Shiva Purana · Chapter 2.1.20

brahmovāca //
nārada tvaṃ śṛṇu mune śivāgamanasattamam //
kailāse parvataśreṣṭhe kuberasya tapobalāt

nidhipatva varaṃ dattvā gatvā svasthānamuttamam //
vicintya hṛdi viśveśaḥ kuberavaradāyakaḥ

vidhyaṃgajassvarūpo me pūrṇaḥ pralayakāryakṛt //
tadrūpeṇa gamiṣyāmi kailāsaṃ guhyakālayam

rudro hṛdayajo me hi pūrṇāṃśo brahmaniṣphalaḥ //
hari brahmādibhissevyo madabhinno niraṃjana

tatsvarūpeṇa tatraiva suhṛdbhūvā vilāsyaham //
kuberasya ca vatsyāmi kariṣyāmi tapo mahat

iti saṃciṃtya rudro'sau śivecchāṃ gaṃtumutsukaḥ //
nanāda tatra ḍhakkāṃ svāṃ sugatiṃ nādarūpiṇīm

trailokyāmānaśe tasyā dhvanirutsāhakārakaḥ //
āhvānagatisaṃyukto vicitraḥ sāṃdraśabdakaḥ

tacchrutvā viṣṇubrahmādyāḥ surāśca munayastathā//
āgamā nigamāmūrtāssiddhā jagmuśca tatra vai

surāsurādyāssakalāstatra jagmuśca sotsavāḥ //
sarve'pi pramathā jagmuryatra kutrāpi saṃsthitāḥ

gaṇapāśca mahābhāgāssarvaloka namaskṛtāḥ //
teṣāṃ saṃkhyāmahaṃ vacmi sāvadhānatayā śṛṇu

abhyayācchaṃkhakarṇaśca gaṇakoṭyā gaṇeśvaraḥ //
daśabhiḥ kekarākṣaśca vikṛto'ṣṭābhireva ca

catuḥṣaṣṭyā viśākhaśca navabhiḥ pāriyātrakaḥ //
ṣaḍbhiḥ sarvāntakaḥ śrīmāndundubho'ṣṭābhireva ca

jālaṃko hi dvādaśabhiḥ koṭibhirgaṇapuṃgavaḥ //
saptabhissamadaḥ śrīmām̐stathaiva vikṛtānanaḥ

paṃcabhiśca kapālī hi ṣaḍbhiḥ sandārakaśśubhaḥ //
koṭikoṭibhireveha kaṇḍukaḥ kuṇḍakastathā

viṣṭaṃbho'ṣṭābhiragamadaṣṭabhiścandratāpanaḥ

mahākeśassahasreṇa koṭīnāṃ gaṇapo vṛtaḥ

kuṇḍī dvādaśabhirvāhastathā parvatakaśśubhaḥ //
kālaśca kālakaścaiva mahākālaḥ śatena vai

agnikaśśatakoṭyā vai koṭyābhimukha eva ca //
ādityamūrddhā koṭyā ca tathā caiva dhanāvahaḥ

sannāhaśca śatenaiva kumudaḥ koṭibhistathā //
amoghaḥ kokilaścaiva koṭikoṭyā sumaṃtrakaḥ

kākapādo'paraḥ ṣaṣṭyā ṣaṣṭyā saṃtānakaḥ prabhuḥ //
mahābalaśca navabhirmadhu piṃgaśca piṃgalaḥ

nīlo navatyā deveśaṃ pūrṇabhadrastathaiva ca //
koṭīnāṃ caiva saptānāṃ caturvaktro mahābalaḥ

koṭikoṭisahasrāṇāṃ śatairviṃśatibhirvṛtaḥ //
tatrājagāma sarveśaḥ kailāsagamanāya vai /

kāṣṭhāgūḍhaścatuṣṣaṣṭyā sukeśo vṛṣabhastathā //
koṭibhissaptabhiścaitro nakulīśastvayaṃ prabhuḥ

lokāṃtakaśca dīptātmā tathā daityāṃtakaḥ prabhuḥ//
devo bhṛṃgī riṭiḥ śrīmāndevadevapriyastathā

aśanirbhānukaścaiva catuṣṣaṣṭyā sanātanaḥ //
naṃdīśvaro gaṇādhīśaḥ śatakoṭyā mahābalaḥ

ete cānye ca gaṇapā asaṃkhyātā mahābalaḥ //
sarve sahasrahastāśca jaṭāmukuṭadhāriṇaḥ

sarve caṃdrāvataṃsāśca nīlakaṇṭhāstrilocanāḥ //
hārakuṇḍalakeyūramukuṭādyairalaṃkṛtāḥ

brahmendraviṣṇusaṃkāśā aṇimādi gaṇairvṛtāḥ //
sūryakoṭipratīkāśāstatrājagmurgaṇeśvarāḥ

ete gaṇādhipāścānye mahānmāno'malaprabhāḥ //
jagmustatra mahāprītyā śivadarśanalālasāḥ

gatvā tatra śivaṃ dṛṣṭvā natvā cakruḥ parāṃ nutim //
sarve sāñjalayo viṣṇupramukhā natamastakāḥ

iti viṣṇvādibhissārddhaṃ maheśaḥ parameśvaraḥ //
kailāsamagamatprītyā kuberasya mahātmanaḥ

kuberopyāgataṃ śaṃbhuṃ pūjayāmāsa sādaram//
bhaktyā nānopahāraiśca parivārasamanvitaḥ

tato viṣṇvādikāndevāngaṇāṃścānyānapi dhruvam //
śivānugānsamānarca śivatoṣaṇahetave

atha śambhustamāliṃgya kuberaṃ prītamānasaḥ //
mūrdhniṃ cāghrāya saṃtasthāvalakāṃ nikaṣākhilaiḥ

śaśāsa viśvakarmāṇaṃ nirmāṇārthaṃ girau prabhuḥ //
nānābhaktairnivāsāya svapareṣāṃ yathocitam

viśvakarmā tato gatvā tatra nānāvidhāṃ mune //
racanāṃ racayāmāsa drutaṃ śambhoranujñayā

atha śambhuḥ pramudito hariprārthanayā tadā

kuberānugrahaṃ kṛtvā yayau kailāsaparvatam //
sumuhūrte praviśyāsau svasthānaṃ parameśvaraḥ

akarodakhilānprītyā sanāthānbhaktavatsalaḥ //
atha sarve pramuditā viṣṇuprabhṛtayassurāḥ //
munayaścāpare siddhā abhyaṣiṃcanmudā śivam

samānarcuḥ kramātsarve nānopāyanapāṇayaḥ//
nīrājanaṃ samākārṣurmahotsavapurassaram

tadāsītsumanovṛṣṭirmaṃgalāyatanā mune //
suprītā nanṛtustatrāpsaraso gānatatparāḥ

jayaśabdo namaśśabdastatrāsītsarvasaṃskṛtaḥ //
tadotsāho mahānāsītsarveṣāṃ sukhavardhanaḥ

sthitvā siṃhāsane śaṃbhurvirājādhikaṃ tadā //
sarvaissaṃsevito'bhīkṣṇaṃ viṣṇvādyaiśca yathocitam

atha sarve surādyāśca tuṣṭuvustaṃ pṛthakpṛthak //
arthyābhirvāgbhiriṣṭābhiśśakaraṃ lokaśaṃkaram

prasannātmā stutiṃ śrutvā teṣāṃ kāmāndadau śivaḥ //
manobhilaṣitānprītyā varānsarveśvaraḥ prabhuḥ

śivājñayātha te sarve svaṃsvaṃ dhāma yayurmune//
prāptakāmāḥ pramuditā ahaṃ ca viṣṇunā saha

upaveśyāsane viṣṇuṃ māñca śambhuruvāca ha //
bahu sambodhya suprītyānugṛhya parameśvaraḥ

śiva uvāca //
he hare he vidhe tātau yuvāṃ priyatarau mama //
surottamau trijagato'vanasargakarau sadā

gacchataṃ nirbhayannityaṃ svasthānaśca madājñayā //
sukhapradātāhaṃ vai vāmviśeṣātprekṣakassadā

ityākarṇya vacaśśambhossupraṇamya tadājñayā //
ahaṃ hariśca svaṃ dhāmāgamāva prītamānasau

tadānīmeva suprītaśśaṃkaro nidhipammudā //
upaveśya gṛhītvā taṃ kara āha śubhaṃ vacaḥ

// śiva uvāca //
tava premṇā vaśībhūto mitratāgamanaṃ sakhe //
svasthānaṅgaccha vibhayassahāyohaṃ sadānagha

ityākarṇya vacaśśambhoḥ kuberaḥ prītamānasaḥ //
tadājñayā svakaṃ dhāma jagāma pramudānvitaḥ

sa uvāca girau śambhuḥ kailāse parvatottame//
sagaṇo yoganiratassvacchando dhyāna tatparaḥ

kvaciddadhyau svamātmānaṃ kvacidyogarato'bhavat //
itihāsagaṇānprītyāvādītsvacchandamānasaḥ

kvacitkailāsa kudharasusthāneṣu maheśvaraḥ //
vijahāra gaṇaiḥ prītyā vividheṣu vihāravit

itthaṃ rudrasvarūpo'sau śaṃkaraḥ parameśvaraḥ//
akārṣītsvagirau līlā nānā yogivaro'pi yaḥ

nītvā kālaṃ kiyantaṃ so'patnīkaḥ parameśvaraḥ //
paścādavāpa svāmpatnīndakṣapatnīsamudbhavām

vijahāra tayā satyā dakṣaputryā maheśvaraḥ//
sukhī babhūva devarṣe lokācāraparāyaṇaḥ

itthaṃ rudrāvatāraste varṇito'yaṃ munīśvara //
kailāsāgamanañcāsya sakhitvānnidhipasya hi

tadantargatalīlāpi varṇitā jñānavardhinī //
ihāmutra ca yā nityaṃ sarvakāmaphalapradā

imāṃ kathāmpaṭhedyastu śṛṇuyādvā samāhitaḥ //
iha bhuktiṃ samāsādya labhenmuktimparatra saḥ

iti śrīśivamahāpurāṇe dvitīyāyāṃ rudrasaṃhitāyāṃ prathamakhaṃḍe kailāsopākhyāne śivasya kailāsagamanaṃ nāma viṃśo'dhyāyaḥ