Shiva Purana · Chapter 3.29

nandīśvara uvāca //
sanatkumāra śambhostvavatāraṃ paramaṃ śṛṇu //
nabhagajñānadaṃ kṛṣṇadarśanāhvayamuttamam

ikṣvākupramukhā āsanśrāddhadevasutāśca ye //
nabhagastatra navamo nābhagastatsutaḥ smṛtaḥ

ambarīṣassutastasya viṣṇubhakto babhūva saḥ //
yasyopari prasannobhūddurvāsā brahmabhaktitaḥ

pitāmaho'mbarīṣasya nabhago yaḥ prakīrtitaḥ //
taccaritaṃ śṛṇu mune yasmai jñānamadācchivaḥ

nabhago manuputrastu paṭhanārthaṃ subuddhi mān //
cakre gurukule vāsaṃ bahukālaṃ jitendriyaḥ

etasminsamaye te vā ikṣvākupramukhāssutāḥ //
tasmai bhāgamakalpyaiva bhejurbhāgānnijānkramāt // ६ /
svaṃsvaṃ bhāgaṃ gṛhītvā te bubhujū rājyamuttamam //
aviṣādaṃ mahābhāgā pitrādeśātsubuddhayaḥ

sa paścādāgatastatra brahmacārī gurusthalāt //
nabhago'dhītya sarvāśca sāṃgopāṃgāḥ śrutīḥ kramāt

bhrātṛnvilokya nabhago vibhaktānsakalānnijān //
dāyārthī prāha tānsnehādikṣvākupramukhānmune

nabhaga uvāca //
bhrātarobhaktakaṃ mahyaṃ dāyaṃ kṛtvā yathātatham //
sarve vibhaktāssuprītyā svadāyārthāgatāya ca

tadā vismṛtamasmābhiridānīṃ pitaraṃ tava //
vibhajāmo vayaṃ bhāgaṃ taṃ gṛhāṇa na saṃśayaḥ

tacchutvā bhrātṛvacanaṃ nabhagaḥ paravismṛtaḥ //
tadopakaṇṭhamāgatya pitaraṃ samabhāṣata

nabhaga uvāca //
he tāta bhrātaraḥ sarve tyaktvā māṃ nyabhajaṃśca te //
paṭhanārthaṃ gataścāhaṃ brahmacārī guroḥ kule

tata āgatya me pṛṣṭā dāyadānārthamādarāt//
te tvāmūcurvibhāgaṃ me tadarthamahamāgataḥ

nandīśvara uvāca //
tadākarṇya vacastasya pitā taṃ prāha vismitaḥ//
āśvāsya śrāddhadevassa satyadharmarataṃ mune

manuruvāca //
taduktaṃ mādṛthāstāta pratāraṇakaraṃ hi tat //
na hyahaṃ paramaṃ dāyaṃ sarvathā bhogasādhanam

tathāpi dāyabhāvena datto'haṃ taiḥ pratāribhiḥ //
tava vai jīvanopāya vadāmi śṛṇu tattvataḥ

satramāṃgirasā viprāḥ kurvaṃtyadya sumedhasaḥ //
tatra karmaṇi muhyanti ṣaṣṭhaṃ ṣaṣṭhamahaḥ prati

tatra tvaṃ gaccha nabhaga tān suśaṃsa mahākave //
sūkte dve vaiśvadeve hi satraṃ śuddhaṃ hi tadbhavet

tatkarmaṇi samāpte hi svayānto brāhmaṇāśca te //
dhanaṃ dāsyanti te tuṣṭāssvasatrapariśeṣitam

nandīśvara uvāca //
tadākarṇya piturvākyaṃ nabhagaḥ satyasāravān //
jagāma tatra suprītyā yatra tatsatramuttamam

tadāhaḥ karmaṇi mune satre tasminsa mānavaḥ //
sūkte dve vaiśvadeve hi provāca spaṣṭatassudhīḥ

samāpte karmaṇi tato viprā āṃgirasāśca te //
tasmai dattvā yayuḥ svargaṃ svaṃsvaṃ satrāvaśeṣitam

tattadā svīkariṣyaṃtaṃ susatrapariśeṣitam //
vijñāya giriśaḥ sadya āvirbhūta sadūtikṛt

sarvāṃgasundaraḥ śrīmānpuruṣaḥ kṛṣṇadarśanaḥ //
bhāvaṃ samīkṣituṃ bhāgaṃ dātuṃ jñānaṃ paraṃ ca tat

atho sa śaṃkaraḥ śambhuḥ parīkṣākara īśvaraḥ //
uvācottarato'bhyetya nabhagaṃ taṃ hi mānavam

īśvara uvāca //
kastvaṃ gṛhṇāsi puruṣa mamedaṃ vāstukaṃ vasu //
preṣitaḥ kena tatsarvaṃ satyaṃ vada mamāgrataḥ

nandīśvara uvāca //
tacchutvā tadvacastāta mānavo nabhagaḥ kavi //
pratyuvāca vinītātmā puruṣaṃ kṛṣṇadarśanam

nabhagaḥ uvāca //
mamedamṛṣibhirdattaṃ vasu yajñagataṃ khalu //
kathaṃ vārayase māṃ tvaṃ gṛhṇataṃ kṛṣṇadarśanam

nandīśvara uvāca //
ākarṇya nābhagaṃ vākyamidaṃ satyamudīritam //
pratyuvāca prasannātmā puruṣaḥ kṛṣṇadarśanaḥ

kṛṣṇadarśana uvāca //
vivāde'sminhi nau tāta pramāṇaṃ janakastava //
yāhi tampṛccha sa brūyāttatpramāṇantu satyataḥ

nandīśvara uvāca //
tadākarṇya vacastasya nabhago mānavaḥ kaviḥ //
āgacchatpitaraṃ prītyā taduktaṃ pṛṣṭavānmune

putroditaṃ samākarṇya śrāddhadevassa vai manuḥ //
smṛtvā śivapadāmbhojaṃ prāptasmṛtiruvāca tam

manuruvāca //
he tāta śṛṇu madvākyaṃ sa devaḥ puruṣaḥ śivaḥ //
tasyaiva sakalaṃ vastu yajñaprāptaṃ viśeṣataḥ

adhvarorvaritaṃ vastu rudrabhāgaḥ prakīrtitaḥ //
ityapi prājñavādo hi kvacijjātastadicchayā

sa deva īśvaraḥ sarvaṃ vastvarhati na saṃśayaḥ //
yajñāvaśiṣṭaṃ kimuta pare tasyecchayā vibhoḥ

anugrahārthamāyātastava tadrūpataḥ prabhuḥ //
tatra tvaṃ gaccha nabhaga prasannaṃ kuru satyataḥ

kṣamāpaya svāparādhaṃ supraṇamya stutiṃ kuru //
sarvaprabhussa eveśo yajñādhīśo'khileśvaraḥ

viṣṇubrahmādayo devāḥ siddhāssarvarṣayo'pi hi //
tadanugrahatastāta samarthaḥ sarvakarmaṇi

kimbahūktyātmajaśreṣṭha gaccha tatrāśu māciram //
prasādaya mahādevaṃ sarvathā sakaleśvaram

nandīśvara uvāca //
ityuktvā sa manuḥ śrāddhadevaśca tanayaṃ drutam //
preṣayāmāsa nikaṭaṃ śambhosso'pi sametya tam

nabhagaśca praṇamyāśu sāñjalirnatamastakaḥ //
provāca suprasannātmā vinayena mahāmatiḥ

nabhaga uvāca //
idaṃ taveśa sarvaṃ hi vastu tribhuvane hi yat //
ityāha me pitā nūnaṃ kimutādhvaraśeṣitam

ajānatā mayā nātha yaduktantadvaco bhramāt //
aparādhantvaṃ kṣamasva śirasā tvāṃ prasādaye

ityuktvā nabhagassotidīnadhīstu kṛtāñjaliḥ //
tuṣṭāva taṃ maheśānaṃ kṛṣṇadarśanamānataḥ

śrāddhadevo'pi śuddhātmā natakassāñjalissudhīḥ //
tuṣṭāva taṃ prabhuṃ natvā svāparādhaṃ kṣamāpayat

etasminnantare tatra viṣṇurbrahmākhilaḥ sudhīḥ //
vāsavādyāḥ samājagmuḥ siddhāśca munayo'pi hi

mahotsavaṃ prakurvantaḥ sukṛtālayo'khilāḥ //
tuṣṭuvurnatakā bhaktyā supraṇamya pṛthakpṛthak

atha rudraḥ prasannātmā kṛpādṛṣṭyā vilokya tān//
uvāca nabhagaṃ prītyā sasmitaṃ kṛṣṇadarśanaḥ

kṛṣṇadarśana uvāca //
yatte pitāvadaddharmyaṃ vākyantattu tathaiva hi //
tvayāpi satyamuktaṃ tatsādhustvannātra saṃśayaḥ

ato'haṃ suprasanno'smi sarvathā suvratena te //
dadāmi kṛpayā te hi jñānambrahma sanātanam

mahājñānī bhava tvaṃ hi savipro nabhagaṃ drutam //
gṛhāṇa vastvidaṃ sarvaṃ maddattaṃ kṛpayādhunā

iha sarvasukhaṃ bhuṅkṣva nirvikāraṃ mahāmate //
sugatiṃ prāpsyasi tvaṃ hi savipraḥ kṛpayā mama

nandīśvara uvāca //
ityuktvā tāta bhagavānsa rudraḥ satyavatsalaḥ //
sarveṣāmpaśyatānteṣāntatraivāntardadhe haraḥ

viṣṇurbrahmāpi devādyāssarve te munisattama //
svaṃsvaṃ dhāma yayuḥ prītyā tasyai natvā diśe mudā

saputraḥ śrāddhadevo'pi svasthānamagamanmudā //
bhuktvā bhogānsuvipulānso'nte śivapura yayau

itthante kīrtito brahmannavatāraḥ śivasya hi //
kṛṣṇadarśananāmā vai nabhagānandadāyakaḥ

idamākhyānamanaghaṃ bhuktimuktipradaṃ satām //
paṭhatāṃ śṛṇvatāṃ vāpi sarva kāmaphalapradam

ya etaccaritamprātassāyaṃ ca smarate sudhīḥ //
kavirbhavati mantrajño gatimante labhetparām

iti śrīśivamahāpurāṇe tṛtīyāyāṃ śatarudrasaṃhitāyāṃ nandīśvarasanatkumārasaṃvāde kṛṣṇadarśanaśivāvatāravarṇanaṃnāmaikonatriṃśo'dhyāyaḥ