Shatapatha Brahmana · Chapter 5.4.2

taṃ vai prāñcaṃ tiṣṭhantamabhiṣiñcati / purastādbrāhmaṇo'bhiṣiñcatyadhvaryurvā yo vā'sya purohito bhavati paścāditare -

somasya tvā dyumnenābhiṣiñcāmīti / vīryeṇaitadāhāgnerbhrājaseti vīryeṇaivaitadāha sūryasya varcaseti vīryeṇaivaitadāhendrasyendriyeṇeti vīryeṇaivaitadāha kṣatrāṇāṃ kṣatrapatiredhīti rājñāmadhirāja edhītyevaitadāhāti didyūnpāhītīṣavo vai didyava iṣuvadhamevainametadatinayati tasmādāhāti didyūnpāhīti -

imaṃ devāḥ / asapatnaṃ suvadhvamitīmaṃ devā abhrātṛvyaṃ suvadhvamityevaitadāha mahate kṣatrāya mahate jyaiṣṭhyāyeti nātra tirohitamivāsti mahate jānarājyāyeti mahate janānāṃ rājyāyetyevaitadāhendrasyendriyāyeti vīryāyetyevaitadāha yadāhendrasyendriyāyetīmamamuṣya putramamuṣyai putramiti tadyadevāsya janma tata evaitadāhāsyai viśa iti yasyai viśo rājā bhavatyeṣa vo'mī rājā somo'smākaṃ brāhmaṇānāṃ rājeti tadasmā idaṃ sarvamādyaṃ karoti / brāhmaṇamevāpoddharati tasmādbrāhmaṇo'nādyaḥ soma rājā hi bhavati -

athaitamabhiṣekam / kṛṣṇaviṣāṇayā'nuvimṛṣṭe vīryaṃ vā etadapāṃ rasaḥ sambhṛto bhavati yenainametadabhiṣiñcatīdaṃ me vīryaṃ sarvamātmānamupaspṛśāditi tasmādvā 'anuvimṛṣṭe -

so'nuvimṛṣṭe / pra parvatasya vṛṣabhasya pṛṣṭhāditi yathāyaṃ parvato'tiṣṭhāvā yatha'rṣabhaḥ paśūnatiṣṭhāvaivaṃ vā eṣa idaṃ sarvamatitiṣṭhatyarvāgevāsmādidaṃ sarvaṃ bhavati yo rājasūyena yajate tasmādāha pra parvatasya vṛṣabhasya pṛṣṭhānnāvaścaranti svasica iyānāḥ tā āvavṛtrannadharāgudaktā ahiṃ budhnyamanurīyamāṇā iti -

athainamantareva śārdūlacarmaṇi viṣṇukramānkramayati / viṣṇorvikramaṇamasi viṣṇorvikrāntamasi viṣṇoḥ krāntamasītīme vai lokā viṣṇorvikramaṇaṃ viṣṇorvikrāntaṃ viṣṇoḥ krāntaṃ tadimāneva lokāntsamāruhya sarvamevedamuparyupari bhavatyarvāgevāsmādidaṃ sarvaṃ bhavati -

atha brāhmaṇasya pātre / saṃsravāntsamavanayati tadbrāhmaṇaṃ rājānamanu yaśaḥ karoti tasmādbrāhmaṇo rājānamanu yaśaḥ -

tadyo'sya putraḥ priyatamo bhavati / tasmā etatpātraṃ prayacchatīdaṃ me'yaṃ vīryaṃ putro'nusaṃtanavaditi-

atha pratiparetya gārhapatyamanvārabdhe juhoti / prajāpate na tvadetānyanyo viśvārūpāṇi pari tā babhūva yatkāmāste juhumastanno astvayamamuṣya piteti tadyaḥ putrastaṃ pitaraṃ karoti yaḥ pitā taṃ putraṃ tadenayorvīrye vyatiṣajatyasāvasya piteti tadyaḥ pitā taṃ pitaraṃ karoti yaḥ putrastaṃ putraṃ tadenayorvīrye vyatiṣajya punareva yathāyathaṃ karoti vayaṃ syāma patayo rayīṇāṃ svāhetyāśīrevaiṣaitasya karmaṇa āśiṣamevaitadāśāste -

atha ya eṣa saṃsravo'tirikto bhavati tamāgnīdhrīye juhotyatirikto vā eṣa saṃsravo bhavatyatirikta āgnīdhrīyo gārhapatye havīṃṣi śrapayantyāhavanīye juhvatyathaiṣo'tiriktaṃ tadatirikta evaitadatiriktaṃ dadhātyuttarārdhe juhotyeṣa hyetasya devasya diktasmāduttarārdhe juhoti sa juhoti rudra yatte krivi paraṃ nāma tasminhutamasyameṣṭamasi svāheti -