Shiva Purana · Chapter 3.20

nandīśvara uvāca//
ataḥ paraṃ śruṇu prītyā hanumaccaritammune//
yathā cakārāśu haro līlāstadrūpato varāḥ

cakāra suhitaṃ prītyā rāmasya parameśvarāḥ //
tatsarvaṃ caritaṃ vipra śṛṇu sarvasukhāvaham

/
ekasminsamaye śambhuradbhutotikaraḥ prabhuḥ //
dadarśa mohinīrūpaṃ viṣṇossa hi vasadguṇaḥ?

cakre svaṃ kṣubhitaṃ śambhuḥ kāmabāṇahato yathā //
svamvīryampātayāmāsa rāmakāryārthamīśvaraḥ

tadvīryaṃ sthāpayāmāsuḥ patre saptarṣayaśca te //
preritā manasā tena rāmakāryārthamādarāta

tairgautamasutāyāṃ tadvīryaṃ śambhormaharṣibhiḥ//
karṇadvārā tathāṃjanyāṃ rāmakāryārthamāhitam

tataśca samaye tasmāddhanūmāniti nāmabhāk //
śambhurjajñe kapitanurmahābalaparākramaḥ

hanūmānsa kapīśānaḥ śiśureva mahābalaḥ //
ravibimbaṃ babhakṣāśu jñātvā laghuphalamprage

devaprārthanayā taṃ so'tyajajjñātvā mahābalam //
śivāvatāraṃ ca prāpa varāndattānsurarṣibhiḥ

svajananyantikamprāgādatha sotipraharṣitaḥ //
hanūmānsarvamācakhyau tasyai tadvṛttamādarāt

tadājñayā tato dhīrassarvavidyāmayatnataḥ //
sūryātpapāṭha sa kapirgatvā nityaṃ tadāntikam

sūryājñayā tadaṃśatya sugrīvasyāntikaṃ yayau//
māturājñāmanuprāpya rudrāṃśaḥ kapisattamaḥ

jyeṣṭhabhrātrā vālinā hi svastrībhoktrā tiraskṛtaḥ //
ṛṣyamṛkagirau tena nyavasatsa hanūmatā

tato'bhūtsa sukaṇṭhasya mantrī kapivarassudhīḥ //
sarvathā suhitaṃ cakre sugrīvasya harāṃśajaḥ

tatrāgatena sabhrātrā hṛtabhāryeṇa duḥkhinā //
kārayāmāsa rāmeṇa tasya sakhyaṃ sukhāvaham

ghātayāmāsa rāmaśca vālinaṃ kapikuñjaram //
bhrātṛpatnyāśca bhoktāraṃ pāpinamvīramāninam

tato rāmā''jñayā tāta hanūmānvānareśvaraḥ //
sa sītānveṣaṇañcakre bahubhirvānaraissudhīḥ

jñātvā laṅkāgatāṃ sītāṃ gatastatra kapīśvaraḥ //
drutamullaṃghya siṃdhuntamanistīryyaṃ paraissa vai

cakre'dbhutacaritraṃ sa tatra vikramasaṃyutam //
abhijñānandadau prītyā sītāyai svaprabhorvaram

sītāśokaṃ jahārāśu sa vīraḥ kapināyakaḥ //
śrāvayitvā rāmavṛttaṃ tatprāṇāvanakārakam

tadabhijñānamādāya nivṛtto rāmasannidhim//
rāvaṇā''rāmamāhatya jaghāna bahurākṣasān

tadeva rāvaṇasutaṃ hatvā sabahurākṣasam //
sa mahopadravaṃ cakre mahotistatra nirbhayaḥ

yadā dagdho rāvaṇenāvaguṃṭhya vasanāni ca //
tailābhyaktāni sudṛḍhaṃ mahābalavatā mune

//
utplutyotplutya ca tadā mahādevāṃśajaḥ kapiḥ //
dadāha laṃkāṃ nikhilāṃ kṛtvā vyājantameva hi

dagdhvā laṃkāṃ vaṃcayitvā vibhīṣaṇagṛhaṃ tataḥ //
apatadvāridhau vīrastatassa kapikuñjaraḥ

svapucchaṃ tatra nirvāpya prāpa tasya parantaṭam //
akhinnassa yayau rāmasannidhiṃ giriśāṃśajaḥ

avilaṃbena sujavo hanūmān kapisattamaḥ //
rāmopakaṇṭhamāgatya dadau sītāśiromaṇim

tatastadājñayā vīrassindhau setumabandhayat //
vānarassa samānīya bahūngirivarānbalī

gatvā tatra tato rāmastartukāmo yathā tataḥ //
śivaliṃgaṃ samānarca pratiṣṭhāpya jayepsayā

tadvarātsa jayaṃ prāpya varaṃ tīrtvodadhiṃ tataḥ //
laṃkāmāvṛtya kapibhī raṇaṃ cakre sa rākṣasaiḥ

jaghānāthāsurānvīro rāmasainyaṃ rarakṣa saḥ //
śaktikṣataṃ lakṣmaṇaṃ ca saṃjīvinyā hyajīvayat

sarvathā sukhinaṃ cakre sarāmaṃ lakṣmaṇaṃ hi saḥ //
sarvasainyaṃ rarakṣāsau mahādevātmajaḥ prabhuḥ

rāvaṇaṃ parivārāḍhyaṃ nāśayāmāsa viśramaḥ //
sukhīcakāra devānsa mahābalagrahaḥ kapi

mahīrāvaṇasaṃjñaṃ sa hatvā rāmaṃ salakṣmaṇam //
tatsthānādānayāmāsa svasthānamparipālya ca

rāmakāryaṃ cakārāśu sarvathā kapipuṃgavaḥ //
asurānnamayāmāsa nānālīlāṃ cakāra ca

sthāpayāmāsa bhūloke rāmabhaktiṃ kapīśvaraḥ//
svayaṃ bhaktavaro bhūtvā sītārāmasukhapradaḥ

lakṣmaṇaprāṇadātā ca sarvadevamadāpahaḥ //
rudrāvatāro bhagavānbhaktoddhārakarassa vai

hanumānsa mahāvīro rāmakāryakarassadā//
rāmadūtābhidho loke daityaghno bhaktavatsalaḥ

iti te kathitaṃ tāta hanumaccaritamvaram//
dhanyaṃ yaśasyamāyuṣyaṃ sarvakāmaphalapradam

ya idaṃ śṛṇuyādbhaktyā śrāvayedvā samāhitaḥ//
sa bhuktvehākhilānkāmānante mokṣaṃ labhetparam

iti śrīśivamahāpurāṇe tṛtīyāyāṃ śatarudrasaṃhitāyāṃ hanumadavatāracaritravarṇanaṃ nāma viṃśo'dhyāyaḥ