Shiva Purana · Chapter 3.23

nandīśvara uvāca //
tato vṛṣabharūpeṇa garjamānaḥ pinākadhṛk //
praviṣṭo vivaraṃ tatra ninadanbhairavānravān

nipestutasya ninadaiḥ purāṇi nagarāṇi ca //
prakampo hi babhūvātha sarveṣāṃ puravāsinām

tato vṛṣo hareḥ putrānsaṃgrāmodyatakārmukān //
śivamāyāvimūḍhātmamahābalaparākramān

hariputrāstataste'tha prākupyanmunisattama //
pradudruvuḥ pragarjyoccairvīrāśśaṃkarasanmukham

āyātāṃstānhareḥ putrānrudro vṛṣabharūpadhṛk //
prākupyadviṣṇuputrāṃśca khuraiśśṛṃgairvyadārayat

vidāritāṃgā rudreṇa sarve harisutāśca te //
naṣṭā drutaṃ sanbabhūvurgataprāṇā vicetasaḥ

hateṣu teṣu putreṣu viṣṇurbalavatāṃ varaḥ //
niṣkramyātha praṇamyoccairyayau śīghraṃ harāntikam

dṛṣṭvā rudraṃ pravrajaṃtaṃ hataviṣṇusutaṃ vṛṣam//
śaraissantāḍayāmāsa divyairastraiśca keśavaḥ

tataḥ kruddho mahādevo vṛṣarūpī madābalaḥ //
astrāṇi tāni viṣṇośca jagrāsa girigocaraḥ

atha kṛtvā mahākopaṃ vṛṣātmā sa maheśvaraḥ //
vinanāda mahāghoraṃ kampayaṃstrijaganmune

tata viṣṇośca tarasā khuraiśśṛṃgairvyadārayat //
viṣṇuṃ krodhākulaṃ mūḍhamajānantaṃ nijaṃ harim

tatassa śithilātmā hi vyathitāṃgo babhūva ha//
tatprahāramasahyāśu harirmāyāvimohitaḥ

gatagarvohariścaiva vicetā gatacetanaḥ//
jñātavānparameśānaṃ viharantaṃ vṛṣātmanā

atha vijñāya gaurīśamāgataṃ vṛṣarūpataḥ //
prāha gambhīrayā vācā nataskandhaḥ kṛtāñjaliḥ

hariruvāca //
devadeva mahādeva karuṇāsāgara prabho//
māyayā te maheśāna mohitohaṃ vimūḍhadhīḥ

kṛtaṃ yuddhaṃ tvayeśena svanāthena mayā prabho //
kṛpāṃ kṛtvā mayi svāminso'parādho hi sahyatām

nandīśvara uvāca //
tasya tadvacanaṃ śrutvā harerdīnatayā mune //
bhagavāñchaṃkaraḥ prāha rameśaṃ bhaktavatsalaḥ

he viṣṇo he mahābuddhe kathaṃ māṃ jñātavānna hi //
yuddhaṃ kṛtaṃ kṛtaste'dya jñānaṃ sarvvaṃ ca vismṛtam

ātmānaṃ kinna jānāsi madadhīnaparākramam //
tvayā nātra ratiḥ kāryā nivartasva kucārataḥ

kāmādhīnaṃ kathaṃ jñānaṃ strīṣu sakto vihārakṛt //
nocitantava deveśa smaraṇaṃ viśvatāraṇam

tacchutvā śambhuvacanaṃ vijñānapradamādarāt//
vrīḍyansvamanasā viṣṇuḥ prāha vācaṃ maheśvaram

viṣṇuruvāca/
mamātra vidyate cakraṃ tadgṛhītve tadādarāt//
gamiṣyāmi svalokantantvadājñāparipālakaḥ

nandīśvara uvāca //
tadākarṇya maheśāno vacanaṃ vaiṣṇavaṃ haraḥ //
pratyuvāca vṛṣātmā hi vṛṣarakṣaḥ punarharim

na vilambaḥ prakarttavyo gantavyamita āśu te//
macchāsanāddhare loke cakramatraiva tiṣṭhatām

santānādityasaṃsthānācchivatvavacanādapi//
ahaṃ ghorataraṃ tasmāccakramanyaddadāmi te

nandīśvara uvāca //
etaduktvā haro'lekhīddivyaṃ kālānalaprabham //
paraṃ cakraṃ pradīptaṃ hi sarvaduṣṭavināśanam

viṣṇave pradadau cakraṃ ghorārkāyutasuprabham //
sarvāmaramunīndrāṇāṃ rakṣakāya mahātmane

labdhvā sudarśanaṃ cānyañcakraṃ paramadīptimit //
uvāca vibudhāṃstatra viṣṇurbuddhimatāṃ varaḥ

sarvadevavarā yūyaṃ madvākyaṃ śṛṇutādarāt //
kartavyantattathā śīghraṃ tataśśaṃ vo bhaviṣyati

divyā varāṃganāssanti pātāle yauvanānvitāḥ//
tābhiḥ sārddhaṃ mahākrīḍāṃ yaḥ karotu karotu saḥ

tacchutvā keśavādvākyaṃ śūrāstridaśayonayaḥ //
praveṣṭukāmāḥ pātālambabhūvurviṣṇunā saha

vicāramatha vijñāya tantadā bhagavānhara //
krodhācchāpandadau ghoraṃ devayonyaṣṭakasya ca

hara uvāca //
varjayitvā muniṃ śāntaṃ dānavānvā madaṃśajam //
idaṃ yaḥ praviśetsthānaṃ tasya syānnidhanaṃ kṣaṇāt

śrutvā vākyamidaṃ ghoraṃ manuṣyahitavardhanam //
pratyākhyātāstu rudreṇa devāssvagṛhamā yayuḥ

evaṃ strīlaḥ paro viṣṇuśśivena pratiśāsitaḥ //
svarlokamagamadvyāsa svāsthyaṃ prāpa jagacca tat

vṛṣeśvaro'pi bhagavācchaṃkaro bhaktavatsalaḥ //
itthaṃ kṛtvā devakāryaṃ jagāma svagirīśvaram

vṛṣeśvarāvatārastu varṇitaśśaṃkarasya ca //
viṣṇumohaharaśśarvastrailokyasukhakārakaḥ

pavitramidamākhyānaṃ śatrubādhāharamparam //
svargyaṃ yaśasyamāyuṣyaṃ bhuktimuktipradaṃ satām

ya idaṃ śṛṇuyādbhaktyā śrāvayedvai samāhitaḥ //
sa bhuktvā sakalānkāmānante mokṣa mavāpnuyāt //
tathā paṭhiti yo hīdaṃ pāṭhayetsudhiyo narān

iti śrīśivamahāpurāṇe tṛtīyāyāṃ śatarudrasahitāyāṃ vṛṣeśvarasaṃjñakaśivāvatāravarṇanaṃ nāma trayoviṃśo'dhyāyaḥ