Shiva Gita · Chapter 1

athātaḥ saṃpravakṣyāmi śuddhakaivalyamuktidam //
anugrahānmaheśasya bhavaduḥkhasya bheṣajam

na karmaṇāmanuṣṭhānairna dānaistapasāpi vā /
kaivalyaṃ labhate martyaḥ kiṃtu jñānena kevalam

rāmāya daṇḍakāraṇye pārvatīpatinā purā /
yā prokttā śivagītākhyā guhyāguhyatamāpi sā

yasyāḥ smaraṇamātreṇa nṛṇāṃ muktirdhuvā hi sā /
purā sanatkumārāya skandenābhihitā hi sā

sanatkumāraḥ provāca vyāsāya munisattamāḥ /
mahyaṃ kṛtā(pā)tirekeṇa pradadau bādarāyaṇaḥ

uktaṃ ca tena kasmaicinna dātavyamidaṃ tvayā /
sūtaputrānyathā devāḥ kṣubhyanti ca śapanti ca

atha pṛṣṭo mayā vipro bhagavānbādarāyaṇaḥ /
bhagavandevatāḥ sarvāḥ kiṃ kṣubhyanti śapanti ca //
tāsāmatrāsti kā hāniryayā kupyanti devatāḥ

pārāśaryo'tha māmāha yatpṛṣṭaṃ śrṛṇu vatsala /
nityāgnihotriṇo viprāḥ santi ye gṛhamedhinaḥ

ta eva sarvaphaladāḥ surāṇāṃ kāmadhenavaḥ //
bhakṣyaṃ bhojyaṃ ca peyaṃ ca yadyadiṣṭaṃ suparvaṇām

agnau hutena haviṣā tatsarvaṃ labhyate divi /
nānyadasti sureśānāmiṣṭasiddhipradaṃ divi

dogdhrī dhenuryathā nītā duḥkhadā gṛhamedhinām /
tathaiva jñānavānvipro devānāṃ du:khado bhavet

tridaśāstena vighnanti praviṣṭāviṣayaṃ nṛṇām /
tato na jāyate bhaktiḥ śive kasyāpi dehinaḥ

tasmādaviduṣāṃ naiva jāyate śūlapāṇinaḥ /
yathākathaṃcijjātāpi madhye vicchidyate nṛṇām

jātaṃ vāpi śivajñānaṃ viśvāsaṃ na bhajatyalam

ṛṣaya ūcuḥ /
yadyevaṃ devatā vighnamācaranti tanūbhṛtām /
pauruṣaṃ tatra kasyāsti yena muktirbhaviṣyati

satyaṃ sūtātmaja brūhi tatropāyo'sti vā na vā //
sūta uvāca /
koṭijanmārjitaiḥ puṇyaiḥ śive bhaktiḥ prajāyate

iṣṭāpūrtāni karmāṇi tenācarati mānavaḥ /
śivārpaṇadhiyā kāmānparityajya yathāvidhi

anugrahāttena śaṃbhorjāyate sudṛḍho naraḥ /
tato bhītāḥ palāyante vighnaṃ hitvā sureśvarāḥ

jāyate tena śuśrūṣā carite candramaulinaḥ /
śṛṇvato jāyate jñānaṃ jñānādeva vimucyate

bahunātra kimuktena yasya bhaktiḥ śive dṛḍhā /
mahāpāpaughapāpaughakoṭigrasto vimucyate

saṃsārabandhanāttasmādanyaḥ ko vā vimūḍhadhīḥ

niyamādyastu kurvīta bhaktiṃṃ vā drohameva vā //
tasyāpi cetprasanno'sau phalaṃ yacchati vāñchitam

ṛddhaṃ kiṃcitsamādāya kṣullakaṃ jalameva vā /
yo datte niyamenāsau tasmai datte jagattrayam

tatrāpyaśakto niyamānnamaskāraṃ pradakṣiṇām //
yaḥ karoti maheśasya tasmai tuṣṭo bhavecchivaḥ

pradakṣiṇāsvaśakto'pi yaḥ svānte cintayecchivam //
gacchansamupaviṣṭo vā tasyābhīṣṭaṃ prayacchati

candanaṃ bilvakāṣṭhasya puṣpāṇi vanajānyapi /
phalāni tādṛśānyeva yasya prītikarāṇi vai //
duṣkaraṃ tasya sevāyāṃ kimasti bhuvanatraye

vanyeṣu yādṛśī prītirvartate parameśituḥ /
uttameṣvapi nāstyeva grāmajeṣvapi tādṛśī

taṃ tyaktvā tādṛśaṃ devaṃ yaḥ sevetānyadevatām /
sa hi bhāgīrathīṃ tyaktvā kāṅkṣate mṛgatṛṣṇikām

kiṃtu yasyāsti duritaṃ koṭijanmasu saṃcitam /
tasya prakāśate nāyaṃ tvartho mohāndhacetasaḥ

na kālaniyamo yatra na deśasya sthalasya ca /
yatrāsya ramate cittaṃ tatra dhyānena kevalam //
svātmatvena śivasyāsau śivasāyujyamāpnuyāt

atisvalpatarāyuḥśrīrbhūteśāṃśādhipo'pi yaḥ//
sa tu rājāhamasmīti vādinaṃ hanti sānvayam

kartāpi sarvalokānāmakṣayaiśvaryavānapi /
śivaḥ śivo'hamasmīti vādinaṃ yaṃ ca kaṃcana /
ātmanā saha tādātmyabhāginaṃ kurute bhṛśam

dharmārthakāmamokṣāṇāṃ paraṃ yāsyanti yena vai //
munayastatpravakṣyāmi vrataṃ pāśupatābhidham

kṛtvā tu virajāṃ dīkṣāṃ bhūtirudrākṣadhāriṇaḥ //
japanto vedasārākhyaṃ śivanāmasahasrakam

saṃtyajya tena martyatvaṃ śaivīṃṃ tanumavāpya ca /
tataḥ prasanno bhagavāñchaṃkaro lokaśaṃkaraḥ //
bhavatāṃ dṛśyatāmetya kaivalyaṃ vaḥ pradāsyati

rāmāya daṇḍakāraṇye yatprādātkumbhasaṃbhavaḥ /
tatsarvaṃ vaḥ pravakṣyāmi śṛṇudhvaṃ bhaktiyoginaḥ