Shiva Purana · Chapter 2.3.55

brahmovāca //
atha sā brāhmaṇī devyai śikṣayitvā vratañca tat //
provāca menāmāmantrya yātrāmasyāśca kāraya

tathāstviti ca samprocya premavaśyā babhūva sā //
dhṛtindhṛtvāhūya kālīṃ viśleṣavirahā kulā

atyuccai rodanaṃ cakre saṃśliṣya ca punaḥ punaḥ //
pārvatyapi rurodoccairuccarantī kṛpāvacaḥ

śailapriyā śivā cāpi mūrcchāmāpa śucārditā//
mūrcchāmprāpurdevapatnyaḥ pārvatyā rodanena ca

sarvāśca rurudurnāryyassarvamāsīdacetanam //
svayaṃ ruroda yogīśo gacchankonya paraḥ prabhuḥ

etasminnantare śīghramājagāma himālayaḥ //
sasarvatanayastatra sacivaiśca dvijaiḥ paraiḥ

svayaṃ ruroda mohena vatsāṃ kṛtvā svavakṣasi //
kva yāsītyevamuccārya śūnyaṃ kṛtvā muhurmuhuḥ

tataḥ purohito viprairadhyātmavidyayā sukham //
sarvānprabodhayāmāsa kṛpayā jñānavattaraḥ

nanāma pārvatī bhaktyā mātarampitaraṃ gurum //
mahāmāyā bhavācārādrurodoccairmuhurmuhuḥ

pārvatyā rodanenaiva rurudussarvayoṣitaḥ //
nitarāṃ jananī menā yāmayo bhrātarastathā

punaḥ punaḥ śivāmātā yāmayo'nyāśca yoṣitaḥ //
bhrātaro janakaḥ premṇā rurudurbaddhasauhṛdāḥ

tadā viprāḥ samāgatya bodhayāmāsurādarāt //
lagnannivedayāmāsuryātrāyāssukhadamparam

tato himālayo menāṃ dhṛtvā dhairyyamvivekataḥ //
śibikāmānayāmāsa śivārohaṇahetave

śivāmārohayāmāsustatra viprāṅganāśca tām //
āśiṣampradadussarvāḥ pitā mātā dvijāstathā

mahārājñyupacārām̐śca dadau menā giristathā //
nānādravyasamūhaṃ ca pareṣāndurlabhaṃ śubham

śivā natvā gurūnsarvāñ janakaṃ jananīntathā //
dvijānpurohitaṃ yāmīstrīstathānyā yayau mune

himācalo'pi sasuto'gacchatsnehavaśī budhaḥ //
prāptastatra prabhuryatra sāmaraḥ prītimāvahan

prītyābhirebhire sarve mahotsavapura ssaram //
prabhumpraṇemuste bhaktyā praśaṃsanto'viśanpurīm

jātismarāṃ smārayāmi nityaṃ smarasi cedvada //
līlayā tvāñca deveśi sadā prāṇapriyā mama

brahmovāca //
ityākarṇya maheśasya svanāthasyātha pārvatī //
śaṅkarasya priyā nityaṃ sasmitovāca sā satī

pārvatyuvāca //
sarvaṃ smarāmi prāṇeśa maunī bhūto bhaveti ca //
prastāvocitamadyāśu kāryaṃ kuru namo'stu te

brahmovāca//
ityākarṇya priyāvākyaṃ sudhādhārāśatopamam //
mumude'tīva viśveśo laukikācāratatparaḥ

śivaḥ sambhṛtasambhāro nānāvastumanoharam //
bhojayāmāsa devaśca nārāyaṇapurogamān

tathānyānnikhilānprītyā svavivāhasamāgatān //
bhojayāmāsa surasamannambahuvidhamprabhuḥ

tato bhuktvā ca te devā nānāratna vibhūṣitāḥ //
sastrīkāssagaṇāssarve praṇemuścaṃdraśekharam

saṃstutya vāgbhiriṣṭābhiḥ parikramya mudānvitāḥ //
praśaṃsanto vivāhañca svadhāmāni yayustataḥ

nārāyaṇaṃ mune māṃ ca praṇanāma śivassvayam //
laukikācāramāśritya yathā viṣṇuśca kaśyapam

mayāśliṣyāśiṣandattvā śivasya punaragrataḥ //
matvā vai taṃ paraṃ brahma cakre ca stutiruttamā

tamāmantrya mayā viṣṇussāñjaliśśivayormudā //
praśaṃsaṃstadvivāhañca jagāma svālayamparam

śivo'pi svagirau tasthau pārvatyā viharanmudā //
sarve gaṇāssukhaṃ prāpuratīva svabhajañchivau

ityevaṅka thitastāta śivodvāhassumaṃgalaḥ //
śokaghno harṣajanaka āyuṣyo dhanavarddhanaḥ

ya imaṃ śṛṇuyānnityaṃ śucistadgatamānasaḥ //
śrāvayedvātha niyamācchivalokamavāpnuyāt

idamākhyānamākhyātamadbhutaṃ maṃgalāyanam //
sarvavighnapraśamanaṃ sarvavyādhivināśanam

yaśasyaṃ svargyamāyuṣyaṃ putrapautrakaramparam //
sarvakāmapradaṃ ceha bhuktidaṃ muktidaṃ sadā

apamṛtyupraśamanaṃ mahāśāntikaraṃ śubham //
sarvadussvapnapraśamanaṃ buddhiprajñādisādhanam

śivotsaveṣu sarveṣu paṭhitavyamprayatnataḥ //
śubhepsubhirjanaiḥ prītyā śivasantoṣakāraṇam

paṭhetpratiṣṭhākāle tu devādīnāṃ viśeṣataḥ //
śivasya sarvakāryasya prārambhe ca suprītitaḥ

śṛṇuyādvā śucirbhūtvā caritaṃ śivayośśivam //
sidhyanti sarvakāryāṇi satyaṃ satyaṃ na saṃśayaḥ

iti śrīśivamahāpurāṇe brahmanāradasaṃvāde dvitīyāyāṃ rudrasaṃhitāyāṃ tṛtīye pārvatīkhaṇḍe śivakailāsagamanavarṇanaṃ nāma pañcapañcāśattamo'dhyāyaḥ

samāpto'yaṃ tṛtīyaḥ pārvatīkhaṇḍaḥ