Shiva Purana · Chapter 2.2.42

// brahmovāca //
śrībrahmeśaprajeśena sadaiva muninā ca vai//
anunītaśśaṃbhurāsītprasannaḥ parameśvaraḥ

āśvāsya devān viṣṇvādīnvihasya karuṇānidhiḥ/
uvāca parameśānaḥ kurvan paramanugraham

śrīmahādeva uvāca //
śṛṇutaṃ sāvadhānena mama vākyaṃ surottamau //
yathārthaṃ vacmi vāṃ tāta vāṃ krodhaṃ sarvadāsaham

nāghaṃ tanau tu bālānāṃ varṇamevānuciṃtaye //
mama māyābhibhūtānāṃ daṃḍastatra dhṛto mayā

dakṣasya yajñabhaṃgoyaṃ na kṛtaśca mayā kvacit //
paraṃ dveṣṭi pareṣāṃ yadātmanastadbhaviṣyati

pareṣāṃ kledanaṃ karma na kāryaṃ tatkadācana//
paraṃ dveṣṭi pareṣāṃ yadātmanastadbhaviṣyati

dakṣasya yajñaśīrṣṇo hi bhavatvajamukhaṃ śiraḥ //
mitranetreṇa saṃpaśyedyajñabhāgaṃ bhagassuraḥ

pūṣābhidhassurastātau dadbhiryajñasupiṣṭabhuk //
yājamānairbhagnadaṃtassatyametanmayoditam

bastaśmaśrurbhavedeva bhṛgurmama virodha kṛt//
devāḥ prakṛtisarvāṃgā ye ma ucchedanaṃ daduḥ

bāhubhyāmaśvinau pūṣṇo hastābhyāṃ kṛtavāhakau //
bhavaṃtvadhvaryavaścānye bhavatprītyā mayoditam

brahmovāca //
ityuktvā parameśāno virarāma dayānvitaḥ //
carācarapatirdevaḥ samrāṭ vedānusārakṛt

tadā sarva surādyāste śrutvā śaṃkarabhāṣitam//
sādhusādhviti saṃprocuḥ parituṣṭāḥ saviṣṇvajāḥ

tataśśaṃbhuṃ samāmaṃtrya mayā viṣṇussurarṣibhiḥ//
bhūyastaddevayajanaṃ yayau ca parayā mudā

evaṃ teṣāṃ prārthanayā viṣṇuprabhṛtibhissuraiḥ//
yayau kanakhalaṃ śaṃbhuryajñavāṭaṃ prajāpateḥ

rudrastadā dadarśātha vīrabhadreṇa yatkṛtam //
pradhvaṃsaṃ taṃ kratostatra devarṣīṇāṃ viśeṣataḥ

svāhā svadhā tathā pūṣā tuṣṭirdhṛtiḥ sarasvatī //
tathānye ṛṣayassarve pitaraścāgnayastathā

ye'nye ca bahavastatra yakṣagaṃdhavarrākṣasāḥ //
troṭitā luṃcitāścaiva mṛtāḥ kecidraṇājire

yajñaṃ tathāvidhaṃ dṛṣṭvā samāhūya gaṇādhipam //
vīrabhadraṃ mahāvīramuvāca prahasan prabhuḥ

vīrabhadra mahābāho kiṃ kṛtaṃ karma te tvidam //
mahāndaṃḍo dhṛtastāta devarṣyādiṣu satvaram

dakṣamānaya śīghraṃ tvaṃ yenedaṃ kṛtamīdṛśam //
yajño vilakṣaṇastāta yasyedaṃ phalamīdṛśam

// brahmovāca //
evamuktaśśaṃkareṇa vīrabhadrastvarānvitaḥ //
kabaṃdhamānayitvāgre tasya śaṃbhorathākṣipat

viśiraskaṃ ca taṃ dṛṣṭvā śaṃkaro lokaśaṃkaraḥ //
vīrabhadramuvācāgre vihasanmunisattama

śiraḥ kutreti tenokte vīrabhadro'bravītprabhuḥ //
mayā śiro hutaṃ cāgnau tadānīmeva śaṃkara

iti śrutvā vacastasya vīrabhadrasya śaṃkaraḥ //
devān tathājñapatprītyā yaduktaṃ tatpurā prabhuḥ

vidhāya kārtsnyena ca tadyadāha bhagavān bhavaḥ //
mayā viṣṇvādayaḥ sarve bhṛgvādīnatha satvaram

atha prajāpatestasya savanīyapaśośśiraḥ//
bastasya saṃdadhuśśaṃbhoḥ kāyenāraṃ suśāsanāt

saṃdhīyamāne śirasi śaṃbhusaddṛṣṭivīkṣitaḥ //
sadyassupta ivottasthau labdhaprāṇaḥ prajāpatiḥ

utthitaścāgrataśśaṃbhuṃ dadarśa karuṇānidhim //
dakṣaḥ prītamatiḥ prītyā saṃsthitaḥ suprasannadhīḥ

purā hara mahādveṣakalilātmābhavaddhi saḥ//
śivāvalokanātsadyaśśaraccandra ivāmalaḥ

bhavaṃ stotumanā sotha nāśaknodanurāgataḥ //
utkaṃṭhāvikalatvācca saṃparetāṃ sutāṃ smaran

atha dakṣaḥ prasannātmā śivaṃ lajjāsamanvitaḥ //
tuṣṭāva praṇato bhūtvā śaṃkaraṃ lokaśaṃkaram

dakṣa uvāca //
namāmi deva varadaṃ vareṇyaṃ maheśvaraṃ jñānanidhiṃ sanātanam //
namāmi devādhipatīśvaraṃ haraṃ sadāsukhāḍhyaṃ jagadekabāṃdhavam

namāmi viśveśvara viśvarūpaṃ purātanaṃ brahmanijātmarūpam//
namāmi śarvaṃ bhava bhāvabhāvaṃ parātparaṃ śaṃkaramānatomi

devadeva mahādeva kṛpāṃ kuru namostu te //
aparādhaṃ kṣamasvādya mama śaṃbho kṛpānidhe //

anugrahaḥ kṛtaste hi daṃḍavyājena śaṃkara //
khalohaṃ mūḍhadhīrdeva jñātaṃ tattvaṃ mayā na te

adya jñātaṃ mayā tattvaṃ sarvopari bhavānmataḥ //
viṣṇubrahmādibhissevyo vedavedyo maheśvaraḥ

//
sādhūnāṃ kalpavṛkṣastvaṃ duṣṭānāṃ daṃḍadhṛksadā //
svataṃtraḥ paramātmā hi bhaktābhīṣṭavarapradaḥ

vidyātapovratadharānasṛjaḥ prathamaṃ dvijā //
ātmatattvaṃ samāvettuṃ mukhataḥ parameśvaraḥ

sarvāpadbhyaḥ pālayitā gopatistu paśūniva //
gṛhītadaṃḍo duṣṭāṃstān maryādāparipālakaḥ

mayā duruktaviśikhaiḥ praviddhaḥ parameśvaraḥ //
amarānatidīnāśān madanugrahakārakaḥ

sa bhavān bhagavān śaṃbho dīnabaṃdho parātparaḥ //
svakṛtena mahārheṇa saṃtuṣṭo bhaktavatsala

// brahmovāca //
iti stutvā maheśānaṃ śaṃkaraṃ lokaśaṃkaram //
prajāpatirvinītātmā virarāma mahāprabhum

atha viṣṇuḥ prasannātmā tuṣṭāva vṛṣabhadhvajam //
bāṣpagadgadayā vāṇyā supraṇamya kṛtāṃjaliḥ

viṣṇuvāca //
mahādeva maheśāna lokānugrahakāraka //
parabrahma parātmā tvaṃ dīnabaṃdho dayānidhe

sarvavyāpī svairavartī vedavedyayaśāḥ prabhoḥ //
anugrahaḥ kṛtastena kṛtāścāsukṛtā vayam//

dakṣoyaṃ mama bhaktastvāṃ yanniniṃda khalaḥ purā //
tat kṣaṃtavyaṃ maheśādya nirvikāro yato bhavān

kṛto mayāparādhopi tava śaṃkara mūḍhataḥ //
tvadgaṇena kṛtaṃ yuddhaṃ vīrabhadreṇa pakṣataḥ

tvaṃ me svāmī parabrahma dāsohaṃ te sadāśiva //
poṣyaścāpi sadā te hi sarveṣāṃ tvaṃ pitā yataḥ

brahmovāca //
devadeva mahādeva karuṇāsāgara prabho //
svataṃtraḥ paramātmā tvaṃ parameśo dvayovyayaḥ//

mama putropari kṛto devānugraha īśvara//
svāpamānamagaṇayan dakṣayajñaṃ samuddhara

prasanno bhava deveśa sarvaśāpānnirākuru //
sabodhaḥ prerakastvaṃ me tvamevaṃ vinivārakaḥ

iti stutvā maheśānaṃ paramaṃ ca mahāmune //
kṛtāṃjalipuṭo bhūtvā vinamrīkṛtamastakaḥ//

atha śakrādayo devā lokapālāssucetasaḥ //
tuṣṭuvuḥ śaṃkaraṃ devaṃ prasannamukhapaṃkajam

tataḥ prasannamanasaḥ sarve devāstathā pare //
siddharṣayaḥ prajeśāśca tuṣṭuvuḥ śaṃkaraṃ mudā

tathopadevanāgāśca sadasyā brāhmaṇāstathā //
praṇamya parayā bhaktyā tuṣṭuvuśca pṛthak pṛthak

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe dakṣaduḥkhanirākaraṇavarṇanaṃ nāma dvicatvāriṃśo 'dhyāyaḥ