Shiva Purana · Chapter 2.4.20

//brahmovāca//
etasminnaṃtare tatra viśvarūpaḥ prajāpatiḥ //
tadudyogaṃ saṃvicārya sukhamāpa prasannadhīḥ

viśvarūpaprajeśasya divyarūpe sute ubhe//
siddhibuddhiriti khyāte śubhe sarvāṃgaśobhane

tābhyāṃ caiva gaṇeśasya girijā śaṃkaraḥ prabhū //
mahotsavaṃ vivāhaṃ ca kārayāmāsaturmudā

saṃtuṣṭā devatāssarvāstadvivāhe samāgaman //
yathā caiva śivasyaiva girijāyā manorathaḥ

tathā ca viśvakarmā'sau vivāhaṃ kṛtavāṃstathā //
tathā ca ṛṣayo devā lebhire paramāṃ mudam

gaṇeśopi tadā tābhyāṃ sukhaṃ caivāpticiṃtakam //
prāptavāṃśca mune tattu varṇituṃ naiva śakyate

kiyatā caiva kālena gaṇeśasya mahātmanaḥ //
dvayoḥ patnyośca dvau divyau tasya putrau babhūvatuḥ

siddhergaṇeśapatnyāstu kṣemanāmā suto'bhavat //
buddherlābhābhidhaḥ putro hyāsītparabhaśobhanaḥ

evaṃ sukhamaciṃtyaṃ va bhuṃjāne hi gaṇeśvare //
ājagāma dvitīyaśca krāṃtvā pṛthvīṃ sutastadā

tāvaśca nāradenaiva prāpto gehe mahātmanā//
yathārthaṃ vacmi no'satyaṃ na chalena na matsarāt

pitṛbhyāṃ tu kṛtaṃ yacca śivayā śaṃkareṇa te //
tanna kuryyātparo loke satyaṃ satyaṃ bravīmyaham

niṣkāsya tvāṃ kukramaṇaṃ miṣamutpādya yatnataḥ //
gaṇeśasya varokāri vivāhaḥ paraśobhanaḥ

gaṇeśasya kṛtodvāho labdhavāṃsstrīdvayaṃ mudā //
viśvarūpaprajeśasya kanyāratnaṃ mahottamam

putradvayaṃ lalābhāsau dvayoḥ patnyośśubhāṃgayoḥ //
siddhe kṣemaṃ tathā buddherlābhaṃ sarvaṃ sukhapradam

patnyordvayorgaṇeśo'sau labdhvā putradvayaṃ śubham //
mātāpitrormatenaiva sukhaṃ bhuṃkte niraṃtaram

bhavatā pṛthivī krāṃtā sasamudrā sakānanā//
tacchalājñāvaśāttāta tasya jātaṃ phalaṃ tvidam

pitṛbhyāṃ kriyatāsmaivacchalaṃ tāta vicāryatām //
svasvāmibhyāṃ viśeṣeṇa hyanyaḥ kinna karoti vai

asamyakca kṛtaṃ tābhyāṃ tvatpitṛbhyāṃ hi karma ha //
vicāryatāṃ tvayā'pīha maccitte na śubhaṃ matam

dadyādyadi garaṃ mātā vikrīṇīyātpitā yadi //
rājā harati sarvasvaṃ kasmai kiṃ ca bravītu vai

yenaivedaṃ kṛtaṃ syādvai karmānarthakaraṃ param //
śāṃtikāmassudhīstāta tanmukhaṃ na vilokayet

iti nītiḥ śrutau proktā smṛtau śāstreṣu sarvataḥ //
niveditā ca sā te'dya yathecchasi tathā kuru

brahmovāca //
ityuktvā nārada tvaṃ tu maheśvaramanogatiḥ //
tasmai tathā kumārāya vākyaṃ maunamupāgataḥ

skando'pi pitaraṃ natvā kopāgnijvalitastadā //
jagāma parvataṃ krauṃcaṃ pitṛbhyāṃ vārito'pi san

vāraṇe ca kṛte tvadya gamyate ca kathaṃ tvayā //
ityevaṃ ca niṣiddhopi procya neti jagāma saḥ

na sthātavyaṃ mayā tātau kṣaṇamapyatra kiṃcana //
yadyevaṃ kapaṭaṃ prītimapahāya kṛtaṃ mayi

evamuktvā gatastatra mune so'dyāpi vartate //
darśanenaiva sarveṣāṃ lokānāṃ pāpahārakaḥ

taddinaṃ hi samārabhya kārtikeyasya tasya vai //
śivaputrasya devarṣe kumāratvaṃ pratiṣṭhitam

tannāma śubhadaṃ loke prasiddhaṃ bhuvanatraye //
sarvapāpaharaṃ puṇyaṃ brahmacaryapradaṃ param

kārtikyāṃ ca sadā devā ṛṣayaśca satīrthakāḥ//
darśanārthaṃ kumārasya gacchaṃti ca munīśvarāḥ

kārtikyāṃ kṛttikāsaṃge kuryādyaḥ svāmidarśanam//
tasya pāpaṃ dahetsarvaṃ cittepsita phalaṃ labhet

umāpi duḥkhamāpannā skandasya virahe sati //
uvāca svāminaṃ dīnā tatra gaccha mayā prabho

tatsukhārthaṃ svayaṃ śaṃbhurgatassvāṃśena parvate //
mallikārjunanāmāsījjyotirliṅgaṃ sukhāvaham

adyāpi dṛśyate tatra śivayā sahitaśśivaḥ //
sarveṣāṃ nijabhaktānāṃ kāmapūrassatāṃ gatiḥ

tamāgataṃ sa vijñāya kumārassaśivaṃ śivam //
sa virajya tato'nyatra gaṃtumāsītsamutsukaḥ

devaiśca munibhiścaiva prārthitassopi dūrataḥ //
yojanatrayamutsṛjya sthitaḥ sthāne ca kārtikaḥ

putrasnehāturau tau vai śivau parvaṇi parvaṇi //
darśanārthaṃ kumārasya tasya nārada gacchataḥ

amāvāsyādine śaṃbhuḥ svayaṃ gacchati tatra ha //
pūrṇamāsī dine tatra pārvatī gacchati dhruvam

yadyattasya ca vṛttāṃtaṃ bhavatpṛṣṭaṃ munīśvara //
kārtikasya gaṇeśasya paramaṃ kathitaṃ mayā

etacchrutvā naro dhīmān sarvapāpaiḥ pramucyate //
śobhanāṃ labhate kāmānīpsitānsakalānsadā

yaḥ paṭhetpāṭhayedvāpi śṛṇuyācchrāvayettathā //
sarvānkāmānavāpnoti nātra kāryā vicāraṇā

brāhmaṇo brahmavarcasvī kṣatriyo vijayī bhavet //
vaiśyo dhana samṛddhassyācchūdrassatsamatāmiyāt

rogī rogātpramucyeta bhayānmucyeta bhītiyuk //
bhūtapretādibādhābhyaḥ pīḍito na bhavennaraḥ

etadākhyānamanaghaṃ yaśasyaṃ sukhavarddhanam //
āyuṣyaṃ svargyamatulaṃ putrapautrādikārakam

apavargapradaṃ cāpi śivajñānapradaṃ param //
śivāśivaprītikaraṃ śivabhaktivivarddhanam

śravaṇīyaṃ sadā bhaktairniḥkāmaiśca mumukṣubhiḥ //
śivādvaitapradaṃ caitatsadāśivamayaṃ śivam

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe gaṇeśavivāhavarṇanaṃ nāma viṃśo'dhyāyaḥ

samāptoyaṃ rudrasaṃhitāntargataḥ kumārakhaṇḍaścaturthaḥ