Shiva Purana · Chapter 2.3.43

menovāca //
nirīkṣiṣyāmi prathamaṃ mune taṃ girijāpatim //
kīdṛśaṃ śivarūpaṃ hi yadarthe tapa uttamam

brahmovāca //
ityajñānaparā sā ca darśanārthaṃ śivasya ca //
tvayā mune samaṃ sadyaścandraśālāṃ samāgatā

śivo'pi ca tadā tasyāṃ jñātvāhaṃkāramātmanaḥ //
prāha viṣṇuṃ ca māntāta līlākṛtvādbhutāmprabhuḥ

śiva uvāca //
madājñayā yuvāntātau sadevau ca pṛthakpṛthak //
gacchataṃ hi giridvāraṃ vayaṃ paścādvrajemahi

brahmovāca //
ityākarṇya harissarvānāhūyovāca tanmayāḥ //
surāssarve tathaivāśu gamanaṃ cakrurutsukāḥ

sthitāṃ śirogṛhe menāṃ mune viśveśvara tvayā //
tathaiva darśayāmāsa hṛdvibhraṃśo yathā bhavet

etasminsamaye menā senāṃ ca paramāṃ śubhām //
nirīkṣantī mune dṛṣṭvā sāmānyaṃ harṣitā'bhavat

prathamaṃ caiva gandharvāssundarāssubhagāstadā //
āyātāśśubhavastrāḍhyā nānālaṃkārabhūṣitāḥ

nānāvāhanasaṃyuktā nānāvādyaparā yaṇā //
patākābhirvicitrābhirapsarogaṇasaṃyutāḥ

atha dṛṣṭvā vasuṃ tatra tatpatiṃ paramaprabhum //
menā praharṣitā hyāsīcchivoyamiti cābravīt

śivasya gaṇakā ete na śivoyaṃ śivāpatiḥ //
ityevaṃ tvaṃ tatastāṃ vai avoca ṛṣisattama

evaṃ śrutvā tadā menā vicāre tatparā'bhavat //
itaścābhyadhiko yo vai sa ca kīdṛgbhaviṣyati

etasminnantare yakṣā maṇigrīvādayaśca ye //
teṣāṃ senā tayā dṛṣṭā śobhādidviguṇīkṛtā

tatpatiṃ ca maṇigrīvaṃ dṛṣṭvā śobhānvitaṃ hi sā //
ayaṃ rudraśśivāsvāmī menā prāheti harṣitā

nāyaṃ rudraśśivāsvāmī sevakoyaṃ śivasya vai //
ityavocogapatnyai tvaṃ tāvadvahnissa āgataḥ

tato'pi dviguṇāṃ śobhāṃ dṛṣṭvā tasya ca sābravīt //
rudro'yaṃ girijāsvāmī tadā neti tvamabravīḥ

tāvadyamassamāyātastato'pi dviguṇaprabhaḥ//
taṃ dṛṣṭvā prāha sā menā rudro'yamiti harṣitā

neti tvamabravīstāṃ vai tāvannirṛtirāgataḥ //
bibhrāṇo dviguṇāṃ śobhāṃ śubhaḥ puṇyajanaprabhuḥ

taṃ dṛṣṭvā prāha sā menā rudro'yamiti harṣitā //
neti tvamabravīstāṃ vai tāvadvaruṇa āgataḥ

/
tato'pi dviguṇāṃ śobhāṃ dṛṣṭvā tasya ca sābravīt //
rudro'yaṃ girijāsvāmī tadvā neti tvamabravīḥ

tāvadvāyussamāyātastato'pi dviguṇaprabhaḥ //
taṃ dṛṣṭvā prāha sā menā rudroyamiti harṣitā

neti tvamabravīstāṃ vai tāvaddhanada āgataḥ //
tato'pi dviguṇāṃ śobhāṃ bibhrāṇo guhyakādhipaḥ

taṃ dṛṣṭvā prāha sā menā rudro'yamiti harṣitā //
neti tvamabravīstāṃ vai tāvadīśāna āgataḥ

tato'pi dviguṇāṃ śobhāṃ dṛṣṭvā tasya ca sābravīt //
rudro'yaṃ girijāsvāmī tadā neti tvamabravīḥ

tāvadindrassamāyātastato'pi dviguṇaprabhaḥ //
sarvāmaravaro nānādivyabhastridiveśvaraḥ

taṃ dṛṣṭvā śaṃkarasso'yamiti sā prāha menakā //
śakrassurapatiścāyaṃ neti tvaṃ tadābravīḥ

tāvaccandrassamāyātaśśobhā taddviguṇā dadhata //
dṛṣṭvā taṃ prāha rudro'yaṃ tāṃ tu neti tvamabravīḥ

tāvatsūryassamāyātaśśobhā taddviguṇā dadhat //
dṛṣṭvā taṃ prāha sā soyantāṃtu neti tvamabravīḥ

tāvatsamāgatāstatra bhṛgvādyāśca munīśvarāḥ //
tejaso rāśayassarve svaśiṣyagaṇasaṃyutāḥ

tanmadhye caiva vāgīśaṃ dṛṣṭvā sā prāha menakā //
rudro'yaṃ girijāsvāmī tadā neti tvamabravīḥ

tāvadbrahmā samāyātastejasāṃ gaśiruttamaḥ //
sarṣivaryyasutassākṣāddharmapuṃja iva stutaḥ //३ १ //
dṛṣṭvā sā taṃ tadā menā mahāharṣavatī mune //
so'yaṃ śivāpatiḥ prāha tāṃ tu neti tvamabravīḥ

etasminnantare tatra viṣṇurdevassamāgataḥ//
sarvaśobhānvitaḥ śrīmānmeghaśyāmaścaturbhujaḥ

koṭikandarpyalāvaṇyaḥ pītāmbaradharassvarāṭ//
rājīvalocanaśśāntaḥ pakṣīndravaravāhanaḥ//

śaṃkhādilakṣaṇairyukto mukuṭādivibhūṣitaḥ//
śrīvatsavakṣā lakṣmīśo hyaprameya prabhānvitaḥ

taṃ dṛṣṭvā cakitākṣyāsīnmahāharṣeṇa sābravīt//
so'yaṃ śivāpatiḥ sākṣācchivo vai nātra saṃśayaḥ

atha tvaṃ menakāvākyamākarṇyovāca ūtikṛt//
nāyaṃ śivāpatirayaṃ kintvayaṃ keśavo hariḥ

śaṃkarokhilakāryyasya hyadhikārī ca tatpriyaḥ //
ato'dhiko varo jñeyassa śivaḥ pārvatīpatiḥ

tacchobhāṃ varṇituṃ mene mayā naiva hi śakyate //
sa evākhilabrahmāṇḍapatissarveśvaraḥ svarāṭ

// brahmovāca //
ityākarṇya vacastasya menā mene ca tāṃ śubhām //
mahādhanāṃ bhāgyavatī kulatrayasukhāvahām

uvāca ca prasannāsyā prītiyuktena cetasā //
svabhāgyamadhikaṃ cāpi varṇayantī muhurmuhuḥ

menovāca //
dhanyāhaṃ sarvathā jātā pārvatyā janmanādhunā //
dhanyo girīśvaropyadya sarvaṃ dhanyatamaṃ mama

yeye dṛṣṭvā mayā devā nāyakāssuprabhānvitāḥ //
eteṣāṃ yaḥ patisso'tra patirasyā bhaviṣyati

asyāḥ kiṃ varṇyate bhāgyamapi varṣaśatairapi //
varṇituṃ śakyate naiva tatprabhuprāptidarśanāta

brahmovāca //
ityavādīcca sā menā premanirbharamānasā //
tāvatsamāgato rudro'dbhutotikārakaḥ prabhuḥ

adbhutātmāgaṇāstāta menāgarvāpahārakāḥ //
ātmānaṃ darśayan māyānirliptaṃ nirvikārakam ४४६//
tamāgatamabhipretya nārada tvaṃ mune tadā //
menāmavocaḥ suprītyā darśayaṃstaṃ śivāpatim

// nārada uvāca //
ayaṃ sa śaṃkarassākṣāddṛśyatāṃ sundari tvayā //
yadarthe śivayā taptaṃ tapo'ti vipine mahat

// brahmovāca //
ityuktvā harṣitā menā taṃ dadarśa mudā prabhum //
adbhutākṛtimīśānamadbhutānugamadbhutam

tāvadeva samāyātā rudrasenā mahādbhutā //
bhūtapretādisaṃyuktā nānāgaṇasamanvitā

vātyārūpadharāḥ kecitpatākāmarmarasvanā //
vakratuṃḍāstatra kecidvirūpāścāpare tathā

karālāḥ śmaśrulāḥ kecitkecitkhañjā hyalocanāḥ //
daṇḍapāśadharāḥ kecitkecinmudgarapāṇayaḥ

viruddhavāhanāḥ kecicchṛṃganādavivādinaḥ //
ḍamarorvādinaḥ kecitkecidgomukhavādinaḥ

amukhā vimukhāḥ kecitkecidbahumukhā gaṇāḥ //
akarā vikarāḥ kecitkecidbahukarā gaṇāḥ

anetrā bahunetrāśca viśirāḥ kuśirāstathā //
akarṇā bahukarṇāśca nānāveṣadharā gaṇāḥ

ityādivikṛtākārā aneke prabalā gaṇāḥ //
asaṃkhyātāstathā tāta mahāvīrā bhayaṃkarāḥ

aṃgulyā darśayam̐stvaṃ tāṃ mune rudragaṇām̐stataḥ //
harasya sevakānpaśya haraṃ cāpi varānane

asaṃkhyātān gaṇān dṛṣṭvā bhūtapretādikān mune //
tatkṣaṇādabhavatsā vai menakā trāsasaṃkulā

tanmadhye śaṃkaraṃ caiva nirguṇaṃ guṇavattaram //
vṛṣabhasthaṃ pañcavaktraṃ trinetraṃ bhūtibhūṣitam

kapardinaṃ candramauliṃ daśahastaṃ kapāli nam //
vyāghracarmottarīyañca pinākavarapāṇinam

śūlayuktaṃ virūpākṣaṃ vikṛtākāramākulam //
gajacarma vasānaṃ hi vīkṣya trese śivāprasūḥ

cakitāṃ kampasaṃyuktāṃ vihvalāṃ vibhramaddhiyam //
śivo'yamiti cāṃgulyā darśayam̐stāṃ tvamabravīḥ

/
tvadīyaṃ tadvacaḥ śrutvā vātāhatalatā iva //
sā papāta drutambhūmau menā duḥkhabharā satī

kimidaṃ vikṛtaṃ dṛṣṭvā vañcitāhaṃ durāgrahe //
ityuktvā mūrcchitā tatra menakā sā'bhavatkṣaṇāt

atha prayatnairvividhaissakhībhirupasevitā //
lebhe saṃjñāṃ śanai menā girīśvarapriyā tadā

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivādbhutalīlāvarṇanaṃ nāma tricatvāriṃśo'dhyāyaḥ