛṣṭvā dhyānaṃ kṛtvā śivasya saḥ //
gatvā tatrārjunastena yuddhaṃ cakre sudāruṇam

gaṇaiśca vividhaistīkṣṇairāyudhaistaṃ nyapīḍayat //
taistadā pīḍitaḥ pārthaḥ sasmāra svāminaṃ śivam

arjunaśca tadā teṣāṃ bāṇāvalimathācchinat //
yadāyuddhaṃ ca taiḥ kṣiptaṃ tataḥ śarvaṃ parāmṛśat

pīḍitāste gaṇāstena yayuścaiva diśo daśa //
gaṇeśā vāritāste ca nājagmussvāminamprati

śivaścaivārjunaścaiva yuyudhāte parasparam //
nānāvidhaiścāyudhairhi mahābalaparākramau

śivo'pi manasā nūnaṃ dayāṃ kṛtvārjunaṃ hyagāt //
arjunaśca dṛḍhaṃ tatra prahāraṃ kṛtavāṃstadā

āyudhāni śivasso vai hyarjunasyācchinattadā //
kavacāni ca sarvāṇi śarīraṃ kevalaṃ sthitam

tadārjunaḥ śivaṃ smṛtvā mallayuddhaṃ cakāra saḥ //
vāhinīpatinā tena bhayātkliṣṭopi dhairyavān

tadyuddhena mahī sarvā cakaṃpe sasamudrakā //
devā duḥkhaṃ samāpannaḥ kiṃ bhaviṣyati vā punaḥ

etasmitraṃtare devaḥ śivo gaganamāsthitaḥ //
yuddhaṃ cakāra tatrasthassorjunaśca tathā'karot

uḍḍīyoḍḍīya tau yuddhaṃ cakraturdevapārthivau//
devāśca vismayaṃ prāpū raṇaṃ dṛṣṭvā tadādbhutam

athārjunottare jñātvā smṛtvā śivapadāṃbujam//
dadhāra pādayostaṃ vai taddhyānādāptasadbalaḥ

dhṛtvā pādau tadā tasya bhrāmayāmāsa sorjunaḥ //
vijahāsa mahādevo bhaktavatsala ūtikṛt

dātuṃ svadāsatāṃ tasmai bhaktavaśyatayā mune //
śivenaiva kṛtaṃ hyetaccaritannānyathā bhavet

paścādvihasya tatraiva śaṃkaro rūpama dbhutam //
darśayāmāsa sahasā bhaktavaśyatayā śubham

yathoktaṃ vedaśāstreṣu purāṇe puruṣottamam//
vyāsopadiṣṭaṃ dhyānāya tasya yatsarvasiddhidam

taddṛṣṭvā suṃdaraṃ rūpaṃ dhyānaprāptaṃ śivasya tu //
babhūva vismitotīva hyarjuno lajjitaḥ svayam

aho śivaśśivassoya yo me prabhutayā vṛtaḥ //
trilokeśaḥ svayaṃ sākṣāddhā kṛtaṃ kiṃ mayā'dhunā

prabhorbalavatī māyā māyināmapi mohinī //
kiṃ kṛtaṃ rūpamācchādya prabhuṇā chalito hyaham

dhiyeti saṃvicāryyaiva sāñjalirnatamastakaḥ //
praṇanāma prabhuṃ prītyā tadovāca sa khinnadhīḥ

arjuna uvāca // devadeva mahādeva karuṇākara śaṃkara//
mamāparādhaḥ sarveśa kṣantavyaśca tvayā punaḥ

kiṃ kṛtaṃ rūpamācchādya cchalito'smi tvayādhunā //
dhiṅ māṃ samarakartāraṃ svāminā bhavatā prabho

nandīśvara uvāca//
ityevaṃ pāṇḍavassotha paścāttāpamavāpa saḥ //
pādayornipapātāśu śaṃkarasya mahāprabhoḥ

atheśvaraḥ prasannātmā pratyuvācārjunaṃ ca tam //
samāśvāsyeti bahuśo maheśo bhaktavatsalaḥ

śaṃkara uvāca //
na khidya pārtha bhaktosi mama tvaṃ hi viśeṣataḥ//
parīkṣārthaṃ mayā te'dya kṛtamevaṃ śucañjahi

naṃdīśvara uvāca //
ityuktvā taṃ svahastābhyāmutthāpya prabhurarjunam //
vilajjaṃ kārayāmāsa gaṇaiśca svāmino gaṇaiḥ

punaśśivo'rjunamprāha pāṇḍavaṃ vīrasammatam //
harṣayan sarvathā prītyā śaṃkaro bhaktavatsalaḥ

śiva uvāca //
he pārtha pāṇḍavaśreṣṭha prasannosmi varaṃ vṛṇu //
prahāraistāḍanaiste'dya pūjanammānitammayā

icchayā ca kṛtaṃ me'dya nāparādhastavādhunā //
nādeyaṃ vidyate tubhyaṃ yadicchasi vṛṇīṣva tat

te śatruṣu yaśorājyasthāpanāya śubhaṃ kṛtam //
etadduḥkhaṃ na kartavyaṃ vaiklavyaṃ ca tyajākhilam

nandīśvara uvāca //
ityuktastvarjunastena prabhuṇā śaṃkareṇa saḥ//
uvāca śaṃkaraṃ bhaktyā sāvadhānatayā sthitaḥ

arjuna uvāca //
bhaktapriyasya śambhoste suprabho kiṃ samīhitam//
varṇanīyaṃ mayā deva kṛpālustvaṃ sadāśiva

ityuktvā saṃstutiṃ tasya śaṃkarasya mahāprabhoḥ //
cakāra pāṇḍavassotha sadbhaktiṃ vedasaṃmatām

arjuna uvāca//
namaste devadevāya namaḥ kailāsavāsine //
sadāśiva namastubhyaṃ pañcavaktrāya te namaḥ

kapardine namastubhyantrinetrāya namo'stu te//
manaḥ prasannarūpāya sahasravadanāya ca

nīlakaṃṭha namastestu sadyojātāya vai namaḥ //
vṛṣadhvaja namastestu vāmāṃgagirijāya ca

daśadoṣa namastubhyannamaste paramātmane //
ḍamarukapālahastāya namaste muṇḍamāline

śuddhasphaṭikasaṃkāśaśuddhakarpūravarṣmaṇe //
pinākapāṇaye tubhyantriśūlavaradhāriṇe

vyāghracarmottarīyāya gajāmbaravidhāriṇe //
nāgāṃgāya namastubhyaṃ gaṃgādhara namostu te

supādāya namaste'stu āraktacaraṇāya ca //
nandyādigaṇasevyāya gaṇeśāya ca te namaḥ

namo gaṇeśarūpāya kārtikeyānugāya ca //
bhaktidāya ca bhaktānāṃ muktidāya namonamaḥ

aguṇāya namastestu saguṇāya namonamaḥ //
arūpāya sarūpāya sakalāyākalāya ca

namaḥ kirātarūpāya madanugrahakāriṇe //
yuddhapriyāya vīrāṇāṃ nānālīlānukāriṇe

yatkiṃciddṛśyate rūpantattejastāvakaṃ smṛtam //
cidrūpastvaṃ trilokeṣu ramasenvayabhedataḥ

guṇānānte na saṃkhyāsti yathā bhūrajasāmiha //
ākāśe tārakāṇāṃ hi kaṇānāṃ vṛṣṭyapāmapi

na te guṇāstu saṃkhyātuṃ vedā vai sambhavanti hi //
mandabuddhirahaṃ nātha varṇayāmi kathampunaḥ

sosi yosi namaste'stu kṛpāṃ kartumihārhasi//
dāsohaṃ te maheśāna svāmī tvaṃ me maheśvara

nandīśvara uvāca //
iti śrutvā vacastasya punaḥ provāca śaṃkara //
suprasannataro bhūtvā vihasanprabhurarjunam

śaṃkara uvāca//
vacasā kimbahūktena śṛṇuṣva vacanammama //
śīghraṃ vṛṇu varamputra sarvantacca dadāmi te

nandīśvara uvāca//
ityuktaścārjunastena praṇipatya sadāśivam //
sāñjalirnatakaḥ premṇā provāca gadgadākṣaram

arjuna uvāca //
kiṃ brūyāṃ tvaṃ ca sarveṣāmantaryāmitayā sthitaḥ //
tathāpi varṇitaṃ me'dya śrūyatāṃ ca tvayā vibho

śatrūṇāṃ saṃkaṭaṃ yacca tadgatandarśanāttava//
aihikīṃ ca parāṃ siddhimprāpnuyāṃ vai tathā kuru

nandīśvara uvāca //
ityuktvā taṃ namaskṛtya śaṃkarambhaktavatsalam //
nataskandho'rjunastatra baddhāñjalirupasthitaḥ

śivopi ca tathābhūtañjñātvā pāṇḍavamarjunam //
nijabhaktavaraṃ svāmī mahātuṣṭo babhūva ha

astrampāśupataṃ svīyandurjayaṃ sarvadākhilaiḥ //
dadau tasmai maheśāno vacanaścedamabravīt

śiva uvāca //
svaṃ mahāstrammayā dattandurjayastvambhaviṣyati //
anena sarvaśatrūṇāṃ jayakṛtyamavāpnuhi

kṛṣṇaṃ ca kathayiṣyāmi sāhāyyante kariṣyati //
sa vai mamātmabhūtaśca madbhaktaḥ kāryyakārakaḥ

matprabhāvānbhārata tvaṃ rājyannikaṇṭakaṃ kuru //
dharmyānnānāvidhānbhrātrā kāraya tvaṃ ca sarvadā

nandīśvara uvāca //
ityuktvā nijahastaṃ ca dhṛtvā śirasi tasya saḥ //
pūjito hyarjunenāśu śaṃkarontaradhīyata

athārjunaḥ prasannātmā prāpyāstraṃ ca varaṃ prabhoḥ //
jagāma svāśrame mukhyaṃ smaranbhaktyā guruṃ śivam

sarvve te bhrātaraḥ prītāstanvaḥ prāṇamivāgatam //
militvā taṃ sukhaṃ prāpurdraupadī cāti suvratā

śivaṃ paraṃ ca santuṣṭampāṇḍavāḥ sarva eva hi //
nātṛpyansarvavṛttāntaṃ śrutvā harṣamupāgatāḥ

āśrame puṣpavṛṣṭiśca candanena samanvitā //
papāta sukarārthaṃ ca teṣāñcaiva mahātmanām

dhanyaṃ ca śaṃkaraṃ caiva namaskṛtya śivammudā //
avadhiṃ cāgataṃ jñātvā jayaścaiva bhaviṣyati

etasminnantare kṛṣṇaśśrutvārjunamathāgatam//
melanāya samāyātaśśrutvā sukhamupāgataḥ

ataścaiva mayākhyātaḥ śaṃkaraḥ sarvaduḥkhahā //
sa sevyate mayā nityaṃ bhavadbhirapi sevyatām

ityuktaste kirātāhvovatāraśśaṃkasya vai //
taṃ śrutvā śrāvayanvāpi sarvānkāmānavāpnuyāt

ityaṣṭāśītyavatārāḥ (८८)
iti śrīśivamahāpurāṇe tṛtīyāyāṃ śatarudrasaṃhitāyāṃ kirāteśvarāvatāravarṇanaṃ nāmaikacatvāriṃśo'dhyāyaḥ