Shiva Purana · Chapter 2.2.43

brahmovāca //
iti stuto rameśena mayā caiva surarṣibhiḥ //
tathānyaiśca mahādevaḥ prasannassaṃbabhūva ha

atha śaṃbhuḥ kṛpā dṛṣṭyā sarvān ṛṣisurādikān //
brahmaviṣṇū samādhāya dakṣametaduvāca ha

mahādeva uvāca //
śṛṇu dakṣa pravakṣyāmi prasannosmi prajāpate //
bhaktādhīnaḥ sadāhaṃ vai svataṃtropyakhileśvaraḥ

caturvidhā bhajaṃte māṃ janāḥ sukṛtinassadā//
uttarottarataḥ śreṣṭhāsteṣāṃ dakṣaprajāpate

ārto jijñāsurarthārthī jñānī caiva caturthakaḥ //
pūrve trayaśca sāmānyāścaturtho hi viśiṣyate

tatra jñānī priyatara mamarūpañca sa smṛtaḥ //
tasmātpriyataro nānyaḥ satyaṃ satyaṃ vadāmyaham

jñānagamyohamātmajño vedāṃtaśrutipāragaiḥ //
vinā jñānena māṃ prāptuṃ yatante cālpabuddhayaḥ

na vedaiśca na yajñaiśca na dānaistapasā kvacit //
na śaknuvaṃti māṃ prāptuṃ mūḍhāḥ karmavaśā narā

kevalaṃ karmmaṇā tvaṃ sma saṃsāraṃ tartumicchasi //
ata evābhavaṃ ruṣṭo yajñavidhvaṃsakārakaḥ

itaḥ prabhṛti bho dakṣa matvā māṃ parameśvaram //
buddhyā jñānaparo bhūtvā kuru karma samāhitaḥ

anyacca śṛṇu sadbuddhyā vacanaṃ me prajāpate //
vacmi guhyaṃ dharmahetoḥ saguṇatvepyahaṃ tava

ahaṃ brahmā ca viṣṇuśca jagataḥ kāraṇaṃ param //
ātmeśvara upadraṣṭā svayaṃdṛgaviśeṣaṇaḥ

ātmamāyāṃ samāviśya sohaṃ guṇamayīṃ mune //
sṛjanrakṣanharanviśvaṃ dadhe saṃjñāḥ kriyocitāḥ

advitīye pare tasmin brahmaṇyātmani kevale //
ajñaḥ paśyati bhedena bhūtāni brahmaceśvaram

śiraḥ karādisvāṃgeṣu kurute na yathā pumān //
pārakyaśemuṣīṃ kvāpi bhūteṣvevaṃ hi matparaḥ

sarvabhūtātmanāmekabhāvanāṃ yo na paśyati //
trisurāṇāṃ bhidāṃ dakṣa sa śāṃtimadhigacchati

yaḥ karoti trideveṣu bhedabuddhiṃ narādhamaḥ //
narake sa vasennūnaṃ yāvadācandratārakam

matparaḥ pūjayeddevān sarvānapi vicakṣaṇaḥ //
sa jñānaṃ labhate yena muktirbhavati śāśvatī

vidhibhaktiṃ vinā naiva bhaktirbhavati vaiṣṇavī //
viṣṇubhaktiṃ vinā me na bhaktiḥ kvāpi prajāyate

ityuktvā śaṃkarassvāmī sarveṣāṃ parameśvaraḥ //
sarveṣāṃ śṛṇvatāṃ tatrovāca vāṇīṃ kṛpākaraḥ

haribhakto hi māṃ nindettathā śaivobhave dyadi //
tayoḥ śāpā bhaveyuste tattvaprāptirbhavenna hi

// brahmovāca //
ityākarṇya maheśasya vacanaṃ sukhakārakam //
jahṛṣussakalāstatra suramunyādayo mune

dakṣobhavanmahāprītyā śivabhaktiratastadā //
sakuṭumbassurādyāste śivaṃ matvākhileśvaram

yathā yena kṛtā śaṃbhoḥ saṃstutiḥ paramātmanaḥ //
tathā tasmai varo dattaśśaṃbhunā tuṣṭacetasā

jñaptaḥ śivenāśu dakṣaḥ śivabhaktaḥ prasannadhīḥ //
yajñaṃ cakāra saṃpūrṇaṃ śivānugrahato mune

dadau bhāgānsurebhyo hi pūrṇabhāgaṃ śivāya saḥ //
dānaṃ dadau dvijebhyaśca prāptaḥ śaṃbhoranugrahaḥ

atho devasya sumahattatkarma vidhipūrvakam //
dakṣaḥ samāpya vidhivatsahartvigbhiḥ prajāpatiḥ

evaṃ dakṣamakhaḥ pūrṇobhavattatra munīśvaraḥ //
śaṃkarasya prasādena parabrahmasvarūpiṇaḥ

atha devarṣayassarve śaṃsaṃtaśśāṃkaraṃ yaśaḥ //
svadhāmāni yayustu ṣṭāḥ parepi sukhatastadā

ahaṃ viṣṇuśca suprītāvapi svaṃsvaṃ paraṃ mudā //
gāyantau suyaśaśśaṃbhoḥ sarvamaṃgaladaṃ sadā

dakṣa saṃmānitaḥ prītyā mahādevopi sadgatiḥ //
kailāsaṃ sa yayau śailaṃ suprītassagaṇo nijam

āgatya svagiriṃ śaṃbhussasmāra svapriyāṃ satīm //
gaṇebhyaḥ kathayāmāsa pradhānebhyaśca tatkathām

kālaṃ nināya vijñānī bahu taccaritaṃ vadan//
laukikīṃ gatimāśritya darśayan kāmitāṃ prabhuḥ

nānītikārakaḥ svāmī parabrahma satāṃ gatiḥ//
tasya mohaḥ kva vā śokaḥ kva vikāraḥ paro mune

ahaṃ viṣṇuśca jānīvastadbhedaṃ na kadācana //
kepare munayo devā manuṣādyāśca yoginaḥ

mahimā śāṃkaronaṃto durvijñeyo manīṣibhiḥ //
bhaktajñātaśca sadbhaktyā tatprasādādvinā śramam

ekopi na vikāro hi śivasya paramātmanaḥ //
saṃdarśayati lokebhyaḥ kṛtvā tāṃ tādṛśīṃ gatim

yatpaṭhitvā ca saṃśrutya sarvalokasudhīrmune//
labhate sadgatiṃ dibyāmihāpi sukhamuttamam

itthaṃ dākṣāyaṇī hitvā nijadehaṃ satī punaḥ //
jajñe himavataḥ patnyāṃ menāyāmiti viśrutam

punaḥ kṛtvā tapastatra śivaṃ vavre patiṃ ca sā //
gaurī bhūtvārddhavāmāṃgī līlāścakredbhutāśśivā

itthaṃ satīcaritraṃ te varṇitaṃ paramādbhutam //
bhuktimuktipradaṃ divyaṃ sarvakāmapradāyakam

idamākhyānamanaghaṃ pavitraṃ parapāvanam //
svargyaṃ yaśasyamāyuṣyaṃ putrapautraphalapradam

ya idaṃ śṛṇuyādbhaktyā śrāvayedbhaktimānnarān //
sarvakarmā labhettāta paratra paramāṃ gatim

yaḥ paṭhetpāṭhayedvāpi samākhyānamidaṃ śubham //
sopi bhuktvākhilān bhogānaṃte mokṣamavāpnuyāt

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe dakṣaya jñānusaṃdhānavarṇanaṃ nāma tricatvāriṃśo'dhyāyaḥ

// śrīḥ //
samāptoyaṃ rudrasaṃhitāntargatasatīkhaṇḍo dvitīyaḥ