Shiva Purana · Chapter 2.4.1

// śrīgaṇeśāya namaḥ //
// śrīgaurīśaṃkarābhyāṃ namaḥ //
atha rudrasaṃhitāṃtargataścaturthaḥ kumārakhaṇḍaḥ prārabhyate //
vande nandanatuṣṭamāna samati premapriyaṃ premadaṃ pūrṇaṃ pūrṇakaraṃ prapūrṇanikhilaiśvaryaikavāsaṃ śivam//
satyaṃ satyamayaṃ trisatyavibhavaṃ satyapriyaṃ satyadaṃ viṣṇubrahmanutaṃ svakīyakṛpayopāttākṛtiṃ śaṃkaram

// nārada uvāca //
vivāhayitvā girijāṃ śaṃkaro lokaśaṃkaraḥ //
gatvā svaparvataṃ brahman kimakārṣiddhi tadvada

kathaṃ hi tanayo jajñe śivasya paramātmanaḥ //
yadarthamātmārāmo'pi samuvāha śivāṃ prabhuḥ

tārakasya kathaṃ brahman vadho'bhūddevaśaṃkaraḥ //
etatsarvamaśeṣeṇa vada kṛtvā dayāṃ mayi

sūta uvāca //
ityākarṇya vacastasya nāradasya prajāpatiḥ //
suprasannamanāḥ smṛtvā śaṃkaraṃ pratyuvāca ha

brahmovāca //
caritaṃ śṛṇu vakṣyāmi śaśimaulestu nārada //
guhajanmakathāṃ divyāṃ tārakāsurasadvadham

śrūyatāṃ kathayāmyadya kathāṃ pāpapraṇāśinīm //
yāṃ śrutvā sarvapāpebhyo mucyate mānavo dhruvam

idamākhyānamanaghaṃ rahasyaṃ paramādbhutam //
pāpasaṃtāpaharaṇaṃ sarvavighnavināśanam

sarvamaṃgaladaṃ sāraṃ sarvaśrutimanoharam //
sukhadaṃ mokṣabījaṃ ca karmamūlanikṛṃtanam

kailāsamāgatya śivāṃ vivāhya śobhāṃ prapede nitarāṃ śivo'pi //
vicārayāmāsa ca devakṛtyaṃ pīḍāṃ janasyāpi ca devakṛtye

śivassa bhagavān sākṣātkailāsamagamadyadā //
saukhyaṃ ca vividhaṃ cakrurgaṇāssarve suharṣitāḥ //

mahotsavo mahānāsīcchive kailāsamāgate //
devāssvaviṣayaṃ prāptā harṣanirbharamānasāḥ

atha śaṃbhurmahādevo gṛhītvā girijāṃ śivām //
jagāma nirjanaṃ sthānaṃ mahādivyaṃ manoharam

śayyāṃ ratikarīṃ kṛtvā puṣpacandanacarcitām //
adbhutāṃ tatra paramāṃ bhogavastvanvitāṃ śubhām

sa reme tatra bhagavāñśaṃbhugirijayā saha //
sahasravarṣaparyantaṃ devamānena mānadaḥ

durgāṃgasparśamātreṇa līlayā mūrcchitaḥ śivaḥ //
mūrcchitā sā śivasparśādbubudhe na divāniśam

hare bhogapravṛtte tu lokadharma pravartini //
mahān kālo vyatīyāya tayoḥ kṣaṇa ivānagha

atha sarve surāstāta ekatrībhūya caikadā //
maṃtrayāṃcakrurāgatya merau śakrapurogamāḥ

surā ūcuḥ //
vivāhaṃ kṛtavāñchaṃbhurasmatkāryārthamīśvaraḥ//
yogīśvaro nirvikāro svātmārāmo niraṃjanaḥ

notpannastanayastasya na jānāmo'tra kāraṇam//
vilaṃbaḥ kriyate tena kathaṃ deveśvareṇa ha

etasminnaṃtare devā nāradāddevadarśanāt //
bubudhustanmitaṃ bhogaṃ tayośca ramamāṇayoḥ

ciraṃ jñātvā tayorbhogaṃ ciṃtāmāpussurāśca te//
brahmāṇaṃ māṃ puraskṛtya yayurnārāyaṇāṃtikam

taṃ natvā kathitaṃ sarvaṃ mayā vṛttāṃtamīpsitam //
santasthire sarvadevā citre puttalikā yathā

brahmovāca//
sahasravarṣa paryyantaṃ devamānena śaṃkaraḥ //
ratau rataśca niśceṣṭo yogī viramate na hi

//
bhagavānuvāca //
cintā nāsti jagaddhātassarvaṃ bhadraṃ bhaviṣyati //
śaraṇaṃ vraja deveśa śaṃkarasya mahāprabhoḥ

maheśaśaraṇāpannā ye janā manasā mudā //
teṣāṃ prajeśabhaktānāṃ na kutaścidbhayaṃ kvacit

śṛṃgārabhaṃgassamaye bhavitā nādhunā vidhe //
kālaprayuktaṃ kāryaṃ ca siddhiṃ prāpnoti nānyathā

śambhossambhogamiṣṭaṃ ko bhedaṃ kartumiheśvaraḥ //
pūrṇe varṣasahasre ca svecchayā hi viraṃsyati

strīpuṃso rativicchedamupāyena karoti yaḥ //
tasya strīputrayorbhedo bhavejjanmani janmani

bhraṣṭajñāno naṣṭakīrttiralakṣmīko bhavediha //
prayātyaṃte kālasūtra varṣalakṣaṃ sa pātakī

raṃbhāyuktaṃ śakramimaṃ cakāra virataṃ ratau //
mahāmunīndro durvāsāstatstrībhedo babhūva ha

punaranyāṃ sa saṃprāpya viṣevya śubhapāṇikām //
divyaṃ varṣasahasraṃ ca vijahau virahajvaram

ghṛtācyā saha saṃśliṣṭaṃ kāmaṃ vāritavān guruḥ //
ṣaṇmāsābhyaṃtare candrastasya patnīṃ jahāra ha

punaśśivaṃ samārādhya kṛtvā tārāmayaṃ raṇam //
tārāṃ sagarbhāṃ saṃprāpya vijahau virahajvaram //३४
mohinīsahitaṃ candraṃ cakāra virataṃ ratau //
maharṣirgautamastasya strīvicchedo babhūva ha

hariścandro hālikaṃ ca vṛṣalyāsaha saṃyutam //
cārayāmāsa niśceṣṭaṃ nirjanaṃ tatphalaṃ śṛṇu

bhraṣṭaḥ strīputrarājyebhyo viśvāmitreṇa tāḍitaḥ //
tataśśivaṃ samārādhya mukto bhūto hi kaśmalāt

ajāmilaṃ dvijaśreṣṭhaṃ vṛṣalyā saha saṃyutam //
na bhiyā vārayāmāsussurāstāṃ cāpi kecana

sarvaṃ niṣekasādhyaṃ ca niṣeko balavān vidhe //
niṣekaphalado vai sa niṣekaḥ kena vāryyate

divyaṃ varṣasahasraṃ ca śaṃbhoḥ saṃbhogakarma tat //
pūrṇe varṣasahasre ca gatvā tatra sureśvarāḥ

yena vīryaṃ patedbhūmau tat kariṣyatha niścitam //
tatra vīryye ca bhavitā skandanāmā prabhossutaḥ

adhunā svagṛhaṃ gaccha vidhe suragaṇaissaha //
karotu śaṃbhussaṃbhogaṃ pārvatyā saha nirjane

brahmovāca //
ityuktvā kamalākāntaḥ śīghraṃ svantaḥ puraṃ yayau //
svālayaṃ prayayurdevā mayā saha munīśvara

śaktiśaktimatoścā'tha vihāreṇā'ti ca kṣitiḥ //
bhārākrāṃtā cakaṃpe sā saśeṣā'pi sakacchapā

kacchapasya hi bhāreṇa sarvādhārassamīraṇaḥ //
staṃbhito'tha trilokāśca babhūvurbhayavihvalāḥ

atha sarve mayā devā hareśca śaraṇaṃ yayuḥ //
sarvaṃ nivedayāṃcakrustadvṛttaṃ dīnamānasāḥ

devā ūcuḥ //
devadeva ramānātha sarvā'vanakara prabhoḥ //
rakṣa naḥ śaraṇāpannān bhayavyākulamānasān

staṃbhitastrijagatprāṇo na jāne kena hetunā //
vyākulaṃ munibhirlekhaistrailokyaṃ sacarācaram

// brahmovāca //
ityuktvā sakalā devā mayā saha munīśvara //
dīnāstasthuḥ puro viṣṇormaunībhūtāssu duḥkhitāḥ

tadākarṇya samādāya surānnaḥ sakalān hariḥ //
jagāma parvataṃ śīghraṃ kailāsaṃ śivavallabham

tatra gatvā harirdevairmayā ca suravallabhaḥ //
yayau śivavarasthānaṃ śaṃkaraṃ draṣṭukāmyayā

tatra dṛṣṭvā śivaṃ viṣṇurnasurairvismito'bhavat //
tatra sthitāñ śivagaṇān papraccha vinayānvitaḥ

viṣṇuruvāca //
he śaṃkarāḥ śivaḥ kutra gatassarvaprabhurgaṇāḥ //
nivedayata naḥ prītyā duḥkhitānvai kṛpālavaḥ

brahmovāca //
ityākarṇya vacastasya sāmarasya harerguṇāḥ //
procuḥ prītyā gaṇāste hi śaṃkarasya ramāpatim

śivagaṇā ūcuḥ //
hare śṛṇu śivaprītyā yathārthaṃ brūmahe vayam //
brahmaṇā nirjaraissārddhaṃ vṛttāntamakhilaṃ ca yat

sarveśvaro mahādevo jagāma girijālayam //
saṃsthāpya no'tra suprītyā rānālīlāviśāradaḥ

tadguhābhyantare śaṃbhuḥ kiṃ karoti maheśvaraḥ //
na jānīmo ramānātha vyatīyurbahavassamāḥ

// brahmovāca//
śrutveti vacanaṃ teṣāṃ sa viṣṇussāmaro mayā //
vismito'ti muniśreṣṭha śivadvāraṃ jagāma ha

tatra gatvā mayā devaissa harirdevavallabhaḥ//
ārtavāṇyā mune proce tārasvaratayā tadā

śaṃbhumastaunmahāprītyā sāmaro hi mayā hariḥ //
tatra sthito muniśreṣṭha sarvalokaprabhuṃ haram

// viṣṇuruvāca //
kiṃ karoṣi mahādevā'bhyantare parameśvara //
tārakārtānsurānsarvānpāhi naḥ śaraṇāgatān

ityādi saṃstuvañ śaṃbhuṃ bahudhā somarairmayā //
rurodāti haristatra tārakārtairmunīśvara

duḥkhakolāhalastatra babhūva tridivaukasām //
miśritaśśiva saṃstutyā'surārttānāṃ munīśvara

iti śrīśivamahāpurāṇe rudrasaṃhitāyāṃ kumārakhaṇḍe śivavihāravarṇanaṃ nāma prathamo'dhyāyaḥ