Shiva Purana · Chapter 2.5.52

sanatkumāra uvāca //
śṛṇuṣvānyaccaritraṃ ca śivasya paramātmanaḥ //
bhaktavātsalyasaṃgarbhi paramānandadāyakam

purā bāṇāsuro nāma daivadoṣācca garvitaḥ //
kṛtvā tāṃḍavanṛtyaṃ ca toṣayāmāsa śaṃkaram

jñātvā saṃtuṣṭamanasaṃ pārvatīvallabhaṃ śivam //
uvāca cāsuro bāṇo nataskandhaḥ kṛtāṃjaliḥ

bāṇa uvāca//
devadeva mahādeva sarvadevaśiromaṇe //
tvatprasādādbalī cāhaṃ śṛṇu me paramaṃ vacaḥ

dossahasraṃ tvayā dattaṃ paraṃ bhārāya me'bhavet //
trilokyāṃ pratiyoddhāraṃ na labhe tvadṛte samam

he deva kimanenāpi sahasreṇa karomyaham //
bāhūnāṃ giritulyānāṃ vinā yuddhaṃ vṛṣadhvaja

kaḍūṃtyā nibhṛtaidoṃrbhiryuyutsurdiggajānaham //
purāṇyācūrṇayannadrīnbhītāstepi pradudruvuḥ

mayā yamaḥ kṛto yoddhā vahniśca kṛtako mahān//
varuṇaścāpi gopālo gavāṃ pālayitā tathā

gajādhyakṣaḥ kuberastu sairandhrī cāpi nirṛtiḥ//
jitaścākhaṃḍalo loke karadāyī sadā kṛtaḥ

yuddhasyāgamanaṃ brūhi yatraite bāhavo mama //
śatruhastaprayuktaśca śastrāstrairjarjarīkṛtāḥ

pataṃtu śatruhastādvā pātayantu sahasradhā //
etanmanorathaṃ me hi pūrṇaṃ kuru maheśvara

sanatkumāra uvāca //
tacchrutvā kupito rudrastvaṭṭahāsaṃ mahādbhutam//
kṛtvā'bravīnmahāmanyurbhaktabādhā'pahārakaḥ

rudra uvāca //
dhigdhiktvāṃ sarvato garvinsarvadaityakulādhama //
baliputrasya bhaktasya nocitaṃ vaca īdṛśam

darpasyāsya praśamanaṃ lapsyase cāśu dāruṇam //
mahāyuddhamakasmādvai balinā matsamena hi

tatra te girisaṃkāśā bāhavo'nalakāṣṭhavat //
chinnā bhūmau patiṣyaṃti śastrāstraiḥ kadalīkṛtāḥ

yadeṣa mānuṣaśiro mayūrasahito dhvajaḥ//
vidyate tava duṣṭātmaṃstasya syātpatanaṃ yadā

sthāpitasyāyudhāgāre vinā vātakṛtaṃ bhayam //
tadā yuddhaṃ mahāghoraṃ saṃprāptamiti cetasi

nidhāya ghoraṃ saṃgrāmaṃ gacchethāḥ sarvasainyavān //
sāṃprataṃ gaccha tadveśma yatastadvidyate śivaḥ

tathā tānsvamahotpātāṃstatra draṣṭāsi durmate //
ityuktvā virarāmātha garvahṛdbhaktavatsalaḥ

sanatkumāra uvāca //
tacchrutvā rudramabhyarcya divyairajaṃlikuḍmalaiḥ//
praṇamya ca mahādevaṃ bāṇaśca svagṛhaṃ gataḥ

kuṃbhāṇḍāya yathāvṛttaṃ pṛṣṭaḥ provāca harṣitaḥ //
paryaikṣiṣṭāsuro bāṇastaṃ yogaṃ hyutsukassadā

atha daivātkadācitsa svayaṃ bhagnaṃ dhvajaṃ ca tam //
dṛṣṭvā tatrāsuro bāṇo hṛṣṭo yuddhāya niryayau

sa svasainyaṃ samāhūya saṃyuktaḥ sāṣṭabhirgaṇaiḥ //
iṣṭiṃ sāṃgrāmikāṃ kṛtvā dṛṣṭvā sāṃgrāmikaṃ madhu

kakubhāṃ maṃgalaṃ sarvaṃ saṃprekṣya prasthito'bhavat //
mahotsāho mahāvīro baliputro mahārathaḥ

iti hṛtkamale kṛtvā kaḥ kasmādāgamiṣyati //
yoddhā raṇapriyo yastu nānāśastrāstrapāragaḥ

yastu bāhusahasraṃ me chinattvanalakāṣṭhavat //
tathā śastrairmahātīkṣṇaiścchinadmi śataśastviha

etasminnaṃtare kālaḥ saṃprāptaśśaṃkareṇa hi //
yatra sā bāṇaduhitā sujātā kṛtamaṃgalā

mādhavaṃ mādhave māsi pūjayitvā mahāniśi //
suptā cāṃtaḥ pure gupte strībhāvamupalaṃbhitā

gauryā saṃpreṣitenāpi vyākṛṣṭā divyamāyayā //
kṛṣṇātmajātmajenātha rudaṃtī sā hyanāthavat

sa cāpi tāṃ balādbhuktvā pārvatyāḥ sakhibhiḥ punaḥ //
nītastu divyayogena dvārakāṃ nimiṣāṃtarāt

mṛditā sā tadotthāya rudaṃtī vividhā giraḥ //
sakhībhyaḥ kathayitvā tu dehatyāge kṛtakṣaṇā

sakhyā kṛtātmano doṣaṃ sā vyāsa smāritā punaḥ//
sarvaṃ tatpūrvavṛttāṃtaṃ tato dṛṣṭvā ca sā bhavat

abravīccitralekhāṃ ca tato madhurayā girā //
ūṣā bāṇasya tanayā kuṃbhāṃḍatanayāṃ mune

ūṣovāca //
sakhi yadyeṣa me bhartā pārvatyā vihitaḥ purā //
kenopāyena te guptaḥ prāpyate vidhivanmayā

kasminkule sa vā jāto mama yena hṛtaṃ manaḥ //
ityuṣāvacanaṃ śrutvā sakhī provāca tāṃ tadā

citralekhovāca //
tvayā svapne ca yo dṛṣṭaḥ puruṣo devi taṃ katham //
ahaṃ saṃmānayiṣyāmi na vijñātastu yo mama

daityakanyā tadukte tu rāgāṃdhā maraṇotsukā //
rakṣitā ca tayā sakhyā prathame divase tataḥ

punaḥ provāca soṣā vai citralekhā mahāmatiḥ //
kuṃbhāṃḍasya sutā bāṇatanayāṃ munisattama /३८//
citralekhovāca //
vyasanaṃ te'pakarṣāmi trilokyāṃ yadi bhāṣyate//
samāneṣye naraṃ yaste manohartā tamādiśa

sanatkumāra uvāca //
ityuktvā vastrapuṭake devāndaityāṃśca dānavān //
gandharvasiddhanāgāṃśca yakṣādīṃśca tathālikhat

tathā narāṃsteṣu vṛṣṇīñśūramānakaduṃdubhim //
vyalikhadrāmakṛṣṇau ca pradyumnaṃ narasattamam

aniruddhaṃ vilikhitaṃ prādyumniṃ vīkṣya lajjitā //
āsīdavāṅmukhī coṣā hṛdaye harṣapūritā

ūṣā provāca cauro'sau mayā prāptastu yo niśi //
puruṣaḥ sakhi yenāśu cetoratnaṃ hṛtaṃ mama

yasya saṃsparśanādeva mohitāhaṃ tathābhavam //
tamahaṃ jñātumicchāmi vada sarvaṃ ca bhāmini

kasyāyamanvaye jāto nāma kiṃ cāsya vidyate //
ityuktā sābravīnnāma yoginī tasya cānvayam

sarvamākarṇya sā tasya kulādi munisattama //
utsukā bāṇatanayā babhāṣe sā tu kāminī

ūṣovāca //
upāyaṃ racaya prītyā tatprāptyai sakhi tatkṣaṇāt //
yenopāyena taṃ kāṃtaṃ labheyaṃ prāṇavallabham

yaṃ vināhaṃ kṣaṇaṃ naikaṃ sakhi jīvitumutsahe //
tamānayeha sadyatnātsukhinīṃ kuru māṃ sakhi

sanatkumāra uvāca //
ityuktā sā tathā bāṇātmajayā maṃtrikanyakā //
vismitābhūnmuniśreṣṭha suvicāraparā'bhavat

tatassakhīṃ samābhāṣya citralekhā manojavā //
buddhvā taṃ kṛṣṇapautraṃ sā dvārakāṃ gaṃtumudyatā

jyeṣṭhakṛṣṇacaturdaśyāṃ tṛtīye tu gate'hani //
āprabhātānmuhūrte tu saṃprāptā dvārakāṃ purīm

ekena kṣaṇamātreṇa nabhasā divyayoginī //
tataścāṃtaḥpurodyāne prādyumnirdadṛśe tayā

krīḍannārījanaissārddhaṃ prapibanmādhavī madhu //
sarvāṃgasundaraḥ śyāmaḥ susmito navayauvanaḥ

tataḥ khaṭvāṃ samārūḍhamaṃdhakārapaṭena sā //
ācchādayitvā yogena tāmasena ca mādhavam

tatassā mūrdhni tāṃ khaṭvāṃ gṛhītvā nimiṣāṃtarāt //
saṃprāptā śoṇitapuraṃ yatra sā bāṇanaṃdinī

kāmārtā vividhānbhāvāñcakāronmattamānasā //
ānītamatha taṃ dṛṣṭvā tadā bhītā ca sābhavat

aṃtaḥpure sugupte ca nave tasminsamāgame //
yāvatkrīḍitumārabdhaṃ tāvajjñātaṃ ca tatkṣaṇāt

aṃtaḥpuradvāragatairvetrajarjarapāṇibhiḥ //
iṃgitairanumānaiśca kanyādauḥśīlyamācaran

sa cāpi dṛṣṭastaistatra naro divyavapurdharaḥ //
taruṇo darśanīyastu sāhasī samarapriyaḥ

taṃ dṛṣṭvā sarvamācakhyurbāṇāya balisūnave //
puruṣāste mahāvīrāḥ kanyāntaḥpurarakṣakāḥ

dvārapālā ūcuḥ //
deva kaścinna jānīte guptaścāṃtaḥpure balāt //
sa kastu tava kanyāṃ vai svayaṃgrāhādadharṣayat

dānavendra mahābāho paśyapaśyainamatra ca //
yadyuktaṃ syāttatkuruṣva na duṣṭā vayamityuta

sanatkumāra uvāca //
teṣāṃ tadvacanaṃ śrutvā dānavendro mahābalaḥ //
vismitobhūnmuniśreṣṭha kanyāyāḥ śrutadūṣaṇaḥ

iti śrīśivamahāpurāṇe dvitīyāyāṃ rudrasaṃhi tāyāṃ paṃcame yuddhakhaṇḍe ūṣācaritravarṇanaṃ nāma dvipañcāśattamo'dhyāyaḥ