શતપથબ્રાહ્મણમ્ · અધ્યાય 5.4.2

તં વૈ પ્રાઞ્ચં તિષ્ઠન્તમભિષિઞ્ચતિ । પુરસ્તાદ્બ્રાહ્મણોઽભિષિઞ્ચત્યધ્વર્યુર્વા યો વાઽસ્ય પુરોહિતો ભવતિ પશ્ચાદિતરે -

સોમસ્ય ત્વા દ્યુમ્નેનાભિષિઞ્ચામીતિ । વીર્યેણૈતદાહાગ્નેર્ભ્રાજસેતિ વીર્યેણૈવૈતદાહ સૂર્યસ્ય વર્ચસેતિ વીર્યેણૈવૈતદાહેન્દ્રસ્યેન્દ્રિયેણેતિ વીર્યેણૈવૈતદાહ ક્ષત્રાણાં ક્ષત્રપતિરેધીતિ રાજ્ઞામધિરાજ એધીત્યેવૈતદાહાતિ દિદ્યૂન્પાહીતીષવો વૈ દિદ્યવ ઇષુવધમેવૈનમેતદતિનયતિ તસ્માદાહાતિ દિદ્યૂન્પાહીતિ -

ઇમં દેવાઃ । અસપત્નં સુવધ્વમિતીમં દેવા અભ્રાતૃવ્યં સુવધ્વમિત્યેવૈતદાહ મહતે ક્ષત્રાય મહતે જ્યૈષ્ઠ્યાયેતિ નાત્ર તિરોહિતમિવાસ્તિ મહતે જાનરાજ્યાયેતિ મહતે જનાનાં રાજ્યાયેત્યેવૈતદાહેન્દ્રસ્યેન્દ્રિયાયેતિ વીર્યાયેત્યેવૈતદાહ યદાહેન્દ્રસ્યેન્દ્રિયાયેતીમમમુષ્ય પુત્રમમુષ્યૈ પુત્રમિતિ તદ્યદેવાસ્ય જન્મ તત એવૈતદાહાસ્યૈ વિશ ઇતિ યસ્યૈ વિશો રાજા ભવત્યેષ વોઽમી રાજા સોમોઽસ્માકં બ્રાહ્મણાનાં રાજેતિ તદસ્મા ઇદં સર્વમાદ્યં કરોતિ । બ્રાહ્મણમેવાપોદ્ધરતિ તસ્માદ્બ્રાહ્મણોઽનાદ્યઃ સોમ રાજા હિ ભવતિ -

અથૈતમભિષેકમ્ । કૃષ્ણવિષાણયાઽનુવિમૃષ્ટે વીર્યં વા એતદપાં રસઃ સમ્ભૃતો ભવતિ યેનૈનમેતદભિષિઞ્ચતીદં મે વીર્યં સર્વમાત્માનમુપસ્પૃશાદિતિ તસ્માદ્વા ઽઅનુવિમૃષ્ટે -

સોઽનુવિમૃષ્ટે । પ્ર પર્વતસ્ય વૃષભસ્ય પૃષ્ઠાદિતિ યથાયં પર્વતોઽતિષ્ઠાવા યથઽર્ષભઃ પશૂનતિષ્ઠાવૈવં વા એષ ઇદં સર્વમતિતિષ્ઠત્યર્વાગેવાસ્માદિદં સર્વં ભવતિ યો રાજસૂયેન યજતે તસ્માદાહ પ્ર પર્વતસ્ય વૃષભસ્ય પૃષ્ઠાન્નાવશ્ચરન્તિ સ્વસિચ ઇયાનાઃ તા આવવૃત્રન્નધરાગુદક્તા અહિં બુધ્ન્યમનુરીયમાણા ઇતિ -

અથૈનમન્તરેવ શાર્દૂલચર્મણિ વિષ્ણુક્રમાન્ક્રમયતિ । વિષ્ણોર્વિક્રમણમસિ વિષ્ણોર્વિક્રાન્તમસિ વિષ્ણોઃ ક્રાન્તમસીતીમે વૈ લોકા વિષ્ણોર્વિક્રમણં વિષ્ણોર્વિક્રાન્તં વિષ્ણોઃ ક્રાન્તં તદિમાનેવ લોકાન્ત્સમારુહ્ય સર્વમેવેદમુપર્યુપરિ ભવત્યર્વાગેવાસ્માદિદં સર્વં ભવતિ -

અથ બ્રાહ્મણસ્ય પાત્રે । સંસ્રવાન્ત્સમવનયતિ તદ્બ્રાહ્મણં રાજાનમનુ યશઃ કરોતિ તસ્માદ્બ્રાહ્મણો રાજાનમનુ યશઃ -

તદ્યોઽસ્ય પુત્રઃ પ્રિયતમો ભવતિ । તસ્મા એતત્પાત્રં પ્રયચ્છતીદં મેઽયં વીર્યં પુત્રોઽનુસંતનવદિતિ-

અથ પ્રતિપરેત્ય ગાર્હપત્યમન્વારબ્ધે જુહોતિ । પ્રજાપતે ન ત્વદેતાન્યન્યો વિશ્વારૂપાણિ પરિ તા બભૂવ યત્કામાસ્તે જુહુમસ્તન્નો અસ્ત્વયમમુષ્ય પિતેતિ તદ્યઃ પુત્રસ્તં પિતરં કરોતિ યઃ પિતા તં પુત્રં તદેનયોર્વીર્યે વ્યતિષજત્યસાવસ્ય પિતેતિ તદ્યઃ પિતા તં પિતરં કરોતિ યઃ પુત્રસ્તં પુત્રં તદેનયોર્વીર્યે વ્યતિષજ્ય પુનરેવ યથાયથં કરોતિ વયં સ્યામ પતયો રયીણાં સ્વાહેત્યાશીરેવૈષૈતસ્ય કર્મણ આશિષમેવૈતદાશાસ્તે -

અથ ય એષ સંસ્રવોઽતિરિક્તો ભવતિ તમાગ્નીધ્રીયે જુહોત્યતિરિક્તો વા એષ સંસ્રવો ભવત્યતિરિક્ત આગ્નીધ્રીયો ગાર્હપત્યે હવીંષિ શ્રપયન્ત્યાહવનીયે જુહ્વત્યથૈષોઽતિરિક્તં તદતિરિક્ત એવૈતદતિરિક્તં દધાત્યુત્તરાર્ધે જુહોત્યેષ હ્યેતસ્ય દેવસ્ય દિક્તસ્માદુત્તરાર્ધે જુહોતિ સ જુહોતિ રુદ્ર યત્તે ક્રિવિ પરં નામ તસ્મિન્હુતમસ્યમેષ્ટમસિ સ્વાહેતિ -