Shatapatha Brahmana · Chapter 9.4.3

९.४.३ aṣṭānāṃ dhiṣṇyāgnīnāṃ cayanam
atha pratyetya dhiṣṇyānāṃ kāle dhiṣṇyānnivapati / agnaya ete yaddhiṣṇyā agnīnevaitaccinoti tā etā viśaḥ kṣatramayamagniścitaḥ kṣatraṃ ca tadviśaṃ ca karotyamuṃ pūrvaṃ cinotyathemānkṣatraṃ tatkṛtvā viśaṃ karoti -

eka eṣa bhavati / ekasthaṃ tatkṣatramekasthāṃ śriyaṃ karoti bahava itare viśi tadbhūmānaṃ dadhāti -

pañcacitika eṣa bhavati / ekacitikā itare kṣatraṃ tadvīryeṇātyādadhāti kṣatraṃ viśo vīryavattaraṃ karotyūrdhvametaṃ cinoti kṣatraṃ tadūrdhvaṃ citibhiścinoti tiraśca itarānkṣatrāya tadviśamadhastādupaniṣādinīṃ karoti -

ubhābhyāṃ yajuṣmatyā ca lokampṛṇayā caitaṃ cinoti / lokampṛṇayaivemānkṣatrameva tadvīryeṇātyādadhāti kṣatraṃ viśo vīryavattaraṃ karoti viśaṃ kṣatrādavīryatarām -

sa yadimāṃllokampṛṇayaiva cinoti kṣatraṃ vai lokampṛṇā kṣatraṃ tadviśyattāraṃ dadhātyubhayāṃścinotyadhvarasya cāgneścādhvarasya pūrvānathāgnestasyoktobandhuryaṃ yamevādhvaradhiṣṇyaṃ nivapati taṃ taṃ cinotyāgnīdhrīyaṃ prathamaṃ cinoti taṃ hi prathamaṃ nivapati dakṣiṇata udaṅṅāsīnastasyokto bandhuḥ -

tasminnaṣṭāviṣṭakā upadadhāti / aṣṭākṣarā gāyatrī gāyatro'gniryāvānagniryāvatyasya mātrā tāvantamevainametaccinoti tāsāmaśmā pṛśnirnavamo nava vai prāṇāḥ sapta śīrṣannavāñcau dvau tānevāsminnetaddadhāti yaścite'gnirnidhīyate sa daśamo daśa vai prāṇā madhyamāgnīdhraṃ madhyatastatprāṇāndadhāti madhye ha vā etatprāṇāḥ santa iti ceti cātmānamanuvyuccaranti -

ekaviṃśatiṃ hotrīya upadadhāti / ekaviṃśatirveva pariśritastasyokto bandhurekādaśa brāhmaṇācchaṃsya ekādaśākṣarā vai triṣṭuptraiṣṭubha indra aindro brāhmaṇācchaṃsyaṣṭāvaṣṭāvitareṣu tasyokto bandhuḥ -

ṣaṇmārjālīye / ṣaḍvā ṛtavaḥ pitarastaṃ haitamṛtavaḥ pitaro dakṣiṇataḥ paryūhire sa eṣāmeṣa dakṣiṇataḥ sa vā itīmamupadadhātītīmānityamuṃ viśaṃ tatkṣatramabhisammukhāṃ karoti -

athainānpariśridbhiḥ pariśrayati / āpo vai pariśrito'dbhirevaināṃstatparitanoti sa vai paryeva nidadhāti kṣatraṃ haitā apāṃ yāḥ khātena yantyatha haitā viśo yānīmāni vṛthodakāni sa yadamuṃ khātena pariśrayati kṣatre tatkṣatraṃ dadhāti kṣatraṃ kṣatreṇa pariśrayatyatha yadimānparyeva nidadhāti viśi tadviśaṃ dadhāti viśā viśaṃ pariśrayati teṣāṃ vai yāvatya eva yajuṣmatyastāvatyaḥ pariśrito yāvatyo hyevāmuṣya yajuṣmatyastāvatyaḥ pariśritaḥ kṣatrāyaiva tadviśaṃ kṛtānukarāmanuvartmānaṃ karoti -

athaiṣu purīṣaṃ nivapati / tasyokto bandhustūṣṇīmaniruktā hi viḍathāgnīṣomīyasya paśupuroḍāśamanu diśāmaveṣṭīrnirvapati diśa eṣo'gnistābhya etāni havīṃṣi nirvapati tadenā haviṣā devatāṃ karoti yasyai vai devatāyai havirgṛhyate sā devatā na sā yasyai na gṛhyate pañca bhavanti pañca hi diśaḥ -

tadāhuḥ / daśahaviṣamevaitāmiṣṭiṃ nirvapetsā sarvastomā sarvapṛṣṭhā sarvāṇi cchandāṃsi sarvā diśaḥ sarva ṛtavaḥ sarvamvetadayamagnistadenaṃ haviṣā devatāṃ karoti yasyai vai devatāyai havirgṛhyate sā devatā na sā yasyai na gṛhyate daśa bhavanti daśākṣarā virāḍvirāḍagnirdaśa diśo diśo'gnirdaśa prāṇāḥ prāṇā agniryāvānagniryāvatyasya mātrā tāvataivainametadannena prīṇāti -

tattvai devasvāmeva / etāni havīṃṣi nirvapedetā ha devatāḥ sutā etena savena yenaitatsoṣyamāṇo bhavati tā evaitatprīṇāti tā asmā iṣṭāḥ prītā etaṃ savamanumanyante tābhiranumataḥ sūyate yasmai vai rājāno rājyamanumanyante sa rājā bhavati na sa yasmai na tadyadetā devatāḥ sutā etena savena yadvainametā devatā etasmai savāya suvate tasmādetā devasvaḥ -

tā vai dvināmnyo bhavanti / dvināmā vai savena suto bhavati yasmai vai savāya sūyate
yena vā savena sūyate tadasya dvitīyaṃ nāma -

aṣṭau bhavanti / aṣṭākṣarā gāyatrī gāyatro'gniryāvānagniryāvatyasya mātrā tāvataivainametadannena prīṇāti -

tadāhuḥ / naitāni havīṃṣi nirvapennedatirecayānīti tāni vai nirvapedeva kāmebhyo vā etāni havīṃṣi nirupyante na vai kāmānāmatiriktamasti yadvai kiṃ ca paśupuroḍāśamanu havirnirupyate paśāveva sa madhyato medho dhīyata ubhayāni nirvapatyadhvarasya cāgneścādhvarasya pūrvamathāgnestasyokto bandhuruccaiḥ paśupuroḍāśo bhavatyupāṃśvetānīṣṭirhyanubrūhi preṣyeti paśupuroḍāśasyāhānubrūhi yajetyeteṣāmiṣṭirhi samānaḥ sviṣṭakṛtsamānīḍeṣṭā devatā bhavantyasamavahitaṃ sviṣṭakṛte -

athainaṃ pūrvābhiṣekeṇābhimṛśati / savitā tvā savānāṃ suvatāmeṣa vo'mī rājā somo'smākaṃ brāhmaṇānāṃ rājeti brāhmaṇānevāpoddharatyanādyānkaroti -