Shiva Purana · Chapter 3.22

nandīśvara uvāca //
śṛṇu brahmasuta prājña vṛṣeśākhyaṃ munīśvara //
śivāvatāraṃ sallīlaṃ harigarvaharaṃ varam

purā devāsurāḥ sarve jarāmṛtyubhayārditāḥ //
parasparaṃ ca saṃdhāya ratnānyāditsavo'bhavan

tataḥ surā'surāḥ sarve kṣīrodaṃ sāgarottamam //
udyatā mathituṃ taṃ ca babhūvurmuni nandana

āsañchucismitāssarve kenedaṃ manthanaṃ bhavet //
svakāryasiddhaye tasya brahmanniti surāsurāḥ

tadā nabhogatā vāṇī meghagambhīranisvanā //
uvāca devāndaityāṃśca śvāsayantīśvarājñayā

nabhovāṇyuvāca //
he devā asurāścaiva manthadhvaṃ kṣīrasāgaram //
bhavatāmbalabuddhirhi bhaviṣyati na saṃśayaḥ

mandaraṃ caiva manthānaṃ rajjuṃ kuruta vāsukim //
mithassarve militvā tu maṃthanaṃ kurutādarāt

nandīśvara uvāca //
nabhogatā tadā vāṇīṃ niśamyātha surāsuraḥ //
udyogaṃ cakrire sarve tatkartuṃ munisattama

susandhāyākhilāste vai mandaramparvatottamam //
kanakābhaṃ ca saralaṃ nānāśobhārcitaṃ yayuḥ

suprasādya girīśaṃ taṃ tadājñaptāḥ surāsurāḥ //
balādutpāṭayāmāsurnetukāmāḥ payo'rṇavam

bhujairutpāṭya te sarvve jagmuḥ kṣīrārṇava pure //
aśaktā abhavaṃstatra tamānetuṃ hataujasaḥ

tadbhujaissa paribhraṣṭaḥ patito maṃdaro giriḥ //
sahasātigurussadyo devadaityopari dhruvam

evambhagnodyamā bhagnāḥ sambabhūvussurāsurā//
cetanāḥ prāpya ca tatastuṣṭuvurjagadīśvaram

tadicchayodyatāssarve punarutthāya taṃ girim//
nicikṣipurjale nītvā kṣīrodasyottare taṭe

tatassurāsuragaṇā rajjuṃ kṛtvā ca vāsukim //
ratnānyādātukāmāste mamaṃthuḥ kṣīrasāgaram

kṣīrode mathyamāne tu śrīssvarlokamaheśvarī //
samudbhūtā samudrācca bhṛguputrī haripriyā

dhanvantariḥ śaśāṃkaśca pārijāto mahādrumaḥ //
uccaiśśravāśca turago gaja airāvatastathā

surā haridhanu śśaṅkho gāvaḥ kāmadughāstataḥ //
kaustubhākhyo maṇiścaiva tathā pīyūṣameva ca

punaśca mathyamāne tu kālakūṭaṃ mahāviṣam //
yugāntānalabha jātaṃ surāsurabhayāvahama

pīyūṣajanmakāle tu bindavo ye bahirgatāḥ //
tebhyaḥ kāntā samudbhūtā bahvayo hyadbhutadarśanāḥ

śaratpūrṇenduvadanāstaḍitsūryyānalaprabhāḥ //
hārakeyūrakaṭakairdivyaratnairalaṅkṛtāḥ

lāvaṇyāmṛtatoyena tāssiṃcantyo diśo daśa //
jagadunmādayantyeva bhrūbhaṅgāyatavīkṣaṇāḥ

koṭiśastāssamutpannāstvamṛtātkāmanissṛtāḥ //
tato'mṛtaṃ samutpannaṃ jarāmṛtyunivāraṇam

lakṣmīṃ śaṃkhaṃ kaustubhaṃ ca khaḍgaṃ jagrāha keśavaḥ //
jagrāhārko hayaṃ divyamuccaiḥśravasamādarāt

pārijātaṃ taruvaramairāvatamibheśvaram //
śacīpatiśca jagrāha nirjareśo mahādarāta

kālakūṭaṃ śaśāṃkaṃ ca devatrāṇāya śaṃkaraḥ //
svakaṇṭhe dhṛtavāñchambhussvecchayā bhaktavatsalaḥ

daityāssurākhyāṃ ramaṇīmīśvarājñāvimohitāḥ //
jagṛhuḥ sakalā vyāsa sarve dhanvantariṃ janāḥ

jagṛhurmunayassarve kāmadhenummunīśvarāḥ //
sāmānyatastriyastāśca sthitā āsanvimohitāḥ

amṛtārthaṃ mahāyuddhaṃ saṃbabhūva jayaiṣiṇām//
surāṇāmasurāṇāṃ ca mithaḥ saṃkṣubdhacetasām

hṛtaṃ somaṃ ca daiteyairbalāddevānvijitya ca //
baliprabhṛtibhirvyāsa yugāntāgnyarkasuprabhaiḥ

devāśśaṃkaramāpannā vihvalāśśivamāyayā //
sarve śakrādayastāta daiteyairarditā balāt

tatastadamṛtaṃ yatnātstrīsvarūpeṇa māyayā //
śivājñayā rameśena daityebhyaśca hṛtammune

apāyayatsurāṃstāṃśca mohinīstrīsvarūpadhṛk //
mohayitvā surānsarvānharirmāyāvināṃ varaḥ

gatvā nikaṭametasyā ūcire daityapuṃgavāḥ //
pāyayasva sudhāmetāṃ mā bhūdbhedo'tra paṃktiṣu

etaduktvā dadustasmai viṣṇave chalarūpiṇe //
te daityā dānavāḥ sarve śivamāyāvimohitāḥ

etasminnantare dṛṣṭvā striyo dānavapuṃgavāḥ //
anayannamṛtodbhūtā yathāsthānaṃ yathāsukham

tāsāmpurāṇi divyāni svargācchaguṇānyapi//
ghorairyantraissuguptāni mayamāyākṛtāni ca

surakṣitāni sarvāṇi kṛtvā yuddhāya niryayuḥ//
aspṛṣṭavakṣaso daityāḥ kṛtvā samayameva hi

na spṛśāmaḥ striyaścemā yadi devairvinirjitāḥ //
ityuktvā te mahāvīrā daityāssarve yuyutsavaḥ

siṃhanādantataścakruśśaṃkhāndadhmuḥ pṛthakpṛthak//
pūrayanta ivākāśaṃ tarpayanto balāhakān

yuddhaṃ babhūva devānāmasuraissaha bhīkaram //
devāsurākhyamatulaṃ prasiddhaṃ bhuvanatraye

jayaṃ prāpussurāssarve viṣṇunā parirakṣitāḥ//
daityāḥ palāyitāstatra hatāḥ sāmaraviṣṇunā

daityāḥ saṃmohitā devairviṣṇunā ca mahātmanā //
hatāvaśiṣṭāḥ pātālaṃ viviśurvivarāṇi ca

anuvavrāja tānviṣṇuścakrapāṇirmahābalaḥ //
pātālaṃ paramaṃ gatvā saṃsthitānbhītabhītavat

etasminnantare viṣṇu dadarśāmṛtasambhavāḥ //
kāntāḥ pūrṇenduvadanā divyalāvaṇyagarvitāḥ

saṃmohitaḥ kāmabāṇairlebhe tatraiva nirvṛtim //
tābhiśca varanārībhiḥ krīḍamāno babhūva ha

tābhya putrānajanayadviṣṇurvaraparākramān //
mahīṃ sarvāṃ kaṃpayato nānāyuddhaviśāradān

tato vai hariputrāste mahābalaparākramāḥ //
mahopadravamācerussvarge bhuvi ca duḥkhadam

lokopadravamālakṣya nirjarā munayo'tha vai //
cakrurnivedananteṣāṃ brahmaṇe praṇipatya ca

tacchrutvādāya tānbrahmā yayau kailāsaparvatam //
tatra dṛṣṭvā śivaṃ devaiḥ praṇanāma punaḥ punaḥ

tuṣṭāva vividhaistotrairnata skandhaḥ kṛtāñjaliḥ //
jaya deva mahādeva sarvasvāminniti bruvan

brahmovāca //
devadeva mahādeva lokānrakṣākhilānprabho //
upadrutānviṣṇuputraiḥ pātālasthairvikāribhiḥ

nārīṣvamṛtabhūtāsu saṃsaktātmā harirvibho //
pātāle tiṣṭhatīdānīṃ ramate hi vikāravān

nandīśvara uvāca //
itthaṃ bahustutaḥ śambhurbrahmaṇā sarṣinirjaraiḥ //
lokasaṃrakṣaṇārthāya viṣṇorānayanāya ca

tatassa bhagavāñchambhuḥ kṛpāsiṃdhurmaheśvaraḥ //
tadupadravamājñāya vṛṣarūpo babhūva ha

iti śrīśivamahāpurāṇe tṛtīyāyāṃ śatarudrasaṃhitāyāṃ viṣṇūpadravavṛṣāvatāravarṇanaṃ nāma dvāviṃśo'dhyāyaḥ