શિવ પુરાણ · અધ્યાય 2.3.55

બ્રહ્મોવાચ ॥
અથ સા બ્રાહ્મણી દેવ્યૈ શિક્ષયિત્વા વ્રતઞ્ચ તત્ ॥
પ્રોવાચ મેનામામન્ત્ર્ય યાત્રામસ્યાશ્ચ કારય

તથાસ્ત્વિતિ ચ સમ્પ્રોચ્ય પ્રેમવશ્યા બભૂવ સા ॥
ધૃતિન્ધૃત્વાહૂય કાલીં વિશ્લેષવિરહા કુલા

અત્યુચ્ચૈ રોદનં ચક્રે સંશ્લિષ્ય ચ પુનઃ પુનઃ ॥
પાર્વત્યપિ રુરોદોચ્ચૈરુચ્ચરન્તી કૃપાવચઃ

શૈલપ્રિયા શિવા ચાપિ મૂર્ચ્છામાપ શુચાર્દિતા॥
મૂર્ચ્છામ્પ્રાપુર્દેવપત્ન્યઃ પાર્વત્યા રોદનેન ચ

સર્વાશ્ચ રુરુદુર્નાર્ય્યસ્સર્વમાસીદચેતનમ્ ॥
સ્વયં રુરોદ યોગીશો ગચ્છન્કોન્ય પરઃ પ્રભુઃ

એતસ્મિન્નન્તરે શીઘ્રમાજગામ હિમાલયઃ ॥
સસર્વતનયસ્તત્ર સચિવૈશ્ચ દ્વિજૈઃ પરૈઃ

સ્વયં રુરોદ મોહેન વત્સાં કૃત્વા સ્વવક્ષસિ ॥
ક્વ યાસીત્યેવમુચ્ચાર્ય શૂન્યં કૃત્વા મુહુર્મુહુઃ

તતઃ પુરોહિતો વિપ્રૈરધ્યાત્મવિદ્યયા સુખમ્ ॥
સર્વાન્પ્રબોધયામાસ કૃપયા જ્ઞાનવત્તરઃ

નનામ પાર્વતી ભક્ત્યા માતરમ્પિતરં ગુરુમ્ ॥
મહામાયા ભવાચારાદ્રુરોદોચ્ચૈર્મુહુર્મુહુઃ

પાર્વત્યા રોદનેનૈવ રુરુદુસ્સર્વયોષિતઃ ॥
નિતરાં જનની મેના યામયો ભ્રાતરસ્તથા

પુનઃ પુનઃ શિવામાતા યામયોઽન્યાશ્ચ યોષિતઃ ॥
ભ્રાતરો જનકઃ પ્રેમ્ણા રુરુદુર્બદ્ધસૌહૃદાઃ

તદા વિપ્રાઃ સમાગત્ય બોધયામાસુરાદરાત્ ॥
લગ્નન્નિવેદયામાસુર્યાત્રાયાસ્સુખદમ્પરમ્

તતો હિમાલયો મેનાં ધૃત્વા ધૈર્ય્યમ્વિવેકતઃ ॥
શિબિકામાનયામાસ શિવારોહણહેતવે

શિવામારોહયામાસુસ્તત્ર વિપ્રાઙ્ગનાશ્ચ તામ્ ॥
આશિષમ્પ્રદદુસ્સર્વાઃ પિતા માતા દ્વિજાસ્તથા

મહારાજ્ઞ્યુપચારાઁશ્ચ દદૌ મેના ગિરિસ્તથા ॥
નાનાદ્રવ્યસમૂહં ચ પરેષાન્દુર્લભં શુભમ્

શિવા નત્વા ગુરૂન્સર્વાઞ્ જનકં જનનીન્તથા ॥
દ્વિજાન્પુરોહિતં યામીસ્ત્રીસ્તથાન્યા યયૌ મુને

હિમાચલોઽપિ સસુતોઽગચ્છત્સ્નેહવશી બુધઃ ॥
પ્રાપ્તસ્તત્ર પ્રભુર્યત્ર સામરઃ પ્રીતિમાવહન્

પ્રીત્યાભિરેભિરે સર્વે મહોત્સવપુર સ્સરમ્ ॥
પ્રભુમ્પ્રણેમુસ્તે ભક્ત્યા પ્રશંસન્તોઽવિશન્પુરીમ્

જાતિસ્મરાં સ્મારયામિ નિત્યં સ્મરસિ ચેદ્વદ ॥
લીલયા ત્વાઞ્ચ દેવેશિ સદા પ્રાણપ્રિયા મમ

બ્રહ્મોવાચ ॥
ઇત્યાકર્ણ્ય મહેશસ્ય સ્વનાથસ્યાથ પાર્વતી ॥
શઙ્કરસ્ય પ્રિયા નિત્યં સસ્મિતોવાચ સા સતી

પાર્વત્યુવાચ ॥
સર્વં સ્મરામિ પ્રાણેશ મૌની ભૂતો ભવેતિ ચ ॥
પ્રસ્તાવોચિતમદ્યાશુ કાર્યં કુરુ નમોઽસ્તુ તે

બ્રહ્મોવાચ॥
ઇત્યાકર્ણ્ય પ્રિયાવાક્યં સુધાધારાશતોપમમ્ ॥
મુમુદેઽતીવ વિશ્વેશો લૌકિકાચારતત્પરઃ

શિવઃ સમ્ભૃતસમ્ભારો નાનાવસ્તુમનોહરમ્ ॥
ભોજયામાસ દેવશ્ચ નારાયણપુરોગમાન્

તથાન્યાન્નિખિલાન્પ્રીત્યા સ્વવિવાહસમાગતાન્ ॥
ભોજયામાસ સુરસમન્નમ્બહુવિધમ્પ્રભુઃ

તતો ભુક્ત્વા ચ તે દેવા નાનારત્ન વિભૂષિતાઃ ॥
સસ્ત્રીકાસ્સગણાસ્સર્વે પ્રણેમુશ્ચંદ્રશેખરમ્

સંસ્તુત્ય વાગ્ભિરિષ્ટાભિઃ પરિક્રમ્ય મુદાન્વિતાઃ ॥
પ્રશંસન્તો વિવાહઞ્ચ સ્વધામાનિ યયુસ્તતઃ

નારાયણં મુને માં ચ પ્રણનામ શિવસ્સ્વયમ્ ॥
લૌકિકાચારમાશ્રિત્ય યથા વિષ્ણુશ્ચ કશ્યપમ્

મયાશ્લિષ્યાશિષન્દત્ત્વા શિવસ્ય પુનરગ્રતઃ ॥
મત્વા વૈ તં પરં બ્રહ્મ ચક્રે ચ સ્તુતિરુત્તમા

તમામન્ત્ર્ય મયા વિષ્ણુસ્સાઞ્જલિશ્શિવયોર્મુદા ॥
પ્રશંસંસ્તદ્વિવાહઞ્ચ જગામ સ્વાલયમ્પરમ્

શિવોઽપિ સ્વગિરૌ તસ્થૌ પાર્વત્યા વિહરન્મુદા ॥
સર્વે ગણાસ્સુખં પ્રાપુરતીવ સ્વભજઞ્છિવૌ

ઇત્યેવઙ્ક થિતસ્તાત શિવોદ્વાહસ્સુમંગલઃ ॥
શોકઘ્નો હર્ષજનક આયુષ્યો ધનવર્દ્ધનઃ

ય ઇમં શૃણુયાન્નિત્યં શુચિસ્તદ્ગતમાનસઃ ॥
શ્રાવયેદ્વાથ નિયમાચ્છિવલોકમવાપ્નુયાત્

ઇદમાખ્યાનમાખ્યાતમદ્ભુતં મંગલાયનમ્ ॥
સર્વવિઘ્નપ્રશમનં સર્વવ્યાધિવિનાશનમ્

યશસ્યં સ્વર્ગ્યમાયુષ્યં પુત્રપૌત્રકરમ્પરમ્ ॥
સર્વકામપ્રદં ચેહ ભુક્તિદં મુક્તિદં સદા

અપમૃત્યુપ્રશમનં મહાશાન્તિકરં શુભમ્ ॥
સર્વદુસ્સ્વપ્નપ્રશમનં બુદ્ધિપ્રજ્ઞાદિસાધનમ્

શિવોત્સવેષુ સર્વેષુ પઠિતવ્યમ્પ્રયત્નતઃ ॥
શુભેપ્સુભિર્જનૈઃ પ્રીત્યા શિવસન્તોષકારણમ્

પઠેત્પ્રતિષ્ઠાકાલે તુ દેવાદીનાં વિશેષતઃ ॥
શિવસ્ય સર્વકાર્યસ્ય પ્રારમ્ભે ચ સુપ્રીતિતઃ

શૃણુયાદ્વા શુચિર્ભૂત્વા ચરિતં શિવયોશ્શિવમ્ ॥
સિધ્યન્તિ સર્વકાર્યાણિ સત્યં સત્યં ન સંશયઃ

ઇતિ શ્રીશિવમહાપુરાણે બ્રહ્મનારદસંવાદે દ્વિતીયાયાં રુદ્રસંહિતાયાં તૃતીયે પાર્વતીખણ્ડે શિવકૈલાસગમનવર્ણનં નામ પઞ્ચપઞ્ચાશત્તમોઽધ્યાયઃ

સમાપ્તોઽયં તૃતીયઃ પાર્વતીખણ્ડઃ